Почитувани,
Со длабока болка и тага ја примив веста за смртта на ценетиот професор и новинар, Томе Груевски. Во овие тажни мигови не постојат зборови со кои може да се надомести загубата и тагата, но дозволете ми да го искажам моето најдлабоко сочувство до семејството, колегите и до целата македонска јавност.
Професорот Томе Груевски беше меѓу пионерите со своите трудови од областа на комуникологијата, теоријата на новинарство и односи со јавноста. Со повеќе од триесетина објавени книги и стотина научни трудови Груевски го задолжи македонското новинарство и публицистика. Неговата научна и професорска дејност остави неизбришлива трага во академските кругови.
Својата длабока посветеност и љубов кон новинарството успешно ја пренесуваше и на своите студенти на Правниот факултет при Универзитетот Св. Кирил и Методиј во Скопје , како и на универзитетот Св. Климент Охридски во Битола.
Со смртта на професорот Томе Груевски, Република Северна Македонија. загуби врвен ерудит, посветен професионалец и неуморно новинарско перо.
Нека почива во мир!
Стево Пендаровски