News
Sredba_Forplay_01
Средба на претседателот Иванов со организаторите и уметниците кои ќе го отворат фестивалот „Охридско лето“
Tuesday, 11 July 2017 14:43
There are no translations available.

Претседателот на Република Македонија, д-р Ѓорге Иванов, денеска во „Вила Билјана" во Охрид ги прими организаторите на фестивалот „Охридско лето", и членовите на светски познатиот џез-квартетот „Форплеј“, од Соединетите Американски Држави, кои во придружба на оркестарот на Македонската филхармонија, ќе настапат на отворањето на годинашното 57. издание на „Охридско лето“.

Во пресрет на утрешното отворање на „Охридско лето", македонскиот претседател изрази задоволство од годинешната програма, посочувајќи дека овој фестивал дава исклучителен придонес за промовирање на македонската култура во светот, како и на најзначајните светски културни достигнувања пред македонската публика.

Претседателот Иванов го поздрави учеството на американскиот смут џез-квартет на „Охридско лето“, и им посака успешен настап на утрешното отворање на фестивалот. Во разговорот со членовите на „Форплеј“,  македонскиот претседател посочи дека  џезот со својата импровизација, креативност и инструментална посебност, е универзален јазик кој ги поврзува луѓето и кој секогаш оди со стремежот кон слобода и чување на слободата. Членовите на „Форплеј“ се заблагодарија за средбата со македонскиот претседател  и изразија особено задоволство поради тоа што Претседателот е голем љубител и поддржувач на џез-музиката.

На средбата, организаторите на фестивалот го информираа претседателот Иванов за текот на подготовките и за новиот, збогатен концепт на фестивалот „Охридско Лето" во кој се воведени повеќе музички жанрови и содржини, но сепак преовладува сериозната музика како негов главен белег. Во програмата на 57. издание на „Охридско лето“ се содржани над 40 музички настапи на домашни и странски уметници, 10 театарски претстави и повеќе изложби. Република Македонија ќе биде домаќин на над 300 врвни уметници, изведувачи и автори од 20 земји од целиот свет, од Кина, Индонезија, САД, Холандија, Италија, Руската Федерација, Австрија, Канада, Полска, Шпанија, Грција, Црна Гора, Хрватска, Турција, Бугарија, Романија, Данска, Ерменија и други земји.

Манифестацијата „Охридско лето" традиционално се одржува под покровителство на Претседателот на Република Македонија.
Sredba_Forplay_02

dubrovnik_forum0
Иванов: Интеграцијата на Балканот е клучна за безбедноста на ЕУ
Saturday, 01 July 2017 00:00
There are no translations available.

Европската Унија треба да го забрза интегративниот процес како витален елемент и дел од нејзината долгорочна стратегија за безбедност. Балканот секогаш бил крстосница на Европа, а стабилни земји значат и подобра заштита на нејзините југоисточни граници, порача претседателот на Република Македонија, д-р Ѓорге Иванов на „Дубровник форум 2017", што се одржува на тема „Јадранско-медитеранска соработка и безбедноста на Југоисточна Европа".

Претседателот Иванов посочи дека најголемата закана за европската безбедност допрва доаѓа и итно е потребно да ѝ се посвети внимание, посочувајќи на илјадниците странски борци од балканските земји кои учествуваат во борбите на Блискиот Исток.

- ЕУ и НАТО мора да испланираат превентивни мерки против повратниците насочени не само кон нивните земји членки, туку и кон неинтегрираниот дел од Балканот, истакна шефот на државата.

Претседателот Иванов истакна дека интеграцијата на Балканот како целина не е само важна, туку е неопходна за долгорочен мир, стабилност и безбедност во регионот.

Интеграцијата на балканските земји, рече Иванов, во Европската Унија е најважната алатка за превенирање од религиозен екстремизам. - Со тоа би се гарантирале надеж и напредок во регионот, кој веќе покажува знаци на разочарување и очај. Европскиот сон треба да стане реалност за сите и тоа што е можно побргу, порача Претседателот.

Балканските земји, посочи Иванов, кои не се сè уште интегрирани во Европската унија, се потенцијален Тројански коњ на портите на Европа.

- Неинтегрираните земји од Балканот претставуваат безбедносен јаз во еден многу ранлив дел на Европа. Балканот како регион веќе има сопствени предизвици кои многу лесно може да предизвикаат нестабилност дури и без надворешно влијание: етничка и религиозна разноликост, историски судири, неодамнешни конфликти, невработеност, сиромаштија, корупција и организиран криминал. Сето ова, во комбинација со постојано присутниот национализам, етноцентризам, ксенофобија, а од неодамна и исламофобија, покажува дека Балканот ги има сите потребни состојки, кои терористичките групи може потенцијално да ги искористат за да ја подријат Европа посредно и од внатре, истакна претседателот Иванов во обраќањето на „ Дубровник форумот".

Регион, додаде Иванов, кој се соочува со предизвици кои од своја страна може да водат кон нестабилност и нефункционални држави, може многу лесно да стане прибежиште за терористи, база за понатамошни операции, транзитни кампови за обука, регрутирање, индоктринација и инфилтрирање на европско тло.

Оттука Претседателот апелираше на потребата од долгорочни регионални политики за безбедност, како прв чекор кон создавање на стабилна и безбедна средина.

Претседателот Иванов вчера учествуваше на Самитот на шефови на држави и влади на земјите - учеснички во Процесот за соработка во Југоисточна Европа и оствари билатерална средба со претседателот на Хрватска, г-ѓа Колинда Грабар Китаровиќ.

dubrovnik_forum

PSJIE
Иванов на ПСЈИЕ: Потребна е нова енергија во регионалната соработка
Friday, 30 June 2017 00:00
There are no translations available.

Европската Унија да ја врати вербата и перспективата за цел регион, но не само декларативно и само со зборови, туку и со дела, конкретни чекори и акции, порача претседателот на Република Македонија, Ѓорге Иванов, во своето обраќање на Самитот на шефови на држави и влади на земјите-учеснички, на Процесот за соработка во Југоисточна Европа, што се одржува во Дубровник, Република Хрватска.

„Ако Европската Унија која е единствена и највлијателна мобилизирачка и трансформирачка сила, не ни ја направи иднината опиплива и реална, немам дилема дека ние ќе се враќаме во минатото и работите ќе се влошуваат. Паралелно со овој Процес треба да биде процесот на градење доверба, солидарност, соработка и поддршка во ЈИЕ, билатерално или преку регионалните механизми кои ги имаме, вклучително и ПСЈИЕ. Потребна е нова енергија", истакна претседателот Иванов.

Македонскиот претседател во својот говор го посочи и случајот со евроинтегративниот процес на Македонија како типичен пример за досегашен погрешен и штетен пристап, и побара поголема меѓусебна поддршка за побрза интеграција во ЕУ и НАТО.

„Наместо да зборуваме за конкретни проекти кои ќе бидат од корист за нашите народи, ние меѓусебно се обвинуваме. Наместо да најдеме креативни начини за да им помогнеме на земјите од регионот за нивна побрза интеграција во ЕУ и во НАТО, претпочитаме да наоѓаме креативни начини како да се блокира европскиот пат на соседите", рече претседателот Иванов, посочувајќи дека острата реторика од страна на некои политичари имала негативно влијание и ја зајакна тензијата помеѓу земјите во регионот.

Шефот на државата потенцираше дека земјите од регионот мора да ја вратат меѓусебната доверба, да имаат политичка волја и искрена соработка заснована врзконкретни проекти, со цел справување со реалните и непосредни предизвици во регионот. „Потребно ни е стратегиско свртување кон себе, кон регионот, во услови на глобална нестабилност. Но, повторно регионот има потреба од поддршка од ЕУ, тоа стратегиско свртување да го направиме суштинско и одржливо. Да не дозволиме стравот и недовербата да ни ја украдат иднината и перспективата", рече македонскиот претседател.

Тој исто така укажа на сериозните проекции и очекувања за нови мигрантски бранови од африканските земји, поради кои е можно регионот да се соочи со сериозни безбедносни недостатоци, доколку не се зголеми нивото на регионална соработка помеѓу агенциите за разузнавање и силите за безбедност.

Иванов ја потенцираше и потребата од инфраструктурни и транспортни проекти со цел подобро поврзување на регионот и подобрување на животот на граѓаните. „Овие проекти може да отворат илјадници работни места за младата генерација, ќе го олеснат транспортот и ќе донесат надеж на граѓаните од нашиот регион дека иднината која ја посакуваат може да стане реалност и без да ги напуштат нивните земји", порача македонскиот претседател.

Самитот на ПСЈИЕ финишираше со усвојувањето на заедничката декларација во која лидерите од регионот ја реафирмираа потребата од продлабочување на регионалната соработка меѓу земјите од Југоисточна Европа, во насока на понатамошен развој на просперитетот и стабилноста на регионот. Заедничка декларација ги опфаќа заложбите на земјите во однос на целосна европската и евроатланската интеграција на регионот, ефикасно справување со безбедносните предизвици, унапредување на економската соработка, растот и развојот, како и потребите од парламентарната соработка на државите – учеснички.

„Убедени сме дека европската интеграција нема да биде целосна додека сите земји од овој регион не станат дел од Унијата. Одржувањето на моментумот на проширување и континуираната посветеност на реформите, е клучно за кредибилитетот на политиката на проширување", стои во заедничката декларација на земјите – учеснички на ПСЈИЕ. Во однос на безбедносните предизвици во декларацијата се наведува „Ние одлучивме да ги вложиме нашите најдобри напори во градењето одржлива мрежа за соработка и размена на информации со цел ефикасно да се бориме со заканите од тероризам и радикализација во регионот". Со цел соодветен одговор на предизвиците од мигрантската криза се посочува дека е потребен заеднички пристап, заснован на соработка и дијалог помеѓу сите учесници на ПСЈИЕ.

Претседателот Иванов попладнево ќе оствари билатерална средба со хрватската претседателка, г-ѓа Колинда Грабар-Китаровиќ

На самитот на ПСЈИЕ учествуваат и словенечкиот претседател, г. Борут Пахор, црногорскиот претседател, г. Филип Вујановиќ, претседателот на Република Србија г. Александар Вучиќ, претседателот на Република Косово, г. Хашим Тачи, претседателот на Владата на Република Бугарија, г. Бојко Борисов.

Со Самитот во Дубровник завршува хрватското претседавање со ПСЈИЕ. Од јули 2017 претседавањето со регионалната иницијатива, кое е ротирачко меѓу сите земји-членки, го преземе Република Словенија.

PSJIE1

IzjavaDubrovnik
Иванов: Регионот да се сврти кон себе и да работиме на конкретни проекти
Friday, 30 June 2017 00:00
There are no translations available.

Актуелните состојби во нашиот регион и опкружувањето бараат Процесот за соработка во Југоисточна Европа да понуди решенија за предизвиците со кои се соочуваме, изјави претседателот на Република Македонија, д-р Ѓорге Иванов, кој денеска учествува на Самитот на шефови на држави и влади на ПСЈИЕ што се одржува во Дубровник.

- Секоја земја треба да се сврти кон себе, да наоѓа решенија за своите предизвици и на тој начин да придонесува за стабилноста на целиот регион, изјави македонскиот претседател.

Иванов порача дека ПСЈИЕ треба да се фокусира на конкретни проекти и да даде соодветен одговор на прашањата кои го засегаат регионот. Посочувајќи ги заканите од илегална миграција, Иванов изјави дека земјите од нашиот регион мора преку меѓусебна доверба да го зајакнат нивото на комуникација, соработка и размена на податоци за да можат соодветно да одговорат на безбедносните предизвици.

На овие теми, македонскиот претседател попладнево разговарал и на билатералната средба со хрватската претседателка, г-ѓа Колинда Грабар Китаровиќ.

prm_kolindaИванов истакна дека е потребно регионот да се интегрира и ја потенцираше потребата од инфраструктурни проекти, енергетско поврзување и поврзување на младите луѓе од регионот.

-Младите едноставно имаат потреба за поблиска комуникација и едноставно да ги сфатат предизвиците за да можат да живеат со нив, бидејќи целта на сите ни е тие да останат во нашиот регион, а не да ги напуштаат земјите, изјави македонскиот претседател. Тоа е општ проблем во целиот регион, додаде Иванов, регионот останува без најкреативните, најспособните млади луѓе и затоа акцентот во иднина треба да биде кон енергетско поврзување, инфраструктурни проекти и работа со младите.

Иванов изрази очекување дека завршната декларација од Самитот, нема да остане само на хартија, и истакна дека секоја земја од ПСЈИЕ мора во својот домен да ги реализира овие заложби.

Претседателот Иванов денеска се обрати на пленарна сесија на Самитот на земјите - учеснички во ПСЈИЕ. Утре, македонскиот претседател ќе учествува на „Дубровник форум 2017", што се одржува на тема „Јадранско-медитеранска соработка и безбедноста на Југоисточна Европа".

prm_vucik_sredba_1
Иванов-Вучиќ: Отворените прашања да ги решаваме со дијалог
Saturday, 24 June 2017 10:30
There are no translations available.

Сите прашања меѓу двете земји околу кои постојат различни мислења треба да се решаваат зеднички преку дијалог. Да не дозволуваме тие прашања да влијаат на односите меѓу двете држави, затоа што сепак, ние сме соседи и што и да се случи остануваме да живееме на овој простор и мора како добри соседи да создаваме добри практики за идните поколенија, порача претседателот на Република Македонија, д-р Ѓорге Иванов, по денешната билатерална средба со српскиот претседател, Александар Вучиќ во Белград.

Претседателот Иванов изјави дека со неговиот српски колега имале конструктивна средба и биле согласни дека отворените прашања не треба да се политизираат.

„Сите отворени прашања мора да ги разгледуваме преку дијалог и надлежните институции да наоѓаат решенија. Kаде настанувааат проблемите, таму да се наоѓаат и решенијата.  Да не ги политизираме  и да не им даваме посебно значење на прашањата кои се во надлежност на институциите", изјави претседателот Иванов.

На прашањето дали двајцата претседатели разговарале за промовирање на идејата за заеднички регионален пазар, претседателот Иванов изјави дека тоа ќе биде во надлежноста на двете Влади.

izjava_bELGRAD3„Тоа е во интерес на целиот регион. Ние во минатото сме имале заеднички пазар, ги знаеме бенефитите од сето тоа, и која е користа за нашето стопанство, така што се надевам дека владите од регионот, како што Брдо Бриони процесот на ниво претседателите ги промовира тие идеи за зближување и отварање на просторот, така и премиерите на нивната идна средба во Трст сигурно конкретно ќе разговараат за  реализација на таа иницијатива", изјави македонскиот претседател.

Претседателот Иванов изјави дека Македонија и Србија како две соседни земји своите односи мора да ги гаат во духот на пријателството и меѓусебна соработка. Претседателот  Иванов додаде дека на средбата двајцата претседатели раазговарале и за можностите за продлабочување на економската и трговската соработка, како и за прашања од доменот на културата.

„Разговаравме и за прашања од доменот на културата кои мора да ги регулираме со одбележувања на настани, како што беше одбележувањето на 70-годишнината од доаѓањето на Македонците во Србија што го одбележавме заедно со претходникот на  Вучиќ. Тоа  беше еден чин на почит. Тие ни посветија внимание и нашите Македонци беа навистина задоволни. Таквите настани ќе продолжиме и во иднина да ги одбележуваме, бидејќи тие ги зближуваат двата народи и придонесуваат кон доверба на двете држави",изјави претседателот Иванов.

Политичкиот дијалог меѓу двете земји се очекува да продолжи со идна посета на претседателот Вучиќ на Република Македонија.

Претседателот Иванов утрово оствари и неформална средба со досегашниот српски претседател Томислав Николиќ.

Македонскиот претседател вчеравечер во „Палата Србија" присуствуваше на свеченоста по повод инаугурацијата на новиот српски претседател Александар Вучиќ.

 
Start < Prev 1 2 3 4 5 6 7 8 9 10 Next > End
Page 1 of 170