Говори и обраќања
ip1
Обраќање по повод доделувањето на признанието „Инженерски прстен 2016“
Понеделник, 20 Јуни 2016

Почитувани студенти,
Почитувани гости,
Дами и господа,

„Секоја доволно напредна технологија е еднаква на магија", рече големиот Артур Кларк. Но технологијата за која зборува Кларк не е случајност туку е резултат на темелно образование, многу труд, макотрпна работа, креативност и посветеност. Вие како инженери, како најдобри студенти од техничките факултети ја имате моќта да го менувате светот и реалноста. Тоа е несомнено голема одговорност, храброст, истрајност но и етичка големина.

Интензивирањето на инвестирањето во инженерското образование полека но сигурно почнува да ги покажува очекуваните резултати. Новоформираните факултети од инженерските струки веќе ги продуцираа првите кадри кои ќе бидат носители на инженерството во нашата држава. Вие сте дел од тие кадри кои ќе треба и практично да докажат дека вложувањето во инженерското образование е висински потег. Верувам дека допрва кога ќе започнете своето знаење да го користите во професионалната кариера до израз ќе дојдат сите ваши квалитети и акумулирано знаење.

Драги студенти,

Како Претседател на Република Македонија и како универзитетски професор би сакал да ви пренесам една порака која ја повторувам на сите генерации добитници на инженерскиот прстен. Немојте никогаш да престанете да се усовршувате и да ги применувате своите знаења и креативни потенцијали. Нека не постои ограничување кое не може да го надминете.

Денеска, кога се наоѓаме над нашето езеро, сакам да ве охрабрам да запливате во океанот на технологијата. Таму, во глобалниот свет на постојани иновации и технолошки решенија вие ќе се натпреварувате со најпосветените, најработливите, најкреативните. Во тој натпревар вие ќе стекнете искуство и самодоверба. Вербата во себе, волјата, посветеноста ќе ви помогнат да го најдете своето место во инженерските науки за да придонесете за себе, но и за својата заедница, за својата држава.

Имајќи предвид дека веќе две години сте вмрежени во Алумни-асоцијацијата на добитниците на „Инженерски прстен" ве поттикнувам да го користете искуството од постарите колеги, да си помагате и да се мотивирате.

Од се срце ви посакувам да бидете предводници на човечкиот потенцијал кој ќе придонесе во развојот на нашата земја. Дозволете ми на самиот крај да ви честитам вам, добитници на годинешното признание „Инженерски прстен", на вашите професори, но и на вашите родители.

Ви благодарам.

ip2

angelova
Обраќање по повод доделувањето на признанието „Најдобар млад научник“ за 2015 година на Михаела Ангелова
Четврток, 16 Јуни 2016

Почитувани присутни,
Дами и господа,
Драги пријатели,

Науката е имагинативна авантура на умот кој во светот на мистеријата трага по вистината", рече британскиот хемичар и нобеловец Норман Хиншелвуд.

Ако науката е авантура на умот, тогаш научниците се луѓе кои во своите истражувања и научни авантури се водени од љубопитност, храброст и дисциплина. Откривајќи ги научните вистини, тие во голема мера се заслужни за светот во кој живееме, технологиите што ги користиме, знаењата што ги применуваме, а без кои напредокот би бил незамислив.

И Република Македонија, која годинава треба да прославува четврт век независност, има свои научници кои се вклучени во глобалната потрага по вистината.

Имагинативноста, креативноста, хуманоста и вистинољубивоста на нашите научници веќе се вткаени во ризницата на знаењето на човечката цивилизација. Не се сомневам дека македонската наука допрва ќе го задолжува светот.

Денес, како претседател на Република Македонија, но и како универзитетски професор го имам задоволството, по шести пат да доделам признание на еден таков трагаач по научната вистина, д-р Михаела Ангелова.

Драги пријатели,

Секоја година имаме пријавени кандидати со високи достигнувања кои ѝ предизвикуваат тешкотии на комисијата за да го избере најдобриот меѓу најдобрите. Искрено им благодарам на сите нејзини членови за ангажманот во изборот на носителот на признанието „Најдобар млад научник". Особена благодарност и до рецензентите без чиј несебичен придонес целиот процес на селекција ќе беше невозможен. Заедно со комисијата завршија голема работа.

Убеден сум дека со изборот на најдобриот млад научник придонесуваме кон поттикнувањето на интересот за младата македонска научна мисла.

Креативноста и постигнувањата на нашите млади научници се доказ дека имаме голем потенцијал во сите научни области. Оттука, треба да направиме сè, младите научници да ги заземат своите места во образованието, институциите, компаниите во кои ќе можат најмногу да придонесат со својата научна работа.

Дозволете на крајот, на д-р Михаела Ангелова, но и на сите други млади научници, кои беa дел од конкурсот за избор на „Најдобар млад научник" за 2015, да им посакам многу успех и долгогодишна плодна научна работа.

Ви благодарам.

PRM_ZEMAN_FORUM_2
Обраќање на претседателот Иванов на македонско - чешкиот бизнис форум во Охрид
Петок, 10 Јуни 2016

Почитуван Претседателе Земан,
Почитувани дами и господа,
Почитувани стопанственици,

Со особено задоволство ви се обраќам денес на овој значаен Бизнис форум, чија цел е унапредување на економската соработка меѓу нашите две земји. Република Македонија и Чешката Република имаат традиционално добри пријателски односи, силна историска и културна поврзаност. Граѓаните на двете земји, бизнис заедниците на двете земји, се тие кои треба да профитираат и да ги искористат овие поволни односи. Вчера со претседателот Земан заемно констатиравме дека фокусот на нашето внимание во наредниот период треба да се сконцентрира на интензивирање на економската соработка.

Почитувани присутни,

Од информациите со кои располагам, како особено значајна за двете држави се смета соработката во енергетскиот сектор, а особено обновливите ресурси, развојот на малите хидроцентрали, ветерните електрани, сончевата енергија, геотермалните технологии, рударството. Посебен интерес постои и во областа на металната и електро-индустријата, во автомобилската индустрија за поврзување на македонските производители со чешки компании, хемиската индустрија, животната средина, земјоделството и прехранбената индустрија.

Владата на Република Македонија континуирано работи на подобрување на бизнис климата како и на олеснување на условите за инвестирање. Нашата стратешка географска положба, како и можноста за слободна трговија со земјите од поширокиот регион, овозможува да бидеме атрактивни за компании кои се заинтересирани да оперираат во регионот.

За жал нивото на чешки инвестиции во Македонија е многу мало, а поволностите кои ние ги нудиме за соработка и инвестиции на Вашите компании ќе ви ги претстави Заменик министерот за економија, г. Христијан Делев.

Почитуван Претседателе,

За крај, да нема дилема, јас како претседател на Република Македонија, а убеден сум дека и мојот колега и пријател, претседателот Земан, во рамките на нашите можности ќе ја дадеме нашата поддршка и помош. Впрочем не случајно сме денес тука, да ве охрабриме, и да ве поттикнеме да ги продолжите контактите, да го најдете интересот за соработка.
Ви посакувам успешна работа.

 

prm_izjavapomiluvanje
Обраќање на претседателот на Република Македонија, д-р Ѓорге Иванов
Петок, 27 Мај 2016

Почитувани граѓани на Република Македонија,

На 12 ти април донесов одлука за помилување – ослободување од гонење без спроведување на постапка, за поголем број лица, согласно Уставот и Законот за помилување. Одлука за која, како тогаш, така и сега сметам дека ја донесов исклучиво во интерес на државата и на граѓаните на Република Македонија.

Многумина, за жал, не ја разбраа оваа идеја, или можеби не сакаа да ја разберат. Дебатите и во домашната и во меѓународната јавност отидоа во друг правец. Бев обвинуван дека сум сакал да ги заштитам политичарите, дека сум креирал селективна правда, дека политичарите се над законите.

Најсовесно изјавувам дека немав таква намера.

За разлика од 12 април, денеска имаме нова реалност во Македонија. Во услови на надворешни закани и безбедносни ризици, имаме функционални институции, кои можат да се справат со предизвиците од мигрантската криза, особено во пресрет на најавите за новиот бран на бегалци и мигранти.

Почитувани сограѓани,

Денес донесов одлука да поништам дел од одлуките, и без помилуваните лица да го побараат тоа од мене.

Во согласност со Законот за дополнување на Законот за помилување, донесов одлука за поништување на одлуките за помилување – ослободување од гонење без спроведување на постапка за сите политички експонирани лица, вкупно дваесет и двајца. Сите други лица, согласно законските измени имаат можност да поднесат лични барања за поништување на нивните одлуки за помилување.

Не сакам веќе никој да има сомнеж. Ниту еден политичар не е над законот. Ниту еден политичар не е недопирлив. Напротив, секој ќе одговара за своите постапки.

Сакам да потенцирам дека искрено верував и сѐ уште верувам дека одлуката за помилување беше најдобрата можност за излез од политичката криза. Убеден сум дека без враќање на меѓусебната доверба и без помирување во која било форма, оваа криза ќе трае уште долго, што не е од интерес ниту за граѓаните, ниту за државата.

Сакам да порачам, дека како и досега, така и во иднина, секогаш сум подготвен да помогнам за надминување на кризата.

Ви благодарам.

PRM_Obrakjanje_Humanitaren_samit_Istanbul
Обраќање на претседателот Иванов на Светскиот хуманитарен самит во Истанбул
Понеделник, 23 Мај 2016

Почитувани присутни,
Дами и господа,
Драги пријатели,

Живееме во исклучително тегобно, мачно и турбулентно време. Човештвото е заложник на два меѓусебно преплетени процеса.
Сè уште се обидуваме да се помириме со мрачното наследство од 20-тиот убиствен век во кој околу 300 милиони луѓе настрадаа во војни, политички репресалии и меѓуетничко и меѓуверско насилство. Ниту 21-от век не е лишен од насилства и од конфликти.

Придобивките на глобализацијата се злоупотребуваат за глобализирање на ксенофобијата, омразата и хаосот.

Од друга страна, се поставивме за господари на природата, без да умееме да господариме со сопствената алчност. Го нарушивме кревкиот климатски баланс, рамнотежата меѓу човештвото и природата, и ја загрозивме иднината на нашите потомци.

Светскиот хуманитарен самит се одржува во време кога чашата на човечкото страдање повторно почнува да се прелева. Неопходно е да ги научиме лекциите од 20-от век за да не ги повториме.

Дами и господа,

Република Македонија, беше прв пример на успешна превентивна дипломатија на Обединетите нации. Од 1992 до 1999-та, најпрво УНПРОФОР, а потоа УНПРЕДЕП спречија прелевање на конфликтите од поранешна Југославија во Македонија.

Ценети екселенции,

Пред нас има две опции и од нашата генерација зависи во која насока ќе се движиме.

Првата опција е да бидеме проактивни и да се обидеме од оваа криза на човештвото да го извлечеме најдоброто. Но, за тоа ни се неопходни храбри чекори:

Прво: Јасни правила на играта. Зборуваме за ерозија на почитувањето на човековите права и хуманитарното право, а дозволуваме другите сегменти на меѓународното право да бидат игнорирани.

Повикуваме на почитување на Меѓународниот кривичен суд, а ги занемаруваме пресудите на Меѓународниот суд на правдата. Ќе ве потсетам дека веќе 5 години Македонија чека меѓународната заедница да ја испочитува пресудата на врвниот светски правен авторитет – Меѓународниот суд на правдата.

Двојните стандарди го суспендираат меѓународното право и оставаат простор за анархичност во меѓународните односи. Алтернативата на меѓународното право и меѓународниот поредок е глобалниот хаос и глобалниот непоредок.

Како второ, потребно ни е економски праведен систем.

Како трето, потребно инвестирање во обновата на разорените општества.

Четврто, потребно ни е помирување.

Драги пријатели,

Имаме и втора опција, а тоа е да продолжиме како и досега. Но, тогаш постои опасност меѓународниот систем за одржлив и инклузивен економски развој да се заглави во бирократските лавиринти и да стане заложник на борбата за моќ и влијание.

Затоа денес неопходно е храбро политичко лидерство, кое нема да биде паралелизирано од страв. Овој самит и оваа агенда ни помагаат да направиме храбри чекори кон создавање свет во кој ќе биде обновена вербата во човештвото и во солидарноста, во кој ќе се почитуваат и заштитуваат човековите права и правото на човечкото достоинство.

Ви благодарам.
PRM_Obrakjanje_Humanitaren_samit_Istanbul_2

orden
Доделувањe „Орден за воени заслуги“ на Единицата за специјални задачи и Единицата за брзо распоредување и „Медал за храброст“ на загинатите припадници на МВР на 9 мај 2015 г.
Четврток, 05 Мај 2016

Почитувани граѓани на Република Македонија,
Почитувани припадници на безбедносните сили,
Почитувани членови на семејствата на македонските херои,
Драги пријатели,

Пред малку ја чувме химната на Република Македонија во која ја воспеваме слободата. Тоа е слобода кон која се стремеле нашите предци, за која се бореле нашите илинденци и за која се избориле нашите партизани и АСНОМ-ци. Тоа е слобода во која живееме веќе четврт век. Но, историјата нè потсетува дека слободата не е стекната еднаш засекогаш и дека секојдневно се брани и чува. Најревносни чувари на слободата на Македонија се нашите безбедносни сили.

Денеска се собравме за да им се заблагодариме за сето она што го прават за Македонија во овие тешки времиња исполнети со предизвици, закани и ризици.

Во годината кога требаше да славиме четврт век независност, станавме нација заразена со сомнежи. Се шири недоверба во институциите и страв меѓу граѓаните. Македонското општество е поделено по речиси сите основи. Длабоката политичка криза го намали безбедносниот имунитет на Република Македонија. Се соочуваме со постојани и директни закани по националната безбедност и со опасност од загрозување на јавната безбедност. За заканата од илегалната миграција е активиран кризниот менаџмент, а нашите институции функционираат во кризна состојба. Со други зборови, по којзнае кој пат, Македонија се соочува со тегоби и маки.

orden011Почитувани полициски службеници,

Во овој период вие минувате низ троен предизвик. Врз вашите плеќи, вие и вашите браќа по оружје од Армијата на Република Македонија, ја носите тежината на мигрантската криза и насилството на границата. Се соочувате со безбедносните закани од тероризмот и од насилниот екстремизам, насилните акти во градовите и последиците од политичката криза.

Распоредени на нашата јужна граница и на подрачјата зафатени со криза, вие, заедно со Армијата, го чувате суверенитетот на Република Македонија и ја штитите Европа од заканата од илегалната миграција.

Имате тешка улога достојна за историјата. Вие сте чувари на портите за влез во Европа. Секојдевно се соочувате со постојани насилни акти и напади, но и организирано насилство од некои мигранти и нивните помагачи. Но, не потклекнавте ниту за миг. Извршувате задачи во сложени услови за работа. Професионално одговарате на предизвиците. Вашиот одговор е препознатлив во Европа. Тој е гаранција за одлучноста на Македонија да го запре протокот на илегалната миграција и да ги намали безбедносните ризици.

Чувајќи го јавниот ред и мир низ нашата татковина, вие спречувате насилно уривање на државните институции, го заштитувате животот, личната сигурност и имотот на граѓаните. Но, и на овој план се соочувате со предизвици.

Знам дека нема ништо потешко од тоа да се биде напаѓан од своите сограѓани, за чиј мир и безбедност го ризикувате животот.
Знам и дека вашите семејства секојдневно со страв ве испраќаат и со солзи ве дочекуваат.
Знам дека вие и вашите најблиски сте изложени на притисок од дел од јавноста.
Знам дека секој од овие предизвици е проверка за вашата издржливост.
Но, во ниту еден момент не се сомневам во вашата висока лојалност кон државата. А, државата се институциите и граѓаните, независно од нивната етничка, јазична, верска, политичка или која било друга припадност.

Вие сте еден од столбовите на нашата држава за заштита на националната безбедност.

Вие сте доказ дека институциите функционираат и професионално и одговорно си ја вршат работата, и тоа во исклучително сложени услови.

orden1Почитувани присутни,

Како претседател и врховен командант често се соочувам со тешки одлуки. Но, за мене нема потешка одлука од посмртното одликување на припадници на безбедносните сили.

На 9 мај, на Денот на победата и Денот на Европа, бранејќи го нашето осумзрачно сонце, осум херои ги положија животите.

Тажно е што наместо да им се оддаде должна почит, во јавноста се ширеа разни шпекулации, обвинувања и коментари во кои припадниците на полицијата беа омаловажувани и понижувани.

Но, времето, како и секогаш, е најправеден судија. Се покажа дека осумте херои не ги положија своите животи залудно. Со својата жртва тие спречија дестабилизација на државата и конфликт што можеше да има несогледливи последици за мирот, безбедноста и стабилноста на Република Македонија и поширокиот регион. Беа спречени терористички напади и крвопролевања од големи размери. Без професионалниот ангажман и пожртвуваноста на Единицата за специјални задачи и Единицата за брзо распоредување, постоеше постојана и директна закана во наредните денови по улиците на повеќе градови низ Македонија да се лее крв на невини цивили. Благодарение на храброста и на одлучноста на нашите безбедносни сили беше избегнато светот и Македонија да се ужаснуваат од крвави сцени.

Времето е и најдобар учител. Сите ние треба да ја научиме лекцијата од Куманово што е многу скапо платена. А, тоа е дека поделбите и раздорот нè прават послаби и поранливи. Пожртвуваноста на нашите херои треба да биде предупредување до сите учесници во политичкиот живот на Македонија, но и фактор на обединување.

Крајно време е да го отфрлиме духот на поделбите, нетрпеливоста и омразата кон политичкиот противник и конечно да се помириме и да се сплотиме околу државниот интерес. Оттука, нивната жртва е влог кон иднината и помирувањето на Македонија.

Со овие медали за храброст ние нема да ги вратиме назад.
Нема да ги избришеме солзите на нивните родители, сопруги, деца...
Нема да ја исцелиме болката на нивните пријатели и другари.
Нема да ја вратиме радоста во нивните домови.
Но, со овој чин јасно покажуваме дека Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ не се заборавени. Нивната жртва не беше залудна. Напротив. Тие загинаа за нашите деца да имаат мирен сон, но и за побезбеден живот на нашите сограѓани, а со тоа и за заштита на националната безбедност на Република Македонија.

orden02Ценети присутни,

На почетокот ја спомнав државната химна. Но, покрај државната, има и една друга химна, со различен текст и музика, но со иста порака и суштина. Во неа се вели:

„Македонија земјо моја најмила, секогаш и секаде ние први одиме.
За тебе живот даваме, Македонијо. Секогаш и секаде ние ќе се бориме."

Верувам дека сите вие многу добро ја знаете оваа химна на Единицата за брзо распоредување. Во неа е врежана цената на слободата што ја живееме. А таа цена секогаш и секаде ја плаќаат храбрите и посветени припадници на безбедносните сили. И кога ја чуваат границата, и кога го обезбедуваат јавниот ред и мир, без разлика дали живееме во период на хармонија или предизвици. Секогаш и секаде, чесно и професионално, тие се борат за Македонија и за македонските граѓани.

Како претседател на Република Македонија и врховен командант, овие медали ги доделувам како израз на благодарност на македонските граѓани кон нивните херои.

Ордените за воени заслуги за Единицата за специјални задачи и за Единицата за брзо распоредување, како и медалите за храброст за осумте херои ги доделувам бидејќи успеаја, и во најтешките моменти за нашата татковина, да го зачуваат јавниот ред и мир и да го одбранат државниот интерес.

Драги сограѓани,

Има нешто што на нашите безбедносни сили им дава истрајност во извршувањето на овие ризични, но благородни задачи. А, тоа е нивната верба во иднината на Република Македонија. Тоа е нивната надеж за подобро утре. Тоа е нивната длабока увереност дека со сè што прават, создаваат неопходни услови за благосостојба и напредок на сите македонски граѓани во слободно, демократско и праведно општество.

Затоа, ве повикувам сите, независно дали сте Македонци, Албанци, Турци, Власи, Срби, Роми, Бошњаци, христијани, муслимани, Евреи, атеисти..., да ги охрабриме и да ги поддржиме во нивната мисија, но и да ја споделиме нивната надеж и верба во Македонија. Верба дека Македонија има сила да ги надмине поделбите и одново да се издигне. Верба дека доаѓа нова генерација млади и посветени луѓе кои ќе работат за подобра иднина во Македонија. Со тоа, во вистинска смисла на зборот, ние ќе ја искажеме нашата благодарност кон хероите на Македонија.

Ви благодарам.

orden3

 
Почеток < Пред 1 2 3 4 5 6 7 8 9 10 Следно > Крај
Страница 9 од 55