Говори и обраќања
prm_iselenici_14
Признанија за претставници на македонската дијаспора
Среда, 20 Јули 2016

Почитувани присутни,
Дами и господа,
Браќа и сестри,

„Сите ние имаме две заеднички татковини, кои годинава слават две значајни годишнини.

Пред 25 години, во 1991-та го остваривме сонот на неброени генерации и прогласивме независна, суверена и самостојна држава – Република Македонија. Македонија е нашата прва заедничка татковина што нè поврзува со нашата дијаспора.

„Но, само 5 години претходно, во 1986-та, Блаже Конески напиша дека: „за нас повеќе отколку за многу други во светот, јазикот претставува, со сè што е на него создадено, како говорен и пишуван текст, најголемо приближување до идеалната татковина. Тој, македонскиот јазик, е заправо единствена наша комплетна татковина". Годинава одбележуваме и 11 века од упокојувањето на еден од втемелувачите на македонскиот јазик - св. Климент Охридски.

Денеска имам чест и задоволство да ве поздравам во Охрид, во духовната и културната престолнина на таа наша комплетна татковина. Но, не само да ве поздравам, туку и да ви се заблагодарам. Затоа што вие, со вашата дејност, се покажавте како достојни чеда на двете наши заеднички татковини."

Почитувани присутни,

„Живееме во време на длабока политичка криза, кога македонскиот јавен простор е преплавен со зборови на безнадежност, цинизам и омраза. И токму затоа, неопходни ни се зборови на надеж, добрина и љубов. А кој владее подобро со зборовите отколку поетот, кој е слуга на својот јазик? Меѓу вас има двајца поети. Иван Трпески од Австралија и Лилјана Стоилковска-Андовска од Шведска, кои од двата краја на светот речиси половина век нè потсетуваат како треба да се љуби Македонија.

Тука е и Борче Величковски кој неуморно работи на унапредување на состојбата на македонската заедница во Република Србија. Но, со неговиот ангажман, тој суштински придонесува и кон градењето мостови на соработка меѓу двете соседни пријателски држави."

„Со нас денеска е и професорот Кирил Христовски од Државниот универзитет во Аризона во Соединетите Американски Држави. Професорот Христовски e преокупиран со големата тема за најмалите нешта – нанотехнологијата. Со своите научни и академски успеси на ова поле на иднината, тој претставува позитивен пример и охрабрување за нашите млади научници. Очекувам многумина по него да се вклучат во глобалниот натпревар на знаење, идеи и технологии."

Конечно, би сакал особено внимание да посветам на единствената организација што годинава се стекна со Повелба на Република Македонија, а тоа е Македонскиот сојуз во Шведска.

Овој сојуз, што ги обединува и ги претставува интересите на дваесет илјадната македонска заедница во Шведска, е една од најдинамичните организации од македонската дијаспора. Секогаш, кога се среќавам со иселеници од скандинавските земји, слушам најпофални зборови за Македонскиот сојуз. Запознаен сум со напорите за зачувување и за афирмирање на македонските историски, културни и духовни традиции и вредности. Знам дека овој сојуз придонесува за унапредување на соработката меѓу Шведска и Македонија преку разни проекти и иницијативи, вклучително и хуманитарни активности. Сè на сè, станува збор за исклучително заслужна иселеничка организација.

Драги пријатели,

„Сите вие сте живата врска на Македонија со светот. Многупати имам истакнато дека вие, успешните поединци и организации од дијаспората, сте наши амбасадори на полето на културата, уметноста, образованието, науката, добротворството. Секој ваш успех е и успех за Македонија.

Затоа, како претседател на Република Македонија, во името на македонските граѓани сакам да ви се заблагодарам за сè што правите за Македонија. А Македонија памети, препознава и вреднува. Медалите за заслуги за Македонија и Повелбата на Република Македонија се симболичен израз на нашата искрена благодарност, но и поттик да продолжите да работите како и до сега. Да продолжите да го исполнувате заветот на свети Климент Охридски, а тоа е да се престигнуваме со добрина. "

Ви честитам.
prm_iselenici_15

OHleto
Обраќање на свеченото отворање на 56. издание на фестивалот „Охридско лето“
Вторник, 12 Јули 2016

Почитувани вљубеници во уметноста,

Фестивалот „Охридско лето" се одржува во период кога стариот свет умира, а новиот сè уште не е роден. Период на длабоки кризи, крвави конфликти и милиони бегалци. Година, кога наместо да го прославуваме, ние како да го забораваме јубилејот од независноста на Република Македонија.

Во време кога над светот се надвиснати темни облаци, уметноста е како продорен зрак светлина. Овој зрак ја осветлува скриената убавина што извира од длабочината на човековото срце. Истовремено, овој продорен зрак на уметноста нè упатува и кон она што е скриено зад облаците, а тоа е вечниот извор на светлината и животот. Уметноста ја изразува надежта дека бурата ќе мине, облаците ќе се распрснат, ветриштата ќе се смират и дека ќе нè огрее светлината по која копнееме.

Повеќе од пет децении, десетина илјади уметници од сите меридијани, преку своите музички, сценски и ликовни дела нè охрабруваат да бидеме извор на убавината во светот. А првиот оригинален словенски и македонски поет ни кажува како да го направиме тоа. Пред повеќе од 11 века, токму од ова место, св. Климент Охридски нè поттикна да се престигнуваме во добрина, бидејќи убавината е само друго име за добрината.

Со таа мисла, го прогласувам 56-то издание на фестивалот „Охридско лето" за отворено!

obrakjanje_22062016
Обраќање на Претседателот на Република Македонија, д-р Ѓорге Иванов
Среда, 22 Јуни 2016

Почитувани граѓани на Република Македонија,

Во изминатите денови имавте можност да ја следите дебатата во Собранието за предлогот на опозицијата за покренување постапка за утврдување одговорност на претседателот на Република Македонија.

Сето она што беше кажано од собраниската говорница ќе остане запишано како сведоштво за односот на пратениците кон сопствената држава и кон сопствените институции. Врз основа на тоа сведоштво идните поколенија ќе знаат низ што се минувала демократијата во Македонија и како оваа генерација политичари ја разбирале и практикувале политиката.

Дел од тие сведоштва се помилувањата од претходни претседатели за кои воопшто не беше покренато прашање за нивна одговорност. Ниту пак се покрена кога ни наметнаа привремено име кое сеуште не фрустрира. Ниту пак за промената на државното знаме, Уставот и територијалната поделба на државата. Никој не одговараше за атентатот на еден претходен претседател и за неразјаснетите околности што доведоа до смртта на друг претседател. Наредните генерации ќе знаат дека во тоа време, на власт биле истите оние кои денес го покренаа прашањето за моја одговорност и кои го оспоруваат мојот легитимитет.

Гласањето во Собранието заврши. Неоснованата иницијатива на опозицијата беше отфрлена. Затоа, денеска им се обраќам на граѓаните. Граѓаните кои два пати ми ја дале довербата да бидам претседател на Република Македонија.

Почитувани сограѓани,

Веќе подолго време предупредував за причините и последиците од кризата во која се наоѓаме.
Активностите на паралелната мрежа и безбедносните пропусти во системот за следење на комуникации по втор пат во овие 15 години ја предизвикаа политичката криза.
Под покровителство на меѓународниот фактор, беше постигнат договорот од Пржино. Беше формирана техничка влада со претставници од власта и опозицијата. Беше формирано Специјално јавно обвинителство.

Но, наместо да се разреши, кризата се продлабочи.

Изборите на 24 април беа одложени на барање на опозицијата. Изборите закажани за 5 јуни беа минирани бидејќи опозицијата се закани дека ќе ги спречи, а олеснувачите извршија притисок кај дел од партиите да се откажат од учество.
Партиите и нивните поддржувачи ги користеа институциите како средство за меѓусебна пресметка.
Во недостиг на време за водење на квалитетни истраги Специјалното јавно обвинителство потфрли.
Постоеше висок ризик од поттикнување насилни акти и предизвикување меѓу-македонски судир.
Се активираа криминални мрежи, антивладини активисти и олеснувачи на движењето на мигрантите.
Од ден во ден, состојбата се усложнуваше.
Договорот од Пржино беше de facto мртов.
Поради нарушениот систем на команда, безбедносните институции беа блокирани и паралелизирани. Постоеше висок ризик да не можат да одговорат на заканите со кои се соочуваме како држава.

А закани имаше многу, и од надвор, и од внатре.

На нашата јужна граница илјадници мигранти се обидуваа насилно да ја срушат заштитната ограда, да ја преплават територијата на нашата држава, за да го отворат балканскиот мигрантски коридор кон Европа. Армијата и полицијата спречија над 15.000 обиди за илегален премин на границата.

На северната граница имаше упад од четириесетчлена вооружена, насилно-екстремна група. Оваа група имаше за цел да изврши осветнички терористички акти за полициската акција од 9 мај 2015 година во Куманово. Тогашниот министер за внатрешни работи од опозицијата е добро информиран за она за што зборувам. Тој можел на пратениците од опозицијата да им ги пренесе класифицираните информации за сите закани што ги имавме тие денови. Како членови на собраниските комисии за надзор и контрола тие имаат право да ја знаат вистината.

Но, не е само тоа. Во изминатата година се случија десетина напади со оружје и експлозиви врз државни објекти и институции и една политичка партија.

Постоеше и сеуште постои висок ризик и од заканата од странски терористички борци. Имаме 86 повратници од боиштата во Сирија и Ирак.

Двајца од лидерите на политичките партии добиваа закани за атентат. Закани потврдени и од партнерските служби.

Настаните на јужната и северната граница, заканите од странски терористички борци, мобилизацијата на криминалните структури и антивладините активисти со намера да предизвикуваат насилства и узурпирање на објекти ги зголемија ризиците за загрозување на безбедноста на Република Македонија.

Во услови на прогласена кризна состојба и на длабока политичка криза, кога имавме распуштено Собрание и техничка Влада со мандат ограничен само за спроведување на избори; кога имавме парализирани безбедносни институции со нарушен систем на команда, и постојани и директни закани по националната безбедност, Специјалното јавно обвинителство вршеше селективен прогон кон само една политичка структура. Тоа водеше кон предизвикување на тензии во општеството со ризик за меѓуграѓански конфликт и насилства.

Се што се случуваше упатуваше на тоа дека се соочуваме со туѓа наметната игра што има за цел дестабилизација на Македонија. Очекувам судската разрешница на предметот „Пуч" да го даде одговорот.

Сакам граѓаните да знаат дека бевме на чекор од отворен и насилен граѓански судир, најавено од обвинетите во случајот „Пуч". Нешто мораше да се преземе за да се спечи најлошото.

Во ваква сложена состојба, како Претседател на располагање имав два уставни и законски инструменти – реактивен и превентивен.

Првата опција беше да дејствувам реактивно. Тоа подразбираше да стојам по страна, и да чекам се додека состојбата во Македонија не ескалира. Тогаш ќе морав да ја ангажирам Армијата за смирување на состојбата. Но, со тоа ќе ја оставев јужната граница незаштитена и отворена за илегална миграција. Тоа ќе беше сигнал за милиони потенцијални мигранти дека Балканскиот коридор е повторно отворен. Тогаш Македонија ќе беше преплавена со мигранти.

Втората опција беше превентивна. Тоа подразбираше да наметнам нови правила на наметнатата игра со Македонија. Да превземам контрола врз играта и да обезбедам предност за Македонија.

Почитувани сограѓани,

Сакам да знаете дека целосно свесен за ризиците од носењето на одлуки, влегов во наметнатата игра и ги употребив оние инструменти со кои располагав.

Затоа, превентивно донесов одлука за помилување на сите кои на еден или друг начин се вклучени во политичката криза. Помилувањата беа инструмент со кој ги замрзнав сите непријателски намери меѓу спротивставените страни.

Мојата одлука ги изненади сите и предизвика нервоза кај одредени центри на моќ. Гневот се насочи кон мене. Плановите за предизвикување конфликт беа растурени. Со тоа го превенирав загрозувањето на јавната безбедност.

Но, некои погрешно ги толкуваа моите намери.

Во изминатите два месеци многумина упатија прашање до мене: Што сум мислел кога сум ја донел одлуката за помилувањата?
На ова прашање ќе одговорам со контра прашања:
Зарем требаше да бидам пасивен набљудувач додека се закануваше отворен судир меѓу двете спротивставени страни?
Зарем требаше да чекам да падне крв на улиците, за да ја употребам Армијата како втор инструмент во услови на веќе прогласена кризна состојба?
Зарем требаше да дозволам Македонец на Македонец да дигне рака?

Точно е дека трпам критики поради непопуларната одлука за помилување. Мојот личен углед беше доведен во прашање. Точно е дека во неколку наврати, протестите станаа и насилни. Но, подобро е да бидат горени моите фотографии, отколку институциите на државата. Она што е за мене најважно е што не дојде до отворен меѓу-македонски судир кон кој туркаа некои вжештени глави. Затоа, сметам дека целта е постигната. Вжештените глави се оладени. Македонија сеуште е безбедна, стабилна и мирна држава. Со други зборови, наметнатата игра за дестабилизација на Македонија не успеа.

Драги сограѓани,

Во изминативе два месеци секојдневно бев мета на бројни обвинувања.

Ме обвинуваа дека со одлуката сум покажал неодговорност. Напротив. Јас целосно ја превзедов одговорноста за мојата одлука.

Слушам обвинувања дека одлуката поттикнала на протести и ги зголемила безбедносните ризици.
Напротив. Од разузнавачки извори навремено бев информиран дека овие протести биле однапред планирани и подготвувани. Мојата одлука само го забрза нивното дејствување.
Во оваа прилика, сакам да им се заблагодарам на припадниците на полицијата за нивниот професионален однос, бидејќи не подлегнаа на ниедна од мноштвото провокации на кои беа изложени.
Сакам да им се заблагодарам на нашите сограѓани за совесното однесување и неприфаќање на насилството кон кое постојано беа, и сеуште се повикувани.
Сакам да им се заблагодарам на безбедносните служби кои навремено информираат за намерите за вршење на насилни акти.
Штетата на туѓиот имот се пресметува во пари и алтернативни казни но загрозување на јавната безбедност не се случи.

Почитувани сограѓани,

Ме обвинуваат дека во годината кога одбележуваме четврт век независност со одлуката за помилувања сум ја поништил правната држава.
Правната држава ја нарушија оние кои поради недостаток на политичка култура и култура на дијалог и компромис немаа доблест своите недоразбирања да ги решаваат во институциите на државата.
Правната држава ја нарушија лидерите на СДСМ и ДУИ бидејќи уставниот поредок не им беше доволен за да се сретнеме, да седнеме и да се договориме, туку трчаа во амбасадите на странските држави.
Правната држава, сувереноста и независноста ги загрозија овие двајца неодговорни политички лидери кои придонесоа да го добиеме договорот од Прижино, и кои не се ни придржуваа кон тој договор.

Ме обвинуваат дека сум го повредил Уставот и дека сум дал амнестија што е во надлежност на Собранието. Тие или не ја знаат разликата меѓу амнестијата што ја дава Собранието и помилувањето што го дава Претседателот, или ја знаат, но намерно шират конфузија меѓу граѓаните.

Ме обвинуваат дека одлуката сум ја донел за да го поништам Специјалното јавно обвинителство.

Специјалното јавно обвинителство е институција формирана ад-хок, со точно определна наменска цел, согласно договорот на политичките партии, од која се очекуваше со својата работа да биде во функција на решавање на политичката криза, а не нејзино продлабочување.

За жал, наместо инструмент за правда, Специјалното јавно обвинителство се покажа како инструмент за уцена. Од сите милион фајлови кои кажуваат дека ги имаат, ги одбра само оние кои се однесуваат на претставниците на власта, односно на ВМРО-ДПМНЕ. Селективниот прогон на СЈО создаде мачна атмосфера во општеството. Јас и јавно прашав по која методологија се одбрани само тие случаи. Одговорот го даде лидерот на опозицијата Заев кој изјави дека Специјалното јавно обвинителство постапува исклучиво по пријави доставени од опозицијата. Значи, наместо специјално обвинителство добивме селективно обвинителство, кое е исклучиво во функција на опозицијата.

Ме обвинуваа дека со помилувањата сум сакал да ги заштитам политичарите, и дека сум пратил порака дека политичарите се недопирливи, дека се над правото и законот.

За да ги отфрлам ваквите неосновани обвинувања, кога беа донесени измените на Законот за помилувања и кога беше создадена нова реалност, ги повлеков сите помилувања за политичари.

Денес, единствениот аболициран политичар во Република Македонија е господинот Зоран Заев. Доколку не блефира, го охрабрувам, врз основа на законските измени да го одржи дадениот збор и да поднесе формално барање за повлекување на неговото помилување.

Деновиве истакнуваат дека со повлекувањето на помилувањата сум признал дека сум направил погрешна проценка, дека сум го повредил Уставот и законите.
Напротив. Одлуката за повлекување ја донесов затоа што, за разлика од 12 април, денеска имаме нова реалност во Македонија.
Вратена е првобитната состојба.
Имаме функционални институции, кои можат да се справат со сите предизвици и закани со кои се соочува државата.
Наместо техничка имаме политичка влада што може да носи одлуки и да предлага закони.
Собранието повторно работи и носи закони, дури и водеше расправа за предлогот за импичмент на Претседателот.
Договорот од Пржино е повторно заживеан.
Работните групи на политичките партии разговараат за решенија за политичката криза и определување на датум за избори.
Безбедносните служби се под една команда и едно старешинство.

Почитувани сограѓани,

Во Македонија се води специјална војна како дел од стратегиите за предизвикување на тензии и воспоставување на постојани политички кризи со технички влади за неможност во справување со закани и доведување во положба на потчинетост. Договорот меѓу лидерите сеуште не е целосно исполнет. Парламентарните избори сеуште не се спроведени.

Во недостиг на политичка програма и решенија за граѓаните, гледаме циркус во Собранието, театар на улиците од оние кои не ги признаваат и ги бојкотираат институциите, повикуваат на безредие и безвластие.

Никому не му е забрането да протестира, да го искаже своето незадоволство од власта. Никому не му е оспорено правото јавно да го искаже своето мислење за кое било прашање во државата. Но институциите мора да воведат ред. Никаде не се толерира хулиганство, вандализам и уништување на туѓиот имот. Секаде тоа се санкционира. И кај нас таквото насилство мора да престане.

Затоа, сакам да упатам порака до сите оние кои придонесоа кон оваа криза.

Лидерите на партиите да внимаваат што договараат, олеснувачите да внимаваат какви пакети предлагаат, пратениците да внимаваат за какви закони гласаат.

Автентичниот невладин сектор кој со години конструктивно придонесува кон решавање на бројни проблеми во општеството да се дистанцира од оние поединци и групи кои протестираат само за да профитираат.

Ги повикувам партнерите да не ја користат состојбата за остварување свои интереси. Блокирањето на европска и евроатлантска иднина придонесе кон блокирање на политичките процеси во Македонија. Затоа, ги повикувам Европската унија и НАТО да го деблокираат патот на Македонија. Процесот на преговори и затворање на поглавјата досега ќе ги научеше политичките елити на културата на дијалог и компромис.

Сакам да ги потсетам политичките лидери што не ја признаваат институцијата Претседател на следново: тие се должни да не ја загрозуваат независноста и суверенитетот на Република Македонија со доведување во состојба на потчинетост и зависност кон други држави, центри на моќ или недржавни актери.

Не смее да се дозволи целата држава и народот да биде заложник на карактерите, егото и личната омраза на овие неодговорни политичари. За такви не треба да има место на политичката сцена. Ако во остварување на која било цел се водите од омраза и деструкција, тогаш неуспехот е загарантиран.

За крај, на овие неодговорни политичари кои од мене бараа одговорност, ќе им го порачам следново: Како Претседател имам одговорност кон граѓаните кои ме избрале и кои ми дале легитимитет. Имам одговорност кон вооружените сили чиј Врховен командант сум. Имам одговорност кон државата на чие чело сум во овие тегобни и мачни времиња.

И, со таа одговорност, како и досега, така и во иднина ќе постапувам единствено и исклучиво, според Уставот и Законите на Република Македонија во заштита на државните интереси и националната безбедност.

Ви благодарам.

ip1
Обраќање по повод доделувањето на признанието „Инженерски прстен 2016“
Понеделник, 20 Јуни 2016

Почитувани студенти,
Почитувани гости,
Дами и господа,

„Секоја доволно напредна технологија е еднаква на магија", рече големиот Артур Кларк. Но технологијата за која зборува Кларк не е случајност туку е резултат на темелно образование, многу труд, макотрпна работа, креативност и посветеност. Вие како инженери, како најдобри студенти од техничките факултети ја имате моќта да го менувате светот и реалноста. Тоа е несомнено голема одговорност, храброст, истрајност но и етичка големина.

Интензивирањето на инвестирањето во инженерското образование полека но сигурно почнува да ги покажува очекуваните резултати. Новоформираните факултети од инженерските струки веќе ги продуцираа првите кадри кои ќе бидат носители на инженерството во нашата држава. Вие сте дел од тие кадри кои ќе треба и практично да докажат дека вложувањето во инженерското образование е висински потег. Верувам дека допрва кога ќе започнете своето знаење да го користите во професионалната кариера до израз ќе дојдат сите ваши квалитети и акумулирано знаење.

Драги студенти,

Како Претседател на Република Македонија и како универзитетски професор би сакал да ви пренесам една порака која ја повторувам на сите генерации добитници на инженерскиот прстен. Немојте никогаш да престанете да се усовршувате и да ги применувате своите знаења и креативни потенцијали. Нека не постои ограничување кое не може да го надминете.

Денеска, кога се наоѓаме над нашето езеро, сакам да ве охрабрам да запливате во океанот на технологијата. Таму, во глобалниот свет на постојани иновации и технолошки решенија вие ќе се натпреварувате со најпосветените, најработливите, најкреативните. Во тој натпревар вие ќе стекнете искуство и самодоверба. Вербата во себе, волјата, посветеноста ќе ви помогнат да го најдете своето место во инженерските науки за да придонесете за себе, но и за својата заедница, за својата држава.

Имајќи предвид дека веќе две години сте вмрежени во Алумни-асоцијацијата на добитниците на „Инженерски прстен" ве поттикнувам да го користете искуството од постарите колеги, да си помагате и да се мотивирате.

Од се срце ви посакувам да бидете предводници на човечкиот потенцијал кој ќе придонесе во развојот на нашата земја. Дозволете ми на самиот крај да ви честитам вам, добитници на годинешното признание „Инженерски прстен", на вашите професори, но и на вашите родители.

Ви благодарам.

ip2

angelova
Обраќање по повод доделувањето на признанието „Најдобар млад научник“ за 2015 година на Михаела Ангелова
Четврток, 16 Јуни 2016

Почитувани присутни,
Дами и господа,
Драги пријатели,

Науката е имагинативна авантура на умот кој во светот на мистеријата трага по вистината", рече британскиот хемичар и нобеловец Норман Хиншелвуд.

Ако науката е авантура на умот, тогаш научниците се луѓе кои во своите истражувања и научни авантури се водени од љубопитност, храброст и дисциплина. Откривајќи ги научните вистини, тие во голема мера се заслужни за светот во кој живееме, технологиите што ги користиме, знаењата што ги применуваме, а без кои напредокот би бил незамислив.

И Република Македонија, која годинава треба да прославува четврт век независност, има свои научници кои се вклучени во глобалната потрага по вистината.

Имагинативноста, креативноста, хуманоста и вистинољубивоста на нашите научници веќе се вткаени во ризницата на знаењето на човечката цивилизација. Не се сомневам дека македонската наука допрва ќе го задолжува светот.

Денес, како претседател на Република Македонија, но и како универзитетски професор го имам задоволството, по шести пат да доделам признание на еден таков трагаач по научната вистина, д-р Михаела Ангелова.

Драги пријатели,

Секоја година имаме пријавени кандидати со високи достигнувања кои ѝ предизвикуваат тешкотии на комисијата за да го избере најдобриот меѓу најдобрите. Искрено им благодарам на сите нејзини членови за ангажманот во изборот на носителот на признанието „Најдобар млад научник". Особена благодарност и до рецензентите без чиј несебичен придонес целиот процес на селекција ќе беше невозможен. Заедно со комисијата завршија голема работа.

Убеден сум дека со изборот на најдобриот млад научник придонесуваме кон поттикнувањето на интересот за младата македонска научна мисла.

Креативноста и постигнувањата на нашите млади научници се доказ дека имаме голем потенцијал во сите научни области. Оттука, треба да направиме сè, младите научници да ги заземат своите места во образованието, институциите, компаниите во кои ќе можат најмногу да придонесат со својата научна работа.

Дозволете на крајот, на д-р Михаела Ангелова, но и на сите други млади научници, кои беa дел од конкурсот за избор на „Најдобар млад научник" за 2015, да им посакам многу успех и долгогодишна плодна научна работа.

Ви благодарам.

PRM_ZEMAN_FORUM_2
Обраќање на претседателот Иванов на македонско - чешкиот бизнис форум во Охрид
Петок, 10 Јуни 2016

Почитуван Претседателе Земан,
Почитувани дами и господа,
Почитувани стопанственици,

Со особено задоволство ви се обраќам денес на овој значаен Бизнис форум, чија цел е унапредување на економската соработка меѓу нашите две земји. Република Македонија и Чешката Република имаат традиционално добри пријателски односи, силна историска и културна поврзаност. Граѓаните на двете земји, бизнис заедниците на двете земји, се тие кои треба да профитираат и да ги искористат овие поволни односи. Вчера со претседателот Земан заемно констатиравме дека фокусот на нашето внимание во наредниот период треба да се сконцентрира на интензивирање на економската соработка.

Почитувани присутни,

Од информациите со кои располагам, како особено значајна за двете држави се смета соработката во енергетскиот сектор, а особено обновливите ресурси, развојот на малите хидроцентрали, ветерните електрани, сончевата енергија, геотермалните технологии, рударството. Посебен интерес постои и во областа на металната и електро-индустријата, во автомобилската индустрија за поврзување на македонските производители со чешки компании, хемиската индустрија, животната средина, земјоделството и прехранбената индустрија.

Владата на Република Македонија континуирано работи на подобрување на бизнис климата како и на олеснување на условите за инвестирање. Нашата стратешка географска положба, како и можноста за слободна трговија со земјите од поширокиот регион, овозможува да бидеме атрактивни за компании кои се заинтересирани да оперираат во регионот.

За жал нивото на чешки инвестиции во Македонија е многу мало, а поволностите кои ние ги нудиме за соработка и инвестиции на Вашите компании ќе ви ги претстави Заменик министерот за економија, г. Христијан Делев.

Почитуван Претседателе,

За крај, да нема дилема, јас како претседател на Република Македонија, а убеден сум дека и мојот колега и пријател, претседателот Земан, во рамките на нашите можности ќе ја дадеме нашата поддршка и помош. Впрочем не случајно сме денес тука, да ве охрабриме, и да ве поттикнеме да ги продолжите контактите, да го најдете интересот за соработка.
Ви посакувам успешна работа.

 

 
Почеток < Пред 1 2 3 4 5 6 7 8 9 10 Следно > Крај
Страница 10 од 57