Новости
Њујорк - средби со Пал Шмит, Ангела Меркел, учество на Клинтоновата глобална иницијатива
Вторник, 21 Септември 2010

Претседателот на Република Македонија д-р Ѓорге Иванов во Њујорк имаше билатерална средба со претседателот на Унгарија Пал Шмит. На средбата, Претседателот Шмит изрази силна поддршка за интеграцијата на Македонија во ЕУ, во пресрет на унгарското претседавање со Унијата.
Иванов потенцираше дека за Македонија е исклучително важно одредуванњето датум и почнувањето преговори за членство во ЕУ. Побарал поддршка од Унгарија за ова праѓање. Смит најавил дека е подготвен да биде знаменосец на Македонија во Унијата.
На средбата двајцата претседатели разговараа за улогата на Република Македонија и важноста на нејзината евринтеграција за регионалната стабилност. Според Шмит, Унгарија при интеграциите се водела од принципот дека билатералните прашања не смеат да бидат пречка за интеграциите на земјите од регионот. Шмит ја потенцираше неговата силна лична поддршка за членството на Хрватска во ЕУ и поддршката на Унгарија за интеграциите на другите земји од регионот, истакнувајќи дека е време Македонија да продолжи со овој процес.
Претседателот Шмит изрази интерес и високо го оцени македонскиот интегративен модел за етничките заедници. Разговарано било и за засиленате соработка на Македонија со регионалните организации, како што се Дунавската иницијатива и Вишеградската група.
Шефот на македонската држава вчера во Њујорк имаше и куса неформална средба со германската канцеларка Ангела Меркел. На средбата беше потврдена германската поддршка за евро-атланската интеграција на Македонија. Заедничка оценка е дека билатералните односи на двете земји се одлични. Иванов и Меркел разговараа за можностите за продлабочување на трговската размена.
Претседателот Иванов на маргините од самитот на Клинтоновата Глобална иницијатива, имаше неформални средби со домаќинот Бил Клинтон, со поранешниот американски државен секретар Медлин Олбрајт, со израелскиот претседател Шимон Перес, летонскиот претседател Валдис Затлерс, претседателот на Косово Фатмир Сејдиу, со претседавачот на босанското претседателство Харис Силајџиќ и со бугарскиот премиер Бојко Борисов.
На иницијатива на претседателот Иванов е остварена и заедничка средба со претставници на македонската дијаспора и Националниот американски албански совет. Претседателот истакна дека очекува заедничките средби на претставници на македонската и албанската дијаспора да станат пракса, со цел заеднички настап на овие организации.

Средба на Претседателот Иванов со амбасадорот Метју Нимиц
Понеделник, 20 Септември 2010

Претседателот на Република Македонија д-р Ѓорге Иванов во Њујорк имаше средба со посредникот на Обединетите Нации во разговори за надминување на спорот кој Република Грција го поставува во врска со името на Македонија.
- Има зголемено чувство на доверба дека проблемот може да биде решен со дијалог на многу високо ниво, меѓу водствата на двете земји. Тоа е многу позитивен развој. Чувствувам дека страните сега зборуваат меѓу себе за работи кои се во рамки каде може да се видат некои очекувања дека евентуално може да се најде решение на овој проблем, изјави амбасадорот Метју Нимиц по средбата.
Македонскиот претставник во рагзоворите за името амбасадорот Зора Јолевски, изјави дека претседателот Иванов го информирал Нимиц за позицијата на Република Македонија при што ја истакнал определеноста и посветеноста на земјата за што побрзо изнаоѓање заемно прифатливо решение кое ќе го заштити дигнитетот на македонските граѓани.
Прашан дали нивото на доверба е доволно двете страни да најдат решение до ноември или декември, Нимиц со одговор дека не сака да дава претпоставки зашто според него наметнати рокови никогаш не се добри за ваков тип на преговори.
- Тие создаваат лажни очекувања и непотребни разочарувања ако се промашат и затоа не би зборувал за рокови. Би рекол дека работејќи на ова прашање долги долги години, ми се чини од 1994 година, сигурно гледам дијалог кој ми дава реалистични очекувања дека проблемот овде може да дојде до заемно решение во кое двете страни ќе чувствуваат дека постигнале национални цели и ќе ја заштитат националната гордост на двете страни, изјави медијаторот.
Истакна дека на средбата не излегол со нов предлог и оти се разговарало за текот на процесот.
- Не давам нови предлози. Во текот на годините дадов предлози до страните. Тие никогаш не беа во целост задоволителни, но за некои од идеите мислам дека вредеше што разговаравме за нив, затоа се чувстувам позитивно во тој правец. Да дозволиме процесот да продолжи и да видиме како ќе се развива - рече Нимиц.

Честитка по повод празникот Јом Кипур
Сабота, 18 Септември 2010

По повод празникот Јом Кипур, Претседателот на Република Македонија д-р Ѓорге Иванов ја испрати следната честитка до г-ѓа Бјанка Суботиќ, Претседател на Еврејската Заедница на Македонија, како и до сите припадници на еврејската заедница во Македонија.
Почитувани,
Дозволете ми во мое лично име и во име на сите граѓани на Република Македонија да Ви го честитам денешниот голем празник, Јом Кипур. Се надевам дека овој свет период во годината ќе Ви донесе мир, љубов и среќа, и дека благословот на празникот ќе Ве затекне во кругот на Вашите најблиски.
Деновите посветени на пост и оживувањето на традицијата, особено во пресрет на предизвиците кои ги носи денешниот начин на живеење, се исклучително важни за зачувувањето на чувството на душевен мир, но и како можност да одиме напред во иднината со помош на искуството кое ни го носат безбројните генерации пред нас. Хармоничниот спој на минатото и на иднината кој толку силно се чувствува на деновите посветени на Господ, е важен за секој нас поединечно, но и за цврстината на нашите заедници и на општеството во целина.
Република Македонија се чувствува благодарна за богатството на верските и етничките традиции на нејзините граѓани, меѓу кои особено значаен е придонесот на еврејската заедница. Горди сме што можеме да Ви го честитаме празникот Јом Кипур, и да славиме заедно со Вас, како што доликува на нашата традиција на прифаќање и соработка.
Уште еднаш, за многу години нека ни е денешниот празник.

Обраќањето на Претседателот на Република Македонија д-р Ѓорге Иванов по повод почетокот на академската 2010 / 2011 година
Среда, 15 Септември 2010

Почитувани студенти, почитувани професори, драги пријатели,
Ми претставува особена чест да ве поздравам на почетокот на академската 2010/2011 година. Задоволството е уште поголемо што оваа церемонија ја приредува првиот државен универзитет во Република Македонија. Мојот матичен универзитет, кој го носи името на големите сесловенски просветители, светите браќа Кирил и Методиј.
И денес, по дванаесет века, нивното дело претставува инспирација за сите нас. Тие се ставија во одбраната на правото на секој народ да верува. Да учи и да се просветува на сопствениот јазик.
Некогаш борбата била образованието да биде на мајчин јазик. Денес борбата е образованието да биде и достапно за сите.
Универзитетите секаде во светот се основа за развојот на целото општесво и затоа е неопходно нивно постојано усовршување во согласност со општествените потреби.
Со прифаќање на Болоњската декларација од 1999 година речиси сите земји од Европа пристапија кон изградба на заедничките основи на системот на високото образование. Оваа синхронизирана активност на европските земји се нарекува Болоњски процес.
Целта на тој процес е да се воспостави единствениот европски високо образовен простор. Тоа овозможува препознавање и признавање на образовните профили и наставните содржини ширум Европа. Овозможува непречено пласирање на националните образовни институции на европскиот пазар. Го осигурува квалитетот; воспоставува три степени на студирање, обезбедува европски систем за пренос на бодовите и ја овозможува мобилноста на студентите.
Многу ваши колеги студенти од претходните генерации веке ги користат придобивките на воспоставените европски стандарди на високото образование кај нас. Нашите студенти денес ќе ги сретнете на  универзитетите низ Европа каде го продолжуваат и усовршуваат своето високо образование. 
Македонија, преку високото образование, е веќе дел од европскиот отворен образовен простор. Со реформите што се спроведуваат, европските образовни вредности стануваат наши вредности.
Почитувани,
Образованието денес ви ги отвора вратите кон знаењето. Знаење кое, кога ќе се најде во вистинските раце – во вашите раце, може да продуцира вистински вредности. Токму затоа оваа година се воведува и практичната настава за студентите. Настава што ќе придонесе за зголемување на квалитетот на вештините што се стекнуваат со високото образование.
Убеден сум дека оваа заедничка инвестиција во македонските студенти, ова партнерство на државата и бизнисот, на универзитетите, институциите и претпријатијата ќе даде конкретни резултати. Ова партнерство ни дава можност да изградиме чувство на заедништво, на споделена одговорност. Заедно, го затвораме кругот на општествената одговорност и посветеност. А во центарот на нашето партнерство сте токму вие, студентите.
Почитувани,
Денешниов настан го одржуваме во салата кое го носи името  на покојниот Претседател Борис Трајковски. Затоа, токму од тука, сакам да ви соопштам дека оваа година ќе доделувам триесет стипендии “Борис Трајковски“ за најдобрите студенти запишани на основните, постдипломските и бизнис мастер студиите. Стипендии кои ќе ги доделувам заедно со Министерството за образование и наука на Република Македонија и со Сити колеџот од Солун кој е дел од Универзитетот Шефилд. Овој заеднички напор ја одразува нашата верба во вас, во вашата способност и во вашата иднина.
Почитувани,
Верувам дека сите вие ќе продолжите да чекорите по патот на напредокот. Убеден сум дека вашите претстојни достигнувања ќе ги крунисате со благородното чувство на исполнетост и гордост. Гордост каква што ние денес чувствуваме. Воедно, од вас очекувам никогаш да не ја заборавите вашата обврска кон Македонија и кон македонското општество. Доколку бидете истрајни во вашите напори, доколку се надградувате академски и професионално, доколку се однесувате одговорно, тогаш, верувајте, вашата иднина и иднината на Македонија ќе биде обезбедена. Ако вие сте успешни, тогаш и Македонија ќе биде успешна.
За крај, сакам да знаете дека патот што води до индивидуалниот и колективниот успех не е нити краток нити пак лесен. За да се измине тој пат не е доволна само желбата за успех туку и посветеност кон целта и чувство за одговорност кон себе и кон другите.
Денес, вие направивте уште еден крупен чекор во насока на сопствената наобразба. Денес ја покажавте желбата за знаење Затоа, сите ние веруваме во вас. Сите ние веруваме дека ќе успеете.
Им посакувам на сите студенти, на сите универзитети во Македонија интелектуалната љубопитност да ги следи за време на студиите, но и по успешното завршување на овој значаен академски потфат. Да бидат вредни, чесни и искрени. Така ќе успеат и на студиите и во животот.
Ви благодарам.

Честитка до Претседателот Медведев
Вторник, 14 Септември 2010

Претседателот на Република Македонија д-р Ѓорге Иванов ја упати следната честитка до Претседателот на Руската Федерација, Дмитри Медведев, по повод неговиот роденден:

Почитуван господине Претседател,
Ми причинува особено задоволство од мое лично име и од името на граѓаните на Република Македонија, да Ви го честитам роденденот.
Истовремено ја користам можноста да Ви посакам Вам, и на Вашето семејство добро здравје и среќа, како и понатамошен успех во извршувањето на Вашите одговорни обврски со желби за просперитет на Вашата земја и благосостојба на нејзините граѓани.
Се уште во пријатно сеќавање ми се нашите неодамнешни средби во Москва и Санкт Петербург. Убеден сум, дека соработката и односите на  пријателство меѓу нашите две земји, во годините што доаѓаат, со заеднички ангажман успешно ќе се развиваат и продлабочуваат во сите области од заемен интерес. На тоа не обврзуваат долгата и богата традиција на македонско - руските односи.
И во оваа прилика, почитуван Претседателе, сакам да ја повторам мојата, и од граѓаните на Република Македонија, благодарност за досегашната поддршка што Вие лично и Вашата земја континуирано и ја давате на мојата земја.
Ве молам, почитуван Претседателе, да ги примите изразите на моето највисоко почитување.
д-р Ѓорге Иванов

Пристигнати честитки по повод Осми септември (Британија, Франција, Турција, Бразил...)
Недела, 12 Септември 2010

По повод празникот Осми септември, Претседателот на Република Македонија д-р Ѓорге Иванов доби честитки од голем број шефови на држави од светот.
Во честитката на Претседателот на Република Франција Никола Саркози до Претседателот на Република Македонија д-р Ѓорге Иванов се поздравува визната либерализација за македонските граѓани за патувањето во Европската Унија и се наведува: Убеден сум дека ќе продолжите со неопходните реформи, посебно во областа на судството и борбата против корупцијата во дух на дијалог и консензус, за да се премине во нова етапа. Франција ја поддржува Македонија и сака да и помогне за што сведочи вниманието кое го искажуваме кон билатералната соработка во придружувањето кон европската интеграција.
Нејзиното Кралско Височество, британската кралица Елизабета Втора, во својата честитка по повод Денот на независноста Осми септември до Претседателот Иванов порачува: Ми претставува особена чест и задоволство да Ви го честитам државниот празник, Денот на независноста, со најискрени желби и честитки за среќа и просперитет на Владата и народот на Република Македонија.
Претседателот на Република Турција Абдула Ѓул ги испрати своите најискрени честитки по повод Денот на независноста. Не се сомневам во тоа дека нашите пријателски односи и блиска соработка кои својата сила ја црпат од историските врски и заеднички вредности и цели, во наредниот период ќе продолжат да се развиваат и да бидат поразновидни. Уште еднаш сакам да го подвлечам значењето на елиминирањето на билатералните проблеми како прашања од дневен ред на регионалните иницијативи како и зацврстувањето на климата на балканската соработка во процесот на интегрирањето со евроатланските структури и дека во тој правец ги поддржуваме ставовите на Македонија – пишува понатаму во честитката на Претседателот Ѓул по повод Осми септември.
Луис Игнасио Лула да Силва, Претседател на Бразил, по повод празникот Осми септември, ги пренесува своите најискрени честитки, со желби за просперитет на Вашата земја и граѓани.
Пал Шмит, Претседателот на Унгарија, во честитката упатена до Претседателот Иванов, го изразува своето големо задоволство што во изминатите години контактите на високо ниво меѓу Македонија и Унгарија се интензивирани, и додава: Во остварувањето на стремежите за придружување на Македонија во НАТО и во Европската Унија, Република Македонија како и досега, и во иднина може да смета на мојата поддршка. Искрено посакувам Вашите напори во исполнувањето на задачите кои Ви претстојат што поскоро да бидат крунисани со успех.
Неговото кралско височество Мухамед Шести, Крал на Мароко, во честитката по повод Денот на независноста на Република Македонија изразува надеж дека и во иднина ќе се соработува на највисоко ниво за проширување на односите на пријателство и соработка меѓу двете земји, во взаемно полза на народите.
Претседателот на Казахстан Нурсултан Назарбаев испрати честитка до Република Македонија по повод Денот на независноста во која истакнува дека е убеден оти натамошниот развој на конструктивно партнерство меѓу Казахстан и Македонија ќе биде засновано врз взаемното разбирање и пријателските односи на нашите народи.

 
Почеток < Пред 171 172 173 174 175 176 177 178 179 180 Следно > Крај
Страница 173 од 190