Новости
Претседателот Иванов на средба со Вагит Алекперов од Лукоил
Петок, 18 Јуни 2010

Претседателот на Република Македонија д-р Ѓорге Иванов во Санкт Петерсбург оствари средба со г-дин Вагит Алекперов, Претседател на руската нафтена компанија Лукоил.

На средбата, на која присуствуваше и Заменик-Претседателот на Владата на Република Македонија г-дин Зоран Ставревски беше разговарано за иднината на соработката во енергетската сфера меѓу Македонија и Русија. Иванов и Алекперов зборуваа и за очекувањата од развојот на активностите на Лукоил во Република Македонија. Претседателот Иванов оцени дека Лукоил е компанија која веќе подолго време работи во Македонија, и за која македонските граѓани имале можност да утврдат дека се работи за солиден бренд кој ги поставува стандардите за македонските компании. Претседателот Иванов воедно оцени дека Македонија е енергетски пазар кој забрзано се развива и нуди можности за поврзување со големиот европски пазар.

На средбата беше укажано дека Република Македонија врши реформи чија цел е отстранување на бирократските пречки кои го забавуваат или оневозможуваат привлекувањето на поголеми странски инвестиции во земјата. Г-дин Алекперов го претстави интересот на Лукоил за можноста за инвестирање во помали енергетски капацитети во Македонија. Претседателот Иванов од своја страна го покани г-дин Алекперов да ја посети Република Македонија.

Вагит Алекперов, изразувајќи задоволство од инвестицијата на Лукоил во Македонија, нагласи дека истата е потврда за интересот на руските компании за инвестирање, и може да биде поттик за останатите компании на Руската Федерација за да го пронајдат економскиот интерес во Македонија. Воедно, информираше за развојот на компанијата која постигнува одлични резултати и тоа на глобално ниво. На средбата беше договорено во најскоро време да се оствари средба на експертско ниво, на која ке се разгледуваат и дефинираат правците на можната идна соработка.

Претседателот Иванов и Вицепремиерот Ставревски со Алексеј Милер од ГАЗПРОМ разговараа за гасификација на Македонија, проектот Јужен Поток
Четврток, 17 Јуни 2010


Претседателот на Република Македонија Ѓорге Иванов и Заменик претседател на Владата на Република Македонија и министер за финансии Зоран Ставрески, денеска  во Санкт Петерсбург, остварија средба со генералниот директор на ГАЗПРОМ, Алексеј Милер.
На средбата беше искажано обострано задоволство од претстојното потпишување на клириншкиот долг, што ќе овозможи унапредување на соработката меѓу Македонија и Русија во енергетскиот сектор. Со тоа се создадени услови ГАЗПРОМ да учествува во изградбата на гасоводната мрежа во Република Македонија, за што двете страни искажаа целосна подотвеност за соработка.
При средбата разговарано е и за вклучување на Македонија во значајниот меѓународен транзитен коридор „Јужен поток“, со можност за изградба на крак низ територијата на РМ.
Третата област за која се разговараше на средбата, беше партнерство меѓу рускиот гигант и Република Македонија во изградба на гасни електрани.
Подготвеноста на двете страни за реализација на гореспоменатите проекти се докажува и со тоа што е договорено експертските тимови на ГАЗПРОМ и Владата на РМ веднаш да почнат да работат на усогласување на техничките работи.

Писмо на Претседателот Ван Ромпуј до Претседателот Иванов
Четврток, 17 Јуни 2010
Професор Круме Кепески посмртно одликуван со Орден за заслуги за Македонија
Четврток, 17 Јуни 2010
Македонските каратисти на посета кај Претседателот Иванов
Вторник, 15 Јуни 2010

Претседателот на Република Македонија д-р Ѓорге Иванов денес се сретна со група спортисти од Карате Федерацијата на Македонија. На средбата, Претседателот Иванов им честиташе на македонските каратисти на долгата низа успеси на сениорските и кадетските натпреварувања, вклучително и на бронзениот медал на Огнен Груевски, освоен на 45тиот Европски карате шампионат во Атина во мај годинава.
Претседателот Иванов ги поздрави напорите на каратистите за претставување на Македонија како држава на млади и амбициозни спортисти. Претседателот изрази надеж дека со инвестициите во спортот, кој засилено се вршат во изминатите години, како и со укинувањето на визите со што се отстранува голема бирократска пречка за патување за младите луѓе, македонскиот спорт ќе добие можност порамноправно да се натпреварува со европските и светските спортисти.
Во изминатите четири години, карате репрезентациите на Маедонија освоија 22 медали на европск и светски првенства во сите категории.

Средба со Претседателот на Европскиот суд за човекови права д-р Жан Пол Коста
Петок, 11 Јуни 2010

Претседателот на Република Македонија д-р Ѓорге Иванов во Охрид се сретна со д-р Жан Пол Коста, Претседател на Европскиот суд за човекови права со седиште во Стразбур.
На средбата стана збор за реформите во македонското судство, кои имаат цел натамошно градење на ефикасен и правичен систем кој ќе биде гарант за почитување на човековите права и слободи и ќе овозможи владеење на правото и правна сигурност.
Двајцата соговорници зборуваа за претседавањето на Република Македонија со Советот на Европа, и за македонските приоритети во претседавањето кои вклучуваат јакнење на заштитата на човековите права. Оттаму, Македонија ја поддржува важната улога на Европскиот суд за човекови права.
Претседателот Иванов оцени дека се потребни дополнителни напори за обезбедување на целосно спроведување на одлуките на Судот од страна на државите. Спроведувањето на одлуките на Судот, според Претседателот Иванов, е основен предуслов за Судот да може да ја врши својата улога како институција - заштитник на човековите права и слободите на граѓаните.

 
Почеток < Пред 171 172 173 174 175 176 177 178 179 180 Следно > Крај
Страница 173 од 181