Новости
01
Претседателот Иванов на Универзитетот „Улудаг“: Македонскиот модел на интеграција без асимилација е модел на иднината
Среда, 28 Ноември 2018

Македонскиот модел на интеграција без асимилација е модел на иднинатa, бидејќи во својата основа подразбира почитување на различноста,  истакна претседателот Иванов во своето предавање на  Универзитетот „Улудаг“ во Бурса.

„Ние секојдневно го надградуваме и го усовршуваме овој наш заеднички модел кој подразбира уживање на правата, но и почитување и споделување на обврските и одговорностите кои произлегуваат од уставниот поредок“, подвлече претседателот Иванов, потенцирајќи дека ваквиот модел, Македонија не сака себично да го чува за себе туку да го споделува со светот, што според него, е особено важно денес.

„Македонскиот модел на соживот создавал луѓе со отворен ум кои ја прифаќаат и ја почитуваат различноста. Луѓе како Мајка Тереза, која е родена во 1910 година во Скопје, во Македонија. Во радиус, не повеќе од 100 метри од нејзината родна куќа, имало католичка црква, православна црква, еврејска синагога и муслиманска џамија. Мајка Тереза, стана синоним за човек кој го живее единството во различноста“, рече претседателот Иванов во своето предавање на  Универзитетот „Улудаг“ во Бурса.

 

Соживотот, нагласи македонскиот претседател, бил присутен и во борбата на македонскиот народ за слобода и независност. Сите апели, повици, манифести и декларации ја нагласуваат почитта кон различноста. Според претседателот Иванов, Република Македонија го има вградено и го има унапредено ова искуство во својот инклузивен демократски модел на интеграција без асимилација.


Република Македонија, истакна претседателот Иванов, е посветена на меѓукултурниот и меѓурелигискиот дијалог. „Во 2003 година го иницираме првиот Форум на дијалогот меѓу цивилизациите и сме активни учесници во Алијансата на цивилизациите на Обединетите нации што беше формирана во 2005 година на иницијатива на владите на Шпанија и на Турција. Својата посветеност Македонија дополнително ја потврди како домаќин на четирите светски конференции за меѓурелигиски и меѓуцивилизациски дијалог“, рече македонскиот претседател.


Според него,  за некои држави на Балканот, во Европа, македонскиот демократски модел на соживот сè уште претставува предизвик. Но, едно е јасно, рече претседателот Иванов, нашиот модел втемелен врз позитивните искуства од минатото, е воедно и модел на иднината. „Ако во минатото сме можеле да живееме и да напредуваме заедно, можеме и мораме да се обидеме тоа да го постигнеме и во иднината. Разликата во отворениот и затворениот простор е во комуникацијата и интеграцијата. Честопати велам дека оној што комуницира, тој се интегрира, а оној што не комуницира, се гетоизира и измислува непријатели“, нагласи македонскиот претседател во своето предавање на  Универзитетот „Улудаг“ во Бурса.

PRM_Bursa_01
Средба со претставници на Стопанската и трговска комора на Бурса
Вторник, 27 Ноември 2018

Претседателот на Република Македонија, д-р Ѓорге Иванов, во рамки на работната посета на Република Турција, денеска во градот Бурса оствари средба со претставници на Стопанската и трговската комора на Бурса.

Повикувајќи ги бизнисмените од Бурса да инвестираат во Република Македонија, претседателот Иванов во своето обраќање истакна дека двете држави и нивните институции вложуваат значајни напори за дополнително упапредување на соработката во областа на економијата.

„Република Македонија и Република Турција денес имаат исклучително добри претпоставки да се фокусираат на она што е најважно, економската соработка и инвестициите. Нашата држава нуди огромен број можности и прилики за инвестирање. Ние можеме многу повеќе и во инвестициите и во трговската размена", рече македонскиот претседател, додавајќи дека економските меѓудржавни договори го олеснуваат тоа.

Претходно, претседателот Иванов во областа Изник, ги посети историскиот храм „Аја Софија" каде што биле одржани двата Нијски Вселенски собори, Античкиот римски театар и познатата Фондација за чинии на Изник.

Утре, претседателот Иванов ќе оствари средба со Гувернерот на Бурса, г. Јакуп Канболат  со Градоначалникот на Бурса, г. Алинур Акташ и ќе одржи предавање на универзитетот „Улудаг".

PRM_Bursa_02

PRM_Bosfor_01
Претседателот Иванов на самитот „Босфор“: На Балканот е неопходна политичка, безбедносна и економска поврзаност
Понеделник, 26 Ноември 2018

Политичката, безбедносната, економската, транспортната и дигиталната поврзаност се неопходни за нашите компании да бидат поконкурентни на глобалниот пазар, нашите држави поуспешни во создавањето услови за просперитет на младите, а нашите региони поатрактивни за директни странски инвестиции. А тоа е клучно за одржлив мир и развој за сите, рече претседателот Иванов во своето обраќање, на отворањето на 9. Самит „Босфор", што се одржува во Истанбул.

Осврнувајќи се на предизвиците со кои денес се соочуваат економиите, претседателот Иванов ги посочи малите пазари за големите компании. „Како што границите на Балканот се разгрануваа, така граничните премини се мултиплицираа, а пазарите се ситнеа", подвлече македонскиот претседател. Вториот предизвик, според него, е големиот одлив на стручен кадар. „Како држави ние успеавме да го затвориме балканскиот мигрантски коридор за илегалните мигранти. Но, никако да успееме да ја спречиме миграцијата на нашите млади. По сè изгледа дека илегалните мигранти и нашите млади имаат едно нешто заедничко, а тоа е нивната дестинација –  најразвиените европски центри. Таму можат да ги реализираат своите бизнис-идеи и да ги остварат своите животни планови. Нашиот регион се празни. Си заминуваат оние кои со своите таленти, образование и вештини создаваат реална вредност. Цената ја плаќаат и државите и компаниите", оцени македонскиот претседател. Третиот голем предизвик, додаде претседателот Иванов, е застарениот начин на функционирање на дел од компаниите. Иако веќе сме во првиот век на третиот милениум, некои од компaниите во регионот сè уште функционираат според правилата од вториот милениум. Ризикуваат да станат некомпетентни, а со тоа и неконкурентни на глобалниот пазар.

Според македонскиот претседател, за да се надмине регионалната фрагментираност, неопходна е политичка и безбедносна поврзаност. За Балканот тоа подразбира членство во Европската Унија и во НАТО.

„Европската Унија беше најуспешен мировен проект што ги мобилизираше државите и општествата од Балканот. Ние доброволно се менуваме поради трансформирачката моќ на Унијата. Но, заморот од проширувањето кај нас создаде замор од чекање и наместо да се бавиме со реформи, ние почнавме да се бавиме со самите себе. Затоа, неопходно е Европската Унија час поскоро да ги започне преговорите за членство со Република Македонија", рече претседателот Иванов.

PRM_Bosfor_02

Говорејќи за предизвиците во регионот, претседателот Иванов оцени дека е потребна економска и транспортна поврзаност, како и дигитална трансформација на застареното функционирање.

Кога нашите држави и економии ќе се поврзат, тогаш нашиот регион ќе стане една економска зона, со многу повеќе можности за нашите млади кадри, рече македонскиот претседател. Тој додаде дека за рамноправно да се вклучиме во европскиот економски простор, неопходно е да сме рамноправен дел и од европските и евроазиските патни, железнички и енергетски коридори.

Целта на Самитот Босфор, кој се одржува под покровителство на Претседателот на Република Турција, е да обезбеди платформа за дијалог и да ја поттикнува економската соработка меѓу државите.

PRM_Bosfor_03


dojran
Претседателот Иванов во посета на јужната граница
Петок, 23 Ноември 2018

Претседателот на Република Македонија и врховен командант на вооружените сили Ѓорге Иванов, денеска беше во посета на јужната граница на Република Македонија, за да се информира за тековните состојби и активностите што се преземаат од страна на Армијата на Република Македонија, Агенцијата за разузнавање, ЦУК, Граничната полиција и контингентот на странските полициски сили, како субјекти вклучени во соочувањето со нелегалната миграција.

Претседателот Иванов изврши обиколка на караулата Богородица и привремениот транзитен центар во близина на Гевгелија, на капацитетот за сместување на припадниците на АРМ во Богданци, како и на караулата Езеро во Дојран.

За време на посетатa на караулата Богородица, претседателот Иванов изврши увид во моменталната состојба на македонско-грчката граница. Од страна на припадниците на АРМ беше информиран за обидите за нелегално минување на државната граница во изминатиот период, како и за тактичките мерки и активности кои се применуваат во спречувањето на нелегални минувања на јужната граница. Од страна на надлежните институции беше посочено дека во изминатите 3 месеци е спречен обид на околу 3300 илегални преминувања на јужната граница од мигранти, кои во најголем број доаѓаат од Блискиот Исток.05

Претседателот Иванов го посети и привремениот транзитен центар во Гевгелија, каде беше информиран за работата на хуманитарните организации, од страна на ангажираните во Црвениот Крст, Меѓународната организација за миграција, Агенцијата за бегалци при ОН, кои се распоредени таму и притоа изрази поддршка за нивниот континуиран придонес и ангажман.

Македонскиот претседател разговараше и со мигранти кои во моментот престојуваат во транзитниот центар, и се информираше за условите и третманот кои тие го добиваат за време на нивниот престој во центарот. Воедно, претседателот Иванов се сретна и со полициските припадници на странски држави, кои се распоредени во контролирањето на теренот на јужната граница, во поддршка на македонските безбедносни сили.

Во рамките на обиколката на јужната граница, македонскиот претседател ги посети и објектот за сместување на припадниците на АРМ во Богданци и караулата Езеро во Дојран. При тоа беше информиран за моменталните состојби, предизвиците и начинот на ангажирање на припадниците, во однос на справување со обидите за илегални преминувања на тој дел од нашата јужна граница, како и за условите за сместување и работа на припадниците на Армијата на Република Македонија.

karaula_bogorodica_2

WAC1
Претедателот Иванов прогласен за почесен член на Советот за светски прашања во Јордан
Среда, 21 Ноември 2018

Претседателот Иванов вечерва во Аман, беше прогласен за почесен член на „Советот за светски прашања", независна научна институција која се занимава со прашања од интернационален карактер. Пред членовите на Советот, македонскиот претседател одржа предавање на тема: „Балканот, Кавказот и Блискиот Исток: Бермудскиот триаголник на Европа".

Во своето предавање, македонскиот претседател порача дека многу иницијативи, проекти и преговори кои биле наменети за регионите на Балканот, Кавказот и Блискиот Исток пропаднале, нагласувајќи дека во овие региони живеат многу етнички, јазични и религиски групи. Според македонскиот претседател овие се места каде што се испреплетуваат и каде што се допираат поранешните империи, со што настанувале и конфилкти.

„Но каде што биле империите, таму се создавал и отворен простор. Луѓето немале граници и затоа најчесто тие го користиле целиот простор. Балканот е врската меѓу Европа и Блискиот Исток", рече претседателот Иванов.

Историјата, според него, покажала дека овие регионите живееле во релативен мир и благосостојба, во време кога се дел од отворен простор и затоа е потребна интеграцијата.

„Кој комуницира тој се интегрира, кој не комуницира тој се гетоизира и му требаат непријатели. Меѓу Балканот, Кавказот и Блискиот исток за време на империите немало граници. Луѓето слободно можеле да комуницираат да се запознаваат и меѓусебе да тргуваат", рече македонскиот претседател.

Претседателот Иванов во своето предавање потсети дека и Македонија е домаќин на Светските конференции за дијалог меѓу религиите и цивилизациите и порача дека нашата држава е голем поддржувач и активен учесник во Алијансата на цивилизациите, чија мисија е да промовира дијалог.

Претходно, претседателот Иванов го посети Бирото за дизајн и развој на Кралот Абдула Втори.

Со предавањето во Советот за светски прашања во Аман, претседателот Иванов ја заврши официјалната посета на Хашемитското Кралство Јордан, за време на која со највисоки државни и воени почести беше примен од Кралот Абдула Втори Ибн Ал Хусеин, а оствари средби и со јорданскиот премиер, д-р Омар Разар, со претседателот на Сенатот, г. Фаисал Ел-Фајез и со спикерот на Претставничкиот дом г. Атеф Таравнех.

WAC2

1._Jordan-premier_1
Претседателот Иванов на средби со јорданскиот државен врв: Сеопфатна и партнерска соработка меѓу Македонија и Јордан
Понеделник, 19 Ноември 2018

Претседателот на Република Македонија, д-р Ѓорге Иванов, во рамки на официјалната посета на Хашемитското Кралство Јордан, денеска во Аман, оствари средби со премиерот на Кралството Јордан, д-р Омар Разар, со претседателот на Сенатот, г. Фаисал Ел-Фајез, со спикерот на Претставничкиот дом г. Атеф Таравнех, како и со членови на Претставничкиот дом.

На средбата со јорданскиот премиер Разар, претседателот Иванов истакна дека уште од воспоставувањето на дипломатските односи, Република Македонија се стреми кон стабилни и пријателски релации со Хашемитското Кралство Јордан.

Македонскиот претседател изрази надеж дека со интензивирањето на политичкиот дијалог, ќе се отвори можност за натамошна идна соработка во сферата на економијата, безбедноста, културата и образованието, преку потпишување на меѓу-владини договори и унапредување на правната рамка.

Претседателот Иванов и премиерот Разар разменија мислења и во однос на бегалската и мигрантската криза и се осврнаа на предизвиците на Блискиот Исток и на состојбите во Европа. Во тој контекст, македонскиот претседател го поздрави важниот придонес што Кралството Јордан го има во рамките на хуманитарниот аспект на кризата и згрижувањето на бегалците, нагласувајќи дека Република Македонија ги поддржува напорите за постигнување на траен мир на Блискиот Исток.

На средбата со претседателот на Сенатот, г. Фаисал Ел-Фајез и со спикерот на Претставничкиот дом г. Атеф Таравнех, претседателот Иванов изрази уверување дека оваа официјална посета ќе ѝ даде нов импулс на севкупната соработката меѓу Република Македонија и Кралството Јордан во сите сфери од заеднички интерес и дека меѓусебното пријателство ќе продолжи да се развива. Претседателот Иванов го истакна фактот дека се поставени темелите за сеопфатна и партнерска соработка на долг рок. Првите луѓе на јорданскиот парламент ја изразија подготвеноста за унапредување на парламентарна соработка меѓу Република Македонија и Хашемитското Кралство Јордан.
2._Jordan_-_senat_2

 
Почеток < Пред 1 2 3 4 5 6 7 8 9 10 Следно > Крај
Страница 6 од 197