Новости
Претседателот Иванов покровител на македонското Претседателство со Европскиот форум за намалување на ризици од катастрофи
Понеделник, 22 Ноември 2010

Претседателот на Република Македонија д-р Ѓорге Иванов ќе биде покровител на Македонското Претседателство со Европскиот форум за намалување на ризици од катастрофи 2010 – 2011 година.
Македонското претседавање со Форумот е сериозен придонес на нашата земја кон регионалните и глобалните напори за градење на побезбеден свет. Европскиот форум за намалување на ризици од катастрофи е водечки европски форум, дел од системот на Меѓународната стратегија за намалување на ризици од катастрофи, која работи на превенцијата на несреќите и катастрофите предизвикани од природата или од човечки фактор и намалувањето на последиците на нивното настанување. Република Македонија и македонската Национална платформа за намалување на ризици, го даваат својот придонес во подготвувањето за подобро намалување на ризиците и справување со несреќите и катастрофите, и во таа насока македонското претседавање со Европскиот форум ќе претставува дополнителен поттик за институциите и субјектите во Република Македонија кои се опфатени со Националната платформа. Како држава, Македонија има високо ценет и развиен модел и систем за проценка и подготовка за ризиците.
Како покровител на македонското Претседателство со Европскиот форум, Претседателот Иванов најави иницијатива за организирање на самит на шефови на држави од регионот на Југоисточна Европа и земјите од опкружувањето на Европската Унија.

Средби на маргините на Самитот на НАТО во Лисабон
Сабота, 20 Ноември 2010


Претседателот на Република Македонија д-р Ѓорге Иванов на маргините на Самитот на НАТО во Лисабон оствари повеќе неформални средби.

Претседателот на Соединетите Американски Држави Барак Обама на денешната средба со Претседателот Иванов изрази жалење што Република Македонија се уште не е член на Алијансата и упати честитки за исклучителниот македонски придонес во Авганистан и благодарност за партнерството кое Република Македонија го негува со САД.

На средбата се разговараше за процесот за надминување на разликите околу името.

Претседателот Обама истакна дека САД остануваат посветени и сакаат да помогнат ова прашање што побрзо да се надмине со заемно прифатливо решение. Претседателот Иванов истакна дека Република Македонија е таа која бара решение, и додаде дека поради овој наметнат спор трпиме реални последици и дека сме подготвени за решение.

Претседателот Иванов му укажа на Претседателот Обама дека за Република Македонија е исклучително значаен ангажманот на САД во овој процес.



На средбата со канцеларот на Германија Ангела Меркел, на нејзино барање, Претседателот Иванов ја информираше Меркел за процесот за надминување на разликата околу името со Грција.

Претседателот Иванов нагласи дека Република Македонија е подготвена за решение, и додаде дека, за разлика од порано, сега постои попозитивна клима по ова прашање, како и дека се одржуваат чести средби и контакти за кои Претседателот верува дека можат да доведат до заемно прифатливо решение.

Канцеларката Меркел изрази надеж дека со конструктивен пристап на двете страни тоа ќе биде направено што е можно побрзо, за Република Македонија да си го земе своето заслужено место во Алијансата.

 



Државниот секретар на САД Хилари Клинтон на средбата со Претседателот Иванов изрази целосна подготвеност за натамошна тесна соработка со Претседателот и со Република Македонија, и изрази надеж дека со заеднички напори што поскоро Македонија ќе си го заземе заслуженото место во Алијансата.

Државниот секретар Клинтон искажа благодарност за лидерството на Претседателот Иванов и огромната поддршка во глобалната цел преку ангажманот на Македонија во мисијата ИСАФ.

 

 



Претседателот Иванов оствари средба со Генералниот Секретар на Обединетите нации Бан Ким-мун, кој лично се извини за неодамнешниот случај со регистарот на Обединетите нации, и притоа потенцираше дека ОН имаат целосна почит кон македонскиот јазик.

На средбата со Претседателот на Република Турција Абдула Ѓул, беше истакнато дека Република Македонија може да смета на целосна и сестрана поддршка од страна на Турција.

 

 



Авганистанскиот Претседател Хамид Карзаи на средбата со Иванов се заблагодари за ангажманот на македонските мировници, и за нивната посветеност за просперитетот на Авганистан.

Претседателот Иванов нагласи дека со заеднички напори ќе дојдеме до крајната цел  - изградба на демократско општество засновано на владеење на правото и почит за човековите права.

 

 




На средбата со Претседателот на Европскиот Совет Херман ван Ромпуј и Претседателот на Европската Комисија Жозе Мануел Баросо беше нагласена подготвеноста за натамошна тесна соработка во интегративниот процес на Република Македонија во Европската Унија.

Честитка по повод верскиот празник Курбан Бајрам
Вторник, 16 Ноември 2010


Претседателот на Република Македонија д-р Ѓорге Иванов по повод верскиот празник Курбан Бајрам денеска упати честитка до Поглаварот на Исламската верска заедница Реис Ул Улема Сулејман ефенди Реџепи.

Почитуван Реис Ул Улема Сулејман ефенди Реџепи,

Дозволете ми Вам лично, на членовите на Ријасетот, муфтиите, имамите и на сите граѓани од исламска верисповед во Република Македонија да упатам најсрдечни честитки по повод големиот исламски празник Курбан Бајрам.

Најискрено посакувам празникот да го поминете во добро здравје, радост, среќа и хармонија споделувајќи љубов со ближните.

Курбан Бајрам е празник на солидарноста и зближувањето ден кога благосостојбата и подава рака на сиромаштијата, ден кој ги потенцира сите човечки доблести. Токму во овој дух нека помине и годинешново празнување.

Верувам дека Исламската верска заедница и сите нејзини верници како нераскинлив дел од македонското општество и понатаму ќе бидат активни чинители во градењето на соживот и разбирање помеѓу различните вери и етникуми во Република Македонија.


Нека е Честит Курбан Бајрам

Д-р Ѓорге Иванов

Конференција на хрватската академска истражувачка мрежа во Сплит
Понеделник, 15 Ноември 2010


Претседателот на Република Македонија д-р Ѓоргe Иванов денеска во Сплит присуствуваше на свеченото отворање на 12. Конференција на Хрватската академска истражувачка мрежа - CARNet CUC 2010, на која одржа предавање.

На конференцијата присуствуваа Претседателот на Хрватска Иво Јосиповиќ, градоначалникот на Сплит Жељко Керум и директорот на CARNet Звонимир Станиќ.

Хрватската академска и истражувачка мрежа е формирана во 1991 година како проект на тогашното Министерство за наука и технологија на Хрватска, а во 1995 година хрватската Влада донесе уредба за основање на CARNet. Нејзините активности се насочени кон нудење интернет услуги, поттикување на развојот на информатичкото општество и образование за новото време.

Во делегацијата што ја предводи шефот на државата во Сплит е и министерот за информатичко општество Иво Ивановски.



Пред почетокот на 12. Конференција на хрватската академска истражувачка мрежа - CARNet CUC 2010, Претседателот Иванов оствари средба со хрватскиот претседател на која се разговараше за македонско-хрватските односи. Двајцата претседатели констатираа дека Македонија и Хрватска немаат отворени прашања. Политичките и економските односи меѓу двете земји се одлични и соработката треба да продолжи во таа насока.

Освен за билатералните односи претседателите Иванов и Јосиповиќ разменија мислења и за евроинтегративните процеси, како и за состојбите во регионот. Притоа беше потврдена успешната соработка во НАТО, а нагласена беше и конструктивната политика на двете држави што резултира со позитивна атмосфера во регионот. Двајцата претседатели разговараа и за проекти со кои ќе продолжи добрата економска соработка како што е инфраструктурното поврзување на Јадранската магистрала со Коридорите 8 и 10.

Посета на македонските мировници во Авганистан
Четврток, 11 Ноември 2010


Претседателот на Република Македонија д-р Ѓорге Иванов денеска ги посети македонските мировници распоредени во мисијата ИСАФ во Авганистан.

Македонија треба да се гордее со учеството на нашите војници во мисијата ИСАФ во Авганистан бидејќи тие на најдобар начин ги претставуваат сите реформи во армијата, како и за тоа до каде се подготовките за нашето полноправно членство во НАТО, изјави денеска Претседателот на Република Македонија д-р Ѓорге Иванов, кој е во прва посета на македонските војници во Авганистан. Претседателот Иванов нагласи дека иако се уште Македонија не е членка на НАТО, во мисијата ИСАФ во Авганистан покажува дека ги исполнува сите обврски и се однесува како и сите земји членки на Алијансата. Тој потенцира дека македонските мировници во оваа мисија придонесуваат и за светскиот мир и за градењето на институциите во Авганистан.

Нашите војници професионално ги извршуваат сите обврски. Почитувани се од колегите, но и од локалното население. Иако сме мала држава, на овој начин придонесуваме да се стабилизира еден дел од светот, изјави Претседателот Иванов и додаде дека ова искуство ќе им помогне на нашите војници и за следните мисии.




Претседателот Иванов оствари средби со највисокиот цивилен претставник на НАТО во Авганистан, Марк Седвил и со командантот на ИСАФ во Авганистан генералот Дејвид Петреус.


На средбите, амбасадорот Седвил и генералот Петреус го информираа Претседателот Иванов за постигнувањето и придонесот на македонските војници во мисијата ИСАФ при што изразија задоволство и ја потенцираа нивната професионалност и посветеност во извршувањето на задачите.

Се разговараше и за придонесот на Република Македонија во ИСАФ, за достигнувањата во процесот на транзиција, напредокот на демократските процеси во Авганистан и градењето на капацитетите на авганистанските безбедносни сили.


Придонесот на Македонија во мисијата ИСАФ почна во август 2002 година, со симболично испраќање на двајца офицери во рамки на турскиот контингент. Во моментов Република Македонија во ИСАФ учествува со 242 војници, распоредени во четири поголеми контингенти. Досега во оваа мисија учествувале повеќе од 1.500 македонски војници.

Средба со министерот за надворешни работи на Полска Радослав Сикорски
Понеделник, 08 Ноември 2010


Претседателот на Република Македонија д-р Ѓорге Иванов денеска го прими Министерот за надворешни работи на Република Полска, Радослав Сикорски.

На средбата беше потврдено искреното пријателство меѓу двете држави и високото ниво во односите, кои во континуитет бележат позитивен развој.

Исто така на средбата се истакна задоволството од македонско-полската соработка, поддршката во евроинтегративниот процес на Република Македонија како и очекувањето оваа соработка да продолжи и во иднина.

Претседателот Иванов истакна дека очекува проширувањето на Европската Унија со земјите од Балканот да се најде на листата на приоритети за време на Полското Претседателство со Европската Унија во втората половина на 2011 година.

Во разговорите Претседателот Иванов подвлече дека билатералните односи меѓу Република Македонија и Република Полска се многу добри и без отворени прашања, како и подготвеноста од двете страни за натамошно интензивирање на односите и соработката во сите сфери од заемен интерес.

 
Почеток < Пред 161 162 163 164 165 166 167 168 169 170 Следно > Крај
Страница 165 од 186