Соопштенија
PRM
Честитка од претседателот Иванов по повод почетокот на рамазанските пости
Вторник, 15 Мај 2018

Претседателот на Република Македонија, д-р Ѓорге Иванов, по повод почетокот на рамазанските пости, упати честитка до поглаварот на Исламската верска заедница во Република Македонија, Реис-ул-улема Хаџи Сулејман ефенди Реџепи, до членовите на Ријасетот и до сите припадници на исламската вероисповед во Република Македонија.

Почитуван Реис–ул–улема Хаџи Сулејман ефенди Реџепи,

Дозволете ми, Вам лично и на членовите на Ријасетот, муфтиите, имамите и на сите граѓани од исламска вероисповед во Република Македонија, да Ви упатам честитки по повод почетокот на рамазанските пости.

Во исламот, Рамазан е светиот месец, тоа е месец на молитва, добрина, простување, милосрдие и љубов. За време на Рамазан се слави духовното воздигнување и телесното прочистување.

Деновите на пост се можност за секој верник да го отвори своето срце кон великодушноста и хуманоста, помагајќи им на сиромашните и изнемоштените, и молејќи се за простување на своите гревови.

Нека овој празник биде поттик за меѓусебно помагање и почитување бидејќи само заедно, почитувајќи ги разликите ќе успееме да изградиме посветла иднина за сите граѓани на Република Македонија.

Во духот на празникот Ви посакувам лесни рамазански пости. На сите припадници на исламската вероисповед во земјава им посакувам мир, благосостојба, љубов и проштавање.

д-р Ѓорге Иванов

Donald_Tusk
Честитка до г. Доналд Туск, Претседател на Европскиот совет, по повод 9 Mај - Денот на Европа
Среда, 09 Мај 2018

Претседателот на Република Македонија, д-р Ѓорге Иванов, по повод 9 Mај, Денот на Европа, упати честитка до г. Доналд Туск, Претседател на Европскиот совет.

Ваша Екселенцијо,

Дозволете ми, во името на граѓаните на Република Македонија и во свое лично име, да Ви упатам најсрдечни честитки по повод 9 Мај – Денот на Европа.

Пред сè, би сакал да Ви се заблагодарам за Вашето учество на Состанокот на лидерите на земјите од Процесот Брдо-Бриони во Скопје. Со тоа пративте позитивна и охрабрувачка порака за европската иднина на секоја земја од регионот.

„Европа не е само континент, таа, исто така, е идеја. Оваа идеја се нарекува слобода", рече големиот Eвропеец Куденхов Калерги. Со приближувањето кон европското семејство, ние го движиме македонското општество кон слободниот проток на луѓе, капитал, стоки, услуги и идеи. Приближувањето кон Унијата нè мотивира доброволно да се трансформираме и реформираме за доброто на македонските граѓани. Република Македонија е подготвена, веднаш и неодложно да ја започне следната фаза од интеграцијата во Европската Унија, што впрочем беше потврдено и со последниот извештај на Европската комисија за напредокот на Република Македонија и безусловната препорака за давање датум за почеток на преговорите за членство. Членството за нас е и право, но и обврска, исто како што кредибилната европска перспектива на Западниот Балкан е обврска за Европската Унија. Како држава остануваме доследни во исполнувањето на преземената обврска за спроведување на одлуката на Европската Унија да го држиме затворен Балканскиот мигрантски коридор.

Ве повикувам да ја искористите веќе потврдената позитивна практика на паралелни процеси на евроинтеграција и на надминување на отворените билатерални прашања и во случајот со Република Македонија. Со добра волја и желба за стабилен и напреден регион, можни се заемно прифатливи и одржливи решенија во согласност со меѓународното право и почитувањето на правото на самоидентификација и човечко достоинство.

Со такво очекување и со желби за добро здравје, натамошна успешна работа и лична среќа, Ви ги упатувам господине Претседателе и драг пријателе, изразите на моето највисоко почитување.

д-р Ѓорге Иванов

PRM_Ivanov_PRB_Radev
Средба со претседателот на Република Бугарија г. Румен Радев
Недела, 06 Мај 2018

Претседателот на Република Македонија, д-р Ѓорге Иванов, денеска во Дојран оствари средба со претседателот на Република Бугарија г. Румен Радев, кој престојува во работна посета на Република Македонија.

На средбата беше разговарано за продлабочување на одличните билатерални односи преку јакнење на политичкиот дијалог, за интегративните процеси на Република Македонија и беа разменети мислења за актуелните предизвици во регионот и во Европската Унија.

Претседателот Иванов изрази надеж дека Република Бугарија како актуелен претседавач со Европската Унија, по добиената позитивна препорака од Европската Комисија, ќе продолжи да ги поддржува македонските интегративни процеси, особено за одредување на датум за отпочнување на пристапните преговори.

„Самитот ЕУ – Западен Балкан во Софија, по Процесот Брдо-Бриони, ќе биде одлична можност уште еднаш да се потврди европската перспектива за целосната интеграција на земјите од Западен Балкан, бидејќи само на тој начин се гарантира мирот, стабилноста и просперитетот на нашиот регион, кој сè уште е подложен на безбедносни и геостратешки предизвици", рече македонскиот претседател.

Бугарскиот претседател изрази задоволство од учеството на припадниците на Армијата на Република Македонија на воената парада во Софија.

Претседателот Иванов и претседателот Радев разговараа и за унапредување на безбедносната и армиската соработка и разменија мислења за активности насочени кон справување со предизвиците од илегалната миграција, тероризмот и насилниот екстремизам.

На средбата, двајцата претседатели ја реафирмираа заемната посветеност за конструктивно унапредување на севкупните пријателски односи меѓу двете земји и во тој контекст изразија задоволство од континуираниот политички дијалог на највисоко ниво. Претседателот Иванов на покана на претседателот Радев ќе престојува во возвратна официјална посета на Република Бугарија во месец јуни оваа година.

BBP3x4
Заеднички заклучоци од состанокот на лидерите на земјите во Процесот Брдо-Бриони Скопје, Република Македонија, 27 април 2018 година
Петок, 27 Април 2018


BB_family_photo

Ние, лидерите на Процесот Брдо-Бриони, во присуство на нашите гости, Претседателот на Европскиот совет, Доналд Туск и Премиерот на Република Бугарија, Бојко Борисов, признаваме дека обновениот фокус на ЕУ на нашиот дел од Европа повикува на наш одговорен стратешки одговор.

Ние, лидерите на Процесот Брдо-Бриони, потврдуваме дека одговорноста сега е кај земјите кандидати за членство во ЕУ и потенцијалните кандидати за да продолжат истрајно со потребните реформи во пристапниот процес, со што ќе ја реализираат оваа заедничка стратешка ориентација. Свесни дека владеењето на правото, основните човекови права, ефикасното судство и доброто владеење, како и борбата против корупцијата и организираниот криминал се клучни за напредокот, развојот и стабилноста, ќе вложиме натамошни напори за сеопфатни реформи насочени кон нивно зајакнување. Ги поддржуваме објективните критериуми за проширување на Европската унија со земјите членки на Процесот Брдо-Бриони, каде што е истакната проценката на индивидуалните заслуги - со што на секоја од земјите и се дава европска перспектива.

Ние, лидерите на Процесот Брдо-Бриони, ги поздравуваме пораките и конкретните предлози од Стратегијата на ЕУ за Западен Балкан: Потврда за веродостојно проширување и зајакнување на ангажманот на ЕУ со Западен Балкан. Го поздравуваме бугарското Претседателство на Советот на Европската Унија, особено во врска со приоритетот за зајакнување на европската перспектива на Западен Балкан и синергијата со ставовите на земјите членки на Процесот Брдо-Бриони за зацврстување на траен мир, безбедност и просперитет во Југоисточна Европа. Го поздравуваме претстојниот Самит ЕУ-Западен Балкан во Софија, како конкретен израз на обновениот пристап на ЕУ кон регионот. Особено цениме што Хрватска и Словенија ќе дадат висок приоритет на оваа стратешка ориентација и ќе организираат самити во овој формат за време на нивните претседателства со Советот на Европската унија во првата половина на 2020 година и во втората половина на 2021 година. Со гордост истакнуваме дека за ваков вид на засилен пристап на ЕУ кон Западен Балкан, процесот Брдо-Бриони континуирано се залагаше, така што тоа го сметаме и за наш успех.

Заклучивме дека е потребна поголема синергија во регионалните иницијативи и механизми во поглед на градење на инклузивен регион. Силно го охрабруваме и меѓусебно го поддржуваме членството на сите земји членки на Процесот Брдо-Бриони во регионалните иницијативи и механизми како еден од најдобрите начини за постигнување на инклузивна и ефикасна соработка во регионот. Во таа смисла, особено ја поздравуваме синергијата постигната меѓу Процесот Брдо-Бриони и Берлинскиот процес.

Свесни дека процесот на интеграција во ЕУ останува стратешки катализатор за зајакнување на мирот, безбедноста, стабилноста и просперитетот во нашиот регион, се обврзуваме да продолжиме да даваме заемна поддршка во процесите на европска и евроатланска интеграција, а подоцна и за аспирантите во НАТО. За таа цел, ја нагласуваме важноста од воздржување од каква било поларизирачка популистичка и националистичка реторика или активност што може вештачки да ја зголеми тензијата во билатералните и регионалните односи што може да резултира со нестабилност. Очекуваме дека, и покрај постојните отворени прашања и спорови, пријателската соработка, меѓусебното разбирање, почитувањето и дијалогот во добра верба меѓу земјите членките на Процесот Брдо-Бриони ќе бидат дополнително зајакнати, во склад со целосното придржување кон принципите на суверенитет, територијален интегритет, немешање во внатрешните работи на државите, неприфаќање на насилство, избегнување на инциденти и воздржување од еднострани дејства, особено со употреба на сила или закана за употреба на сила.

Го охрабруваме решавањето на отворените прашања и спорови во духот на добрососедството и во согласност со меѓународното право, повикувајќи се на средствата за мирно решавање, пред се, на постојаните меѓународни судови и трибунали, како и арбитража.

Како продолжение на Вонредниот самит на Процесот во Загреб во ноември 2015 година, го поздравуваме неодамнешниот прв состанок на шефовите на нашите разузнавачки агенции во Скопје, како знак на подготвеност за соработка во делот на безбедносните прашања од заеднички интерес, како што се нелегалната миграција, радикализмот, екстремизмот, тероризмот, организираниот криминал. Заедно треба да работиме на зајакнување на отпорноста на нашите општества од нови форми на подривачки елементи и на подобра размена на информации за различните видови на хибридни закани. Во оваа смисла, земјите кандидати за членство во ЕУ и потенцијалните кандидати треба да се стремат да ја унапредат соработката со ЕУ, особено во рамките на ЗНБП, за оние кои се подобни, секоја во согласност со своите приоритети.

Очекуваме натамошна помош од ЕУ за подобрување на транспортната, енергетската и дигиталната поврзаност на земјите членки на Процесот Брдо-Бриони, со силна поддршка на постојните проекти. Ги поддржуваме натамошните напори за подобрување на енергетската безбедност, енергетската ефикасност и диверзификацијата како клучна инвестиција во градењето на енергетска одржливост и независност и важен двигател на растот, конкурентноста и регионалната енергетска интеграција. Ја повикуваме ЕУ да продолжи да го поддржува развојот на интрарегионалната економска интеграција, со цел да ја зголеми атрактивноста на регионалниот пазар и да го унапреди економскиот раст.

Сметаме дека е особено неопходно да се создадат јасни можности за младите и да се поттикне создавањето дополнителни образовни можности и можности за вработување преку зголемување на програмите на ЕУ и преку воведување на регионални програми за стипендии за млади луѓе, со што ќе се зголеми мобилноста на учениците и професорите. Ги поддржуваме иницијативите за национални и регионални партнерски старт-ап проекти за млади. Поддржуваме заеднички проекти на младински невладини организации чија цел е промовирање на толеранцијата и меѓусебното разбирање и елиминирање на сите видови предрасуди, со што се гради инклузивна генерација која ги почитува различностите и плурализмот.

Се согласуваме Република Албанија да биде следниот домаќин на состанокот на лидерите на Процесот Брдо-Бријони во 2019 година.

mogjerini
Средба со г-а Федерика Могерини, висок претставник на ЕУ за надворешни работи и безбедносна политика и заменик-претседател на ЕК
Среда, 18 Април 2018

Претседателот на Република Македонија, д-р Ѓорге Иванов денеска ја прими г-а Федерика Могерини, висок претставник на Европската Унија за надворешни работи и безбедносна политика и заменик-претседател на Европската комисија.

На средбата беа разменети мислења за актуелната политичка состојба во Република Македонија, за процесот на европска интеграција, како и за клучните предизвици со кои се соочуваат регионот и Европската Унија.

Претседателот Иванов ја поздрави обновената препорака на Европската Комисија за отворање на пристапни преговори со Република Македонија, истакнувајќи дека деблокирањето на интегративните процеси преку одредувањето на датум за почеток на пристапните преговори, позитивно ќе влијае врз реформските процеси и врз целата општествено-политичка состојба во Република Македонија.

Двајцата соговорници констатираа дека доследното и заедничко придонесување во исполнувањето на реформските процеси, од страна на сите чинители во државата, ќе придонесе за европската иднина на Република Македонија.

Претседателот Иванов порача дека позитивната препорака за отворање на пристапни преговори за Република Македонија и за Република Албанија, има охрабрувачко влијание за кредибилноста на ЕУ и перспективата на целиот регион.

Имајќи ја предвид позитивната реторика од страна на лидерите од земјите од регионот за напредокот на секоја од другите земји од Западен Балкан, г-га Могерини истакна дека за прв пат овој процес на проширување се фокусира на оригиналната идеја на Европската Унија, а тоа е мирот.

На средбата претседателот Иванов и високиот претставник на Европската Унија, г-а Могерини, разменија мислења и во однос на тековните разговори за прашањето за разликата околу името.
mogjerini_1

Jildirim-Istanbul
Средба на претседателот Иванов со турскиот премиер Јилдирим
Среда, 11 Април 2018

Претседателот на Република Македонија, д-р Ѓорге Иванов, во рамки на работната посета на Република Турција и учеството на 21. Евроазиски економски самит, во Истанбул оствари средба со претседателот на Владата на Република Турција, г. Бинали Јилдирим.

Изразувајќи задоволство од честите контакти меѓу двете држави на високо ниво, двајцата соговорници разменија мислења за севкупните билатерални односи меѓу Република Македонија и Република Турција, актуелните состојби во двете земји, како и за состојбите во регионот.

На средбата беше констатирано дека двете земји негуваат традиционално пријателски односи, и се согласија за потребата од продлабочување на економската соработка и интензивирање на трговската размена.

Македонскиот претседател се заблагодари за принципиелната поддршка од Република Турција за членство на Република Македонија во НАТО, истакнувајќи дека покана за членство на Македонија во НАТО ќе биде дополнителен поттик за реформските процеси во земјата и ќе создаде огромни придобивки за долгорочната стабилност и безбедност на регионот.

 
Почеток < Пред 1 2 3 4 5 6 7 8 9 10 Следно > Крај
Страница 4 од 163