Соопштенија
PRM_cestitka_Ramazan
Честитка од претседателот Иванов по повод Денот на независноста на Соединетите Американски Држави
Вторник, 04 Јули 2017

Претседателот на Република Македонија, д-р Ѓорге Иванов, упати честитка до претседателот на Соединетите Американски Држави, г. Доналд Трамп, по повод Денот на независноста на Соединетите Американски Држави.

Почитуван господине Претседателе,

По повод Денот на независноста на Соединетите Американски Држави, ми претставува особена чест и големо задоволство, во мое лично име и во името на граѓаните на Република Македонија, да Ви упатам најсрдечни честитки и искрени желби за севкупниот просперитет на Вашата пријателска држава, како и за благосостојба на американскиот народ.

Воедно, би сакал да ја искажам својата длабока увереност дека во претстојниот период нашите билатерални односи и понатаму ќе се развиваат со уште посилна динамика, отворен и конструктивен дијалог на заемно разбирање и доверба, како и поцврсти и поинтензивни економски релации.

Заложбите за полноправно членство на Република Македонија во НАТО Алијансата и евроатлантските интегративни процеси се фокусните точки на нашето континуирано политичко дејствување, за чие остварување очекуваме и во иднина отворена поддршка од страна на пријателските Соединети Американски Држави. Господине Претседателе и во оваа пригода сакам да потенцирам дека Република Македонија високо ја цени улогата на Соединетите Американски Држави на глобален план, и сакам да Ве уверам дека целосно сме посветени на зацврстување и на содржинско збогатување на стратегиското партнерство со Вашата голема нација. Бидете уверени дека сме подготвени за тесна и конструктивна соработка на тој план.

Со такво уверување и со најискрени желби за Ваша натамошна успешна работа, добро здравје и лична среќа, Ви ги упатувам, господине Претседателе, изразите на моето највисоко почитување.

д-р Ѓорге Иванов

Nimic
Средба на претседателот Иванов со амбасадорот Метју Нимиц, специјален пратеник на ГС на ОН
Недела, 02 Јули 2017

Претседателот на Република Македонија, д-р Ѓорге Иванов, денеска го прими амбасадорот Метју Нимиц, специјален пратеник на генералниот секретар на Обединетите нации за прашањето за разликата околу името.

На средбата беше разгледана актуелната состојба во разговорите за надминување на ова прашање.

Претседателот Иванов ја поздрави конструктивноста и фокусираноста на мерките за градење на доверба меѓу двете држави и повика на нивно проширување и внесување на нови содржини.

Македонскиот претседател порача дека Република Македонија и натаму ќе учествува во процесот што се води под покровителство на Обединетите нации и истакна дека е потребно да се создаде позитивен амбиент со цел подобро разбирање и почитување.

„Македонската страна со години наназад дава континуиран придонес и иницијативи во насока на градењето на доверба меѓу двете држави и двете општества. Неопходно е да се даде дополнителен импулс од двете страни во надминување на ова прашање, кое има суштинско значење за стабилноста и просперитетот на целиот регион", истакна претседателот Иванов на средбата со амбасадорот Нимиц.

Претседателот Иванов истакна дека во процесот кој се води во рамки на Обединетите нации, неопходно е стриктно придржување до рамката во која се водат разговорите - резолуциите на Советот за безбедност, Времената спогодба и пресудата од Меѓународниот суд на правдата во Хаг. Во таа насока, претседателот Иванов ја потенцираше потребата од почитување на меѓународното право и доследност кон меѓународно преземените обврски.

PRM_cestitka_Ramazan
Честитка од претседателот Иванов по повод празникот Рамазан-бајрам
Недела, 25 Јуни 2017

Претседателот на Република Македонија, д-р Ѓорге Иванов, по повод големиот муслимански празник Рамазан-бајрам, упати честитка до поглаварот на Исламската верска заедница во Република Македонија, Реис–ул–улема Хаџи Сулејман ефенди Реџепи, до членовите на Ријасетот на ИВЗ и до сите припадници на исламската вероисповед во Република Македонија.

Почитуван Реис–ул–улема Хаџи Сулејман ефенди Реџепи,

Дозволете ми, Вам лично, на членовите на Ријасетот, муфтиите, имамите и на сите граѓани од исламска вероисповед во Република Македонија да Ви упатам честитки по повод празникот Рамазан-бајрам.

Рамазан-бајрам е еден од двата најзначајни исламски празника. Тој го означува крајот на едномесечниот пост и го слави духовното и телесното прочистување. Следните три дена, светиот месец ќе се слави во кругот на семејството и блиските.

Овој месец е познат и како месец на добрина, милост, солидарност и простување; мисли и заложби на сите нас подеднакво, бидејќи воздржаноста од лошите мисли и духовното воздигнување се универзални човечки вредности.

Во духот на Празникот, Ви упатувам честитки со желби за лична среќа и духовен мир, а на сите припадници на исламската вероисповед во земјава им посакувам благосостојба, љубов и бериќет.

Честит Бајрам – Бајрам Мубарек!

д-р Ѓорге Иванов

MNR_Norveska
Средба на претседателот Иванов со министерот за надворешни работи на Кралството Норвешка, г. Борге Бренде
Петок, 23 Јуни 2017

Претседателот на Република Македонија, д-р Ѓорге Иванов, денеска го прими министерот за надворешни работи на Кралството Норвешка, г. Борге Бренде.

На средбата двајцата соговорници изразија подготвеност за продолжување и унапредување на севкупната соработка, како и за интензивирање на политичкиот дијалог меѓу Република Македонија и Кралството Норвешка.

Соговорниците разменија мислења за актуелните политички случувања, за евроатлантските перспективи на Република Македонија, како и за безбедносните прашања и предизвици со кои се соочуваат земјите од регионот.

„Не само нашата држава и регион, туку и Европа, и целиот свет се соочува со сериозни предизвици. Бегалската и мигрантската криза, тероризмот и безбедносните ризици, растечката нетолерантност и непочитување на различностите, непочитувањето на меѓународното право, се само дел од предизвиците, кои бараат тесна соработка и глобални одговори", порача македонскиот претседател.

Продолжувањето на процесот на проширување треба да биде стратешка цел на ЕУ, независно од внатрешните и надворешните предизвици со кои се соочува Унијата, а стабилен, безбеден и економски силен Балкан ќе придонесе за стабилноста и просперитетот на Европа, посочи претседателот Иванов на средбата, истакнувајќи дека Република Македонија треба што поскоро да ги почне преговорите за членство во ЕУ.

Министерот за надворешни работи, г. Бренде, истакна дека Кралството Норвешка силно ги поддржува евроатланските аспирации на Република Македонија, укажувајќи дека интеграцијата на Балканот во ЕУ е од значење за стабилноста и безбедноста на Европа.

Во однос на НАТО интеграцијата, македонскиот претседател истакна дека Република Македонија е одговорен член во меѓународната заедница и континуирано и активно придонесува за регионалната безбедност и стабилност.

„Република Македонија континуирано ја одржува компатибилноста со НАТО стандардите и нашето членство во НАТО ќе придонесе во создавањето позитивна клима во земјата и во регионот ", порача претседателот Иванов, укажувајќи на потребата за итен влез на Република Македонија во Алијансата.

Македонскиот претседател се заблагодари за досегашната помош и поддршка од Кралството Норвешка преку бројни програми и проекти со цел унапредување и развивање на повеќе сегменти и сектори во македонското општество.

PRM_Socuvstvo
Сочувство од претседателот Иванов по повод катастрофалниот шумски пожар во Португалија
Понеделник, 19 Јуни 2017

Претседателот на Република Македонија, д-р Ѓорге Иванов, упати сочувство до претседателот на Португалската Република, г. Марчело Ребело де Суза, по повод катастрофалниот шумски пожар.

Почитуван господине Претседателе,

Длабоко ме потресе веста за катастрофалниот шумски пожар кој изби во регионот околу Педрогао Гранде и предизвика вистинска трагедија во Вашата земја. Искрено жалам за загубените животи, за човечките страдања и големите штети од оваа ужасна трагедија.

Екселенцијо, нема соодветни зборови кои ќе ја намалат Вашата и тагата на граѓаните на Португалија, но дозволете ми, во овие моменти на национална жалост, во името на граѓаните на Република Македонија и во свое лично име, да Ви упатам изрази на најискрено и длабоко сочувство.

Ве молам, Ваша Екселенцијо, изразите на најискрено сочувство да ги пренесете до семејствата на трагично настраданите и до целиот пријателски народ на Португалската Република.

д-р Ѓорге Иванов

mnr_Turcija
Средба на претседателот Иванов со г. Мевлут Чавушоглу, министер за надворешни работи на Р. Турција
Недела, 18 Јуни 2017

Претседателот на Република Македонија, д-р Ѓорге Иванов, денеска го прими министерот за надворешни работи на Република Турција, г. Мевлут Чавушоглу.

На средбата, беше разговарано за натамошното продлабочување на билатералните односи и зголемување на соработката меѓу Република Македонија и Република Турција. Двајцата соговорници изразија задоволство од традиционалното пријателство и партнерство, како и од интензивната комуникација и соработка во сите сфери од заеднички интерес, кои се потврда за одличните односи меѓу Република Македонија и Република Турција.

Изразувајќи благодарност за цврстата и принципелна поддршка на Република Турција во однос на нашите стратешки цели, претседателот Иванов нагласи дека Република Македонија високо ја вреднува поддршката од Турција за употребата на уставното имe на Република Македонија и интеграцијата на земјата во НАТО.

„По решението на политичката криза време е да се создаде нов поттик за членството на Република Македонија во НАТО. Како и досега, ја очекуваме вашата отворена и гласна поддршка", истакна на средбата претседателот Иванов.

Министерот Чавушоглу ја реафирмираше поддршката што Република Турција ја дава на европските и евроатланските интеграции на Република Македонија, укажувајќи дека Република Турција ќе биде доследна на таа континуирана поддршка.

Македонскиот претседател и министерот Чавушоглу разменија мислења и информации за состојбите во регионот, за прашањата од надворешно политички интерес за двете земји, и за потребата од поголема соработка меѓу безбедносните служби на Република Македонија и Република Турција. Во таа насока, претседателот Иванов ја истакна потребата од размена на информации меѓу полициските служби и службите за разузнавање, преземање на заеднички акции, како и изнаоѓањето на ефективни средства и методи за превенција и борба против ширење на насилен екстремизам и тероризам.

Двајцата соговорници ја поздравија економската соработка, со очекување за нејзино натамошно интензивирање, како и плодната соработка на полето на одбраната. Претседателот Иванов се заблагодари за логистичката поддршка за опремување, едукација и обука на АРМ, како и за досегашната хуманитарна помош добиена од Република Труција.

 
Почеток < Пред 1 2 3 4 5 6 7 8 9 10 Следно > Крај
Страница 8 од 154