Соопштенија
PRMportret
Честитка до верниците кои го прославуваат Божиќ според Грегоријанскиот календар
Понеделник, 25 Декември 2017

Претседателот на Република Македонија, д-р Ѓорге Иванов, упати честитка до сите христијански верници кои го прославуваат Божиќ според Грегоријанскиот календар.

Почитувани,

Ми претставува особено задоволство во овие празнични денови да Ви го честитам големиот празник на Христовото раѓање – Божиќ.

Празнувајќи го Божиќ ние се потсетуваме на еден од најзначајните моменти во историјата – денот кога Синот Божји поради љубовта кон човештвото се отелотвори и стана човек. Поистоветувајќи се со нас, Христос ни овозможи и ние да се поистоветиме со Неговите заповеди – да имаме љубов кон Бога и солидарност кон нашите ближни, да простуваме за да ни се прости, да бидеме милостиви заради милоста што веќе ни е укажана. Рождеството Христово – Божиќ како еден од најсветлите и највозвишените денови во христијанството треба да не поттикне кон меѓусебно разбирање и почитување како услов за успех на општеството.

Со таа мисла, упатувам искрени желби за мир, љубов и заедништво, бидејќи само така ќе успееме да изградиме просперитетна иднина и подобар живот за сите граѓани во Република Македонија.

д-р Ѓорге Иванов

PRM_Cavusoglu_01
Средба со потпретседателот на Владата на Република Турција, г. Хакан Чавушоглу
Четврток, 21 Декември 2017

Претседателот на Република Македонија, д-р Ѓорге Иванов, го прими потпретседателот на Владата на Република Турција, г. Хакан Чавушоглу.

Двајцата соговорници изразија задоволство од политичките односи меѓу двете земји, кои ги карактеризира традиционално пријателство и партнерство и исклучителна динамика на активности во сферите од заеднички интерес.

На средбата беа разменети мислења и информации за внатрешните политички прашања на двете земји, за состојбите во регионот, како и за прашањата од надворешно политички интерес за Република Македонија и Република Турција.

Во однос на стратешките цели и приоритети, претседателот Иванов истакна дека Република Македонија ја цени долгогодишната и приципиелна поддршка од Република Турција за интеграцијата на Република Македонија во ЕУ и во НАТО, и укажа дека деблокадата на интегративните процеси ќе се одрази на стабилноста и просперитетот на целиот регион.

Потпретседателот  на турската Влада, г. Чавушоглу истакна дека Република Турција и понатаму ќе биде доследна на поддршката на европските и евроатлантските интеграции на Република Македонија.

Во контекст на пошироките предизвици со кои се соочува регионот и Европа, македонскиот претседател и потпретстедателот Чавушоглу се согласија за потребата од поголема соработка меѓу безбедносните служби на Република Македонија и Република Турција. Во таа насока, претседателот Иванов посочи на потребата од размена на информации меѓу полициските служби и службите за разузнавање, преземање на заеднички акции, како и изнаоѓање на ефективни средства и методи за превенција и борба против ширење на насилен екстремизам и тероризам.

Двајцата соговорници ја поздравија економската соработка, со очекување за нејзино натамошно интензивирање. Претседателот Иванов изрази благодарност до турските институции, пред се до ТИКА, за голем број реализирани проекти во Македонија од хуманитарен карактер и за нивната континуирана поддршка преку донации.

На средбата беа разменети и мислења околу можностите за продлабочување на соработката во сферата на туризмот и образованието, при што беше поздравено финализирањето на правните процедури за целосно спроведување на Спогодбата за активностите на културните центри во двете земји.

PRM_Cavusoglu_02

PRMportret2
Честитка од претседателот Иванов по повод 21 декември-Денот на наставата на турски јазик
Четврток, 21 Декември 2017

Претседателот на Република Македонија, д-р Ѓорге Иванов, по повод одбележувањето на Денот на наставата на турски јазик - 21 декември, упати честитка до припадниците на турската заедница во Република Македонија.

Почитувани сограѓани,

Дозволете ми, во мое лично име и во името на граѓаните на Република Македонија, на сите припадници на турската етничка заедница да Ви го честитам 21 декември, Денот на наставата на турски јазик.

Еден од основните предуслови за зачувување и негување на својата традиција е можноста за образување и творење на мајчин јазик. Во Република Македонија живеат различни народи кои имаат свои јазични и културни обележја. Македонија е земја која знае да ги цени и вреднува истите.

Одбележувањето на овој празник е симбол на почитта на Македонија кон турскиот народ, култура и идентитет. Живеејќи заедно, почитувајќи ги овие културни различности, сите ние придонесуваме за зајакнување на општеството и градење на подобар живот за сите.

Ова е влог и во односите со Република Турција, која е долгогодишен пријател и стратешки партнер со Република Македонија, за што говорат големиот број на средби и реализирани проекти.

Ние и понатаму, со заеднички напори ќе продолжиме да работиме за доброто на сите граѓани во Република Македонија, сè со цел да овозможиме континуиран и уште поголем напредок. Само така ќе успееме да изградиме подобра Македонија за сите.

д-р Ѓорге Иванов

MNR UNGARIJA
Средба со министерот за надворешни работи и трговија на Унгарија, г. Петер Сијарто
Понеделник, 18 Декември 2017

Претседателот на Република Македонија, д-р Ѓорге Иванов, денеска го прими министерот за надворешни работи и трговија на Унгарија, г. Петер Сијарто, кој престојува во официјална посета на Република Македонија.

На средбата беше изразено задоволство од севкупните билатерални односи меѓу Република Македонија и Унгарија кои ги карактеризираат искрено пријателство, взаемно разбирање и почит, како и надеж дека во наредниот период ќе се продлабочи започнатата активна соработка особено во сферата на економијата и трговската размена.

Македонскиот претседател изрази благодарност за цврстата и континуирана поддршка која Република Македонија ја добива од Унгарија како земја членка на НАТО и на Европската Унија, во однос на нашите стратешки цели, евроатлантските интеграции.

„Залагањето, соработката и солидарноста која Унгарија ја рефлектира во однос нашите аспирации во НАТО и во ЕУ, е пример како треба да изгледа односот на земјите - членки кон земјите - кандидати. Унгарија е една од најзначајните партнери и пријатели на Република Македонија и тој однос треба да се негува и да продолжи во иднина", истакна претседателот Иванов.

Во тој контекст, министерот Сијарто ја нагласи неопходноста од динамизирање на евроатлантските процеси на Република Македонија и ја повтори силната унгарска поддршка, за Република Македонија да го добие заслуженото место во НАТО и да ги почне пристапните преговори со ЕУ час поскоро.

Претседателот Иванов ја истакна конструктивната улога која Унгарија ја има во менаџирањето на бегалската и мигрантската криза, преку нејзината соработка и помош изразена во полициски сили и опрема со цел поефикасна заштита на нашата јужна граница, за што, во многу прилики досега е искажана благодарност од македонска страна.

PRM_portret_nov
Честитка од претседателот Иванов по повод државниот празник 8 Декември - Свети Климент Охридски
Петок, 08 Декември 2017

Претседателот на Република Македонија, д-р Ѓорге Иванов, по повод празникот Св. Климент Охридски упати честитка до поглаварот на Македонската православна црква - Охридска архиепископија, архиепископот охридски и македонски г.г. Стефан.

Ваше Блаженство,

Дозволете ми, од свое име и од името на граѓаните на Република Македонија, Вам лично, на членовите на Светиот архијерејски синод на Македонската православна црква – Охридска архиепископија како и на сите православни верници во земјата и во странство, да ви упатам најискрени и најсрдечни честитки по повод големиот празник св. Климент Охридски.

Денешниот ден е посветен на најискусниот и најпросветениот ученик на светите Кирил и Методиј, а тоа е нашиот голем народен светител и просветител – Свети Климент Охридски. Поаѓајќи од неговата длабока вера во Господ Исус Христос, Св. Климент неуморно работел на образовно, морално, етичко и духовно издигнување на народот на Македонија. Не давајќи им сон на своите очи, тој кај луѓето ги всадил позитивните навики на срцето – солидарноста, трудољубивоста, гостопримливоста, трпението, милоста. Овие навики кои станале дел од колективниот карактер на народот, ни помогнале не само да ги пребродиме бурите на историјата, туку и да изградиме автентичен македонски модел на соживот и почитување на различноста.

Во изминативе години исполнети со политички кризи, за жал, дел од овие навики паднаа во заборав. Во основата на сите кризи е моралната криза. Единствен начин како трајно да се надмине политичката, е, пред се, да се надмине моралната криза на нашето општество, преку враќање кон трајните морални и етички вредности и принципи кои пред повеќе од 11 века ни ги пренел Св. Климент Охридски. Така ќе успееме да изградиме хумано и праведно македонско мултиетничко и мултирелигиско општество.

Нека ни е за многу години празникот.

д-р Ѓорге Иванов

PRM-sredba_web
Средба на државниот врв на Република Македонија и лидерите на ВМРО-ДПМНЕ и на ДУИ
Четврток, 30 Ноември 2017

Вечерва во Кабинетот на Претседателот на Република Македонија „Вила Водно" се одржа средба на која присуствуваа претседателот на Република Македонија, д-р Ѓорге Иванов, претседателот на Собранието на Република Македонија, г. Талат Џафери, претседателот на Владата на Република Македонија, г. Зоран Заев, претседателот на политичката партија ВМРО-ДПМНЕ, г. Никола Груевски и претседателот на политичката партија ДУИ, г. Али Ахмети.

Средбата се реализира како резултат на претходно започнатите разговори.

На средбата беа разменети мислења за актуелните случувања во Република Македонија и се разговараше за решенија за излез од моменталната состојба на тензичност во државата, а која што предизвикува загриженост кај граѓаните.

Соговорниците се согласија дека е неопходно сите чинители во општеството да се насочат кон градење консензус за национален дијалог, во функција на помирување и нормализирање на политичките процеси, како основа за продолжување на реформските приоритети на Република Македонија.

За прашањата кои предизвикаа интерес на оваа средба, разговорите ќе продолжат и во иднина.

 
Почеток < Пред 1 2 3 4 5 6 7 8 9 10 Следно > Крај
Страница 8 од 161