Соопштенија
PRMportret
Сочувство до претседателот на Република Турција, г. Реџеп Таип Ердоган
Понеделник, 02 Јануари 2017

Претседателот на Република Македонија, д-р Ѓорге Иванов, по повод нападот во Истанбул, упати изрази на сочувство до претседателот на Република Турција, г. Реџеп Таип Ердоган.

Почитуван господине Претседателе,

Со голем шок и длабока потресеност ја примив веста за трагедијата во Ортакој, Истанбул, во која загинаа 39 лица. Без оглед на тоа каде живееме, ваквата трагична загуба на невини млади животи е уште еден потсетник дека мора да останеме заедно и силни во име на човечноста и да направиме сè за добросостојбата на нашите деца.

Во овие мигови на длабока тага, дозволете ми во име на граѓаните на Република Македонија, да изразам искрено сочувство. Нашите мисли и молитви се со семејствата кои ги изгубија нивните сакани.

Сакам да знаете дека силно го осудуваме ова насилство кое се случи во Истанбул. Искрено се надевам дека додека Република Турција поминува низ овие тешки моменти, целата меѓународна заедница ќе работи заедно во борбата против злото и во насока на интензивирање на постоечката соработка против тероризмот.

Ве молам господине Претседателе, изразите на длабоко сочуство да ги пренесете до семејствата на трагично настраданите.

д-р Ѓорге Иванов

PRMportret
Tелеграма со сочувство до претседателот на Руската Федерација, г. Владимир Путин
Понеделник, 26 Декември 2016

Претседателот на Република Македонија, д-р Ѓорге Иванов, упати телеграма со сочувство до претседателот на Руската Федерација, г. Владимир Путин, по повод авионската несреќа во Црното Море.

Почитуван господине Претседателе,

Со голема тага ја примив веста за авионската несреќа во Црното Море во која меѓу другите загинаа и припадниците на познатиот ансамбл за народни песни и игри „Александров", и искрено жалам за големите човечки загуби. Во овој тажен миг, нашите мисли се со Вас и со пријателскиот руски народ.

Дозволете ми, во овие моменти на национална тага, во името на граѓаните на Република Македонија и во свое лично име, да Ви упатам изрази на длабоко сочувство.

Ве молам, господине Претседателе, изразите на сочувство да ги пренесете до роднините и блиските на трагично загинатите од оваа голема трагедија.

д-р Ѓорге Иванов

PRMportret
Честитка до верниците кои го прославуваат Божиќ според Грегоријанскиот календар
Недела, 25 Декември 2016

Претседателот на Република Македонија, д-р Ѓорге Иванов, упати честитка до сите христијански верници кои го прославуваат Божиќ според Грегоријанскиот календар.

Почитувани,

Ми претставува особено задоволство во овие празнични денови, на сите верници на Католичката црква во Република Македонија, да Ви го честитам големиот празник на Христовото раѓање – Божиќ.

Божиќ е празник кој го слави раѓањето на синот Божји. На овој празник ја славиме љубовта, надежта и животот. Ова е период од годината кога повторно се навраќаме на основните човекови вредности, кон потребата да бидеме солидарни, хумани и човечни, да му помогнеме на оној кому му е потребна нашата помош.

На крајот на оваа година и на почетокот на Новата година да си посакаме мир во нашите срца, да ги надвладееме суетите и искушенијата од секојдневието и во духот на христијанството и на вековните традиции да си простиме и подадеме рака.

На сите македонски граѓани, кои го прославуваат Рождеството Христово според Грегоријанскиот календар, им посакувам радост и среќа во текот на целата година со традиционалниот христијански поздрав – Христос се роди!

д-р Ѓорге Иванов

PRMportret
Честитка од претседателот Иванов по повод еврејскиот празник Ханука
Сабота, 24 Декември 2016

Претседателот на Република Македонија, д-р Ѓорге Иванов, по повод еврејскиот празник Ханука, упати честитка до г-ѓа Берта Романо Николиќ, Претседател на Еврејската заедница на Република Македонија, како и до сите припадници на Eврејската заедница во Република Македонија.

Почитувана г-ѓo Романо-Николиќ,

Ми претставува особена чест и големо задоволство, Вам и на припадниците на Еврејската заедница во Република Македонија, да Ви го честитам претстојниот празник Ханука.

Ханука е празник кој ја слави победата на Макабејците над грчко-асирската војска, но тој го слави и триумфот над темнината и над злото, победата врз тиранијата и страдањата низ кои поминал еврејскиот народ. Следните осум денa, во кругот на фамилијата, палејќи ги свеќите на менората ќе се празнува слободата, заедницата и историјата. Славејќи го споменот на празникот на светлината го негувате наследството на Вашите предци, но и традицијата и вредностите за еднаквост и за слобода.

Во деновите кои следат, Вам и на сите припадници на Еврејската заедница, Ви посакувам празникот да го минете во весела семејна атмосфера.

ХАГ ХАНУКА САМЕАХ

д-р Ѓорге Иванов

01_Iran
Новоименуваните амбасадори на Исламската Република Иран, Јапонија, Кралството Мароко и Буркина Фасо ги предадоа акредитивните писма
Четврток, 22 Декември 2016

Претседателот на Република Македонија д-р Ѓорге Иванов денеска ги прими акредитивните писма на новоименуваните амбасадори на Исламската Република Иран, Јапонија, Кралството Мароко и Буркина Фасо.

На средбата со новоименуваниот амбасадор на Исламската Република Иран за Република Македонија, Н.Е. г. Хосеин Карими, претседателот Иванов го поздрави позитивниот тренд во односите меѓу двете земји и зголемениот интензитет на соработка којшто се бележи во изминатиот период. Македонскиот претседател истакна дека подигањето на нивото на политички дијалог помеѓу двете земји треба да придонесе кон искористување на потенцијалите за соработка во повеќе сфери од заеднички интерес.

Амбасадорот Карими истакна дека Иран како влијателна и решавачка сила во осетливиот регион на Блискиот Исток е посебно заинтересирана за унапредување на односите со Балканските земји, особено со Република Македонија. Во тој контекст, амбасадорот Карими посочи дека силна и вредна основа за проширување на идните односи се блиските политички ставови, јасните економски интереси, силното културно сродство и пријателството на владите на двете земји.02_Japonija


На средбата со новоименуваниот амбасадор на Јапонија за Република Македонија Н.Е. Кијоши Коинума, претседателот Иванов истакна дека двата народа и покрај географската оддалеченост го поврзува взаемното почитување и пријателство помеѓу двете земји за што говори и постојаната финансиско-техничка помош што Јапонија и ја доделува на Република Македонија по нејзиното осамостојување.

Според претседателот Иванов,со отворањето на резидентна амбасада на Република Македонија во Токио во 2013 година, како и отворањето на амбасада на Јапонија во Република Македонија на почетокот од следната година, ќе се придонесе кон развојот на меѓусебните односи и збогатување на меѓусебната соработка во повеќе сфери од заеднички интерес, особено во областа на економијата и трговската размена.03_Maroko

Претседателот Иванов на средбата со новоименуваниот амбасадор на Кралството Мароко Н.Е. г-ѓа Закиа Ел Мидауи посочи дека постои искрена подготвеност  за унапредување на соработката  меѓу Република Македонија и Кралството Мароко особено во однос на збогатувањето на нормативно - правната рамка за уредување на билатералните односи, како и воспоставувањето на економска соработка.

04_Burkina_FasoНа средбата по повод предавањето на акредитивните писма од новоименуваниот амбасадор на Буркина Фасо Н.Е. г-Амаду Дико, македонскиот претседател истакна дека има потреба од унапредување на досегашната скромна соработка  меѓу двете земји. Во тој контекст, рече претседателот Иванов, значаен чекор за развивање на односите како на билатерален, така и  на мултилатерален план е запознавање на потенцијалите за воспоставување на соработка во сите сфери од заемен интерес.

Претседателот Иванов на новоименуваните амбасадори им честита за функцијата и им посака успех во вршењето на одговорната дипломатска должност.

 
Почеток < Пред 1 2 3 4 5 6 7 8 9 10 Следно > Крај
Страница 9 од 146