Соопштенија
MNR_HRVATSKA
Средба со г-а Марија Пејчиновиќ Буриќ, заменик претседател на Владата и Министер за надворешни и европски работи на Република Хрватска
Вторник, 13 Март 2018

Претседателот на Република Македонија, д-р Ѓорге Иванов, денеска ја прими г-а Марија Пејчиновиќ Буриќ, заменик претседател на Владата и Министер за надворешни и европски работи на Република Хрватска.

Двајцата соговорници констатираа дека двете земји имаат пријателски односи со висок степен на меѓусебна доверба и заеднички заложби за унапредување на регионалната соработка, мир и стабилност во регионот.

На средбата беа разменети мислења за натамошно продлабочување на билатералните односи меѓу двете земји, како и за актуелните состојби во однос на исполнување на стратешките цели на Република Македонија за членство во ЕУ и НАТО.

Претседателот Иванов се заблагодари за отворената поддршка од Република Хрватска за евроинтеграцискиот процес на Република Македонија и оцени дека новата Стратегија за проширување на Европската комисија е позитивен сигнал за преземање на одлучувачки чекори за Република Македонија и определување на датум за почеток на преговори за членство на Советот на ЕУ во јуни. Во таа насока, претседателот Иванов се заблагодари за конструктивниот став на Хрватска дека билатералните спорови не треба да бидат пречка кон евроатлантскиот пат.

Македонскиот претседател посочи дека двете земји треба да се фокусираат на проекти од значење за економскиот развој и изрази очекување дека успешната и континуирана соработка во одбраната, како и соработката за справување со мигрантската криза, ќе продолжат и во иднина.

Во насока на интензивирање на политичкиот дијалог на највисоко ниво, претседателот Иванов изрази задоволство од претстојната официјална посета на претседателот на Република Хрватска, г-а Колинда Грабар Китаровиќ на Република Македонија и нејзиното учество на состанокот на лидерите на Процесот Брдо-Бриони, што ќе се одржи на 28 април во Скопје. Процесот Брдо-Бриони, потенцираше претседателот Иванов, е конкретна потврда за посветеноста на Хрватска кон јакнење на регионалната соработка и поддршката на евроатлантските интеграции за земјите од регионот.

bosanski_premier_8
Средба со претседавачот со Советот на министри на Босна и Херцеговина, г. Денис Звиздиќ
Понеделник, 12 Март 2018

Претседателот на Република Македонија, д-р Ѓорге Иванов, денеска го прими Претседавачот со Советот на министри на Босна и Херцеговина, г. Денис Звиздиќ.

Двајцата соговорници оценија дека двете држави ги карактеризираат традиционално пријателски односи и идентични ставови во однос на унапредување на меѓународната и соработката во регионалните иницијативи.

На средбата беа разменети мислења околу состојбите во регионот и актуелните политички случувања во двете држави и беа потврдени заложбите за целосна интеграција во Европската Унија и во НАТО.

Претседателот Иванов истакна дека Република Македонија во континуитет го поддржува територијалниот интегритет и суверенитет на Босна и Херцеговина и нејзините напори за интеграција во ЕУ.

„Евроинтеграцијата на државите од Западен Балкан е од суштинско значење за регионалната стабилност и развој. Треба да се искористи моментумот, кога ЕУ конечно го посветува потребното внимание кон државите од Западниот Балкан, за сите да напредуваме во интеграцискиот процес", порача на средбата претседателот Иванов.

Соговорниците разменија информации за претстојниот состанок на лидерите на земјите учеснички во Процесот Брдо-Бриони чиј домаќин ќе биде Република Македонија, при што претседателот Иванов истакна дека овој состанок ќе биде одлична можност за продлабочена и структурирана дискусија за интензивирање на евроинтеграциите на Западен Балкан и справување со предизвиците на регионално ниво.

Македонскиот претседател изрази задоволство од унапредувањето на договорната состојба меѓу двете држави и го поздрави потпишувањето на Спогодбата за патување на граѓаните од двете земји со биометриски лични карти.

На средбата беше искажана подготвеност за натамошно продлабочување на севкупните билатерални односи и беше посочена потребата од подобрување на инфраструктурното поврзување меѓу двете земји и интензивирање на економската соработка, што не соодветствува со реалните можности и капацитети.

junker
Средба со претседателот на Европската комисија, г. Жан Клод Јункер
Недела, 25 Февруари 2018

Претседателот на Република Македонија, д-р Ѓорге Иванов, денеска оствари средба со претседателот на Европската комисија, г. Жан Клод Јункер.

На средбата беше разговарано за актуелната политичка состојба во Република Македонија, за процесот на евроатлантските интеграции, како и за клучните предизвици со кои се соочуваат регионот и Европската Унија.

Претседателот Иванов изрази благодарност за поддршката на претседателот на ЕК, г. Јункер за европската перспектива на Република Македонија, која претставува највисока стратешка надворешно-политичка цел, како и за неговата заложба за зајакнување на европскиот ангажман на Балканот како инвестиција во стабилна, силна и обединета Европа.

„Ја поздравуваме подготвеноста од Европската Комисија за обновување на препораката врз основа на исполнетите критериуми од наша страна", рече претседателот Иванов, дополнувајќи дека деблокирањето на интегративните процеси, преку соодветното вреднување на нашиот напредок, позитивно ќе влијае врз реформските процеси и врз целата општествено-политичка состојба во Република Македонија.

Македонскиот претседател ја нагласи неопходноста од фер и објективен пристап за Република Македонија, во однос на отпочнувањето на пристапните преговори за полноправно членство во ЕУ.

Во таа насока, претседателот Иванов позитивно ја оцени Стратегијата за Западен Балкан, промовирана од страна на г. Јункер и истакна дека со документот којшто претставува јасна порака во кој се изразуваат очекувањата од кандидатите за членство во ЕУ, уште еднаш се потврдува европската иднина на регионот.

Во однос на добрососедските односи, претседателот Иванов ги реафирмираше македонските напори за унапредување на односите со сите соседи и за поголема регионалната соработка, со цел стабилен, безбеден и просперитетен регион. Во тој контекст, македонскиот претседател порача дека изјавите на одредени политички лидери од регионот влијаат дестабилизирачки, не помагаат кон градење на добрососедски односи во регионот и не се европски.
junker_1

brifing_NGS_4
Брифинг за борбената готовност на АРМ за 2017 година
Петок, 23 Февруари 2018

Претседателот на Република Македонија, д-р Ѓорге Иванов, денеска беше информиран за борбената готовност на Армијата на Република Македонија од страна на Началникот на Генералштабот на АРМ, генерал-потполковник Методија Величковски.

Брифингот за борбената готовност е редовна обврска на Началникот на Генералштабот на АРМ кон Претседателот на Република Македонија.

Претседателот Иванов беше информиран за реализацијата на плановите и задачите во АРМ во изминатата година врз основа на извршената целосна и објективна анализа на Генералштабот за 2017 година, факторите и елементите кои влијаат на борбената готовност на АРМ, како и предлози и мерки за подобрување на степенот на борбената готовност на АРМ на повисоко рамниште во 2018 година.

На брифингот беа опфатени клучните функционални области кои влијаат на борбената готовност.

На брифингот генерал-потполковник Величковски посочи на клучните задачи и проекти кои ја одбележаа измината, јубилејна година за АРМ. Исто така, беа посочени приоритетите и мерките кои треба да се превземат во следната 2018 година.

На брифингот беше заклучено дека и покрај објективните потешкотии и ограничени расположиви ресурси, АРМ успешно ја извршуваше својата мисија и сите поставени задачи, при што борбената готовност со големи напори и залагање на персоналот беше на потребното рамниште.

PRMportret
Писмо со сочувство до Претседателот на САД, г. Доналд Трамп
Петок, 16 Февруари 2018

Претседателот на Република Македонија, д-р Ѓорге Иванов, по повод масакрот во училиштето во Флорида, упати писмо со сочувство до г. Доналд Трамп, Претседател на Соединетите Американски Држави.

Почитуван господине Претседател,

Со голем шок и длабока потресеност ја примив веста за масакрот во училиштето во Флорида. Без оглед на тоа каде живееме, ваквата трагична загуба на невини млади животи е уште еден потсетник дека мора да останеме заедно и силни во име на човечноста и да направиме сè за добросостојбата на нашите деца. Училиштата се простор каде, ослободени од стравот, младите ќе можат да ја развиваат љубовта кон животот, слободата на умот и солидарсноста кон општеството. Насилството не смее да има место во училиштата.

Во овие мигови на длабока тага, дозволете ми во име на граѓаните на Република Македонија и во мое лично име, да изразам искрено и длабоко сочувство. Нашите мисли и молитви се со семејствата кои ги изгубија нивните сакани.

Ве молам господине Претседател, изразите на длабоко сочуство и солидарност да ги пренесете до семејствата на трагично настраданите.

д-р Ѓорге Иванов

visegradska_grupa
Традиционален работен ручек со амбасадорите на земјите од Вишеградската група
Четврток, 15 Февруари 2018

Претседателот на Република Македонија, д-р Ѓорге Иванов, денеска приреди традиционален работен ручек со амбасадорите на земјите – членки на Вишеградската група, акредитирани во Република Македонија.

На средбата присуствуваа амбасадорот на Унгарија, Н.Е. г. Ласло Иштван Дукс, амбасадорот на Словачката Република, Н.Е. г. Хенрик Маркуш, амбасадорот на Република Полска, Н.Е. г. Јацек Мултановски и амбасадорот на Чешката Република Н.Е. г. Мирослав Томан.

Претседателот Иванов и амбасадорите разговараа за натамошното продлабочување на билатералните односи и соработката, за актуелната политичка состојба во Република Македонија, за процесот на интеграција во ЕУ и НАТО, како и за клучните предизвици со кои се соочуваат Европската Унија и континентот Европа.

Соговорниците констатираа дека земјите имаат воспоставено одлични билатерални односи и континуиран политички дијалог кои се базираат на искрено пријателство, меѓусебна почит и взаемно разбирање.

Претседателот Иванов го истакна големото значење на досегашната принципиелна и отворена поддршка од Вишеградската група во однос на евроатлантските интеграции на Република Македонија, која е од исклучителна важност за исполнувањето на нашите стратешки цели и приоритети.

Во тој контекст, македонскиот претседател ја нагласи неопходноста од фер третман за Република Македонија во однос на отпочнувањето на пристапните преговори за полноправно членство во ЕУ.

„Република Македонија останува посветена на патот кон целосна интеграција во Европската Унија и во НАТО и на тој план очекуваме вашата политика на отворени-врати да помогне во соодветното вреднување на нашиот напредок", порача македонскиот претседател.

Взаемното соочување со предизвиците од мигрантската и бегалската криза, претседателот Иванов го истакна како позитивен пример на соработка меѓу земја-кандидат за членство и земји-членки на Европската Унија и се заблагодари за помошта во опрема и во полициски сили од земјите на Вишеградската група.

Амбасадорите ги поздравија напорите на Република Македонија за што поскоро зачленување во ЕУ и во НАТО и изразија уверување дека земјите од Вишеградската група ќе продолжат со поддршката на европските и евроатлантските аспирации на нашата земја.

На средбата беа разгледани и можности за идни активности во економската сфера со цел продлабочување на економската соработка и зголемување на трговската размена меѓу Република Македонија и земјите на Вишеградската група.

 
Почеток < Пред 1 2 3 4 5 6 7 8 9 10 Следно > Крај
Страница 10 од 167