Соопштенија
Litvanija
Средба на претседателот Иванов со министерот за надворешни работи на Литванија, г. Линас Линкевичиус
Понеделник, 28 Јануари 2019

Претседателот на Република Македонија, д-р Ѓорге Иванов денеска го прими министерот за надворешни работи на Република Литванија, г. Линас Линкевичиус.

На средбата беше заемно констатирано дека односите меѓу двете земји се традиционално добри и пријателски, со чести средби и континуиран политички дијалог.

Двајцата соговорници разменија мислења околу можностите за развој на билатералната соработка меѓу Република Македонија и Република Литванија, како и за надворешно политичките приоритети и актуелните состојби во двете земји.

Претседателот Иванов се заблагодари за досегашната поддршка од Литванија во однос на европската и евроатлантската интеграција на Република Македонија, и изрази надеж дека истата ќе продолжи и во иднина.

На средбата, македонскиот претседател ја потенцираше потребата од доследно спроведување на реформите, со цел надминување на предизвиците и заокружување на интеграциските процеси на Република Македонија.

PRM_portret_01
Честитка до припадниците на српската заедница по повод празникот Свети Сава
Недела, 27 Јануари 2019

Претседателот на Република Македонија, д-р Ѓорге Иванов, по повод празникот Свети Сава упати честитка до припадниците на српската заедница во Република Македонија.

Почитувани сограѓани,

Ми претставува особено задоволство да ви го честитам големиот празник Свети Сава и да ви посакам здравје, радост, мир и благосостојба.

Чествувањето на денешниот празник, 27 јануари – Денот на првиот српски архиепископ и просветител е порака за заедништво, почит и меѓусебна соработка. Свети Сава за српскиот народ е непресушен извор на вера, надеж и љубов кон Бога и патоказ кон иднината.

Припадниците на српската заедница со своите јазични, етнографски и културни особености го збогатуваат нашето мултиетничко и мултикултурно општество постојано придонесувајќи за напредокот на Република Македонија.

Благодарение на српската заедница во Република Македонија како и на македонската во Република Србија, во нашиот северен сосед имаме пријател и поддржувач.

Уверен сум дека и во иднина заеднички ќе продолжиме да работиме во интерес на сите наши граѓани, сè со цел подобра и посветла иднина.

Нека Ви е честит големиот празник!

д-р Ѓорге Иванов

CG23012019
Средба на претседателот Иванов со претседателот на Собранието на Црна Гора, г. Иван Брајовиќ
Среда, 23 Јануари 2019

Претседателот на Република Македонија, д-р Ѓорге Иванов, денеска го прими претседателот на Собранието на Црна Гора, г. Иван Брајовиќ.

Двајцата соговорници изразија задоволство од севкупните билатерални односи и одличниот политички дијалог на сите нивоа меѓу двете држави. Заемна констатација на средбата беше дека меѓу Република Македонија и Црна Гора нема отворени прашања и дека двете земји се посветени на идентични надворешно-политички цели, мир и стабилност во регионот, како и на проширување и развој на регионалната соработка.

На средбата беше посочено дека само со целосна интеграција на земјите од регионот во ЕУ и НАТО, Европа може да биде посилна и поотпорна на предизвиците со кои се соочува.

Соговорниците констатираа дека економската соработка не соодветствува со нивото на политичките односи и беше истакната потребата од подобро инфраструктурно поврзување како предуслов за развој на економијата и трговската размена.

Претседателот Иванов порача дека парламентарната димензија е значаен сегмент во севкупната соработка и изрази надеж за нејзино натамошно унапредување.

Македонскиот претседател и претседателот на собранието на Црна Гора разменија мислења за актуелните политички случувања во Република Македонија и Црна Гора, како и за состојбите во регионот и Европа.

PRM_portret_01
Честитка од претседателот Иванов по повод големиот христијански празник Богојавление - Водици
Сабота, 19 Јануари 2019

Претседателот на Република Македонија д-р Ѓорге Иванов, по повод големиот христијански празник Богојавление - Водици, упати честитка до поглаварот на Македонската православна црква - Охридска архиепископија, Архиепископот охридски и македонски, г.г. Стефан и до сите православни верници.

Ваше Блаженство,

Дозволете ми Вам лично, на членовите на Светиот архијерејски синод на Македонската православна црква, на ценетото свештенство, како и на сите православни верници во Република Македонија и дијаспората, да Ви упатам најискрени и најсрдечни честитки по повод големиот христијански празник Богојавление - Водици.

Славејќи го крштевањето на Господ Исус Христос, го прославуваме нашето духовно раѓање и ја потврдуваме нашата вера. Со осветувањето на водите и објавата на Божјиот лик се осветува човековото живеење во верата и богоугодниот пат.

На овој голем ден треба да ги зацврстиме основите на нашето верување, да го зацврстиме нашето единство, да се почитуваме, да си помагаме, да продолжиме по патот на успехот и просперитетот на нашата татковина.

И годинава на Водици, да се помолиме Бог да ни даде сила да истраеме пред искушенијата и надеж за подобро утре.

Нека Бог ги чуе нашите молитви и во домовите на сите верници нека владее хармонија, разбирање и љубов, бидејќи само сплотени и единствени ќе успееме да чекориме по божјиот пат.

Честит празник и за многу години.

д-р Ѓорге Иванов

01._Estonia
Предавање акредитиви на новоименуваните амбасадори на Република Естонија, на Суверениот Воен Ред на Малта, на Република Гана и на Република Уганда
Петок, 18 Јануари 2019

Претседателот на Република Македонија, д-р Ѓорге Иванов, денеска ги прими акредитивните писма на новоименуваните амбасадори на Република Естонија, на Суверениот Воен Ред на Св. Јован од Ерусалим, Родос и Малта, на Република Гана и на Република Уганда.

На средбата со новоименуваниот амбасадор на Република Естонија за Република Македонија, со седиште во Будимпешта, Н.Е. г-ѓа Кристи Карелсон, претседателот Иванов изрази задоволство од одличните билатерални односи, што во континуитет ги негуваат двете пријателски држави, афирмирајќи го интересот за натамошно интензивирање на заедничката соработка, особено во економијата и трговската размена.

„Република Македонија придава посебно значење на развојот на пријателските односи со Република Естонија и во овој контекст, дозволете ми да се заблагодарам за досегашната континуирана поддршка што Вашата земја ја дава за реализација на македонските стратешки цели, интеграциите во ЕУ и НАТО", рече претседателот Иванов.

Амбасадорот Карелсон потенцираше дека Естонија ја поддржува нашата цел за членство во НАТО и како долгогодишен поддржувач на проширувањето на Европската Унија, особено се залага за почеток на пристапните преговори со Република Македонија.

„Би сакал да ја потврдиме нашата подготвеност да го споделиме искуството што го стекнавме во градењето на нашата е-влада и дигиталната економија. Нашата соработка во оваа област веќе започна и на тој начин стана добра основа за одличните билатерални односи меѓу Естонија и Македонија", рече амбасадорот Карелсон.

02._The_Sovereign_Military_Order_of_MaltaНа средбата со новоименуваниот амбасадор на Суверениот Воен Ред на Св. Јован од Ерусалим, Родос и Малта за Република Македонија, Н.Е. г. Франческо Саверио Џусти, претседателот Иванов нагласи дека водилка во релациите меѓу Република Македонија и Суверениот Воен Ред на Малта се духот на пријателството и взаемното почитување.

„Дипломатските односи меѓу Република Македонија и Суверениот Ред влегоа во третата деценија од нивното воспоставување. Сите овие години споделуваме заеднички културни и цивилизациски вредности кои се цврсти мостови на поврзување и меѓусебна соработка", рече македонскиот претседател, изразувајќи благодарност за досегашниот ангажман на Редот во хуманитарните мисии во Република Македонија во изминатите две децении. Амбасадорот Џусти потенцираше дека од нејзиното отворање во 1998 година, Амбасадата на Суверениот Воен Ред на Малта во Скопје има имплементирано неколку хуманитарни и социјални активности во различни места во Македонија, додавајќи дека негова улога како амбасадор на Суверениот Воен Ред на Малта ќе биде да ги поттикнува овие иницијативи.

03._GhanaНа средбата со новоименуваниот амбасадор на Република Гана за Република Македонија, со седиште во Прага, Н.Е. г-ѓа Вирџинија Хесе, претседателот Иванов изрази подготвеност за изнаоѓање на различни форми за развивање на меѓусебните дипломатски односи и го поздрави интересот на студентите од Гана за школување во Република Македонија, како позитивен пример на соработка во областа на образованието. Г-ѓа Хесе нагласи дека како амбасадор на Гана ќе работи на зајакнување на односите меѓу двете земји, за подобрување на трговските односи како и за постигнување на начелата за одржливи и развојни цели.

04._UgandaНа средбата со новоименуваниот амбасадор на Република Уганда за Република Македонија, со седиште во Рим, Н.Е. г-ѓа Елизабет Паула Напејок, македонскиот претседател истакна дека и покрај географската оддалеченост меѓу двете земји, постојат начини за создавање на услови за развој и за унапредување на севкупните билатералните односи и взаемната соработка во различни сфери.

Претседателот Иванов на новоименуваните амбасадори им честита за функцијата и им посака успех во вршењето на одговорната дипломатска должност.

PRM_portret_01
Писмена изјава на Претседателот на Република Македонија, д-р Ѓорге Иванов
Вторник, 15 Јануари 2019

Доцна синоќа имавме можност да го видиме вистинското лице на владината коалиција на СДСМ и ДУИ која себеси се смета за проевропска.

Објавувањето на Законот за употреба на јазиците и на Законот за ратификација на спогодбата од Преспа во Службен весник без потпис на указ од Претседателот на Република Македонија се противуставни.

Со доставувањето на овие два закона во Службен весник е прекршен член 75 од Уставот на Република Македонија, додека објавувањето на законите е направено незаконски и претставува основа за кривично гонење.

Ова е момент кој ќе покаже дали во Република Македонија постои Уставен суд, дали функционира обвинителството, дали има независно судство и дали постои владеење на правото.

Се прашувам, дали високите претставници на меѓународната заедница, кои ја поддржуваат оваа владина коалиција, ќе се јават и ќе го поддржат овој начин на донесување на закони?

Дали ќе ги поддржат овие преседани, што носат несогледливи последици и штета по правото и правната држава и дали вакви преседани применуваат во сопствените држави?

д-р Ѓорге Иванов

 
Почеток < Пред 1 2 3 4 5 6 7 8 9 10 Следно > Крај
Страница 2 од 174