Соопштенија
Средба со Заменик претседателот на Владата на РМ задолжен за спроведување на Рамковниот договор Абдилаќим Адеми
Петок, 18 Февруари 2011


Претседателот на Република Македонија д-р Ѓорге Иванов денеска го прими Заменик претседателот на Владата на Република Македонија задолжен за спроведување на Рамковниот договор, Абдилаќим Адеми.

Главна тема на средбата беше координација во правец на одбележувањето на 10 годишнината од потпишувањето на Охридскиот рамковен договор и активностите кои се предвидени во рамки на одбележувањето, за кои носител ќе биде Секретаријатот за спроведување на Рамковниот договор, а ќе бидат поддржани од страна на Претседателот на Република Македонија, Владата на Република Македонија, како и од меѓународната заедница.

На средбата, Претседателот Иванов и Заменик претседателот на Владата Адеми разменија мислења и за меѓуетничките односи во Република Македонија, поврзани со последните настани, при што заеднички став на соговорниците е дека институциите мора да ги искористат сите демократски механизми за зачувување на добрите меѓуетнички и меѓурелигиски односи, како еден од главните приоритети на Република Македонија на нејзиниот пат кон ЕУ и НАТО.


Претседателот Иванов и Заменик претседателот на Владата Адеми, изразувајќи загриженост поради тоа што меѓу учесниците на немилиот настан имало и малолетни лица, упатуваат апел до сите политички актери и до јавноста да не се злоупотребуваат вакви настани за дневно - политички цели.

Транспарентноста, отворениот дијалог, како меѓу политичките партии, така и во пошироката јавност за прашањата поврзани со меѓуетничките и меѓурелигиските односи се единствениот начин на кој треба да се отвораат, елаборираат и затвораат овие прашања, заклучија соговорниците.

Средба со амбасадорите на земјите од Вишеградската група во Република Македонија
Петок, 18 Февруари 2011


Претседателот на Република Македонија д-р Ѓорге Иванов денеска ги прими амбасадорите на земјите од Вишеградската група во Република Македонија (Чешка, Словачка, Полска и Унгарија).

Претседателот Иванов, честитајќи го јубилејот - 20 години од формирањето на Вишеградската група, изрази задоволство од плодниот политички дијалог меѓу Република Македонија и земјите од Вишеградската група и изрази благодарност за силната поддршка која Република Македонија ја добива од овие земји на патот кон реализирање на своите стратегиски цели - интеграцијата во НАТО и во Европската Унија.

На средбата, Претседателот Иванов истакна дека оваа година значењето на Вишеградската група е уште поголемо поради претседавањето на Унгарија и Полска со ЕУ, и во тој контекст го изрази очекувањето на Република Македонија за одредување на датум за почеток на пристапните преговори со ЕУ, за што Претседателот Иванов изрази очекување на поддршка и од Чешка и Словачка.



Амбасадорите на земјите од Вишеградската група го информираа Претседателот Иванов за приоритетните проекти, меѓу кои е интегрирањето на регионот на Југоисточна Европа во европските и евроатланските структури и го посочија искуството на нивните земји како позитивен пример на меѓусебна соработка, и меѓусебна поддршка во процесот на интегрирање во Унијата и во НАТО. Амбасадорите изразија уверување дека посебно земјите членки и самата Вишеградска група како влијателен фактор во рамките на ЕУ ќе продолжи со безрезервната поддршка на евро-атлантските аспирации на Република Македонија.

На средбата, соговорниците разменија мислења и за процесот кој се води под покровителство на Обединетите нации за разликата околу нашето уставно име со нашиот јужен сосед и за актуелните состојби на политичката сцена во Република Македонија.

Новоименуваните амбасадори на Русија, Гана и Шпанија ги предадоа акредитивните писма
Петок, 28 Јануари 2011


Претседателот на Република Македонија д-р Ѓорге Иванов денеска ги прими акредитивните писма на новоименуваните амбасадори на Руската Федерација, Република Гана и Кралството Шпанија.


На средбата со Амбасадорот на Руската Федерација Шчербак Олег Николаевич, Претседателот Иванов високо го оцени нивото на односи меѓу двете држави. Претседателот Иванов изрази задоволство од затворањето на прашањето на клириншкиот долг на начин кој дополнително ќе ги продлабочи односите на Русија и Македонија, и ќе овозможи динамичен економски развој и енергетска стабилност. Двајцата соговорници се согласија дека во изминатиот период, во која имаше повеќе средби на Претседателите на двете земји, бележиме развој на односите во економијата, културата, туризмот, трговската размена и енергетската соработка.


Претседателот Иванов и Амбасадорот на Република Гана Самуел Валис Акијани ги разгледаа можностите за унапредување на односите на двете држави, за кревање на нивото на економската размена и за отворање на пазарите.



Новоименуваниот Амбасадор на Кралството Шпанија во Македонија Фернандо де Галаинена Родригез во разговорот со Претседателот Иванов ја изрази поддршката на неговата земја за остварувањето на стратегиските цели на Република Македонија - полноправно членство во НАТО и во Европската Унија. Претседателот Иванов укажа дека овие цели во Македонија уживаат исклучително висока поддршка и дека нивното остварување ќе биде голем залог за стабилност и просперитет во регионот.

Свечен ручек во чест на поранешниот Претседател Киро Глигоров
Четврток, 27 Јануари 2011
Честитка до припадниците на српската заедница во РМ по повод празникот Свети Сава
Четврток, 27 Јануари 2011


Претседателот на Република Македонија д-р Ѓорге Иванов по повод празникот Свети Сава испрати честитка до припадниците на српската заедница во Република Македонија.

Драги сограѓани,

Дозволете ми како Претседател на Република Македонија, во име на сите граѓани на државата, да ви го честитам денешниот голем празник, Свети Сава. Српската заедница во Македонија, нејзините традиции и обичаи, слави и историски личности, се важен дел од заедничкото културно наследство на Република Македонија. Заедничкото празнување придонесува кон славење на богатството и подобро запознавање со нашите највисоки вредности, со кои треба да бидеме препознатливи и во регионот и во Европа.

Денес славиме личност која се откажала од световната моќ и власт, за да остане запаметен низ вековите како посветител, законодавец. Човек кој со знаење и разум го водел својот народ напред. Ние можеме да се потпреме на ваквите примери на со векови собираната мудрост и знаење на нашите народи за да напредуваме и успееме и во иднина.

Уште еднаш, нека ни е честит празникот, и за многу години.


д-р Ѓорге Иванов

Средба со пензионираните генерали во Армијата на Република Македонија
Четврток, 13 Јануари 2011


Претседателот на Република Македонија д-р Ѓорге Иванов денеска оствари средба со пензионираните генерали во Армијата на Република Македонија. Средбата беше можност за отворена размена на мислења за актуелните состојби во македонската Армија, како и за развојните и реформските процеси во армијата. Претседателот и Врховен командант на армијата, на средбата оцени дека Армијата на Република Македонија успешно ги исполнува реформските приоритети, за формирање на модерна и професионална армија. Претседателот Иванов оцени дека натамошните реформи на армијата треба да бидат во насока на подготвување за одговарање на новите видови предизвици и загрозувања за безбедноста. На средбата, пензионираните генерали на АРМ ги изнесуваа своите погледи и мислења за состојбата и за реформите во Армијата. Претседателот Иванов на средбата истакна дека натамошното развивање и унапредување на Армијата, е приоритет за Република Македонија.

 
Почеток < Пред 141 142 143 144 145 146 147 148 149 150 Следно > Крај
Страница 142 од 152