Соопштенија
Честитка на Претседателот на Република Македонија д-р Ѓорге Иванов по повод 8 септември, Денот на независноста
Среда, 08 Септември 2010

Почитувани граѓани, драги пријатели
Годинешниот празник ни е уште една можност да се потсетиме на сите напори, успеси, тешкотии и активности кои ги изминавме во градењето на нашата држава – Република Македонија. Денес се сеќаваме на почетокот на патот кој беше одбележан со големи закани и со неизвесност, на кој наше најголемо оружје беше решителноста и ентузијазмот на граѓаните кои ја преземаа одговорноста во свои раце. 8 септември е еден во низата решителни чекори преземани со цел да се даде форма и да се отелотвори токму оваа решителност на нашите граѓани да бидат одговорни за својата иднина. Причина повеќе за празнување е што темелите на таа наша држава ги поставивме цврсто во вредностите кои ја гарантираат нејзината долговечност, во демократскиот плурализам, почитувањето на човековите права и заштитата на слободата на сите наши граѓани.
Сите ние кои празнуваме, во Република Македонија како и во големите заедници на македонските граѓани во светот, имаме свој залог во иднината на македонската држава. Како што решително се определивме таа иднина да ја бараме во независна и самостојна држава, еднакво решително сме определени таа држава да го одбележи своето место во обединета Европа. Нашата безбедност која ја зачувавме во бурните први денови на независноста, во иднина ја проектираме во евро-атланскиот сојуз на демократски и слободољубиви држави.
На неизвесниот пат кој го поминавме паметиме мигови кога можеби сме се посомневале во крајниот исход и во успешноста на задачата која ја преземавме. Кога можеби и не сме биле достојни на висината на задачата која е пред нас – да се изгради нова држава, нов дом, на Балканот и во Европа. Но, убеден сум дека сите овие прашања добија решителен одговор – дека основата е поставена, и дека Македонија е тука за да опстои, за да им обезбеди можност за напредок и за благосостојба, како и шанса за докажување на сите нејзини граѓани.

Заедничко соопштение на Претседателот на Република Македонија д-р Ѓорге Иванов и на Претседателот на Република Бугарија д-р Георги Прванов
Недела, 22 Август 2010

На покана на Претседателот на Република Македонија д-р Ѓорге Иванов, Претседателот на Република Бугарија д-р Георги Прванов денеска оствари еднодневна работна посета на Република Македонија, во Охрид и Струга.
Двајцата шефови на држави остварија билатерална средба и ќе присуствуваат на врачувањето на наградата „Златен венец” на бугарскиот поет Љубомир Левчев во рамките на фестивалот „Струшки вечери на поезијата”.
Средбата на претседателите на Република Македонија и на Република Бугарија е продолжение на активниот политички дијалог на највисоко ниво и потврдување на добрите односи меѓу двете земји.
Двајцата претседатели констатираа дека Македонија и Бугарија споделуваат заедничка визија за иднината, во која сите земји од регионот ќе бидат интегрирани во европските и евроатлантските структури, како најважен предуслов за трајна стабилност, демократски и економски просперитет за целиот регион.
На средбата, беше подвлечена важноста на меѓусебната соработка и поддршката на Република Бугарија за интеграцијата на Република Македонија во ЕУ и НАТО, врз основа на целосното исполнување на неопходните критериуми и услови за тоа.
Одбележана беше неопходноста од активирање на заедничка работа за усогласување на општо прифатлив текст на двостраниот договор, кој што дополнително ќе ги развие и збогати принципите и насоките на односите меѓу двете земји врз основа на европските вредности.
Претседателите на Република Македонија и на Република Бугарија се согласија дека двете земји треба да ги искористат реалните потенцијали за јакнење на економските односи и дека ќе ги интензивираат заедничките настапи и соработка во проекти од взаемен интерес за градење и подобрување на патната, железничката, енергетската инфраструктура. Овие проекти двајцата Претседатели ги оценуваат и како проекти од регионален и европски интерес.
На средбата беше истакната заедничката визија дека продлабочувањето на соработката во областа на културата, науката и образованието претставува дополнителен поттик за подобрување на билатералните односи.
Двајцата Претседатели разменија мислења и ставови и за други актуелни регионални и меѓународни прашања.

Обраќање на Претседателот на Република Македонија д-р Ѓорге Иванов, на отворањето на Обуката за млади лидери во Охрид
Понеделник, 16 Август 2010

Почитувани. Ми претставува голема чест и вистинско задоволство да ве поздравам овде, на брегот на Охридското езеро чии води ги заплискуваат некои од најзначајните македонски и европски духовни и културни центри. Езеро од кое со векови наназат ја црпиме инспирацијата за создавање на вистински и трајни вредности. Денес, токму на брегот на ова езеро, инспирирани од богатото наследство на светите Климент и Наум, на македонските преродбеници и творци, заедно ќе запловиме во теориските и практичните води на лидерството.
Велат „..општеството е како брод и во секое време треба да постојат луѓе кои ќе бидат подготвени да го преземат кормилото...“.
За идните кормилари да бидат подготвени да го преземат кормилото мора непрестано да се инвестира во нивниот развој и наобразба.
Патот кој води до индивидуалниот и колективниот успех не е нити краток нити пак лесен. За да се измине тој пат не е доволна само желбата за успех туку и јасна визија која како светилник го осветлува патот. Потребна е посветеност кон целта и чувство за одговорност кон себе и кон другите.
Но, таа лична посветеност и таа лична одговорност треба да бидат поткрепени и со колективна посветеност и одговорност за поддршка на најдобрите, на оние кои утре ќе ја предводат земјата. Општеството кое денес се грижи за своите млади лидери, утре ќе биде предводено од истите луѓе во кои инвестирало. На тој начин се создава и јакне двојството – одговорно општество со одговорни општествени лидери. А токму во тоа се состои и тајната на успешните општества. Затоа, особено ме радува фактот што оваа обука е производ на новиот дух на заедништво, на споделената, општествена одговорност кон младите лидери.
Почитувани. Досега сосема малку и ретко се инвестираше во нив. Често младите потенцијални лидери беа оставани сами да се снаоѓаат. Денес се врти нова страница. Државата и бизнисот треба да се партнери кои со заеднички напори создаваат вистинска вредност. Денес ги поставуваме основите на она што се надеваме дека ќе прерасне во регионален едукативен центар за едукација и тренинг на идните лидери.
Свесни сме дека иднината на општествената благосостојба во Република Македонија зависи од идните лидери, од нивните квалификации, вештини и знаења, но и од моралните вредности и интегритетот на личноста. Затоа, мисијата на Обуката за млади лидери е да Ви го предаде компасот, Вам, како генерација на идни лидери. Нашата мисија е преку високо квалитетна едукација да Ве подготви за спроведување и промовирање на вистинските вредности во политичко-економскиот живот како и справување со предизвиците на глобалната технологија, меѓународната конкуренција, и културната и религиска разноликост.
Почитувани. Некои мислат дека лидерството е уметност, други сметаат дека тоа е практика. Некои велат дека лидерот се раѓа, други пак дека се создава и гради. Независно од тоа кој е одговорот на оваа дилема, лидерството и учењето се нераздвојно поврзани меѓу себе. Не е доволно само да се знае. Знаењето мора да се примени, бидејќи само така ќе биде во функција на индивидуалниот успех кој ќе донесе колективен успех.
Базирана врз почитувањето на основните човечки вредности, визијата на Обуката за млади лидери е да ги интегрира модерните политички, научни и технолошки знаења и вештини, како теориски така и практично. Со овој проект правиме конкретен чекор за Ваше едуцирање, развивање на лидерската личност и лидерските вештини, креирање чувство на одговорност и реакција кон средината во којашто живеете и работите.
Ова најдобро се постигнува преку живата, непосредна врска меѓу докажаните лидери во своите области и младите општествени лидери.
Затоа, оваа обука е одлична можност за плодна размена на искуства и идеи меѓу сегашните и идните лидери. Обуката е поттик на оваа генерација да ја менторира и поддржи идната, да ги остави најдобрите решенија, да и овозможи да твори врз нејзиното богато искуство и да ги реализира своите стремежи.
Верувам дека оваа работилница ќе ги исполни нашите, но пред се Вашите очекувања. Дека ќе продолжи да препознава и прима квалифицирани, потенцијални лидери ориентирани кон предизвиците и изнаоѓањето иновативни решенија на проблемите. Дека и понатаму ќе ангажира професори и инструктори кои и самите се лидери во својата академската сфера или практична област. Дека ќе креира клима која е поволна за отворениот ум, клима која ќе овозможи ефективно учење и квалитетна надградба. Најпосле, верувам дека оваа обука ќе понуди модел на учење втемелен врз најновите истражувања и проучувања на настаните од политичката, економската и социолошката теорија и пракса.
Почитувани. Со користењето на едно од најголемите национални богатства на Македонија – бесконечната креативност на нејзините граѓани – квалитетна обука на нејзините млади лидери може да поттикне и обезбеди национален просперитет и меѓународна компетентност. Верувам дека оваа работилница ќе го овозможи токму тоа.
На крајот, сеќавајќи се на бесмртните зборови на Димитар Миладинов, кој кажа “Јас го посеав семето, а вие бидете живи да го ожнеете неговиот плод“, Вам, младите општествени лидери, Ви посакувам успешна академска и професионална жетва.

Претседателот на Пратеничката група на ЕПП Јозеф Даул на средба со Претседателот Иванов
Вторник, 22 Јуни 2010

Претседателот на Република Македонија д-р Ѓорге Иванов денес (22 јуни) се сретна со Претседателот на Групата на Европската народна партија во Европскиот Парламент, францускиот европратеник Јозеф Даул. На срдечната и пријателска средба Претседателот Иванов се заблагодари за добрата соработка, и принципиелната и цврста поддршка која Република  Македонија ја има во односите со Европскиот Парламент и со пратениците од Европската народна партија.
Претседателот Иванов на средбата ги претстави евро-атланските приоритети на Република Македонија, македонската цврста решеност за полноправно членство во Европската Унија и во НАТО и подготвеноста за исполнување на неопходните реформски зафати на тој пат. Претседателот Иванов го истакна исполнувањето на потребните предуслови за почнување на преговорите за полноправно членство во Европската Унија од страна на Република Македонија.
Јозеф Даул го поздрави напредокот на Република Македонија во реформските процеси, и го поздрави интегративниот демократски модел на Република Македонија. Даул изјави дека е потребно во најкус можен рок Европскиот Совет да определи датум за почнување на преговорите за членство во Унијата за Република Македонија. Според Претседателот на Групата на Европската народна партија, Европската Унија има одговорност да придонесе кон интеграцијата на Балканот како дел од визијата за обединета Европа во која владеат мир и просперитет.
Претседателот Иванов на средбата подвлече дека определувањето на датум за преговори и непреченото водење на преговорите за членство за Република Македонија ќе биде силен поттик за обединување околу амбициозната реформска агенда. Воедно, според Претседателот Иванов, преговорите ќе бидат и силен позитивен сигнал за другите земји од регионот и за заедничката евро-атланска иднина.

Заедничко соопштение по средбата на Претседателите Иванов и Тадиќ
Среда, 09 Јуни 2010

Заедничко соопштение на Кабинетот на Претседателот на Република Македонија д-р Ѓорге Иванов и Кабинетот на Претседателот на Република Србија д-р Борис Тадиќ, по денешната средба на Претседателите:
Средбата на двајцата Претседатели е продолжение на континуираниот политички дијалог на највисоко ниво и на личните релации меѓу двајцата Претседатели. На работната средба беа разгледувани бројни прашања како од билатералните  односи така и од прашањата од регионален интерес.
Двајцата Претседатели се согласија за поинтензивна соработка во пресрет на Јунскиот самит на Советот на ЕУ. Тие ја повторија неопходноста од забрзана интеграција од регионот како клучен предуслов за трајна стабилност и мир. Изразија надеж дека европските лидери на претстојниот самит ќе го оценат позитивно напредокот во спроведувањето на реформите и ќе им овозможат на земјите од регионот забрзана интегративна агенда.
На средбата беа разменети мислења и за регионалните прашања кои ја оптоваруваат трајната стабилност на регионот.

Претседателот Иванов се сретна со Претседателот на Парламентарното Собрание на Советот на Европа Мевлут Чавушоглу
Петок, 21 Мај 2010

Претседателот на Република Македонија д-р Ѓорге Иванов денеска го прими претседателот на Парламентарното собрание на Советот на Европа, г-дин Мевлут Чавушоглу. Централна тема на разговорот беше претстојното претседавање со Комитетот на Министри на Советот на Европа, за кое двајцата соговорници изразија уверување дека Македонија ќе ги вложи сите напори за успешно и продуктивно претседавање со Советот.
Претседателот Иванов подвлече дека јакнењето на заштитата на човековите права е прв приоритет на македонското претседавање со Советот на Европа, и потенцираше дека е неопходно унапредување и консолидирање на системот на човековите права на национално и европско ниво.
Претседателот Иванов нагласи дека во Македонија постои функционален мултиетнички соживот и подвлече дека вториот приоритет на Македонското претседавање е да се промовира и унапреди интеграцијата на националните малцинства во европските општества.
Како трет приоритет, Претседателот Иванов го посочи овозможувањето на размена на мислења и искуства на младите од Југоисточна Европа и пошироко, со цел нивно учество во политичките процеси и демократските реформи во нивните општества, согласно принципите, вредностите и стандардите на Советот на Европа.
Претседателот на Парламентарното Собрание на Советот на Европа Чавушоглу го поздрави степенот на почитување, промоција и заштита на правата на малцинствата во Република Македонија, и притоа изрази уверување дека Република Македонија успешно ќе одговори на одговорната должност за време на своето претседавање и дека на планот на приоритетите на Македонија, како и на планот на реформските процеси во Советот на Европа ќе има успешна соработка.

 
Почеток < Пред 141 142 143 144 145 146 147 148 Следно > Крај
Страница 144 од 148