Соопштенија
Средба со Претседателот на Комисијата за меѓународна соработка на Државната Дума на Руската Федерација Константин Косачев
Петок, 17 Декември 2010


Претседателот на Република Македонија д-р Ѓорге Иванов денеска се сретна со Претседателот на Комисијата за меѓународна соработка на Државната Дума на Руската Федерација Константин Косачев.

На срдечната средба Претседателот Иванов изрази задоволство од континуираните средби на државните раководства на двете земји, вклучително и средбите на највисоко ниво со Претседателот на Руската Федерација Дмитри Медведев, кои придонесуваат за конкретни чекори во севкупната соработка, а особено економската соработка. Претседателот Косачев се заблагодари за личната иницијатива на Претседателот Иванов за одржување на високото ниво на односите меѓу двете земји.

Според Претседателот Иванов, особено важен проект за иднината на регионот е изградбата на гасоводот Јужен Поток, кој треба да обезбеди енергетска стабилност и конкурентност за земјите од Југоисточна Европа. Двајцата соговорници изразија задоволство од затворањето на клириншкиот долг, на начин кој ќе биде во функција на натамошниот економски развој.


Двајцата соговорници се согласија околу потребата да се заокружи иницијативата на Претседателите на Македонија и Русија за потпишување на Договор за пријателство и соработка меѓу двете земји. Како мерки кои натаму можат да ги продлабочат односите меѓу Република Македонија и Русијата Федерација беа посочени отворањето на културни центри во Скопје и во Москва, визната либерализација и културната размена.

Прием на претставници на Здружението на граѓани политички прогонувани, затворани и осудувани
Петок, 10 Декември 2010

По повод 10 декември, Меѓународниот ден на човековите права, Претседателот на Република Македонија д-р Ѓорге Иванов прими претставници на Здружението на граѓани политички прогонувани, затворани и осудувани за самобитноста на македонскиот народ и неговата државност. На средбата, претставниците на Здружението го информираа Претседателот Иванов за положбата на лицата кои во минатиот систем биле апсени и прогонувани од политички причини, и за положбата на нивните семејства. Според Никола Андонов, координатор на Здружението, семејствата на лицата кои биле прогонувани од политички причини се уште живеат со последиците кои произлегуваат од кршењето на нивните основни човекови права. Претставници на Здружението изнесоа повеќе примери на лица чии животи биле тешко нарушени поради нивните политички ставови, убедувања и активности, како и етничка или верска припадност.

Претседателот Иванов се заложи дека ќе го даде својот придонес за подобро запознавање со последиците од системското кршење на човековите права, како неопходен чекор кон градењето на демократски и слободен политички систем. Претседателот Иванов најави реализирање на веќе предвидените законски решенија за гарантирање на статусот на лицата кои биле прогонувани од политички причини. Според Претседателот, исправувањето на неправдите од минатото е неопходно за процесот на помирување и обединување во општеството.

Честитка по повод христијанскиот празник Св. Климент Охридски
Среда, 08 Декември 2010


Претседателот на Република Македонија д-р Ѓорге Иванов по повод големиот христијански празник Св. Климент Охридски упати честитка до Архиепископот Охридски и Македонски г.г. Стефан.

Ваше Блаженство,

Дозволете ми во мое лично име и во името на граѓаните на Република Македонија, Вам лично, на членовите на Светиот Архиерејски Синод на Македонската Православна Црква, како и на сите православни верници во земјата и во странство, да Ви упатам најискрени и најсрдечни честитки по повод големиот христијански празник Св. Климент Охридски.

Чевствувањето на празникот Свети Климент Охридски, основачот на Охридската архиепископија, основоположникот на Охридската Книжевна школа,  и архитектот на кирилското писмо и старословенската култура е настан од огромно значење на само за Република Македонија, туку и за европската култура и цивилизација.

Визијата на Свети Климент Охридски и на неговите учители Светите браќа Кирил и Методиј за приближување на сите народи од нашиот заеднички континент е пример кој и денес не загубил од своето значење и актуелност.

Делата на Свети Климент Охридски преставуваат наша духовна крепост и патоказ кон иднина исполнета со слобода, хуманизам, благодет и просперитет.


Нека ни е честит празникот и за многу години.

Со почит,
д-р Ѓорге Иванов

Новоименуваните амбасадори на Швајцарија и на Суверениот Воен Ред на Малта ги предадоа акредитивните писма
Вторник, 07 Декември 2010


Претседателот на Република Македонија д-р Ѓорге Иванов денеска ги прими акредитивните писма на новоименуваниот амбасадор на Швајцарската Конфедерација во Република Македонија, д-р Стефано Лазарото и на новоименуваниот амбасадор на Суверениот Воен Ред на Малта во Република Македонија, со седиште во Варшава, г-дин Павел Гиерински.

Средбата со новоименуваниот амбасадор на Швајцарската Конфедерација д-р Стефано Лазарото, Претседателот Иванов ја искористи да му посака успешна работа во Република Македонија. Претседателот Иванов изрази задоволство од нивото и од развојот на односите меѓу Македонија и Швајцарија, подвлекувајќи ја неодамнешната посета и средбата со Претседателот на Швајцарската Конфедерација Дорис Лојтхард. Претседателот Иванов изрази задоволство од постојаната соработка меѓу двете држави, која се одразува и во поддршката што Швајцарската Конфедерација ја дава за развојот на Република Македонија, во повеќе општествени сфери. Претседателот Иванов ја истакна улогата на значајната македонска дијаспора во Швајцарија, како важна врска меѓу двете држави, која придонесува во одржувањето на блиски контакти и соработка.

На средбата со новоименуваниот амбасадор на Суверениот Воен Ред на Малта, г-дин Павел Гиерински, Претседателот Иванов високо ја оцени и ја поздрави работата на Редот во нивните глобални хуманитарни активности, за помош на болните и на сиромашните. Претседателот Иванов го информираше амбасадорот Гиерински за ангажманот на Република Македонија за исполнување на Милениумските развојни цели на Обединетите нации, за искоренување на сиромаштијата.

Новоименуваните амбасадори на Италија, Данска и Австралија ги предадоа акредитивните писма
Понеделник, 06 Декември 2010


Претседателот на Република Македонија д-р Ѓорге Иванов денеска ги прими акредитивните писма на новоименуваните амбасадори во Република Македонија на Италијанската Република, на Кралството Данска и на Австралија.

Претседателот Иванов, на средбата со новоименуваниот амбасадор на Италијанската Република, Н.Е. д-р Фабио Кристијани, изрази задоволство од добрите и пријателски односи на двете земји, како и од неодамнешната средба со Претседателот на Република Италија Џорџо Наполитано во Рим. Претседателот Иванов изрази задоволство од принципиелната и постојана поддршка на Република Италија за побрзите интеграции на Република Македонија во евро-атлантските институции што претставува највисока стратегиска цел на Македонија. Притоа, Претседателот Иванов се заблагодари за високото ниво кое Италија го дава во содоветните европски форуми на прашањето на интеграциите не само на Македонија, туку и на сите земји од Југоисточна Европа, како важен чекор кон мир и просперитет за регионот и за Европа во целина.



На разговорот со новоименуваниот амбасадор на Кралството Данска, Н.Е. г-дин Торбен Брил, Претседателот Иванов му посака успех на амбасадорот Брил на новата должност, и изрази надеж дека неговиот мандат ќе биде период на натамошен развој на односите меѓу Македонија и Данска. На средбата, Претседателот Иванов ги претстави стратегиските приоритети на Република Македонија, пред се полноправното членство во НАТО и во Европската Унија, цели кои и Кралството Данска принципиелно ги поддржува и застапува. Претседателот Иванов укажа на неодамнешното доделување на највисокиот орден, 8 септември, на поранешниот Министер за надворешни работи на Данска Уфе Елеман Јенсен, токму поради значајната поддршка искажана кон Македонија како независна држава со јасна евро-атлантска перспектива. Претседателот Иванов, воедно, изрази надеж дека Кралството Данска ќе донесе позитивна одлука за отворање на резидентна амбасада во Република Македонија, како придонес на натамошниот развој на односите меѓу двете држави.


На средбата со новоименуваниот амбасадор на Австралија,  Н.Е. д-р Хелен Стадерт, Претседателот Иванов и посака добредојде на д-р Стадерт на одговорната функција, и изрази надеж дека во нејзиниот мандат ќе бидеме сведоци на продолжување на нагорниот тренд на директни средби и контакти на високо ниво меѓу двете држави. Како важен мост меѓу Македонија и Австралија, Претседателот Иванов ја посочи бројната и динамична македонска заедница во Австралија, која претставува и важен фактор на присуство на Австралија во овој дел од светот. Во таа насока, Претседателот Иванов изрази надеж дека во скоро време ќе бидеме сведоци на отворање на Амбасада на Австралија во Македонија, што дополнително би ги зајакнало врските и односите меѓу двете земји.

Средби на маргините на Самитот на ОБСЕ во Астана
Среда, 01 Декември 2010


Претседателот на Република Македонија д-р Ѓорге Иванов денеска на маргините на Самитот на ОБСЕ во Астана, Казахстан оствари билатерални средби со Високиот комесар на ОБСЕ за национални малцинства, Кнут Волебек, со министерот за Европа на Обединетото Кралство, Дејвид Лидингтон и кратки неформални средби со шефовите на делегациите на земјите соседи на Република Македонија, како и со други учесници на Самитот на ОБСЕ.


Високиот комесар на ОБСЕ за национални малцинства, Кнут Волебек на средбата со Претседателот Иванов изрази благодарност до лидерството на Република Македонија за напорите кои ги прави во обезбедувањето на интегрираниот образовен систем, и во тој контекст изрази особено задоволство за неодамна усвоената стратегија за интегрирано образование. Двајцата соговорници заклучија дека деполитизацијата на образовниот процес е од есенцијално значење. Македонскиот Претседател искажа задоволство од соработката и ангажманот на Високиот комесар на ОБСЕ за национални малцинства во Република Македонија. Претседателот Иванов потенцираше дека моделот на интеграција без асимилација кој е реалност во Македонија, треба да биде модел кој ќе биде следен, не само во нашиот регион, туку и пошироко.


На средбата со министерот за Европа на Обединетото Кралство, Дејвид Лидингтон, беше искажано заемно задоволство од позитивниот тренд во односите и соработката меѓу двете земји. Претседателот Иванов искажа благодарност за силната поддршка од Обединетото Кралство на процесите за интеграција во НАТО и ЕУ. На средбата беа разменети мислења и информации за претстојниот ЕУ Самит. Претседателот Иванов ги изнесе актуелностите во процесот за надминување на разликата околу името со нашиот јужен сосед и изрази надеж дека Република Македонија ќе има еднаков и фер третман од ЕУ, и дека позитивните примери на паралелно движење ќе бидат применети и во нашиот случај. Министерот Лидингтон истакна дека Обединетото Кралство останува силен поддржувач на македонските евроинтеграции, и изрази надеж дека ќе се дојде до заемно прифатливо решение, за Република Македонија да си го заземе заслуженото место во интеграциите.


Претседателот на Република Македонија д-р Ѓорге Иванов оствари кратки неформални средби со Претседателот на Република Србија Борис Тадиќ, со Претседателот на Република Албанија Бамир Топи, со Претседателот на Република Бугарија Георги Прванов, со Премиерот на Република Грција Јоргос Папандреу и министерот за надворешни работи на Грција Димитрис Друцас. На овие средби беа разменети информации и мислења за актуелните состојби во сопствените земји, беа договарани следните чекори во соработката, како билатералната, така и регионалната.

 
Почеток < Пред 141 142 143 144 145 146 147 148 149 150 Следно > Крај
Страница 150 од 157