Соопштенија
Средба со Министерот за надворешни работи и соработка на Шпанија Мигел Анхел Моратинос
Вторник, 20 Април 2010

Претседателот на Република Македонија д-р Ѓорге Иванов денеска го прими Министерот за надворешни работи и соработка на Кралството Шпанија Мигел Анхел Моратинос.

Претседателот Иванов упати честитки до Шпанското претседателство со ЕУ во напорите и особено за посветеноста на евро-интегративниот процес на земјите од регионот.

Претседателот Иванов на средбата јасно ги соопшти позициите на Република Македонија во однос на наметнатиот проблем од Грција за прашањето на името кој ги блокира стратешките цели на Република Македонија, интеграцијата во ЕУ и НАТО. Притоа, Претседателот Иванов нагласи дека наспроти впечатокот кој што се создава во меѓународната јавност, Република Македонија е страната која бара и е подготвена за заемно прифатливо решение, бидејќи Македонија е таа која ги чувствува последиците од опстојувањето надвор од евроатлантските структури. Претседателот Иванов нагласи дека доколку постои сериозна и реална подготвеност и политичка волја кај нашиот јужен сосед, и доколку решението се бара во рамките на резолуциите на ОН и меѓународното право, до компромис може да се дојде.

Министерот Моратинос истакна дека е охрабрен од она што Република Македонија и целото општество го направиле во смисол на исполнување на критериумите и стандардите неопходни за интеграција на земјата во ЕУ. Министерот Моратинос дополни дека е охрабрен од посветеноста на Република Македонија за изнаоѓање на заемно прифатливо решение за прашањето на името и изрази надеж дека за време на нивниот мандат би можело да биде одреден датум за отпочнување на преговорите со ЕУ.

Писмо со сочувство до Претседателот на Народна Република Кина Ху Џинтао
Петок, 16 Април 2010

По трагичниот земјотрес кој однесе над 700 животи во Кина, Претседателот на Република Македонија д-р Ѓорге Иванов испрати писмо со сочувство до Претседателот на Народна Република Кина Ху Џинтао. Писмото го испраќаме во целост.

Почитуван господине Претседател,

Со длабоко жалење ја примив веста за големата трагедија која ја погоди Вашата земја. Жалам за изгубените животи, за големите и ненадоместливи штети предизвикани од оваа природна катастрофа.

Во овие мигови на длабока тага за Вас, Вашата држава и пријателскиот кинески народ, во свое лично име и во име на граѓаните на Република Македонија упатувам изрази на најдлабоко сочувство.

Почитуван господине Претседател, убеден сум дека солидарноста и хуманоста ќе помогнат да се ублажат последиците од оваа голема трагедија.

Ве молам, изразите на најдлабоко сочувство да ги пренесете до семејствата на настраданите и сакам да Ве уверам дека граѓаните на Република Македонија искрено жалат за овој трагичен настан.

Д-р Ѓорге Иванов

Средба со генералниот секретар на Советот на Европа Торбјорн Јагланд
Вторник, 13 Април 2010

Претседателот на Република Македонија д-р Ѓорге Иванов денеска приреди работен ручек за генералниот секретар на Советот на Европа, г-дин Торбјорн Јагланд.

Централна тема на разговорот беше претстојното претседавање со Комитетот на Министри на Советот на Европа, за кое Претседателот Иванов изрази уверување дека Македонија ќе ги вложи сите напори за успешно и продуктивно претседавање со Советот. Иванов и Јагланд зборуваа за главните приоритети на Македонија во текот на шестмесечното претседавање.

Претседателот Иванов истакна дека Република Македонија од денот на своето членство во најстарата пан-европска организација придава највисоко можно значење на соработката со Советот на Европа и во тој правец придонесот кон планираните реформи и зголемувањето на ефиканоста на Советот ќе бидат приоритети на македонското претседателство.

Претседателот Иванов во истовреме потенцираше дека и покрај блокадите со кои се соочува во евроатлантските интегративни процеси, Република Македонија останува силно посветена на реформската агенда. Македонскиот претседател јасно потенцираше дека Република Македонија на ниту еден начин не сака да го злоупотреби своето претседавање со Советот на Европа во поглед на билатералното прашање за разликата околу името за што се водат разговори под покровителство на ОН.

Генералниот секретар Јагланд изрази уверување дека Република Македонија успешно ќе одговори на одговорната должност за време на своето претседавање и дека на планот на приоритетите на Македонија, како и на планот на реформските процеси во Советот на Европа ќе има успешна соработка.

Средба со Претседателот на Уставен Суд на Република Македонија д-р Трендафил Ивановски
Понеделник, 12 Април 2010

Претседателот на Република Македонија д-р Ѓорге Иванов денеска го прими Претседателот на Уставниот Суд на Република Македонија д-р Трендафил Ивановски.

На средбата, која беше закажана на барање на Претседателот на Уставниот Суд, д-р Ивановски го запозна Претседателот Иванов со програмите за регионална и меѓународна соработка на Уставниот Суд со соодветните институции. Претседателот Иванов изрази поддршка за активностите кои се во насока на промоција на работата на Уставниот Суд во регионот и во светот. Претседателот Иванов оцени дека работата на Уставниот Суд е исклучително важна за целосно остварување на владеењето на правото, а со тоа и за развојот и унапредувањето на демократските процеси, и притоа изрази уверување дека Судот ќе ги исполнува своите надлежности во целост.

Двајцата соговорници се согласија дека македонскиот политички модел подразбира можност за слободно искажување на мислење во врска со одлуките на Судот, а дека извршувањето на тие одлуки е задолжително. Д-р Ивановски го информираше Претседателот Иванов и за мислењето на Уставниот Суд во врска со Законот за определување дополнителен услов за вршење јавна функција.

Средба со делегација на ИВЗ предводена од Реис ул Улема Сулејман ефенди Реџепи
Петок, 09 Април 2010
Честитка до припадниците на ромската заедница по повод Интернационалниот Ден на Ромите
Четврток, 08 Април 2010

По повод Интернационалниот Ден на Ромите 8 април, Претседателот на Република Македонија д-р Ѓорге Иванов ја испрати следната честитка до припадниците на ромската заедница во Република Македонија.

Почитувани,

Ми претставува особено задоволство на сите припадници на ромската заедница во Република Македонија да им го честитам интернационалниот ден на Ромите-8 ми Април.

8 ми Април е ден кој со гордост го прославува најголемато етничко малцинство во Европа и кој е убава можност да се афирмира историјата и културата на Ромите, но и нивната актуелна социо-економска положба во различните општества во светот.

Република Македонија се гордее со припадниците на ромската заедница кои се нераскинлив дел од Македонското општество и со степенот на права кои ги уживаат се пример за целиот свет. Имено во нашата земја Ромите имаат можност да се образуваат на својот мајчин јазик, да гласаат за своите партии и кандидати и да бидат претставени во сите институции на државата. Токму пред само два дена имавме можност да и го доделиме Орденот за заслуги за Македонија на кралицата на ромската музика Есма Реџепова-Теодосиевска. Тоа е признание за Есма и за сите припадници на ромската заедница и за нивниот придонес во градењето и претставувањето на Република Македонија.

Почитувани граѓани од ромската националност,

Ние нема да застанеме и да се задоволиме со она што досега е постигнато. Борбата за подобрување на социјалната и економска состојба на Ромите не смее да престане. Тое е перманентен процес кој изискува секојдневни активности и ангажмани. Ве уверувам дека во институцијата Претседател и во мојата личност имате посветен и верен подржувач на овој процес.

Нека е честит празникот.

 
Почеток < Пред 151 152 153 154 Следно > Крај
Страница 151 од 154