Соопштенија
alt
Претседателот Иванов во Софија на Меѓународна конференција за Балканот
Сабота, 28 Мај 2011
alt
Претседателот Иванов ќе присуствува на 17-тиот Состанок на Претседатели од Централна Европа во Варшава
Четврток, 26 Мај 2011

На 27 и 28 мај, Претседателот на Република Македонија д-р Ѓорге Иванов ќе учествува на 17-тиот Состанок на Претседатели од Централна Европа во Варшава, Полска.

Оваа традиционална средба на претседателите од регионот, која се одржува секоја година од 1993 наваму, има цел да овозможи непосреден и рамноправен дијалог на директните соседи и на сите европски држави по местоположба и вокација, за сите прашања од взаемен интерес.

Темите на дискусија се поврзани со актуелните политички и економски проблеми и предизвици во земјите од централно-европскиот регион, но и глобалните политички прашања на европскиот континент и пошироко. Централна тема на состанокот оваа година е „Локалните искуства и универзалните стандарди“, а ќе се дискутира за различните искуства на земјите во процесите на системска трансформација, демократскиот развој, создавањето отворен пазар, како и за идните перспективи и предизвици.

На 17-тиот состанок во Варшава ќе учествуваат вкупно 22 претседатели на држави - Албанија, Австрија, Босна и Херцеговина, Бугарија, Хрватска, Чешка, Германија, Унгарија, Италија, Македонија, Молдавија, Црна Гора, Полска, Романија, Србија, Словачка, Словенија, Украина, Латвија, Литванија и Косово, а како специјален гостин ќе биде присутен и Претседателот на САД, Барак Обама.

Пред крајот на Варшавскиот состанок, предвидена е заедничка вечера на сите европски претседатели со Претседателот на САД Барак Обама, а ќе се разговара за искуствата на земјите од Централна Европа во унапредувањето на демократијата, просперитетот и стабилноста во Европа, како и за револуциите на Средниот Исток и Северна Африка, импликациите врз Европа и поддршката за нивната демократска транзиција.

Покрај учеството во дебатите на зададените теми, Претседателот Иванов ќе оствари повеќе билатерални и неформални средби со европски лидери.
 

alt
Честитка по повод 24 мај – Денот на Светите браќа Кирил и Методиј
Вторник, 24 Мај 2011

Почитувани граѓани,

Во време кога ги живееме врвните цивилизациски придобивки, кога нашиот животен пат се заснова и зацртува преку образованието и знаењето, кога ги надградуваме нашите човечки и хумани вредности во еден обединет свет кој тежнее кон развој, да се потсетиме на оние светли ликови кои го трасираа тој наш пат и кои со нивното дело задолжија многу генерации пред и по нас.

Денес е денот кога го чествуваме делото на македонските и сесловенски просветители и учители, Светите браќа Кирил и Методиј, кога уште еднаш со огромна благодарност се сеќаваме на непроценливото наследство кое ни го оставија, и тоа не само нам, туку и на сите словенски народи.

Како што кажува една стара мудрост – крајот на сознанието се затвора на крајот од вечноста. Секоја генерација го темели својот напредок врз претходните, наследените знаења. Со својата неуморна работа и посветеност Кирил и Методиј го отворија патот на писменоста и ширењето на христијанскиот дух, одбележувајќи ја епохата на будење на словенските народи, придонесувајќи кон севкупниот европски цивилизациски подем. Нивниот придонес за македонската култура и духовен развој, како и втемелувањето на традицијата на верски и културен соживот, претставува срж на нашето бидување денес како нација горда на своето минато, спремна за својата иднина.

Празнувајќи го 24 мај, Денот на Св. Кирил и Методиј, уште еднаш ја потврдуваме нашата верба во добрината и силината на човечкиот дух, еднаквоста и слогата меѓу народите, ја потврдуваме нашата доследност кон светлите принципи кои браќата Кирил и Методиј ги поставија за нас.

Нека ни е честит овој голем празник!

д-р Ѓорге Иванов
 

alt
Честитка до припадниците на Влашката заедница по повод Денот на Власите, 23 мај
Понеделник, 23 Мај 2011

23 мај го празнуваме денот посветен на исполнување на аманетот кој на Власите им го остави големиот поет Константин Белемаче: „Целата радост и светлина во домот, за оној што мајчиниот јазик не го заборава!“ Овој родителски, општочовечки завет е вграден во темелите на македонската државност, но и во македонската мултиетничка демократија насочена кон чување, развивање и промовирање на етничкото, јазичното и културното богатство на Република Македонија.

За посветеноста на Република Македонија зборува фактот што во 2007 година, на 10 годишниот јубилеј од донесувањето на Препораката 1333 на Парламентарното Собрание на Советот на Европа, беше истакнато дека токму Република Македонија е пример за сите други држави за тоа како треба да се негува, унапредува и промовира влашкиот јазик и култура, не само со зборови, туку и со дела.

Република Македонија е горда на влашката заедница, која е уставно призната и општествено ценета, и која со својата трудољубивост и богата култура претставува нераскинлив дел од историјата на нашата држава. Од Илинденската епопеја и Крушевската Република, преку Народно-ослободителната борба и АСНОМ-ска Македонија, па сè до третиот Илинден. Прогласувањето на македонската самостојност, независност и сувереност на 8 септември 1991 година беше првата телевизиска вест емитувана на влашки јазик, означувајќи го со тоа и почетокот на дводецениското работење на Редакцијата на влашки јазик. Македонската телевизија беше и се уште е единствената национална телевизија во светот која емитува програма на влашки јазик.

До сега направеното е пример за другите, но воедно и обврска за нас да продолжиме по истиот пат. Свесна дека нема ништо посвето од идентитетот, Република Македонија посветено и со гордост го негува општествениот придонес на Власите. Токму затоа, силно е поддржана иницијативата за воспоставување на центар посветен на зачувување, проучување и промовирање на влашкиот јазик, култура, историја и традиција.

На тој начин, Македонија го нагласува единството на македонското национално ткиво и присуството на Власите низ историјата, сплотеност запечатена со двата Илиндена, сплотеност препознатлива низ придонесот на бројните Власи хуманисти, научници и уметници со светска слава. Тоа е и конкретен чекор во насока на негувањето на заедничкиот именител од прастари времиња, збогатувајќи ја со тоа и македонска културна матрица. На тоа обврзува заветот на Белемаче, на тоа нè обврзува нашата заедничка европска и евроатлантска иднина на оваа и на наредните генерации.

Во оваа прилика би сакал на сите Власи во Република Македонија да им го честитам овој светол празник.


д-р Ѓорге Иванов
 

alt
Претседателот д-р Ѓорге Иванов во Рим на манифестацијата "Македонија во чест на Св. Кирил"
Недела, 22 Мај 2011

Македонска државна и црковна делегација, предводена од претседателот на Република Македонија д-р Ѓорге Иванов, од денеска ќе престојува во тридневна посета на Република Италија и Светиот Престол, по повод манифестацијата „Македонија во чест на Свети Кирил“.

Во состав на државната делегација се и министерот за информатичко општество и администрација Иво Ивановски и заменик директорот на Комисијата за односи со верските заедници и религиозни групи Антон Серечи, а во црковната делегација се митрополитите преспанско-пелагониски и европски, господин Петар и господин Пимен, како и бискупот скопски и апостолски егзарх Киро Стојанов.

Според програмата, попладнево во Рим делегацијата ќе ја посети античката капела при Пантеон во придружба на Даниеле Микелети, ректор на базиликата Пантеон, каде ќе присуствува и на свеченото отворање на манифестацијата со концерт на Благој Нацоски, Ана и Олег Кондратенко, Алесандро Д Агостини и Марија Вршкова.

Во текот на утрешниот ден, во Ватикан претседателот Иванов ќе биде примен од поглаварот на Римокатоличката црква папата Бенедикт Шеснаесети, а ќе разговара и со државниот секретар на Светиот Престол, кардиналот Тарчисо Бертоне.

Попладнето македонската делегација ќе ја посети базиликата Свети Павле каде ќе положи цвеќе на гробот на Свети Павле во придружба на кардиналот Франческо Монтеризи, а во вечерните часови ќе присуствува на театарската претстава за Мајка Тереза насловена „Светица на темнината“.

По аудиенцијата кај Папата и средбите во Ватикан, во црквата „Свети Климент“ во Рим во вторник ќе биде одржан молебен на гробот на Свети Кирил во рамките на манифестацијата „Македонија во чест на Свети Кирил“.

alt
Посета на Баварија: средба со бизнис заедницата и нови можности за соработка и инвестиции
Петок, 20 Мај 2011

Претседателот на Република Македонија д-р Ѓорге Иванов денеска оствари средба со бизнисмени од германската сојузна држава Баварија на која разговараше за можностите за инвестирање во Македонија. Средбата се одржа во рамките на посетата на Претседателот Иванов на Баварија каде што учествува на годинешната конференција на германската Паневропска Унија.

Во баварскиот град Бад Верисхофен, Претседателот Иванов се сретна со претставници на авионската и текстилната индустрија, со успешни стопанственици од секторот туризам, приватно образование и претставници на германски стопански комори и организации на локалната самоуправа. Учесниците на средбата до Претседателот Иванов изразија интерес за поволностите кои Македонија ги нуди за инвестирање особено за секторот услуги.

Баварија е една од економски најразвиените германски сојузни држави, каде се седиштата на индустриски гиганти како што се БМВ и Ауди и голем број други водечки компании.

Претседателот Иванов денеска ќе оствари средба со Неговото Височество Принцот на Лихтенштајн Ханс Адам Втори, и ќе присуствува на свечено отворање на годинешната конференција на германската Паневропска Унија.

Паневропската Унија е водечка меѓународна организација која со децении се бори за европско обединување, како и за промоција на демократијата и слободата. Членовите на Паневропското движење се постојани и силни поддржувачи на Република Македонија и нејзините европски перспективи.
 

 
Почеток < Пред 151 152 153 154 155 156 157 158 159 160 Следно > Крај
Страница 152 од 167