Соопштенија
Средба со Претседателот на Европската комисија Жозе Мануел Баросо во Охрид
Сабота, 09 Април 2011


Претседателот на Република Македонија д-р Ѓорге Иванов денеска оствари средба со Претседателот на Европската Комисија, Жозе Мануел Баросо.

Теми на средбата беа актуелните политички состојби во Република Македонија, европските перспективи на земјата, како и тековните настани во процесот за надминување на разликата околу името со нашиот јужен сосед.

Претседателот Иванов ја поздрави посветеноста на ЕК и нејзиниот партнерски однос во приближувањето на земјата кон европските стандарди и процесите што водат кон остварувањето на стратегиската цел на РМ, полноправно членство во ЕУ.

Претседателот Баросо истакна дека високо ја цени ангажираноста и поддршката на Претседателот Иванов за постигнување консензус околу стратегиските прашања за Република Македонија.

На средбата се разменија мислења и информации за тековните настани во процесот за надминување на разликата околу името со нашиот јужен сосед, што претставува единствената пречка за продолжување на интегративните процеси.

Претседателот Иванов го информираше Претседателот нa ЕК, Баросо за своите активности преземени на политички план, нагласувајќи дека Република Македонија е на стадиум на демократски развој кога политичкиот дијалог треба да се води во рамките на демократските институции, дека владеењето на дијалогот надвор од институциите не помага и не го јакне демокрaтскиот капацитет на институциите и дека е тоа надвор од европските стандарди.

Претседателот Баросо високо ја цени улогата на Претседателот Иванов на регионален план, поздравувајќи ја и претстојната средба на претседателите на Македонија, Црна Гора, Албанија и на Косово што ќе се одржи во јули во Охрид и во тој контекст изрази задоволство што на агендата на таа средба ќе биде соработката во конкретни инфраструктурни проекти кои Европската Комисија е подготвена да ги разгледа и поддржи.

Честитка до припадниците на Ромската заедница по повод Меѓународниот ден на Ромите
Петок, 08 Април 2011


По повод 8 април - Меѓународниот ден на Ромите, Претседателот на Република Македонија д-р Ѓорге Иванов испрати честитка до припадниците на ромската заедница во Република Македонија.

Почитувани,

Ми претставува особено задоволство да ви го честитам 8 Април, Mеѓународниот ден на Ромите.

8 Април е денот посветен на историјата и културата на Ромите кои претставуваат најголемо етничко малцинство во Европа. Со одбележувањето на овој ден се афирмира потребата од уште поголема активност за интегрирање на ромската популација во европските општества.

Ситуацијата со ромската заедница во Република Македонија и степенот на права кои таа ги ужива се пример за целиот свет. Имено во нашата земја Ромите имаат можност да се образуваат на својот мајчин јазик, да гласаат за своите партии и кандидати и да бидат претставени во сите институции на државата. Со право може да констатираме дека Ромите во Република Македонија се неотуѓив дел од Македонското општество.

Почитувани граѓани од ромската националност,

Ве уверувам дека во институцијата Претседател и во мојата личност имате посветен подржувач на напорите за понатамошно подобрување на социјалната и економска положба на Ромите. Само со заеднички напори на сите институции и на граѓаните на Република Македонија може да постигнеме уште поголеми успеси и резултати во афирмирањето на ромската култура и унапредувањето на благосостојбата на граѓаните од ромска националност.

Нека е честит празникот

Д-р Ѓорге Иванов

Средба со Мајкл Саран, основач на ОДИЕН групацијата и Претседател на бордот на директори на ЧЕДОК
Среда, 30 Март 2011


Претседателот на Република Македонија д-р Ѓорге Иванов денеска го прими г-дин Мајкл Саран, основач на ОДИЕН групацијата, една од водечките приватни инвестициони компании во централна и источна Европа и Претседател на бордот на директори на ЧЕДОК, најголемата туристичка корпорација во Чешката Република и меѓу најголемите во централна Европа.

На средбата, г-дин Саран искажа благодарност за поканата да ја посети Република Македонија и искажа интерес за актуелните економски состојби во Република Македонија. Посетата ја оцени како исклучително значајна имајќи ги предвид можностите и интересот на корпорациите кои ги претставува за проширување на бизнис плановите не само во сферата на туризмот, туку и во други сектори.

Претседателот Иванов го информираше соговорникот за активностите кои се преземаат на планот на создавање на подобра економска и инвестициска клима во Македонија. Изрази задоволство што Република Македонија како туристичка дестинација веќе одредено време е на понудата на туристичката корпорација Чедок, која веќе има реализирано туристички посети во Македонија. Изрази надеж дека поволностите кои се нудат за странските инвеститори, како и бројните можности за инвестирање во Република Македонија во разни сектори, ќе резултираат со конкретна економска соработка.



Мајкл Саран престојува во Република Македонија на покана на Претседателот Иванов упатена на нивната средба реализирана при официјалната посета на македонскиот Претседател на Чешката Република, во согласност со посветеноста на Претседателот Иванов на економскиот развој на Република Македонија.

Мајкл Саран, кој престојува во Македонија со цел добивање на потенцијални информации кои би можел да ги искористи при развој на неговите бизнис планови, ќе оствари и средби со претставници на Агенцијата за странски инвестиции, на Министерството за економија, а во неговата агенда се предвидени и посети на Охрид, Битола, Маврово и средби со претставници на локалната самоуправа.

Новоименуваните амбасадори на Индонезија, Јапонија и Молдова во Република Македонија ги предадоа акредитивните писма
Петок, 25 Март 2011


Претседателот на Република Македонија д-р Ѓорге Иванов денеска ги прими акредитивните писма на новоименуваниот амбасадор на Република Индонезија, со седиште во Будимпешта Н.Е. г-дин Марули Туа Сагала, на новоименуваниот амбасадор на Јапонија, со седиште во Виена Н.Е. г-дин Шигео Иватани и на новоименуваниот амбасадор на Република Молдова, со седиште во Софија Н.Е. г-дин Александру Пригорски.

На средбата со амбасадорот на Република Индонезија, Претседателот Иванов го изрази интересот од македонска страна за зголемување и унапредување на билатералната економска соработка, за динамизирање на можностите за презентација на стопанските потенцијали на Република Македонија преку промотивни активности и бизнис форуми за привлекување на индонезиски инвестиции во Република Македонија.


Амбасадорот на Република Индонезија г-дин Марули Туа Сагала подвлече дека економската соработка меѓу двете земји во последните години бележи нагорен тренд и изрази очекување за продлабочување и интензивирање на оваа соработка во неговиот мандат.
Соговорниците ја истакнаа и потврдија досегашната одлична соработка на мултилатерален план и се заложија за унапредување на меѓусебната поддршка во рамките на различни тела и органи на ООН.


Претседателот Иванов на средбата со новоименуваниот амбасадор на Јапонија г-дин Шигео Иватани изрази длабоко сочувство за големиот број на загубени животи и огромната материјална штета од силниот земјотрес и цунамито, како и од проблемите во нуклеарната централа Фукушима и изрази надеж дека Јапонија бргу ќе се справи со последиците од оваа катастрофа. Претседателот Иванов, изрази задоволство од развојот на билатералните односи меѓу двете земји, нагласувајќи дека постои голем неискористен потенцијал во економската сфера и се заложи за унапредување на односите меѓу Македонија и Јапонија во сите сфери од заеднички интерес, подеднакво на билатерален и на мултилатерален план.


Амбасадорот на Јапонија г-дин Шигео Иватани подвлече дека Република Македонија е значаен фактор за стабилноста и просперитетот на Југоисточна Европа и изрази уверување за натамошна поддршка од Јапонија во реформските процеси на Македонија, неопходни на патот кон полноправно членство во ЕУ.


На средбата со новоименуваниот амбасадор на Република Молдова г-дин Александру Пригорски, Претседателот Иванов ја искажа цврстата европска и евроатлантска определба на Република Македонија која континуирано се демонстрира, не само со спроведувањето на неопходните реформи и исполнувањето на критериумите, туку и со изградбата на еден уникатен и успешен модел на функционална мултиетничка демократија, со градењето добри односи со сите соседи, со учеството во регионалната соработка и регионалните иницијативи. Претседателот Иванов потенцираше дека Република Македонија на сите овие полиња постигна завидни резултати, и е подготвена да ги сподели сите свои позитивни искуства, потврдувајќи ја поддршката за Република Молдова на патот на нејзиното интегрирање во ЕУ.



Амбасадорот на Република Молдова г-дин Александру Пригорски.заблагодарувајќи се на поддршката од Република Македонија истакна дека за време на неговиот мандат ќе направи се што е во негова моќ за натамошно зацврстување на билатерални односи и унапредување на соработката во сферата на економијата, културата и образованието.

Средба со министерот без ресор на Владата на Република Турција и главен преговарач за членство во ЕУ, Егемен Багиш
Петок, 25 Март 2011


Претседателот на Република Македонија д-р Ѓорге Иванов денеска го прими министерот без ресор на Владата на Република Турција и главен преговарач на оваа земја за членство во ЕУ, г-дин Егемен Багиш.

На срдечниот и пријателски разговор беше искажано задоволство од воспоставеното ниво на пријателски односи и соработка меѓу двете земји. Претседателот Иванов ја искажа силната посветеност на Република Македонија за членство во Европската Унија како и целосниот ангажман за исполнување на сите неопходни критериуми што ќе и овозможат на Република Македонија да го продолжи започнатиот интеграциски пат во ЕУ.

Министерот Багиш ја повтори силната и безусловна подршка на Република Турција за евроинтеграциите на Република Македонија и рече дека двете земји треба да ја интензивираат соработката на овој план.

Двајцата соговорници истакнаа дека европската идеја е таа што ги поттикнува земјите и нашите народи да ги исполнат сите реформи кој нема да бидат само клуч  за прием на нашите две држави во Европската Унија, туку ќе придонесат и за подобрување на целокупната политичка состојба во поширокиот регион на Балканот.

Средба со Претседателот на Албанија Бамир Топи и со Претседателот на Црна Гора Филип Вујановиќ
Четврток, 10 Март 2011


Претседателот на Република Македонија д-р Ѓорге Иванов денеска оствари средба со Претседателот на Република Албанија Бамир Топи и со Претседателот на Црна Гора Филип Вујановиќ.

Претседателот Иванов на високите гости срдечно им се заблагодари за присуството на отворањето на Меморијалниот центар на Холокаустот на македонските Евреи, додавајќи дека во регионот на Југоисточна Европа се уште се живи спомените на разурнувачката моќ на човечката омраза. Поради тоа, Претседателот Иванов изрази задоволство што со своето присуство, Претседателот Топи и Претседателот Вујановиќ покажуваат дека се гради еден нов Балкан, во кој разните народи можат да живеат во мир и взаемно почитување.

На средбата, тројцата Претседатели имаа можност да ја разгледаат политичката состојба во регионот. Заедничка оценка на Претседателите беше дека продолжувањето и комплетирањето на евро-атлантските интеграции е неопходен предуслов за одржување на просперитетот на сите земји во регионот. Притоа, водачите на трите држави изразија подготвеност да ја продолжат добрата соработка во интегративните процеси, свесни дека успехот на една држава ги носи сите земји поблиску до заедничката цел. Беше констатирано високо ниво во меѓусебните односи и подготвеност за натамошно интензивирање на односите и соработката. Тема на разговор беше и претстојниот, трет по ред состанок на Претседателите на Македонија, Албанија, Косово и Црна Гора, кој оваа година ќе се одржи во почетокот на јули, а домаќин ќе биде Република Македонија. Беа разгледувани и перспективите за соработка во останатите регионални иницијативи, како во Процесот за соработка и Јадранско-јонската иницијатива и други.

Претседателите Иванов, Топи и Вујановиќ на средбата разгледаа повеќе иницијативи за инфраструктурно поврзување, за намалување на ограничувањата во размената меѓу трите држави и за проекти од взаемен интерес. Заедничка оценка беше дека се потребни конкретни чекори кон создавањето на обединет регион во обединета Европа.

 
Почеток < Пред 151 152 153 154 155 156 157 158 159 160 Следно > Крај
Страница 157 од 169