Маја Иванова - Новости
g._Ivanova-Zemanova
Активности на г-ѓа Маја Иванова за време на официјалната посета на Чешката Република
Петок, 05 Октомври 2018

За време на официјалната посета на Претседателот на Република Македонија, д-р Ѓорге Иванов, на Чешката Република, сопругата на Претседателот г-ѓа Маја Иванова оствари средба со г-ѓа Ивана Земанова, сопруга на Претседателот г. Земан. Покрај средбата на претседателските парови, г-ѓа Иванова и г-ѓа Земанова имаа одвоена дамска програма на која покрај средбата, имаа и кратка прошетка низ прашкиот замок.

Сопругата на Претседателот, г-ѓа Маја Иванова, во рамки на посетата, го посети Националниот институт за аутизам NAUTIS. Г-ѓа Иванова се запозна со начинот на функционирање на институтот, програмите за деца, младинци и возрасни лица со аутизам, од градинка, дневен престој, домување до програмите со лични асистенти за лицата со аутизам. Домаќините ја информираа г-ѓа Иванова за дијагностицирањето, особено раната дијагноза на децата со аутизам, терапија, но и помош и поддршка за нив и нивните родители.
NAUTIS_03

Г-ѓа Иванова и соговорниците разменија мислења за актуелните состојби со аутизмот во двете држави, паралела на законските регулативи, активностите на здруженијата, а се отвори и тема за можна идна соработка меѓу Институтот и организации од Република Македонија. Сопругата на Претседателот информираше за нејзините активности за подигање на свеста за аутизмот во Македонија и нејзината соработка со сите засегнати страни во областа на аутизмот.

Г-ѓа Маја Иванова, за време посетата на Чешка, оствари средба и со г-ѓа Ливија Клаусова, сопруга на поранешниот Претседател на Република Чешка г. Клаус. Двете дами имаа прилика да се сретнат неколкупати при официјални активности, и поради нивното долгогодишно пријателство, г-ѓа Иванова изрази желба да се сретнат и при оваа посета на Чешката Република.

Klausova_01

MI_-_Emine_Erdogan_1
Активности на г-ѓа Маја Иванова за време на 73. Генерално Собрание на ОН
Сабота, 29 Септември 2018

Сопругата на претседателот на Република Македонија, г-ѓа Маја Иванова, во рамки на учеството на 73. Генерално Собрание на Обединетите Нации, присуствуваше на настанот со сопругите на шефовите на делегациите учесници на 73. ГС на ОН, во организација на Првата дама на САД, г-ѓа Меланија Трамп.

На приемот првата дама на САД ги престави активностите во рамки на нејзината кампања BE BEST, која е во насока на поддршка и промоција на програми и организации што им помагаат на децата во целиот свет. г-ѓа Трамп информираше и за нејзините следни активности, како и за нејзината прва самостојна посета на Африка во октомври.

Во рамки на приемот на шефовите на делегациите учесници на 73. ГС на ОН  што го приредија американскиот претседател, Доналд Трамп и неговата сопруга, Меланија Трамп, покрај средбите со други гости, г-ѓа Иванова се сретна и со јорданската кралица Раниа.
MI_-_Melanija_Tramp

Г-ѓа Иванова присуствуваше и на настан на високо ниво што го приреди првата дама на Република Турција, г-ѓа Емине Ердоган, посветен на зајакнување на положбата на жената во Африка. На состанокот беше порачано дека грижата за жените во Африка е хумана должност. Г-ѓа Ердоган ги презентираше и нејзините активности со ТИКА во афричките земји.
MI_-_Emine_Erdogan_2

Претходно, во Детроит, г-ѓа Иванова ја посети Детската болница Мичиген, кадешто беше запозната со севкупната работа на оваа детска болница, идните планови во нејзината работа, а беше разговарано и за можностите за соработка на болницата со здравствени институции во Македонија. Г-ѓа Иванова ги претстави нејзините активности поврзани со детското здравје, со посебен акцент на децата со аутизам.

Во Детроит, г-ѓа Иванова одржа средба со истакнати преставнички на македонската дијаспора. Г-ѓа Иванова беше прогласена за Почесен член на Советодавното тело на програмата за женско лидерство на Обединетата Македонска Дијаспора.

Detska_Klinika_Detroit
Маја Иванова ја посети Детската болница на Мичиген во Детроит
Сабота, 22 Септември 2018

Во рамки на работната посета на Претседателот на Република Македонија д-р Ѓорге Иванов на САД, сопругата на претседателот, г-ѓа Маја Иванова, во Детроит ја посети Детската болница на Мичиген.

Сопругата на македонскиот претседател од менаџментот беше запозната со севкупната работа на оваа детска болница, идните планови во нејзината работа, а беше разговарано и за можностите за соработка на болницата со здравствени институции во Македонија. Г-ѓа Иванова ги претстави нејзините активности поврзани со детското здравје, со посебен акцент на децата со аутизам.

„Често велам дека аутизмот не познава големи и мали држави, богати и сиромашни држави, туку тоа е проблем за којшто треба да се обединиме и да работиме сите. Активноста што ја започнав за аутизмот во Македонија, потекнуваше токму од овде, од Соединетите Американски Држави, кадешто присуствував на конференциите што се организираат од организацијата Autism Speaks и веднаш по враќањето ги продолжив моите активности во Македонија. Почнав да ја подигам јавната свест, да бидам гласноговорникот во Македонија за подигање на јавната свест дека аутизмот во Македонија постои, и треба да се обединат сите, да се соочат со тој проблем и едноставно да почнат со негово решавање. Меѓутоа не застанувам тука, затоа што аутизмот не познава само активности, туку познава обединување на сите оние што треба да работат на овој проблем, почнувајќи од образовниот систем, од здравствениот систем, од невладините организации. Посетата на оваа болница ми е големо искуство, затоа што видов дека овде здравствената заштита на децата е на највисоко можно ниво, со најсовремена опрема, со најмодерна опрема. Се надевам дека мојата посета овде ќе биде една иницијатива да се продолжи натаму со соработката помеѓу оваа болница и Детската болница во Скопје. Се надевам дека оваа посета ќе вроди со плод", изјави г-ѓа Иванова.

„Разговаравме за начините како може да размениме информации, како нашите лекари можат да соработуваат, за подобро здравје на децата. За нас ова беше прекрасно искуство", изјави г-ѓа Луан Евалд, главен извршен директор на Детската болница на Мичиген.

Г-ѓа Иванова е носител на повеќе иницијативи за подобрување на здравјето и унапредување на здравствената заштита на децата. Нејзините напори и активности се првенствено насочени кон борбата против аутизмот и подигнувањето на јавната свест за постоењето на оваа болест. Меѓу бројните реализирани активности, под нејзино покровителство, во 2016 година во Скопје беше отворен Центарот за сензорна терапија за лица со аутистичен спектар на нарушувања, а во 2013 година беше отворен првиот Детски ургентен центар во Република Македонија.

За време на работната посета на претседателот Иванов на САД, предвидено е г-ѓа Иванова во Њујорк да присуствува на настанот со првите дами учеснички на 73. Генерално Собрание на Обединетите Нации во организација на Првата дама на САД, г-ѓа Меланија Трамп, како и на настан на високо ниво кој го приредува Првата дама на Република Турција, г-ѓа Емине Ердоган.

MI_35
Велигденски ручек на г-ѓа Маја Иванова за сопругите на амбасадорите во Македонија
Недела, 15 Април 2018

Сопругата на претседателот на Република Македонија, г-ѓа Маја Иванова, денеска организираше велигденски ручек за сопругите на резидентните амбасадори во Република Македонија, при што беа посетени манастирската црква „Св. Андреја" и манастирот „Успение на Пресвета Богородица" на Матка во близина на Скопје.

На ручекот присуствуваа сопругите на амбасадорите на Европската унија, Русија, Чешка, Германија, Унгарија и Шведска.

Според г-ѓа Маја Иванова, Македонија изобилува со огромно културно и духовно наследство и затоа велигденскиот ручек, еднодневната прошетка и посета се одржаа во едни од најубавите скопски манастири - манастирската црква Св.Андреја и манастирот Успение на Пресвета Богородица во Матка од каде што заедно со сопругите на амбасадорите упатија пораки за мир, љубов, благосостојба, здравје, среќа, радост и убавини.

MI_13„ Оваа година е посебно значајна за Република Македонија затоа што одбележуваме еден неповторлив јубилеј, а тоа е 1000 - годишнината од Охридската Архиепископија и 60 години од нејзиното возобновување. Со оглед на тоа што Македонија е лулката од каде што е тргнато христијанството да се шири низ Европа за што сведочи и Библијата, особено ми е драго што со моите гостинки денеска можеме да присуствуваме овде", истакна г-ѓа Иванова.

Г-ѓа Иванова упати и повик до сите православни христијани - со посета на манастирите и црквите во текот на оваа година, да се вклучат во одбележувањето на овој голем јубилеј, затоа што е многу значаен за Македонската православна црква и за православната вера воопшто во Република Македонија.

Сопругата на рускиот амбасадор во Република Македонија, г-ѓа Лариса Шчербак на сите православни христијани им упати честитка со порака за мир и љубов.

„ Многу сум среќна што сум тука во овие свечени денови и би сакала да им посакам на сите православни во светот и на сите православни христијани во светот мир, пред се во светот, мир во нивните души. Љубов кон ближниот, љубов кон Христос. Христос воскресе!", порача г-ѓа Шчербак.

Сопругата на шведскиот амбасадор, г-ѓа Билјана Стафансон истакна дека овој настан кој го организираше г-ѓа Маја Иванова веќе прераснал во традиција.

„Ова е веќе традиција што г-ѓа Маја Иванова организира еден ваков убав настан за нас. Пресреќни сме и уживаме во овој прекрасен настан! ", рече г-ѓа Стафансон.

MI_22

Obrakjanje_g-gja_Maja_Koncert_
Г-ѓа Маја Иванова на Гала концерт на младиот уметник Вејчеслав Поповски
Сабота, 14 Април 2018

Сопругата на Претседателот на Република Македонија, г-ѓа Маја Иванова, присуствуваше на Гала концертот на младиот уметник Вејчеслав Поповски, што се одржа во Македонската опера и балет.

Во своето поздравно обраќање г-ѓа Иванова, изрази поддршка за ваквиот подвиг на  Поповски, истакнувајќи дека тој е млад но веќе искусен уметник којшто својот ентуизијазам, енергија и љубовта кон музиката успешно ги пренесува на публиката.

Вејчеслав Поповски досега учествувал на голем број фестивали во земјава и во странство, во 2013 година на Светскиот музички шампионат во Холивуд, беше награден со "Светски шампион во три стила: опера, латино и отворен стил". Освен во полето на вокалната изведба, 17 годишниот уметник аранжира, свири, но и изработува неколку музички инструменти. Досега самостојно ги изработил инструментите Прим и Виолина.

За време на неговиот Гала концерт „Љубовна елегија", на којшто беа изведени стари македонски народни песни, Поповски беше придружуван од оркестарот на Македонската опера и балет.

Maja_Ivanova_-_Emine_Erdogan_1
Средба на г-ѓа Маја Иванова, сопруга на Претседателот на Република Македонија, со г-ѓа Емине Ердоган, сопруга на Претседателот на Република Турција
Среда, 21 Февруари 2018

Сопругата на Претседателот на Република Македонија, г-ѓа Маја Иванова, во рамките на официјалната посета на претседателот Иванов на Република Турција, оствари средба со сопругата на Претседателот на Република Турција, г-ѓа Емине Ердоган. Првите дами на Република Македонија и Република Турција на средбата разменија информации и мислења за нивните искуства и активности на кои досега се ангажирани и споделија информации за следните планирани ангажмани.

Г-ѓа Иванова се заблагодари за досегашната одлична соработка со ТИКА – Турската агенција за соработка и координација, со чија поддршка и под покровителство на г-ѓа Иванова се реализираа проекти во Република Македонија. Г-ѓа Иванова искажа благодарност за реализираните проекти на Универзитетската клиника за детски болести во Скопје, отворањето на првиот Ургентен центар на Детска клиника, кој свечено се пушти во употреба во декември 2013 година, и Проектот за комплетна реконструкција, односно реновирање и опремување на Одделот за интензивна нега на Детска клиника, кој технички се пушти во употреба минатата година. Сопругата на претседателот Иванов нагласи дека со овие исклучително значајни проекти на Детската клиника поддржани од ТИКА се овозможија најсовремени услови за лекување и подобри здравствени услуги за најмалите пациенти.

Г-ѓа Ердоган, информирајќи ја г-ѓа Иванова за нејзините активности и проекти кои се спроведуваат под нејзино покровителство во Република Турција, искажа задоволство за успешното функционирање на двата реализирани проекти преку ТИКА и изрази интерес за посета на Детската клиника во првата прилика при посета на Република Македонија.

Во рамките на официјалната посета на претседателот Иванов на Република Турција, г-ѓа Иванова оствари средби и со г-ѓа Семиха Јилдирим, сопруга на Претседателот на Владата на Република Турција, и со г-ѓа Хулија Чавушоглу, сопруга на министерот за надворешни работи на Република Турција.

Detska_klinika_paketcinja1
Г-ѓа Иванова им подари новогодишни пакетчиња на децата во Клиниката за детски болести
Недела, 31 Декември 2017

Сопругата на Претседателот на Република Македонија, г-ѓа Маја Иванова, денеска ја посети Клиниката за детски болести во Скопје, и на децата кои се лекуваат на клиниката им подели новогодишни пакетчиња по повод Новогодишните и Божиќните празници.

- Традиционално, последниот ден од годината го поминувам со децата коишто се хоспитализирани на Детската клиника во Скопје, и за жал новогодишната ноќ ќе је пречекаат овде. Новогодишните подароци што денеска им ги дадовме барем за миг ќе ја вратат насмевката и радоста на детските лица. Посетите на детската клиника ми се секогаш драги, затоа што сум овде за да поддржам, да поттикнам, или да се вклучам во реализација на некој проект кој што значи подобрување на здравствената заштита на децата во Република Македонија, изјави г-ѓа Маја Иванова.

Г-ѓа Иванова во 2013 година беше покровител на Националната донаторска кампања под мотото „Да помогнеме навреме", со која, со целосна поддршка на Турската меѓународна агенција за соработка и развој-ТИКА, беше изграден Ургентниот центар на Клиниката за детски болести.

Detska_klinika_paketcinja3Под покровителство на г-ѓа Иванова, и со поддршка на ТИКА, годинава се финализираше и проектот за реновирање и опремување на Одделот за интензивна нега во рамките на Детската клиника, со кој се обезбеди нов и реновиран простор, најсовремена и модерна опрема и мебел, по сите најсовремени стандарди, со што се подобрија условите на Детска клиника и за буквално најмалите пациенти.

- Горда сум на овие два проекта, затоа што уште еднаш ќе потенцирам дека се одвиваа под мое покровителство, и дека интензивната нега и детскиот ургентен центар, можеме слободно да кажеме дека претставуваат едни од најубавите во овој регион, изјави г-ѓа Маја.

По повод Новата 2018 година, г-ѓа Иванова упати честитки до родителите на децата, до персоналот на Детската клиника и до медиумите.

- Да ви пожелам добро здравје среќа радост и успеси и се надевам дека секогаш од оваа клиника ќе имаме успешни приказни, дека децата се оздравени и се вратени кај своите семејства во прегратките на своите родители и во училишните клупи, порача сопругата на Претседателот на Република Македонија, г-ѓа Маја Иванова.

g-gja_Ivanova_Kran_Montana_02
Маја Иванова наградена со златен медал на форумот Кран Монтана
Петок, 07 Јули 2017

Сопругата на Претседателот на Република Македонија, г-ѓа Маја Иванова, е наградена со Златен медал на форумот Кран Монтана, за нејзините активности, проекти и иницијативи од хуманитарен карактер, што и беше врачен на церемонија во рамки на 28. Годишна сесија на форумот Кран Монтана, во Барселона.

„Активностите што како сопруга на претседателот на Република Македонија ги преземав, се во областа на здравството, образованието и имаат социјален, но пред се хуманитарен карактер. Кога мојот сопруг ја презеде функцијата, почуствував дека можам да ја насочам својата енергија и своите активности, моето знаење и мојот ентузијазам за да поддржам, за да потикнам или реализирам иницијативи кои што ќе бидат за општо добро. Мојата цел ја насочив кон две сфери и тоа кон активности кон жените и кон децата, а посебно кон онаа најранливата категорија на децата со посебни потреби и со аутизам. Вложивме многу напори, многу иницијативи ги преточивме во проекти коишто добија своја реализација“, истакна сопругата на претседателот, г-ѓа Маја Иванова.

Како што посочи г-ѓа Иванова, под нејзино покровителство беа отварањето на Центарот за сензорска терапија за децата со аутизам, како и отварањето на Детскиот ургентен центар.

„Одовде можам да ви најавам и еден нов проект, една убава иницијатива што прерасна во реализација. За неколку дена ќе биде отворен и Центарот за интензивна нега на Детската клиника, проект што се одвиваше под мое покровителство што исто како и Ургентниот центар, се реализирани целосна финансиска поддршка на турската агенција ТИКА“, рече г-ѓа Иванова.

За неа, сите награди што се добиваат се поттик да се продолжи понатаму, за реализација на други иницијативи и заложби.

„Меѓутоа јас секогаш велам дека најголема наградата за мене, е кога ќе направите нешто за што ќе добиете една детска прегратка, еден детски бакнеж, или една детска насмевка, или кога ќе видите како едно здраво дете излегува од клиниката и се враќа во прегратките на своите родители, пријатели, баби и дедовци“, рече г-ѓа Иванова.

Златен медал на форумот Кран Монтана се доделува на етаблирани имиња од меѓународната јавност како признание за постигнувања во насока на похуман свет.

Сопругата на македонскиот претседател е вклучена во бројни активности што имаат социјален, образовен, здравствен предзнак, а пред се хуманитарен карактер и најмногу се посветени на децата, на нивното здравје и на нивните права, здравата исхрана и навики.

Под покровителство на г-ѓа Иванова во Скопје беше отворен Центар за сензорна терапија на деца со аутизам, а ја предводеше и националната кампања за отворање на првиот Ургентен центар на Детската клиника, прв од таков вид во Република Македонија и регионот.

Г-ѓа Иванова е покровител на повеќе проекти и иницијативи кои се однесуваат на жените, нивните права и женското здравје, меѓу кои серозевите кампањи, посветени на борбата против ракот на дојка. 

Сопругата на претседателот Иванов поддржува бројни општествено-корисни иницијативи и проекти во чиј фокус се ранливите категории.
g-gja_Ivanova_Kran_Montana_01



princeza_tajland_2
Принцезата Маха Чакри Сириндорн од Тајланд во посета на Република Македонија
Недела, 23 Април 2017

Сопругата на претседателот на Република Македонија, г-ѓа Маја Иванова беше домаќинка на Нејзиното Кралско Височество, Принцезата Маха Чакри Сириндорн од Тајланд, која престојува во посета на Република Македонија.

За време на дводневниот престој во Македонија, тајландската Принцеза ги посети и разгледа дел од значајните културно – историски знаменитости во Македонија и се запозна со богатата македонска култура, историја и традиција.

На средбата меѓу Принцезата Маха Чакри и сопругата на претседателот, г-ѓа Маја Иванова беа разменети мислења и идеи за соработка во областите и активностите кои споделуваат заеднички вредности во агендите на двете дами.

Г-ѓа Иванова информираше за проектите во кои е таа вклучена и ги поддржува во Република Македонија. Во тој контекст сопругата на македонскиот претседател се осврна на иницијативите кои се оддржуваат под нејзино покровителство а се однесуваат на жените и децата, пред се на активностите поврзани со децата со посебни потреби и детската исхрана.

Двете дами оценија дека ова е добра шанса и отворена врата за можна идна соработка во сферите и темите за кои споделуваат заемен интерес.

princeza_tajlandТајландската принцеза изрази благодарност за гостопримството во Македонија, изразувајќи ја подготвеноста за иницирање на натамошни заедничи активности, преку размена на искуства и знаења.

За време на престојот во Скопје, г-ѓа Иванова и Принцезата Маха Чакри го посетија манастирот Св. Пантелејмон и комплексот Македонско Село во Нерези.

Принцезата Маха Чакри ги посети и Археолошкиот Музеј, Црквата Св. Спас, Милениумскиот крст на Водно, Шарената Џамија во Тетово, Кањонот Матка, Пештерата Врело, а прошета и низ Старата скопска чаршија и Плоштадот Македонија.

Во рамки на посетата, на Тајландската принцеза и беше врачена и на награда за животно дело од страна на Фондацијата „Алијанса на цивилизациите" - Скопје.

Принцезата Маха Чакри Сириндорн е трето дете на поранешниот Крал Бумибол Адулиадеј и Кралицата Сирикит одТајланд. Таа е сестра на актуелниот крал Маха Вајиралнгкорн. Тајландската принцеза е Специјален амбасадор на ОН за Светската програма за храна и Амбасадор на добрата волја на УНЕСКО за еманципирање на децата од малцинските заедници преку образование и заштита на нивното нематеријално културно наследство. Во минатото, таа предавала историја на Кралската Воена Академија во Тајланд, а сега се занимава со општествени и добротворни функции и води филантропски организации и фондации во нејзината држава.
princeza_tajland_3 

globalforum
Обраќање на г-ѓа Маја Иванова, на Глобалниот самит на жени лидери
Петок, 17 Февруари 2017

Ваши Екселенции, почитувани гости,
Дами и господа, жени лидери,

На почетокот, би сакала да ве поздравам сите вас присутни панелистки и учеснички на првиот Глобален самит на жени лидери во Република Македонија. Упатувам благодарност до Сојузот на стопански комори и неговата Претседателка, г-ѓа Данела Арсовска, за укажаната чест да бидам покровител на овој значаен настан, како и за поканата да се обратам на првиот женски лидерски форум во Република Македонија.

Честитки за успешната организација и реализацијата на иницијативата која ги инволвира жените лидери од нашата земја и од странство. Жени лидери кои имаат висок и истакнат профил и изразен професионален и личен интегритет, кои се докажани особено во својата професија, кои заслужуваат да бидат ставени на пиедестал и кои би требало да бидат пример, особено за младите генерации.

Го поздравувам вклучувањето на жените лидери од Република Македонија во Глобалната платформа на жени лидери од јавниот и приватниот сектор, чија цел е севкупно унапредување на женското лидерство, притоа нагласувајќи ја инспиративната улога на жената лидер.

Ми претставува чест да бидам денес со вас и да ја претставам мојата улога во македонското општество како сопруга на Претседателот на Република Македонија, односно моите активности кои произлегуваат од таа улога.

Почитувани,

Ја користам оваа прилика да ви ги пренесам срдечните поздрави од мојот сопруг Претседателот на Република Македонија, д-р Ѓорге Иванов, кој секогаш поддржува иницијативи кои ставаат акцент на жената и го поздравува вклучувањето на жените лидери од Република Македонија во Глобалната платформа на жени лидери.

Еден од најдрагите проекти на мојот сопруг воопшто е Школата за млади лидери. Тој ја основаше Школата за да им овозможи на младите амбициозни и успешни граѓани на Република Македонија да имаат можност да ги развиваат своите лидерски вештини и капацитети, и да придонесат за идниот позитивен развој на општеството и околината во која живеат и работат. Мисијата на Школата е да ги стимулира позитивните вредности кај младите лидери и идни политички, културни и економски предводници на нашата земја, но и да го развие нивниот капацитет за справување со предизвиците на денешницата. Она што е особено интересно е податокот дека во рамките на Школата за млади лидери на Претседателот Иванов, која се организира 7 години досега, од вкупната бројка на учесници, околу 280, женските млади лидери се 57%. Убедена сум дека дел од учесничките на Школата за млади лидери ќе се приклучат кон Глобалната платформа на жени лидери која ја промовирате денес.

Почитувани присутни,

Сликата на жената во македонското општество и третманот кој таа го добива е комбиниран израз на вековните традиции, културата и менталитетот на македонскиот народ од една страна, и политичката волја и заложба на жените во изминатите години од македонската независност од друга страна. Жените низ историјата ја креирале комбинацијата на манири, изглед, вредности и култура кои ја карактеризираат современата македонска жена. Ние, сите присутни од Република Македонија сме претставници на многу генерации жени кои ја создале оваа слика која ние ја живееме. Затоа, мора да бидеме и ние достојни претставници и да бидеме пример за генерациите кои доаѓаат по нас.

Почитувани дами и господа,

Денес, би сакала да споделам со вас дека низ целиот живот ме води разумот, но ме облагородува љубовта. Уште од најрана возраст сфатив дека што и да правам во животот, ако во тоа не вложам љубов, разбирање и посветеност и ако тоа не остави трага или не направи некоја, барем и најмала промена, нема никакво значење! Сфатив дека доколку некој знае да сочувствува и да дозволи поддршката да ги облагороди неговите активности, тогаш секој чекор води кон посветла заедничка иднина. Искуството уште еднаш ми покажа дека на тој пат кон подобрување на нашето севкупно живеење, жената е најчестиот, најупорниот и најуспешниот водач, односно лидер! Таа е присутна и во бизнисот и во уметноста, и во културата и во социјалата, и во здравството и во дипломатијата, и во новинарството и во администрацијата... Да, впрочем, жената е присутна секаде, но она што го прави посебно нејзиното присуство и ја издвојува е нејзиниот пристап, нејзината емотивност, префинетост, интуиција, одлучност и иницијативност.

Жената, како и многу пати досега, докажала дека е вистински борец, столб на кој може да се потпреме, која успева да ги воздигне и најдлабоките емоции, но истовремено спремна да ја скроти и најдлабоката болка, и притоа да ја задржи топлината на своето лице и благоста на своите зборови. Жената, симбол на сите семејни вредности и темел на заедништво, несебично ја дели својата љубов, својот труд и се вложува себе си во секоја улога – како сопруга, мајка, пријател, работник, професионалец, лидер...

globalforum1Драги пријатели,

Кога мојот сопруг стана Претседател на Република Македонија, се запрашав како и каде да ги вложам своите напори и можности, во која област да се ангажирам од аспект на мојата нова улога, а со цел да поттикнам и поддржам што повеќе општествено корисни иницијативи. Низ пребарувањето и препознавањето на најсоодветните области сфатив дека ништо не е повеќе или помалку значајно. Меѓутоа, морав да се одлучам за неколку области кои јас ги препознавам како поблиски и поприфатливи за мојата позиција. Би сакала да нагласам дека сите активности кои ги преземам како сопруга на Претседателот на Република Македонија, ги спроведувам и како жена и како мајка.

Затоа, најдраги ми се сите активности кои се посветени на децата. Посебно сум посветена на активности за децата со посебни потреби, меѓу кои особено работам за децата со аутизам. Се трудам и мислам дека досега успевам да го засилам нивниот глас, но и да ја ангажирам македонската јавност, македонските институции и да го привлечам и насочам нивното внимание кон ова значајно прашање. Последниот голем проект на ова поле беше отворањето под мое покровителство на посебен Центар за сензорна терапија на лица со аутизам. Во 2009 година, кога се активирав на ова поле, немаше многу информации во јавноста за аутизмот, не беше тема која беше често споменувана. Затоа, се обидував да бидам гласноговорник за нивните права, нивните барања и потреби, за силно и јасно да ја пренесам пораката и до јавноста, но и до сите надлежни институции. Кога ме нарекуваат нивен адвокат, застапник и бранител, јас со гордост потврдувам дека тоа и сум!

Почитувани,

Улогата на жената лидер, на жената предводник, а уште повеќе на жената која ја има улогата на прва дама во едно општество, ја препознавам како позиција од која може да се поведат многу иницијативи, да се организираат многу акции и кампањи, но и да се бранат обесправените и помалку бројните, тие чиј настап често е незабележлив, ненаметлив, тивок и редок. Затоа, дел од моите активности се посветени и на лицата со ретки болести во Република Македонија.

Поради ангажманот кој го имам на национално ниво, а и поради моите залагања во контекст на подобрување на положбата, лекувањето и третманите на лицата со ретки болести, четврта година по ред сум Европски почесен покровител на Европската организација за ретки болести - ЕУРОРДИС во Брисел. Реткоста на болеста не значи дека смее да се занемари, реткоста не значи и ретко ангажирање и посветеност на оваа тематика. Ретките болести најчесто се и животно загрозувачки болести. Овде не се гледа од позиција на бројка туку од позиција на живот. Мојот апел е да се обидеме да обезбедиме подобар третман, брза и рана дијагностика, да помогнеме за подобар пристап до најефикасните третмани за пациентите со ретка болест, да се ангажираме и трудиме да се обезбедат најдобрите и соодветни лекарства и да се бориме за подобрен, достоен и поквалитетен живот на секој пациент со ретка болест. Во таа насока, особено ме радува што Владата на Република Македонија го слушна нашиот глас и презема конкретни мерки и одвојува големи износи на средства за решавање на проблемот со кој се соочуваат пациентите кои имаат ретки болести, а тоа најчесто се нивните лекарства, кои се исклучително скапи и кои пациентите не можат сами да си ги набават.

Ценети присутни,

Поголем дел од моите ангажмани се посветени на децата и на нивното здравје. Бев покровител на кампањата „Здрава храна за детство без мана" која беше посветена на правилната и здрава исхрана кај децата уште од најмала возраст, што прерасна од иницијатива во проект на Владата на Република Македонија, што значеше системски пристап кон имплементацијата на оваа кампања.

Сепак, една од најдрагите активности која се спроведе под мое покровителство е отворањето на воопшто првиот Ургентен центар на Детската клиника. Проектот беше всушност национална кампања во која учествуваа граѓаните на Република Македонија, а потоа доби и поддршка од Турската агенција за поддршка и развој. Успеавме да реализираме проект кој од 2013 година работи и функционира одлично. Мотото на кампањата беше „Да помогнеме навреме!", а, јас пак, дополнував, „каде што секундите живот значат". Особено ми беше значајна поддршката на мојот сопруг и неговите зборови, треба да изградиме иднина за младите, но и млади за иднината, и кој, откако го слушна концептот на проектот, без двоумење ниту за миг, веднаш ја даде својата безрезервна поддршка. За нашите деца се работи, рече, тие се иднината на нашата земја. Затоа, особено сум горда на тој проект и ме радува што нашите деца имаат далеку подобри и посовремени услови за лекување.

Би сакала да најавам, по прв пат јавно, дека наскоро ќе следи отворање на уште еден, исто така значаен проект на Детската клиника. Во тек е комплетно реновирање и опремување на Одделот за интензивна нега на Детската клиника, кој се спроведува под мое покровителство, а е со примарна и единствена цел, да се постигнат највисоки и најсовремени стандарди на педијатриски услуги за најмалите пациенти.

globalforum3Почитувани присутни,

Поддржувам уште многу активности посветени на децата, меѓу кои би ги издвоила и континуираната соработка со СОС Детското село и покровителството на нивните значајни годишници, 10 и 15 годишнината, посетите на Детското село и дружењето со децата. Понатаму, поддршката која ја давам општо за децата со посебни потреби, за децата без родители и родителска грижа, специјалната олимпијада, активностите со специјализираните училишта за деца со посебни потреби.

Драги пријатели,

Покрај активностите со децата, како сопруга на Претседателот на Република Македонија, како втора област на мој зајакнат ангажман би ја издвоила жената, нејзините права, позиција и здравје. Како сопруга на Претседателот, но и како жена, не пропуштам прилика, а да не ги поддржам розовите кампањи на моите драги пријателки, борките, од Здружението „Борка – за секој нов ден", поддржани од Алијансата за борба против ракот. Без разлика дали е розова прошетка, национална кампања, национална конференција или некоја друга иницијатива, акција или проект, кога се однесува на борбата против ракот на дојката, ја давам мојата целосна и безрезервна поддршка за подигање на свеста кај жените за потребата од навремено откривање и рано дијагностицирање на ракот на дојката. Шансите за надминување на болеста се многу поголеми доколку е откриена во рана фаза. Мојата мисла водилка при секоја активност во оваа област е ако поттикнеме барем една жена навреме да направи преглед и да ја открие заканата додека не е предоцна, сме ја постигнале целта.

Почитувани присутни,

Ова се дел од моите активности кои ги иницирам или поддржувам како сопруга на Претседателот на Република Македонија, но секако, често имам активности кои подразбираат придружување на мојот сопруг на настани во земјата, како и при посети на странски држави и учества на мултилатерални настани. Секогаш сум активна при посетите, со посебна дамска програма, користејќи ја секоја прилика за размена на мислења, искуства и позитивни примери од областите во кои сум ангажирана.

Во корист на времето, не би можела да ги опфатам сите мои активности, но би сакала да ја искористам оваа прилика да ве информирам и за уште неколку други мои ангажмани. Редовно сум вклучена во кампањата Ден на дрвото која има примарна цел подигање на јавната еколошка свест. Понатаму, одбележувањето на христијанските празници во нашиот дом е секогаш почитувано на највисоко ниво, а откако сме во претседателската резиденција, вратите на нашиот дом се отворени за многу групи на деца кои можат да го почувствуваат празничниот амбиент заедно со моето семејство. Како верник, поддржувам и многу настани на Македонската Православна Црква и се залагам за враќање на вистинските и морални вредности кај младите во нашата земја.

И, уште многу активности за кои би сакала да ви зборувам, се со цел, да повикам и да поттикнам повеќе од вас, жени лидери, секоја во својата област, да се ангажирате и да се вклучите во што поголем број во општествено одговорни иницијативи и да им помогнете на оние на кои најмногу им е потребна поддршка.

Во оваа прилика, би сакала да посочам дека сум професионално ангажирана, во редовен работен однос, во Агенцијата за цивилно воздухопловство на Република Македонија и секогаш се трудам да балансирам најдобро што можам меѓу активностите како сопруга на Претседателот, професионалните ангажмани, но и приватниот живот и обврски.

Драги пријатели,

На крајот, би сакала да ја споменам нашата сограѓанка Света Мајка Тереза, која со својот скромен живот, огромно срце и големи дела, е светол пример колку можеме да постигнеме со посветеност, чисто срце и искрена љубов. Целиот свет ја запозна и е фасциниран од благословената мисија на Мајка Тереза, која целиот живот го посвети служејќи им на оние имаат потреба од помош, и која ќе ја паметиме по нејзините дела и по нејзините зборови. Тоа е неконвенционален пример на жена лидер, но затоа за неа вечно ќе зборуваме и на која вечно ќе и благодариме што успеала во својата земска мисија! Света Мајка Тереза има кажано: „Не сме сите створени да правиме големи работи. Но, затоа можеме да правиме мали работи со многу љубов." и дека: „Не е важно колку работите, важно е колку љубов внесувате во тоа што го правите." А, тоа се поуките кои и јас ги извлеков од мојот живот. Со љубов, посветеност и залагања можеме да постигнеме многу само ако сме доследни и упорни во нашите планови и зацртани цели.

Ви благодарам.

globalforum2

 
Почеток < Пред 1 2 3 4 5 6 7 8 9 Следно > Крај
Страница 1 од 9

Биографија

Првата дама на Република Македонија, госпоѓа Маја Иванова, е дипломиран правник кој во слободното време пишува поезија. 

Повеќе

 

Фото галерија

Maja_fotogal