header

header_peperut_-_Copy3

Маја Иванова - Новости
karil1
На иницијатива на г-ѓа Иванова донирана опрема на КАРИЛ
Среда, 25 Јуни 2014

Над 50.000 евра чини донацијата на Државата Катар во кревети и медицинска опрема што денеска беше презентирана на Клиниката за анестезија, реанимација и интезивно лекување – КАРИЛ во Скопје.

Донацијата, прва на клиниката по повеќе од 20 години, е обезбедена по иницијатива на сопругата на Претседателот на Република Македонија, г-ѓа Маја Иванова и нејзините лични контакти со Шеика Мозах, мајката на Емирот од Катар, Шеик Тамим бин Хамад ал-Тани.

„Сето ова произлезе од посетата на мојот сопруг, Претседателот на Република Македонија, на Државата Катар, каде што имав можност да се сретнам со Нејзиното Височество, Шеиката Мозах, и да размениме мислење околу активностите што ги имаме двете во нашите земји. И ги презентирав моите активности за поддршка на децата, посебно на децата со посебни потреби и аутизам, и севкупно во областа на здравството. И ги презентирав и големите владини проекти во областа на здравството, но и желбата и идеите и плановите што ги имам, на некој начин да помогнам во она што значи поддршка за подобрување на здравството, и на сите пациенти во нашите клиники. Оттаму произлезе и оваа поддршка", изјави г-ѓа Иванова.
karil2
Директорот на Ургентниот центар, д-р Реџеп Селмани изрази благодарност за донацијата од Државата Катар, посочувајќи дека таа е прва по подолг период.

„Добивме една вредна донација. Нашата институција се докомплетира со една софистицирана опрема која ќе ни користи многу за да пружиме квалитетна здравствена заштита", изјави д-р Селмани.

Катарскиот амбасадор, Хасан Бин Абдула Заид Ал-Махмуд, посочи дека донацијата е доказ за длабочината на катарско-македонските односи.

„Во оваа прилика би сакал да се заблагодарам на сопругата на Претседателот на Република Македонија, г-ѓа Маја Иванова, за нејзините хумани активности за Ургентниот центар во Скопје. На народот на Република Македонија им посакувам многу здравје и просперитет", изјави катарскиот амбасадор.
karil3

naslovna0906
Г-ѓа Маја Иванова со поддршка на проектот „Програма за целосна социјализација на деца со посебни потреби во нивните заедници“
Понеделник, 09 Јуни 2014

Сопругата на Претседателот на Република Македонија, г-ѓа Маја Иванова, денеска присуствуваше на промоцијата на проектот „Програма за целосна социјализација на деца со посебни потреби во нивните заедници", кој е финансиран од Европската Унија, а го спроведува Фондацијата Аполонија од Гевгелија во партнерство со Македонското научно здружение за аутизам од Скопје.

Во рамки на проектот беа отворени една терапевтска и три сензорни соби за децата со посебни потреби во Гевгелија, Богданци, Дојран, и во Валандово.

Во своето обраќање во Дневниот центар за деца со посебни потреби во Гевгелија., г-ѓа Иванова искажа поддршка за проектот „Програма за целосна социјализација на деца со посебни потреби во нивните заедници"

„Мојата улога, како сопруга на претседателот на Република Македонија, за мене претставува сериозен предизвик, но и голема одговорност, да ги вложам сите мои сили и капацитети за поддршка на иницијативите кои во општеството можат да направат барем и најмала промена за најмладите, а уште повеќе за децата со посебни потреби. Тоа го правам пред се како мајка, која сочувствува со родителите на децата со посебни потреби и ги разбира предизвиците со кои тие се соочуваат секојдневно", истакна г-ѓа Иванова.

Според г-ѓа Иванова, со отворањето на терапевтската соба во Дневниот центар за деца со посебни потреби во Гевгелија се отвора ново поглавје во оваа општина за подобрување на условите и зголемување на можностите за децата со посебни потреби. Додаде дека со децата ќе работат нивните родители, медицинските лица, дефектолозите, логопедите, терапевтите и воспитно-образовниот кадар.

Во своето обраќање во Богданци, г-ѓа Иванова истакна дека отворањето на сензорната соба во основното училиште „Петар Мусев" во општина Богданци, преставува позитивен пример на соработка меѓу локалните власти, локалните образовни институции и невладини организации.

„Нивната заеднички посветена работа на подобрување на условите за социјална инклузија на децата со посебни потреби има резултати и верувам дека ќе им излезе во пресрет на децата со посебни потреби во Богданци и нивните семејства", рече г-ѓа Иванова.

Dojran_0906На отворањето на сензорната соба во основното училиште „Кочо Рацин" во Нов Дојран, г-ѓа Иванова потенцира дека проектот, кој се спроведува од Фондацијата Аполонија во партнерство со Македонското научно здружение за аутизам, и е поддржан од Делегацијата на Европската унија, претставува исклучително позитивен пример кој треба да претставува инспирација и за другите општини и региони за тоа како да се подобрат условите за социјална инклузија на децата со посебни потреби.

Во своето обраќање во Валандово, г-ѓа Иванова, истакна дека голем дел од нејзините активности се насочени за поддршка на проекти, кои се покренати за подобрување на условите за живот на децата со посебни потреби, како што е отворањето на сензорна соба во основното училиште „Јосип Броз".

„Проекти кои се од хуманитарен, образовен, културен или социјален карактер, и кои имаат крајна цел помагање за социјалното вклучување на децата со посебни потреби, секогаш ја имаат моја целосна и безрезервна поддршка", рече г-ѓа Иванoва.

Главната цел на проектот „Програма за целосна социјализација на деца со посебни потреби во нивните заедници", е да се зголеми социјалната интеграција и развојот на децата со посебни потреби во четирите општини од југоисточниот регион: Гевгелија, Богданци, Дојран, и Валандово, и ќе се реализира до февруари наредната година.
Valandovo0906

mi01
Г-ѓа Иванова учествуваше во акцијата „Македонија им чита на децата“
Сабота, 31 Мај 2014

Сопругата на Претседателот на Република Македонија, г-ѓа Маја Иванова, денеска учествуваше во акцијата „Македонија им чита на децата", што се одржа во организација на издавачката куќа „Култура" и Амбасадата на Република Полска во Македонија.

Г-ѓа Иванова и сопругата на полскиот амбасадор во Македонија, г-ѓа Кинга Нетман Мултановска пред книжарницата „Култура" се дружеа и им читаа на децата од основното училиште „Кочо Рацин" од Скопје, од СОС Детско село и децата со посебни потреби од Здружението „Дајте ни крилја".

Пред родителите, г-ѓа Иванова упати апел да ги поттикнуваат своите деца да читаат книги, затоа што, како што рече, со секоја прочитана книга добиваат едно бесценето богатство.

„Многу ми е драго што наредните неколку недели познати и истакнати личности од областа на културата, уметноста, музиката и спортот ќе се дружат со децата и на некој начин ќе ја доближат магијата на книгата кон секое дете", рече г-ѓа Иванова, изразувајќи задоволство што денешниот настан се организира во пресрет на Меѓународниот ден на детето - 1 јуни.

Таа изрази надеж дека ваквите активности ќе продолжат и во иднина со цел книгата и убавиот пишан збор да се доближат до секое дете.

mi02„Со секоја прочитана страница се отвора нов поглед кон светот. Се добиваат нови зборови, се учат многу работи, се развива детската фантазија. Децата на некој начин се соживуваат со ликовите од романите и книгите што ги читаат", додаде г-ѓа Иванова.

Потсети дека живееме во време кога владеат интернетот и компјутерите и додаде оти секое дете е пред компјутер.

„И од компјутер може секое дете да прочита книга или да го разбере сижето на некоја книга. Сметам дека мислите, убавите зборови од книгата, пејсажите што се опишуваат се доживуваат тогаш ако книгата се држи во раце", потенцира г-ѓа Иванова.

Г-ѓа Кинга Нетман Мултановска истакна дека се привилегирани што госпоѓа Иванова се приклучува во оваа акција. Информира дека оваа акција во Република Полска почнала во 2001 година и оти е многу популарна, а постигнала и голем успех.

„Се надеваме дека со помош на госпоѓа Иванова ќе направиме Македонија повеќе да чита книги. Полските деца читаат многу. Осумдесет отсто од полските деца читаат книги секоја година, многу книги, не само една и не само книгите за на училиште", рече г-ѓа Нетман Мултановска и додаде дека Македонија има прекрасни автори и издавачки куќи.

Според неа, книгата е се, книгата е светот, а интернетот нема да ги замени.

„Многу е важно да се научат децата да читаат. Тогаш ќе имаме и возрасни кои купуваат книги и многу чиатаат", додаде таа.

Следните читања се во јуни со децата без родители и децата со посебни потреби, а се со цел нивна поголема интеграција во општеството. Читањата ќе се одржуваат секоја среда во 18:00 часот и секоја сабота во 11:00 часот, пред книжарницата „Култура" во Скопје.

mi03

borka0
Маја Иванова: Да се обединиме во борбата против ракот на дојка
Сабота, 17 Мај 2014

Сопругата на Претседателот на Република Македонија, г-ѓа Маја Иванова денеска присуствуваше и ја поддржа хуманитарната манифестација „Напред розово 2014", во организација на здружението „Борка", посветена на борбата против ракот на дојката.

Во своето обраќање, г-ѓа Иванова искажа поддршка за розовата кампања на „Борка" за подигање на јавната свест во борбата против ракот на дојка.

„Со тоа, ние, всушност, даваме поддршка за семејствата и пријателите на заболените од рак на дојка. Даваме поддршка и благодарност на посветените лекари и медицински сестри кои секојдневно ја водат битката заедно со своите пациенти. Ја даваме нашата поддршка и благодарност до сите спонзори, донатори и пријатели на оваа кампања. Но, најголемата поддршка ја даваме на оние кои во овие моменти се соочуваат со болеста, оние имаат потреба од неизмерна поткрепа од сите нас. Да им помогнеме да го пребродат овој период и да излезат како вистински победници. И, денес, испраќам најискрени поздрави токму до нив, верувајќи дека догодина заедно со нас исправени и горди ќе ја изодиме розовата панделка исцртана на улиците на нашиот главен град. Нашите молитви и мисли се со вас", рече г-ѓа Иванова во своето обраќање.

borka1Во рамки на манифестацијата, г-ѓа Иванова учествуваше и на розовата прошетка, како дел од кампањата за подигање на свеста за борба против ракот на дојката.

„Розовата прошетка оваа година беше најавена од борките со зборовите,за сите кои решија да веруваат и за сите кои се осмелија да се борат. Денес, и јас ќе застанам со нив, и јас ќе бидам борка и јас гордо ќе пешачам со нив. Заедно ќе ја шириме розовата порака, ќе ја оформиме розовата панделка, и заедно ќе ја водиме борбата против ракот на дојка", рече г-ѓа Иванова.

Сопругата на Претседателот на Република Македонија ја поддржува оваа манифестација од самите почетоци, и воопшто ги поддржува сите активности на Здружението „Борка" со цел борба против ракот на дојка.

Поддршка на акцијата дадоа и амбасадорот на САД, г. Пол Волерс и министерот за внатрешни работи на Република Македонија, г-ѓа Гордана Јанкуловска.

borka2

autizam01
Одбележан Светскиот ден за подигање на свесноста за аутизмот
Среда, 02 Април 2014

Сопругата на Претседателот на Република Македонија, г-ѓа Маја Иванова денеска присуствуваше на одбележувањето на Светскиот ден за подигање на свесноста за аутизмот, што се одржа во Скопје Сити Мол, во организација на Здружението на граѓани за третман на лицата со Аутизам, АДХД и Аспергеров синдром „Во мојот свет".

Со одржувањето на настанот е одбележан и почетокот на кампањата „Еден свет за сите", што ќе се одвива во текот на целиот месец април.

На настанот беше составена сложувалка со меѓународниот знак на аутизмот од страна на децата со аутизам и присутните гости на настанот, меѓу кои беа и преставници на машката ракометна репрезентација и на мото-клубот „Ноќни волци".

Со музичка и танцовна точка и рецитали на настанот настапија деца со аутизам од ПОУ „Иднина", ПОУ „Маца Овчарова" – Велес и ОУ „Коле Неделковски", а свој настап имаше и подмладокот на балетското студио „Ребис".

На настанот беше промовирана и химната за аутизмот, компонирана од браќата Тавитјан, а изведена од Ребека, Мики Јовановски – Џафер и Влатко Лозаноски.

Со присуството на денешниот настан, сопругата на Претседателот на Република Македонија, г-ѓа Иванова уште еднаш ја потврди нејзината и поддршката на претседателот Иванов на сите активности и иницијативи што произлегуваат од здружението и од родителите на децата со аутизам.

autizam02

klinika1
Г-ѓа Иванова им подари новогодишни пакетчиња на децата во Клиниката за детски болести
Вторник, 31 Декември 2013

Сопругата на Претседателот на Република Македонија, г-ѓа Маја Иванова, денеска ја посети Клиниката за детски болести во Скопје, каде заедно со членовите на Алумни асоцијацијата на Иванов Школата за млади лидери (ИСЛАА) на децата кои се лекуваат на клиниката им подели новогодишни пакетчиња, сликовници, како и играчки изработени од нивни врсници од градинките ширум Македонија, во рамки на хуманитарната акција „Прегратка на дар“.

Овде сме за да им подариме пакетчиња на децата кои новогодишната ноќ ќе ја поминат во болница, но во силните раце на персоналот. Ова се празнични денови, кога се подарува љубов и се искажува нашата поддршка на оние на кои им е најпотребна. Сите деца имаат свои копнежи, соништа и желби. Верувам дека децата што се на оваа клиника имаат една желба-да оздрават и да се вратат во прегратките на своето семејство, истакна Иванова. Воедно, првата дама во името на нејзиниот сопруг, претседателот Иванов, и во името на нивниот син Иван им ја честиташе новата 2014 година,  им посака што побргу да оздрават, и да им се остварат сите соништа и желби.
Директорка на Клиниката за детски болести Аспазија Софијанова истакна дека имаат деца кои не можеле за Новата година да бидат дома и оти заедно ќе ја пречекаат 2014. Оваа година со сопругата на претседателот, Маја Иванова направивме klinika2револуцијата на Клиниката и колку што можеме ја враќаме насмевката на дечињата кои мораат да се дружат со лекарите, рече Софијанова. Емилија Џуровска, проектен координатор на хуманитарната акција „Прегратка на дар“ потсети акцијата има за цел да внесе хуманост уште во раните возрасти кај децата во градинките кои рачно изработуваат играчки за нивните другарчиња кои се принудени за време на празниците да останат во болница. „Прегратка на дар“ веќе трета година ги развеселува децата низ болниците со рачно изработени играчки од нивните другарчиња од градинките низ цела Македонија, посочи Џуровска.

veles4
Новогодишни пакетчиња од г-ѓа Маја Иванова за децата со церебрална парализа во Велес
Петок, 27 Декември 2013

На покана на Здружението на лица со церебрална парализа од Велес, сопругата на претседателот на Република Македонија, г-ѓа Маја Иванова, денеска подари новогодишни пакетчиња на децата со церебрална парализа во Велес, по повод новогодишните и божиќните празници,

Ова се празнични денови кога секој од нас ја покажува својата благородност, својата хуманост, празнични денови кога се подарува љубов, кога, како што старите велат, со убаво се испраќа старата, а уште поубаво и повесело се дочекува Новата година, рече г-ѓа Иванова.

Првата дама во името на нејзиниот сопруг, претседателот Иванов, и во името на нивниот син Иван им ја честиташе новата 2014 година и им посака многу здравје, многу среќа, многу радости и многу убавини на децата со церебрална парализа во Велес.

Овие деца, за коишто сме денеска овде, имаат свои копнежи, свои соништа, свои желби, како што има моето дете и како што имаат сите други деца. Затоа, од срце посакувам овие копнежи, овие радости, овие нивни желби и соништа да се остварат во наредната година. Да нема повеќе солзи, туку да има само насмевки на вашите лица. Ви посакувам се најубаво во новата година, изјави г-ѓа Маја Иванова.

veles3

kl1
Отворен првиот Детски ургентен центар во Република Македонија
Сабота, 21 Декември 2013

Во целосно реновиран и комплетно опремен простор, во присуство на Претседателот на Република Македонија, д-р Ѓорге Иванов и неговата сопруга, г-ѓа Маја Иванова, денеска е отворен првиот специјализиран Детски ургентен центар во земјата, сместен во Универзитетската клиника за детски болести во Скопје.

Средствата за реконструкцијата и адаптацијата на просториите во Клиниката беа собрани во рамки на Националната донаторска кампања под мотото „Да помогнеме навреме", а беше спроведена под покровителство на сопругата на претседателот на Република Македонија, г-ѓа Маја Иванова. Ургентниот центар е целосно изграден со поддршка на Турската меѓународна агенција за соработка и развој-ТИКА, а дополнителните донации ќе се искористат за доопремување на Ургентниот центар и новите амбуланти.

За потребите на новата организациона единица беа изведени повеќе градежни реконструкции, објектот беше внатрешно преуреден, а беше обезбедена и најсовремена медицинска апаратура.

Г-ѓа Иванова во обраќањето пред присутните рече дека како покровител на Националната кампања била полна со ентузијазам, имала силна инспирација, но најмногу била охрабрена со безрезервната поддршка на нејзиниот сопруг, претседателот на Република Македонија, д-р Ѓорге Иванов.

„Овој Ургентен центар ќе придонесе во голема мера за здравствени услуги кои нашата држава ги нуди за децата, посебно за итните случаи за кои најнеопходна е првата помош пружена од медицински лица. Итните случаи од денес ќе бидат третирани во Ургентен центар, како што е пракса во многу напредни земји, со добро разработен и крајно ефикасен здравствен систем", посочи г-ѓа Иванова.

Таа рече дека секој има обврска да даде свој личен придонес за активности кои се однесуваат на општото добро на сограѓаните и општеството.

kl2„Таквите активности се тие кои не облагородуваат, кои не оплеменуваат, кои не прават хумани и кои ги истакнуваат нашите доблести и нашите вредности. Затоа, со огромна желба и мотив застанав како покровител на Националната кампања", потенцира г-ѓа Иванова и им се заблагодари на сите кои ја поддржаа кампањата и донираа преку телефонскиот број 14321, како и на медиумите кои овозможија кампањата да допре до секој граѓанин.

Министерот за здравство, г-дин Никола Тодоров истакна дека Детската клиника мора да биде целосно опремена да одговори на сите најсовремени предизвици во медицината и затоа многу е инвестирано-сменети се прозорците, се работело на енергетска ефикасност, на зголемување на стандардот за сместување на децата, тоалети во секоја соба, набавка на ново возило за неонатален педијатриски транспорт, набавка на нова медицинска опрема и се тоа во вредност над 100 милиони денари.

Ова што го имаме денеска, посочи министерот Тодоров, е показател дека во Република Македонија и поинаку може да се инвестира во здравството, односно дека почнуваат да се применуваат принципите на инвестирање во здравството кои важат во сите развиени земји, а тоа е со едно високо ниво на општествена одговорност, со вклучување на највисоките авторитети во државата, на амбасадите и на сите граѓани може да се направи подобрување на системот. Тој додаде дека станува збор за една од поголемите реформи преземена во македонското здравство.

Директорката на Клиниката, д-р Аспазија Софијанова, изразувајќи задоволство од отворањето на Детскиот ургентен центар, рече дека иницијативата тој да се направи на почетокот била само една скромна замисла која ја поддржале и надградиле нејзините најблиски соработници и советници.

Сопругата на американскиот амбасадор, г-ѓа Мери Џо Волерс истакна дека експертската грижа и сочувство на медицинскиот персонал на Ургентниот центар ќе спасат многу од животите на околу 20.000 деца кои се очекуваат да го посетат идната година.

Г-дин Мехмет Суреја Ер, потпретседател на Турската меѓународна агенција за соработка и развој - ТИКА рече дека работите за адаптација и реконструкција кои се одвивале од нивна страна биле комплетирани за само 60-тина дена.

„Проектот за Ургентниот центар содржеше целосна реконструкција, адаптација, медицински гасови, термо техника, електрични инсталации, медицинска опрема и целосно опремување со мебел", истакна г-дин Суреја Ер и додаде дека сето тоа е подарок на Република Турција за Република Македонија.

Нагласи дека Ургентниот центар со најдобар и најквалитетен стандард на функционирање ќе нуди добри услови.

Турскиот амбасадор, г-дин Ѓурол Сокменсуер им посака здрава иднина на децата од Клиниката и укажа на подготвеноста на Република Турција секогаш да ја поддржи, како што рече, пријателска и братска Република Македонија.

Специјализираниот Детски ургентен центар располага со четири главни и два дополнителни кревети, опфаќа шест простории за специјалистички амбуланти, една лабораторија и чекална. Амбулантите ќе ги покријат областите: неонатологија, кардиологија, хемато-онкологија, ендокринологија, гастроентерохепатологија и нефрологија.

kl3

kalinki1
Здрави поколенија се и здрава држава – Претседателот Иванов со сопругата Маја на „Ден на калинката“ во Валандово
Среда, 09 Октомври 2013

Претседателот на Република Македонија, д-р Ѓорге Иванов, со својата сопруга г-ѓа Маја Иванова, денеска во Валандово присуствуваа на манифестацијата „Ден на калинката ", што се организираше во рамки на кампањата „Здрава храна за детство без мана", чиј покровител е г-ѓа Иванова.

На настанот, на кој учествуваа и Николче Чурлиновски, градоначалник на Општина Валандово, ракометарот Наумче Мојсоски и поранешниот фудбалер Миле Боев, децата од валандовското основно училиште „Јосип Броз – Тито" имаа можност да берат калинки и да се запознаат со корисните својства на овој вид овошје.


„Денеска сме во Валандово, градот на калинката, и град за којшто ме врзуваат многу убави работи. Многу сум радосна што денеска кампањата „Здрава храна за детство без мана", во организација на организацијата „ОХО", ја поддржува и мојот сопруг, којшто всушност ја поддржува од самиот нејзин почеток, и еве денеска сме тука - во неговиот роден град. Овој денешен настан го организираме малку поневообичаено од претходните, на кои имавме приредби, минатиот пат ја посетивме фабриката за ориз, а еве денес сме на нива, каде што со децата имавме берба на калинки. Децата можеа да се запознаат како расте калинката, како се бере калинката, кои се нејзините хранливи состојки. Уште еднаш, од овде од Валандово, повик до сите оние којшто се вклучени во правилен развој на децата, да се подигне јавната свест на целото општество за тоа што значи здравата храна за младите поколенија, затоа што здрави поколенија се и здрава држава", изјави г-ѓа Иванова.

kalinki2„Јас сум денеска тука, во мојот роден град, да ја поддржам оваа кампања „Здрава храна за детство без мана", бидејќи пред се ни требаат здрави поколенија. Овие деца да ја знаат моќта на овошјето, на зеленчукот, и на сето она што го дава нашето поднебје. Навистина ми е мило што децата ги стекнуваат овие навики постојано да се хранат со здрава храна, да се во здрава околина, и навистина да вложуваме за млади за иднината. А ние сме тие што мораме да мислиме за иднината на младите", изјави претседателот Иванов на денешната манифестација.

Целта на кампањата „Здрава храна за детство без мана" е да се подигне свеста за консумирање на здрава храна кај децата и учениците. Кампањата се реализира трета учебна година во градинките и училиштата, како дел од програмата „Интеграција на еколошката едукација во македонскиот образовен систем" во соработка со Министерството за образование и наука и здружението „ОХО".

kalinki3

borka1
Да ја шириме розевата порака - Обраќање на г-ѓа Маја Иванова на 6. Национална конференција за борба против ракот на дојката
Понеделник, 07 Октомври 2013

Почитувани,

Чест ми е да бидам дел од 6. Национална конференција за борба против ракот на дојката. Упатувам посебни поздрави до организаторот, здружението „Борка – за секој нов ден" кое претставува лидер организација за поддршка на граѓаните, пациентите, нивните семејства и здравствените организации во борбата против сите видови на рак. Дозволете ми во оваа пригода да ги пренесам искрените поздрави и целосната поддршка од мојот сопруг, претседателот на Република Македонија за сите активности во нашата земја посветени на борбата против ракот на дојка, активности кои секогаш ги поддржуваме со отворено срце и искрена почит.

Дами и господа,

Создавањето здрава популација, здрави поколенија, овозможувањето здравствени услуги достапни за сите граѓани, е обврска на државата во која живееме. И таа секако се труди, посветено работи на постигнување на оваа висока цел. Помошта, поддршката и укажувањето на некои посебни потреби и неопходни третмани, лекувања на граѓаните засегнати од одредена болест и начинот како тие можат, како поединци, да се изборат против болеста, некогаш бара и граѓанска иницијатива за да се слушне нивниот глас. Сите знаеме дека колективниот глас на одредена група е многу посилен од поединечен глас. А, посебно кога одредена група со заеднички проблеми има поддршка и од организација која е секогаш подготвена и која на располагање ги нуди своите ресурси, трудејќи се вистински да помогне. Во таа улога ја препознавам организацијата „Борка". Оваа организација зборува во името на пациентите, во името на нивните семејства, во името на нивните проблеми, нивните потреби, нивните побарувања и идеи за ефикасни третмани и лекувања. „Борка" ги преточува во единствен конкретен предлог пред јавноста, трудејќи се да ја подигне свеста на сите граѓани, сите општествено одговорни поединци, сите надлежни институции. Претставува мост на соработка меѓу засегнатите, и секако, институциите со надлежности во конкретната област. Моќта на здружувањето на гласот на засегнатите од болеста рак на дојка и мобилизирањето на граѓанскиот сектор предводен од најсилниот розев борец во нашето општество го крева гласот на жената поединец. Затоа ги почитувам, затоа ги поддржувам сите активности кои ги презема „Борка". Затоа што сум уверена дека „Борка" зборува во името на Марија, Александра, Виолета, Кристина, Елена и многу други... затоа што зборува и во мое име.

Почитувани присутни,

Во оваа прилика сакам да ги поздравам сите активности кои се преземаат од релевантните државни институции во борбата против ракот на дојката. Mораме да констатираме дека постојат голем број на поволности и придобивки за пациентите со дијагностициран рак на дојка и информирање за оваа болест, а уште повеќе, дека постојат многу можности за редовни прегледи, рано дијагностицирање, адекватен и навремен третман. Бесплатни мамографски прегледи, мобилни мамографи за прегледот да биде достапен на секоја жена без разлика на нејзината економска и социјална состојба и место на живеење, достапни и отворени онколошки капацитети, едукација и усовршувања на здравствените работници во оваа област, квалитет на третманот кој им се нуди на пациентите за справување со овaa болест.

borka2Дами и господа,

Улогата на конференциите како денешната, во месец октомври - месец на борбата против ракот на дојката, како најчесто малигно заболување кај жените, е да се поздрават сите постигнувања во борбата против оваа болест во текот на изминатата година, и, да се посочат и воочат потребите и можностите за подобрување во наредната година. Тука се присутни сите страни... сите учесници, сите релевантни фактори во борбата против ракот на дојката. Надлежните државни институции, претставници на здравствените установи кои во оваа заедничка борба се внесуваат професионално и одговорно одговарајќи на потребите, за достапни и навремени прегледи и третмани na оваа болест. Присутни се и претставници на меѓународни организации и дипломатски претставништва со цел да пренесат позитивни примери, искуства и практики од нивните земји во борбата против рак на дојка.

Меѓутоа, убедена сум дека денешната конференција немаше да биде успешна доколку меѓу нас овде не се присутни многу поединки кои се вистинските „борки". Тоа се храбрите и горди „борки" кои ги пребродиле најтешките моменти во својот живот соочени со оваа болест. Тоа се „борките" кои излегоа победници во борбата против ракот на дојката, кои се пример дека животот продолжува, дека светот се уште може да биде розево место за живеење. Тоа се жените кои со крената глава ги водат розевите прошетки, кои со својот пример зборуваат дека почетокот на битката со ракот на дојката не значи и почеток на крајот. Едноставно не се предале, не се предаваат и нема да се предадат ниту понатаму. Тие се наша инспирација, преку нивниот несебичен активизам и посветено волонтирање, обидувајќи се да и помогнат на својата сестра, пријателка или мајка, со поддршка и подадена рака, за да успеат и тие да се исправат пред болеста, да не дозволат болеста да им ја одземе насмевката од нивните лица, да не дозволат болеста да им ја одземе ведрината во нивните очи, љубовта кон своите најмили, и за да сведочат дека борбата продолжува и дека таа битка може да се добие.

Драги „борки", ова мое денешно обраќање Ви го посветувам токму Вам.

Ве повикувам сите заедно, да ја шириме нивната розева порака, за нив и со нив гордо да ја носиме розевата панделка, да го пренесеме нејзиното значење до секоја жена, заедно да ја подигнеме свеста на граѓаните за важноста на превентивните прегледи и раното откривање на овој карцином, да ја подигнеме јавната свест за борбата против ракот на дојката.

За секоја „борка", за секој нејзин нов ден.

Ви благодарам.

borka3

 
Почеток < Пред 1 2 3 4 5 6 7 8 9 Следно > Крај
Страница 5 од 9

Биографија

Првата дама на Република Македонија, госпоѓа Маја Иванова, е дипломиран правник кој во слободното време пишува поезија. 

Повеќе

 

Фото галерија

Maja_fotogal