header

header_peperut_-_Copy3

Маја Иванова - Новости
Обраќање на женската сесија „Управување, жените и иднината“ во рамки на 15. Евроазиски економски самит во Истанбул
Среда, 11 Април 2012

Почитувани дами и господа, Ваши Екселенции,
Ми претставува особена чест и задоволство да се обратам, денес, на женската сесија во рамките на 15. Евроазиски економски самит, организиран од  Фондацијата Мармара. Дозволете ми, да изразам благодарност и почит до организаторите, а посебно до г-ѓата Мужѓан Сувер, која со огромна упорност од година во година нè соединува на патот на кој секој нареден чекор го преземаме за подобрување на улогата на жената во глобални рамки. Воедно, ја користам приликата да упатам честитки до Фондацијата Мармара за 15-годишниот јубилеј на Евроазискиот економски самит и да посакам многу успеси во организацијата на наредните самити.

Срдечно ве поздравувам и сите вас, присутни овде. Нашето присуство, овде и сега, претставува уште еден доказ дека ниту сме се откажале, ниту сме престанале во борбата за подобро утре, за подобра иднина, туку секојдневно со нашите залагања и активности се трудиме да ги совладаме глобалните предизвици со кои се соочуваат жените.

Драги дами,
Жените со децении наназад го чекорат патот на рамноправноста и еднаквоста. Првата и вистинска цел на тој пат беше да ги добијат истите права и можности како мажите. Сепак, таа цел, сама по себе, не значеше остварување. Напротив, тоа беше само еден чекор на патот кон целосен општествен придонес, кој жената може и има обврска да го даде во социоекономските текови. Благословот кој жената го има во создавањето нов живот претставува и обврска да се грижи и за подобро живеење. На тој начин, балансот кој го создала природата е наш предизвик да создаваме и да промовираме одржливо општество во сите сфери, општество кое ќе може да се справи со сите предизвици. Вистинското прашање во таа насока веќе не е дали, туку колку можеме нашите желби и залагања да ги преточиме во реалност. А, јас сум сигурна дека можеме, дека умееме да придонесеме во развојот на нашите општества, зацврстувајќи ја неповратливоста на тој процес.

Почитувани,
Мојата земја опстојувајќи низ времето, како мост меѓу два континентa, како крстопат на многу култури, религии и цивилизации, длабоко во својата историја ги има вткаено придобивките од антиката до денес, од Истокот и Западот, од христијанството и исламот, од Европа и Азија. Во неа, условите и животот постојано се менувале и се менуваат, но она што останува се вредностите од секоја генерација од кои постојано учиме.

Сликата на македонското општество денес и улогата на жената во него претставува комбиниран израз на традиционалните вредности од една страна, и политичката волја и заложба на жените од друга страна.
Во изминатите години во Република Македонија се направени многу значајни чекори кон подобрување на општествената улога на жената. На патот кон промените, во секој сегмент од моето работење, ги поддржувам активностите и проектите кои го промовираат учеството на жените во подобрувањето на општествениот развој. На различни начини, преку мое директно покровителство, активно вклучување и иницијативи, како и ангажирање на сите видови расположливи општествени ресурси, се трудам да помогнам да се постигнат нивните благородни цели.

Со промените во законодавството за загарантирано учество на жената со 1/3 во претставничките тела, денеска сè поголем број од пратениците, министрите и вршителите на високи државни функции се жени. Со својот придонес, истрајност и залагања, жените сè повеќе успеваат во значајни реформски општествени проекти. Нивните активности суштински придонесуваат во многу политички иницијативи и законски промени во областа на социјалната заштита, здравството, образованието и културата.

Она што посебно сакам да го истакнам е учеството на жената во економските текови. Од година во година се поголем е бројот на успешни жени менаџери, кои ги разбираат условите на пазарот, ја внесуваат својата креативност и промовираат нови општествено одговорни концепти во водењето бизнис.

Во областа на здравството, ги поздравувам инцијативите и реформите кои се преземаат и спроведуваат во мојата држава од страна на институциите. Но, посебно сум горда на проекти кои се иницирани, водени и реализирани од женски здруженија за кои лично сум секогаш подготвена да помогнам. Во таа насока, би ја издвоила мојата соработка со Националното здружение на жените заболени од рак на дојка, со кое се обидуваме да ја промовираме потребата од редовни прегледи и навремено откривање на ракот на дојката. Но, истовремено и да им дадеме поддршка и посреќни моменти на оние кои таа борба веќе ја водат, и да ги охрабриме со примерите за успешно пребродената болест.

На полето на заштита на децата во изминатиот период, на мое големо задоволство, ги поддржувам иницијативите на граѓанскиот сектор и институциите на Република Македонија за посоодветен третман и здравствена заштита, образование и интеграција на децата со посебни потреби. Особено блиска и значајна за мене е поддршката за децата со аутизам. Под мое покровителство, веќе две години по ред, се организираат различни и многубројни активности со кои се обидуваме да ја промениме јавната свест, да покажеме дека секое дете, секоја личност ги ужива истите права и можности. И оваа година ги мобилизиравме различните општествени групи, политичарите, дипломатите, научната јавност, бизнис-заедницата и граѓаните на Република Македонија, сплотени под мотото „Аутизмот зборува, време е да слушнеме“. Tие деца се тука и важно е да ги препознаеме нивните потреби и да ги поддржиме сите активности за нивно вклучување.

Драги дами,
Денес, со вас присутни, споделив дел од активностите кои ги водам како сопруга на претседателот на Република Македонија. Се надевам дека во вашите излагања ќе ги препознаам сите оние активности и проекти, кои како жени можеби не сме доволно силни да ги реализираме, но сме секогаш успешни да ги инспирираме.

Секоја од нас од денешниот настан треба да замине со една дополнителна обврска – да ја препознае и поттикне секоја жена која е подготвена да даде поширок општествен придонес, да ја охрабри и поддржи во остварувањето на нејзините цели, и, секако, да придонесе во вреднувањето на нејзиниот успех. Само на тој начин, преку меѓусебна поддршка, ќе успееме во промените, ќе успееме да се соочиме со предизвиците, да ги надминеме разочарувањата и да ги прославиме успесите како поттик за иднината.

Ви благодарам.


Г-ѓа Иванова во поддршка на манифестацијата „Здрава храна за детство без мана“ во Битола
Четврток, 05 Април 2012

Учениците од основните училишта и деца од детските градинки во Битола денеска ја одржаа манифестацијата „Здрава храна за детство без мана“, кампања која под покровителство на г-ѓа Маја Иванова, сопруга на претседателот на Република Македонија, се спроведува во општините низ државата.

На бројните штандови, поставени пред НУ Центар за култура, беа изложени разни домашни производи, креации од овошје и зеленчук, но и детски творби и пораки за здрава храна и правилна исхрана.

„Оваа акција станува сè помасовна и во неа, освен децата, вклучени се и нивните родители, наставници и професори, односно сите субјекти што се вкчлучени во создавањето на една здрава млада личност. Треба да сме среќни што сме држава која изобилува со плодна почва, со здрава вода, со сончеви денови и затоа ако се храниме здраво ќе живееме здраво и ќе создаваме поколенија кои се иднина за нашата држава,“ истакна г-ѓа Иванова за време на денешниот престој во Битола.

Караванот „Денови на овошјето и зеленчукот“ ќе ја обиколи цела Македонија, а го организираат Здружението на граѓани „ОХО“ во партнерство со Министерството за образование и наука, Швајцарската агенција за развој и соработка, и општините домаќини на манифестациите.

Градоначалникот на Битола, Владимир Талески, истакна дека максимално ја поддржува оваа иницијатива и ќе вложи напори за што поголема и помасовна вклученост на деца, ученици, професори од Битола, што ќе придонесе за стекнување здрави животни навики.

Општинската програма за манифестацијата „Здрава храна за детство без мана“ ја подготвија учениците и наставниците од ОУ „Д-р Трифун Пановски“ - Битола кои изведоа рецитал, песни и драматизации и други училишни креативни содржини.

alt


Да застанеме пред предизвикот наречен аутизам – г-ѓа Маја Иванова покровител на Светскиот ден на лицата со аутизам
Понеделник, 02 Април 2012

По втор пат во Република Македонија, а под покровителство на сопругата на Претседателот, г-ѓа Маја Иванова, во центарот на Скопје се одбележа Светскиот ден на лицата со аутизам. Целта е да се подобри квалитетот на животот на лицата со аутизам, да им се даде рана дијагностика, навремен третман, можност за едукација и соодветна здравствена заштита.

„Преку една ваква манифестација, сакаме да застанеме пред предизвикот наречен аутизам. За него велат дека е тивка болест, меѓутоа ние од овде ќе испратиме гласна порака дека ја даваме нашата безрезервна поддршка за сите оние кои што се справуваат со неа. Од овде сакам да ја упатам мојата безрезервна поддршка на родителите чии што деца боледуваат од аутизам, сакам да им кажам дека не се сами, дека секогаш имаат подадена рака, затоа што вреди да се изодат и милиони чекори преку активности и напори за да се дојде до една детска насмевка, до еден среќен блесок во очите на дете со аутизам,“ рече г-ѓа Иванова.

Таа додаде дека децата со аутизам имаат неверојатно големи таленти, за што вреди сите да се потрудиме да ги откриеме тие таленти и да им помогнеме да ги развијат во една насока во која што ќе бидат најдобри.

„Драго ми е што денеска на овој хепенинг се обединети сите - и здруженијата што се бават со оваа проблематика и надлежните институции и граѓаните, а особено ми е драго што овде се и родителите на децата кои боледуваат од оваа болест. Колку повеќе се знае за неа толку повеќе и побрзо се прифаќаат ваквите лица кои што го доживуваат светот на малку поинаков начин,“ додаде сопругата на претседателот на државата.

Манифестацијата, која ја организира здружението „Во мојот свет“ во соработка со Македонско научно здружение за аутизам, беше исполнета со богата музичка програма и осмислени активности за најмладите. Со овој настан почнува и кампањата под мотото „Еден свет за сите“, која ќе се спроведе во текот на овој месец, а со цел будење на јавната свест во Македонија за постоењето на аутизмот, како и начините на справување со него.

Во Македонија не постои официјален регистар на лица со аутизам, но според статистиката на Светската здравствена организација има 12.240 лица. Аутизмот не е емоционална болест, туку тешко развојно нарушување со генетска основа. Поновите истражувања покажуваат дека се јавува почесто од Дауновиот синдром, од ракот кај децата или глувоста. Почесто се јавува кај машките, отколку кај женските деца и тоа за четири пати.

Раното дијагностицирање на аутизмот е од клучно значење. Со современите знаења, средства и методи, аутизмот може да се детектира најрано на возраст од околу 18 месеци, со што се создава основа за интервенција кога мозокот е во фаза на формирање. Со раното откривање на аутизмот може да се обезбеди излез за аутистичните деца, како и за луѓето околу нив.


Фото-сторија во ТЕА Модерна: дамско дружење на г-ѓа Маја Иванова и г-ѓа Светлана Вујановиќ
Среда, 21 Март 2012
Жената е симбол на сите семејни вредности и темел на заедништвото - Интервју на г-ѓа Маја Иванова за порталот на агенцијата МАРИЛИ
Вторник, 06 Март 2012

„Семејството е најважната алка во општеството, од каде сè започнува. Тука се гради личноста, се воспитува и се насочува. Секој дел од семејството е подеднакво важен, и сметам дека треба и жената и мажот исто да придонесуваат за да се изгради здраво поколение.“

МАРИЛИ: Како сопруга на четвртиот по ред претседател на независна Република Македонија, која е Вашата улога во професионалните ангажмани на нашиот претседател?

ИВАНОВА: Улогата на сопруга на претседател ја чувствувам како улога која ужива привилегии, но со себе носи и голема одговорност. Тргнувајќи од тоа дека сопругата на претседателот е дел од имиџот на претседателот,ми претставува задоволство да го придружувам сопругот секаде, каде тоа од мене го бара протоколот, особено на официјалните посети. Навистина претставува привилегија тоа што имам можност да посетам многу земји и одблиску да се запознам со нивната култура, традиција и историја. Додека пак, кога сум домаќинка на сопругите на претседателите кои ја посетуваат нашата земја се подготвувам посветено за средбите со нив за да бидам достоен соговорник и во најдобро светло да ја претставам мојата земја и нејзиното непроценливо историско, културно и духовно наследство. Во оваа смисла сакам да ги нагласам моите активности како сопруга на претседател коишто ги преземам одделно. Сакам да го издвојам моето учество на Меѓународниот конгрес за музика и културно наследство, кој се одржа во ноември 2010 во Анкара, како и учеството на 5. Меѓународен форум за лица со посебни потреби во јануари 2012 во Доха. Во рамките на моите меѓународни активности, како сопруга на претседател, ја издвојувам посетата на Народна Република Кина и учеството на Меѓународниот форум за жената и одржливиот развој, во организација на Секинеската женска федерација, настан кој имав чест го отворам со воведно обраќање.

МАРИЛИ: Дали според Вас улогата на првата дама е маргинализирана, а со тоа и нејзината функција се става во втор план?

ИВАНОВА: Секогаш претпочитам да ми се обраќаат со „сопруга на претседателот“, со оглед на тоа дека кај нас не постои некаква формална рамка за улогата и функцијата „Прва дама“. Сметам дека улогата на сопругата на претседател како животен сопатник е сè повеќе инклузивна во општественото живеење. Години наназад жените во светот, носители на оваа позиција, водени од своите идеи и желби да го дадат својот придонес во одредени сегменти на општественото живеење ја дефинирале титулата „Прва дама“ и нејзината улога. Постојат многу сфери во општеството каде што се вклучени првите дами, политиката, културата, здравствената и социјалната заштита на жените и децата. Најчесто првите дами во светот се вклучени во најразлични хуманитарни активности, што е природно една жена да сака да ги вложи своите напори и да ги искористи своите можности онаму каде што е најпотребно. Сепак, сакам да нагласам дека колку сопругата на претседателот ќе биде активна во општествениот живот, пред сè зависи од нејзината личност.

МАРИЛИ: Дали улогата на мајка и сопруга се сè уште Вашите клучни улоги во животот?

ИВАНОВА: Улогата на сопруга и мајка секогаш ќе биде моја клучна улога во животот. Жената е симбол на сите семејни вредности и темел на заедништвото. Жената како мајка и сопруга постојано мора да работи на промоција на моралните вредности преку своето лично однесување во рамките на своето семејство, во рамките на работната средина и во непосредното опкружување. Јас уживам во оваа улога и навистина сум многу горда што имам прекрасно семејство. Посветена сум на семејството и се трудам да бидам потпора на мојот сопруг во неговите професионални ангажмани кои се навистина големи, истовремено семејните вредности на кои што нè учеле нашите родители да му ги пренесеме на нашиот син, за тој да се развие во една здрава личност со многу доблести во себе. Така во нашето 21-годишно заедничко живеење сè она што правиме е поставено на трите столба на нашето семејтво, а тоа се љубовта, довербата и разбирањето.

МАРИЛИ: Како дипломиран правник, вработена како советник во Агенцијата за цивилна воздушна пловидба на Република Македонија, дали ова Ви претставува проблем да ги следите и агендите на претседателот на Република Македонија?

ИВАНОВА: Кога се има желба и јасна цел пред себе сè може да се постигне. Не велам дека е лесно, но со добро менаџирање на обврските сè се постигнува. Ја сакам својата работа како советник во Агенцијата за цивилна воздушна пловидба и го давам својот максимум на работното место. Од работното место отсуствувам исклучиво по потреба, во зависност од обврските кои ги имам како сопруга на претседателот. Кога работите посветено успехот е неминовен.

МАРИЛИ: На кои полиња во општественото делување сте најактивна и истовремено се чувствувате најкорисна?

ИВАНОВА: Откако се најдов во позиција на сопруга на претседателот на државата, посакав да ги искористам своите можности и да поддржам некои општествено корисни иницијативи. Сметам дека мојот глас треба дазборува во името на оние на кои им е најпотребна помош. Сфатив дека доколку ја вложам сета своја љубов и разбирање кај децата и жените ќе успеам да го дадам својот најголем придонес во општеството. Согледувајќи ги актуелните проблеми со кои секојдневно се соочуваат децата и младите со посебни потреби, но и нивните родители и поблиските пријатели, и запознавајќи ја средината во која секој мал напредок е подвиг кон кој вреди да се стремиме и за кој вреди да се изодат милиони чекори само да се постигне една насмевка, еден допир, една прегратка, еден блесок во нивните очи, направив чекор. Се вклучив во иницијативата и посветено почнав да работам на унапредување на нивната положба и условите во кои ќе можат да остварат порадосен и побезгрижен живот, особено децата заболени од аутизам, синдром кој за жал во светски рамки има тенденција на пораст. Децата се нашето најголемо богатство и нашата иднина. Сите деца имаат еднакви права и на сите треба да им се даде неопходната поддршка и да им се овозможат еднакви можности. Тргнувајќи од фактот дека исхраната на децата игра клучна улога во нивниот правилен раст и развој со особено задоволство се вклучив во кампањата „Здрава храна за детство без мана“ на невладината организација „ОХО“ која што се спроведува во училиштата низ Република Македонија во соработка со Министерството за образование. Ние сме среќни што живееме во природно богата земја, земја со богата биолошка разновидност, исклучително плодна земја, која изобилува со чисти изворски води, со многу сончеви денови, традиционално производство на зеленчукови и градинарски култури, храна која се пренесува од генерација на генерација. Тоа богатство е наш знак на препознавање. Нашата традиција и здравата храна создаваат здрави навики. Создавањето на здрави навики во подготовката и консумирањето на храна се предуслов за здрави поколенија. Здравата исхрана не е значајна за децата само од нутриционистички аспект, туку и поради градењето однос кон природата. Една од моите активности кои сакам да ги нагласам е и моето вклучување во активностите на невладината организација „Борка“ земајќи го предвид фактот, дека денеска значително е зголемен бројот на жени кај кои е дијагностициран ракот на дојката. Почувствував потреба да се вклучам во кампањата и преку моето учество на најразлични манифестации да помогнам во подигнувањето на јавната свест кај жените за постоењето на оваа болест, бидејќи нејзиното откривање во рана фаза значително помага во процесот на нејзино лекување. Жената како и многупати досега докажала дека е вистински борец, таа успева да ги воздигне најдлабоките емоции, но истовремено подготвена е да ја скроти и најдлабоката болка, а притоа да ја задржи топлината на своето лице и благоста на своите зборови. Најголемата и најценетата поддршка која една жена може да ја воздигне и одржи е поддршката од друга жена, токму затоа и се вклучив во оваа кампања за борба против ракот на дојката. Се разбира, постојат уште многу други иницијативи што ги поддржувам и ќе продолжам и понатаму да се вклучувам во вакви активности, кои се од особено значење за нашето општество.

МАРИЛИ: Има ли првата дама на Република Македонија слободно време за своите желби, потреби и амбиции и како го пополнувате тој вакуум простор?

ИВАНОВА: Со оглед на обврските кои ми ги наложува професионалниот ангажман, како и ангажманот во улога на сопруга на претседателот на државата немам многу слободно време, но она што го имам сакам да го искористам и да бидам со моето семејство и нашите пријатели, бидејќи функциите поминуваат, а семејството и вистинските другарства и пријателства остануваат. Поради тоа заслужуваат особена почит и внимание, и се разбира негување на тие односи. Богатството на еден човек не се мери со неговата материјална состојба, богат човек е само оној кој има вистински пријатели покрај себе. Со нашите пријатели не врзува искрено пријателство години наназад и во нивно друштво се чувствувам навистина убаво. Тука не смеам да изоставам еден посебно драг пријател кој секојпат кога ќе го видам ме прави среќна, нашиот шарпланинец Алек. Семејните прошетки заедно со него во природа ни даваат еден посебен мир и спокојство.

МАРИЛИ: За збирката поезија посветена на Скопје, ја добивте престижната награда „13 Ноември“. Која е Вашата најголема инспирација за создавање на поезијата, и на кој друг начин ја изразувате Вашата креативност и уникатна енергија?

ИВАНОВА: Сакам да пишувам поезија. Тоа повеќе го правев во младоста. Секој автор има свој печат, свој одраз во стиховите што ги создава. Моето творештво секогаш беше проследено со силни емоции и мисли. Сега повеќе се занимавам со музиката, свирењето на пијано навистина ме исполнува, ми ја олеснува душата, ми дава мир, исто како и пишувањето поезија.

МАРИЛИ: Дали мислите дека созревањето на едно младо општество како нашето, значи и созревање на македонската жена во сите сфери, позицијата на жената во семејството, жената во политиката, жената во однос на социјалната заштита, во однос на здравството, жените во бизнисот, во културата и во однос на многу други сегменти од општественото живеење?

ИВАНОВА: Созревањето на македонската жена е процес кој не е наметнат, туку природен, исполнет со предизвици кои се во согласност со времето во кое живееме. Денес, повеќе се очекува од жената, да се докажува на повеќе полиња, и како мајка, како сопруга, и во кариерата и во социјалниот живот. Сепак, жената сама треба да ги одреди своите приоритети и сама да го одбере и да се стреми кон нејзиниот повик во животот. Дали нејзината улога на мајка ќе биде најизразена, дали нејзината кариера, или пак можеби и двете е нејзин личен избор и тоа мора да се почитува, никако наметнува. Успешна и реализирана е секоја жена која го постигнала тоа што таа од себе го очекува. Успешната кариера не значи откажување од улогата на сопруга и мајка. Едното со другото не се исклучуваат и комбинирањето на успешната кариера и грижата за семејството е апсолутно остварливо благодарение на женската упорност, емотивност и посветеност. Созревањето на македонската жена го гледаме во многу примери денес, а најзначајно од сè е тоа што има проекти кои го величаат и наградуваат нивниот успех. Таква е улогата на вашата организација „Марили“, ги поттикнувате и бодрите успешните, ги поддржувате нивните професионални приказни и давате безрезервна поддршка за натамошен стремеж и пример за останатите.

МАРИЛИ: Минатата година ја поддржавте манифестацијата „Избор на најуспешни жени менаџери“ во организација на агенцијата „Марили“. Сметате ли дека во овој период на транзиција жените во Република Македонија се доволно застапени на раководни позиции, особено во бизнисот, или треба повеќе да се поттикнат и охрабрат во таа насока?

ИВАНОВА: Во бизнисот жените заземаат сè позначајна улога со видливо зајакнат претприемнички дух. Денес, сме сведоци на постоењето на многу успешни компании раководени од жени, кои ги разбираат условите на пазарот, ја внесуваат својата креативност во производството, промоцијата и маркетингот, и создаваат препознатливи македонски производи и услуги. Сепак, доколку ги разгледуваме статистичките податоци, далеку сме од доволна застапеност на жената на раководни позиции во бизнис секторот во нашата земја. И токму затоа, приказната за успешна жена менаџер е за восхит. Сето ова укажува дека улогата на жените во бизнисот во македонското општество се менува. Затоа, со огромно задоволство го прифатив покровителството на минатогодишниот избор на Агенцијата „Марили“, најмногу поради уникатноста на манифестацијата и опстојувањето на таа идеја цела декада. Ваквиот избор е само уште една потврда дека жената е сè позначаен учесник во бизнис секторот, што од друга страна претставува признание на успесите и кариерата на една жена, како и поттик за идно успешно делување на жената во општеството и нејзин поголем придонес за заедницата.

МАРИЛИ: Дали македонската жена, денес ги ужива сите права, но и обврски и како би ја оцениле нејзината успешност, без разлика на нејзиниот социјален статус во општеството?

ИВАНОВА: Македонската жена денес ужива многу права и државата ѝ нуди многу опции како истите да ги реализира и остварува. Нејзината успешност за остварување на правата не може да се оценува исклучиво според еден критериум, туку според повеќе. Тоа е израз на вековните традиции, култура, менталитет, образование, под влијание на предизвиците и напредокот на модерното општество, и пред сè, преку заложбата на жените во изминатите дваесет години од македонската независност. И затоа, тие заложби на жената за рамноправност и еднаквост треба повеќе да се ценат. Сметам дека секоја жена е успешна на свој уникатен начин, дури и тогаш кога самата не е свесна за тоа, воопшто независно од нејзиниот социјален статус.

МАРИЛИ: Здравото семејство е најважната алка за едно општество, пред сè заради генерациите кои се иднината на земјата. Колкав е уделот на македонскиот маж во семејството и дали мајката е таа која е столб?

ИВАНОВА: Според мене, семејството е најважната алка во општеството, од каде се започнува. Тука се гради личноста, се воспитува и се насочува. Секој дел од семејството е подеднакво важен, и сметам дека треба и жената и мажот исто да придонесуваат за да се изгради здраво поколение. Столбот може да биде жената, или мажот, според мене нема разлика. Само што жената е природно исполнета со посебно чувство на нежност и суптилност и кога таа презема лидерство, тоа зрачи со топлина и милост. Мораме да инвестираме во нашите деца, како родители ја носиме таа обврска, секој на свој начин, но со единствена цел, создавање здрава генерација која ќе го предводи нашето општество. Затоа, со посебно задоволство се приклучувам или, пак, ги предводам инцијативите кои се посветени на градење здрави идни генерации.

МАРИЛИ: Дали постојаните ангажмани на една жена на работното место, следењето на културните збиднувања, хуманитарните активности, семинарите, а со тоа и отсутноста од домот заслужуваат еден ден во 365 дена посветен на жената?

ИВАНОВА: Жената заслужува секој ден да биде посветен на неа, не само еден ден. Сепак, добро е кога постои ден за да се потсетат сите тие кои забораваат дека треба да ѝ се подари цвет на жената која направила многу во животот за нив. И секој ден да биде 8-ми март, има некој што тоа ќе го заборави. Се чувствувам посебно задоволна и среќна што на моите најмили не им треба повод за да ме израдуваат со некоја подарок, цвеќе, прегратка. И го посакувам тоа на секоја жена.

МАРИЛИ: Кога би направиле споредба на жената во Р. Македонија со жената во светот, каков е Вашиот став за нејзиниот рамноправен статус во општеството како чинител на општествените текови?

ИВАНОВА: Жената во Македонија има на располагање дополнителен сет на права кои се посветени на постигнување на еднаквост и рамноправен статус во општеството. Во насока на нејзина зголемена улога и вклучување во општествените текови, исто така, постои одлична правна рамка и стратегија за нејзин натамошен развој. Нашата земја на жената ѝ нуди многу опции и доколку таа е подготвена, храбра и сигурна во себе, има начин како да ги постигне своите цели без притоа да се чувствува изолирано, понижено, несфатено. Во споредба со правата на жената во целиот свет, Македонија како европска земја, слободно можам да кажам дека многу има постигнато и посветено за подобрување и јакнење на правата на жената.

МАРИЛИ: Учествувавте на Женскиот економски форум во Истанбул на тема: „Сопругите на лидерите како примери и нивното влијание на политиките за жените“. Дали жените на сите претседатели во светот можат да водат поздрава и поуспешна политика?

ИВАНОВА: Мислам дека жените секогаш се доста успешни и умешни кога станува збор за работа на која се посветени. Секако, ако изборот на жената е да биде во политиката, тогаш верувам дека таа може многу да постигне. Денес, жените лидери успеваат да одговорат на општествените потреби, да поведат општествена акција, а истовремено и да ги зачуваат семејните и традиционални вредности. Со задоволство ја прифатив поканата за женскиот економски форум во Истанбул, најмногу поради предизвикот да ја пренесам позицијата на жената во македонското општество, посебно во однос на политиките за жените, затоа што Република Македонија е доста напредна во таа област.

МАРИЛИ: Колку Вам Ви значи празникот 8-ми Март и дали нему пошироко во Европа, или светот му е дадено истото значење како и кај нас?

ИВАНОВА: Осми Март претставува значаен ден за борбата на жената за остварување на рамноправност, кој на различни начини се одбележува и прославува во целиот свет. За жал, понекогаш еуфоријата што кај нас се создава околу овој празник ја засенува неговата вистинска смисла. Традицијата создадена во некој изминат период резултира со малку поинаква претстава за празникот и поинакво прославување од останатите земји во светот. Во секој случај верувам дека 8-ми Март им е еднакво драг на сите жени, иако и останатите 364 дена во годината не се помалку значајни за жените и за нивниот рамноправен статус во општеството.

Пристапете до интервјуто на порталот на МАРИЛИ преку линк


Г-ѓа Маја Иванова на 5-тиот Меѓународен форум на Шафалах центарот во Доха, Катар
Понеделник, 23 Јануари 2012

Сопругата на Претседателот на Република Македонија, г-ѓа Маја Иванова, присуствува на 5-тиот Меѓународен форум на Шафалах центарот за деца со посебни потреби, кој се одржува во Доха, од 22-24 јануари. Главна тема на Форумот е „Кризи, конфликти и инвалидитет: осигурување еднаквост“, а се организира под покровителство на Нејзиното Височество Шеика Моза бин Насер, сопруга на Емирот на Државата Катар.

Во фокусот на овој Меѓународен форум е влијанието на природните катастрофи, конфликтите и хуманитарните кризи врз лицата со посебни потреби, како и нивната маргинализација во таквите ситуации.

Учесниците на сесиите посебно внимание посветија на тековните светски кризи - камповите за бегалци и конфликтните зони на Блискиот Исток и Африка, како и неодамнешните природни катастрофи во Јапонија, Хаити, Пакистан, анализирајќи го нивното влијание врз лицата со посебни потреби.

На настанот учествуваат повеќе од 300 високи гости, први дами, претставници на меѓународни организации, како и истакнати новинари од светски познати медиуми. Покрај г-ѓа Иванова, меѓу првите дами кои со своето учество му дадоа поголемо значење на форумот, се сопругите на претседателите на Шри Ланка, Полска, Намибија, Гана, Финскa, Кипар, принцезата на Холандија, принцот од Јордан и многу други.

По свеченото отворање на форумот, г-ѓа Маја Иванова оствари средба со Нејзиното Височество Шеика Моза бин Насер. Двете соговорнички разговараа на повеќе теми од заемен интерес. Г-ѓа Иванова ја информираше Шеика Моза бин Насер за нејзините активности во Република Македонија, осврнувајќи се посебно на иницијативите под нејзино покровителство, а кои се однесуваат на жената и децата, но пред сè активностите поврзани со децата со посебни потреби.

За време на свечениот ручек организиран за присутните високи гости, чиј домаќин беше Нејзиното Височество Шеика Моза, г-ѓа Иванова упати покана до неа да ја посети Република Македонија во летниот период и да присуствува на свеченото отворање на фестивалот Охридско лето.

Г-ѓа Иванова оствари средба и со г-ѓа Ана Коморовска, сопруга на претседателот на Република Полска, со која разменија информации за нивните тековни активности. Имајќи предвид дека двете први дами посветуваат посебно внимание на децата со посебни потреби, споделија мислења и искуства кои би можеле да ги применат во своите земји, како и идеи за идни заеднички инцијативи.

Г-ѓа Маја Иванова се сретна и со г-ѓа Чери Блер, сопруга на поранешниот британски премиер, и копретседавач на една од сесиите на форумот. Г-ѓа Блер ја информираше г-ѓа Иванова за најзините активности со фондацијата која го носи нејзиното име и чиј што предводник е таа, разговарајќи за можноста за натамошна соработка.

На свечената вечера која ја организираше г-динот Хасан Али Бин Али, Претседавач на Шафалках центарот, г-ѓа Иванова се сретна со Принцот на Јордан, Миред Раад Зеид Ал Хусеин, меѓународно признат активист за правата на лицата со посебни потреби. Г-ѓа Иванова и Принцот од Јордан имаа прилкиа да разменат мислења и да се запознат со нивните активности во областите во кои дејствуваат и за кои споделуваат заемен интереес. Принцот на Јордан во текот на утрешниот ден ќе биде еден од главните говорници на пленарните сесии.


Здраво дете е иднината на секое општество - проект „Здравата храна и традицијата“ во ОУ „Лазо Ангеловски“
Вторник, 27 Декември 2011

Во рамки на кампањата „Здрава храна за детство без мана“, која се одвива под покровителство на г-ѓа Маја Иванова, денес во ОУ „Лазо Ангеловски“ во општина Аеродром беше организирана презентација на училишниот проект насловен „Здравата храна и традицијата“.

Сопругата на претседателот на Република Македонија, г-ѓа Иванова, која ја следеше презентацијата и детската програма на тема здрава исхрана, нагласи дека отсекогаш сакала да поддржува општествено корисни иницијативи, а оваа и е една од најдрагите.

„Целта на оваа активност е да ги покренеме сите субјекти што се вклучени околу правилен развој на децата, како што се родителите, наставниците, училителите, професорите, педијатрите и сите кои учествуваат во градење на една здрава млада личност. Здраво дете е иднината на секое општество,“ посочи г-ѓа Иванова.

Кампањата „Здрава храна за детство без мана“, која започна во октомври годинава, ја спроведува невладината организација „ОХО“.

Александра Младеновска-Костиќ, програмски директор на „ОХО“ истакна дека целта на кампањата е да обезбедат позитивни навики кај децата од најмала возраст и да поттикнат едукација за исхраната.

„Здравјето зависи од квалитетот на исхраната. Храната во Македонија е здрава и убава. Кампањата е осмислена да се реализира на две нивоа: преку емисијата „5+“ која ќе изобилува со клипови и гости на оваа тема и преку училиштата и градинките кои ќе организираат настани во врска со здравата храна,“ истакна Младеновска-Костиќ.

Оваа кампања е поддржана и од Министерството за образование и наука, и како што посочи претставникот на Управниот одбор на програмата, Љупчо Спасовски, учебната 2011/2012 година е посветена на здравата храна.



Плакета за г-ѓа Иванова за хуманоста и поддршката на лицата со хендикеп
Петок, 09 Декември 2011

По повод Денот на лицата со хендикеп, во Универзалната сала во Скопје се одржа традиционалната манифестација „Различни, а еднакви". Овој настан е посветен на животот и подвизите на лицата со посебни потреби, но исто така оддава признание и на поединци и институции кои се трудат на различни начини да го олеснат и подобрат нивниот живот.

Организаторот, „Детла ексклузив", веќе неколку години ги наградува успешните лица со хендикеп, но и организациите, институциите, заводите и центрите што се грижат за нив, како и поединците што се залагаат за поголема афирмација на активностите на лицата со посебни потреби во јавноста.

На сопругата на Претседателот, г-ѓата Маја Иванова и беше доделена плакета во знак на благодарност за нејзината хуманост и континуирана поддршка и заложби лицата со хендикеп да можат да водат нормален живот, да ги надминат секојдневните пречки и да можат слободно да работат и да креираат.

Меѓу наградените лица со хендикеп се:

- Александар Савевски од Државниот училишен центар за образование и рехабилитација „Партение Зографски" од Скопје, успешен студент на Машинскиот факултет, вистински пример за успех во социјалната инклузија применета во образовниот систем кај нас.

- Нена Деспотовиќ, ученичка со попреченост во развојот од Државното средно училиште за рехабилитација и образование „Св. Наум Охридски" од Скопје, која оваа година на Специјалната олимпијада во Република Грција го освои првото место во пинг-понг натпреварите и донесе злато за Република Македонија.

- Ема Ананиевска, ученичка со целосно оштетен вид од Средното музичко училиште „Илија Николовски-Луј" од Скопје која годинава на меѓународен натпревар по клавир освои прво место, а деновиве ќе гостува и во Москва.

- Ифраим Љута од Тетово кој трча на патека од 200 и 400 метри, момче со над деведесет отсто оштетен вид, шести на светската ранг листа за атлетика за 2011 година.

- Роза Мојсовска, ликовен уметник кој црта со уста и неколку години едноподруго освојува прво место за Македонија на натпревар во Бугарија со мешан состав на учесници - здрави лица и лица со хендикеп.

- Дејан Зафиров, кој во последниве три години, со возење велосипед најнапред во Европа, потоа во Америка, го собори сопствениот рекорд со извозени над 14.000 километри, промовирајќи ја во исто време својата земја.

Добитници на плакети беа и други институции, установи, компании и здруженија на граѓани кои исто така даваат значаен придонес за лицата со хендикеп.



alt
Нема ништо повредно од здрави поколенија – г-ѓа Иванова во поддршка на акцијата „Ден на дрвото - засади ја својата иднина“
Вторник, 22 Ноември 2011

Сопругата на претседателот, г-ѓа Маја Иванова, е посветен поддржувач на напорите за зачувување на природата и унапредување на здравата животна средина. Заедно со својот сопруг, претседателот на Република Македонија д-р Ѓорге Иванов, и синот Иван, г-ѓа Иванова засади дрвце во Градскиот парк во Велес во знак на поддршка на акцијата „Ден на дрвото - засади ја својата иднина“.

Поздравувајќи ги дечињата од детската градинка "Димче Мирчев", кои во знак на својата здрава иднина садеа млади фиданки, г-ѓа Иванова истакна дека засадувајќи дрва се создаваат услови за развој на здрави млади генерации.

„Нема ништо повредно од човечкиот живот, од здрави поколенија. Среќна сум што оваа година семејно сме во Велес каде и младо и старо застана против загадувањето. Никогаш повеќе да не капне ниту една мајчина солза за болно дете како резултат на загадената животна средина,“ изјави г-ѓа Иванова денеска во Велес.

Таа изрази надеж дека и оваа акција „Ден на дрвото - засади ја својата иднина“ ќе биде масовна, како и претходните, особено во Велес, за да може да се надомести барем мал дел од штетата за животната средина која била нанесена во минатото со работата на фабриката „Топилница“, и за да можат младите од Велес да имаат посреќни животи.

Во изминатите три години г-ѓа Иванова во неколку наврати учествуваше во акцијата „Ден на дрвото“ вложувајќи напори за што поголем одзив и подигање на јавната свест. Во првата акција, повикувајќи ги сопругите на амбасадорите заедно да засадат дрвца во претседателската резиденција, г-ѓа Иванова ја обезбеди и дипломатската поддршка за оваа иницијатива.  Вториот пат г-ѓата Иванова и сопругите на претставниците на дипломатскиот кор, се собраа заедно со децата да ја засадат иднината во дворот на градинката „Кочо Рацин“. Традиционалното засадување дрвца беше по трет пат организирано од г-ѓа Иванова во манастирот Св. Никола во село Љубанци, со цел да се спречи свлечиштето на земјата на која лежи манастирот, а кое претставува сериозна закана за вредната градба.

alt
Учество на г-ѓа Иванова на Меѓународниот форум за жената и одржливиот развој, во организација на Се-кинеската женска федерација во Кина
Среда, 09 Ноември 2011

Сопругата на Претседателот на Република Македонија, г-ѓа Маја Иванова, е во посета на Народна Република Кина, по повод учеството на Меѓународниот форум за жената и одржливиот развој, во организација на Се-кинеската женска федерација. Форумот се одржува во главниот град на НР Кина, Пекинг, во периодот од 9 -11 ноември 2011 година.

Г-ѓа Иванова ја имаше честа и задоволството да се обрати на свеченото отворање на Меѓународниот форум за жената и одржливиот развој, кој е предвиден како пред-настан на Самитот за одржлив развој на ОН, Рио+20 Самит, што се планира да се реализира во Рио де Женеиро во 2012 година, на дваесет годишнината од првиот самит на ОН за одржлив развој, Самитот на земјата, организиран во Рио во 1992 година. Преку овој форум во Пекинг се планира да се даде посебен придонес за самитот предвиден за наредната година во контекст на одржливиот развој, но гледан од страна на родовата рамноправност и женската вклученост во главните политики, без кои развивањето на концептот за одржлив развој во светот би бил некомплетен.

Сопругата на Претседателот имаше обраќање на свеченото отворање на форумот, а посебно задоволство е тоа што го отвори настанот заедно со Потпретседателот на Народна Република Кина, Н.Е. г-дин Џи Џинпинг.

Г-ѓа Иванова во своето обраќање се осврна на подготвеноста на Република Македонија да го даде својот национален одговор на меѓународните обврски и вложи напор да сеalt обединат сите ставови, активности и ресурси во кохерентна рамка и единствен приод за постигнување на родовата рамноправност, донесувајќи Национален план за акција за родова рамноправност за периодот 2007-2012 година. Исто така, истакна дека основата на овој стратешки документ е во повеќе меѓународни документи, како Пекиншката платформа и План за акција, милениумските развојни цели, обврските кои произлегуваат од процесот на европската интеграција и прилагодувањето и приближувањето на Република Македонија кон Европската унија, како и другите меѓународни обврски, со што ја потврди ангажираноста на нашата земја на овој план. Потенцираше дека Република Македонија е посветена на рамноправната застапеност на жените во секој сегмент и на секое поле, зашто потврда е фактот дека жените имаат загарантирано учество од 1/3 во претставничките тела на граѓаните на РМ на национално и локално ниво, во Собранието на Рeпублика Македонија и во советите на општините.

Понатаму, ја прикажа жената, како рамноправен чинител на општествените текови, истакнувајќи дека жените-лидери успеваат да одговорат на општествените потреби, да поведат општествена акција, а истовремено и да ги зачуваат семејните и традиционални вредности. Нагласи дека токму тоа дава нова димензија на одржливиот развој, во кој одржливоста е всушност жената, а жената е таа која сплотува, која балансира меѓу разумот и чувствата, која знае да се соочи и со успехот и со поразот, и жена која е лидер на денешнината.

На крајот во излагањето, г-ѓа Иванова истакна дека и покрај евидентниот прогрес, можеме да констатираме дека постигнувањето на оваа висока цел се уште не е целосно и соодветно исполнето, дека на тој пат сеуште постојат многу предизвици. Затоа, повика на заеднички и координирани активности на сите земји учеснички, поддржувајќи го донесувањето на Декларација за жената и одржливиот развој, што се планира на свеченото затворање на форумот.

Г-ѓа Иванова оствари и средба со г-ѓа Чен Џили, заменик претседавач со Постојаниот комитет на кинескиот народен конгрес и Претседател на Се-кинеската женска федерација. На средбата беа наброени сите досегашни реализирани и можни идни видови на соработка меѓу женските организации од двете земји, со што уште еднаш беше потврдена одличната соработка со пријателска Кина во секој сегмент и на секое поле од заемен интерес. На овој форум учествуваат повеќе од 300 високи гости од сите земји ширум светот, пример Фиџи, Уганда, Албанија, Русија, Индија, Америка, и мн.др. како и од меѓународни организации од целиот свет, високи претставнички на власти, министри, официјални претставници на ОН, академски институции, приватен сектор, медиуми, невладини организации.

 

 

 
Почеток < Пред 1 2 3 4 5 6 7 8 9 Следно > Крај
Страница 8 од 9

Биографија

Првата дама на Република Македонија, госпоѓа Маја Иванова, е дипломиран правник кој во слободното време пишува поезија. 

Повеќе

 

Фото галерија

Maja_fotogal