Вонредно обраќање на Претседателот на Република Северна Македонија, Стево Пендаровски

18 март 2020 | Обраќања

Почитувани граѓани,

Сакам да ја информирам македонската јавност дека предмалку ја потпишав Одлуката за прогласување на вонредна состојба на територијата на целата држава. Денес попладне Владата упати барање до Собранието кое, според Уставот е прво надлежно за прогласување на вонредна состојба, но, Претседателот на Собранието веднаш го препрати тој акт до мене, тврдејќи дека не може да го свика Собранието да расправа за тоа прашање. Мојата одлука се базира врз членот 125 од нашиот Устав, кој пропишува ваква можност доколку Собранието, од различни причини, не може да се состане.

Конкретно, одлуката за прогласување на вонредна состојба ја донесов заради заштита и справување со последиците од ширењето на вирусот КОВИД – 19. Вонредната состојба ќе трае 30 дена и оној момент кога Собранието ќе биде во можност да се состане ќе му биде поднесена на потврдување. Пред истекот на овие 30 дена очекувам Владата да ми поднесе детален извештај за ефектите од дотогаш преземените мерки и образложен предлог за потребата од евентуално продолжување на вонредната состојба за дополнителни 30 денови.

Почитувани,

Фактот што за прв пат од нашата независност прогласуваме вонредна состојба укажува колку е сложена ситуацијата во која се наоѓаме и колку е голем ризикот за сите нас. Од денес извршната власт ќе има зголемени надлежности и ќе може да ги користи сите ресурси на државата – потенцирам, сите и државни и приватни за поуспешно да се справиме со епидемијата. Во вонредна состојба Владата ќе може да носи уредби со законска сила, со цел, да воведе поголеми ограничувања во движењето на луѓето, и, особено да обезбеди поголеми средства за поддршка на економијата која влегува во исклучително кризен период. Епидемијата значително ги оптовари ресурсите на државата и веќе во овој момент, штетите за фирмите кои не работат се огромни. Тука Владата мора да понуди значителна помош и поддршка.

Почитувани,

Како држава и како граѓани не очекуваат тешки денови, но јас како Претседател немам никакви дилеми во исправноста на одлуките кои ги носам. Очекувам дека и Владата која што во претстојниот период ќе ја има најголемата одговорност, ќе биде на висина на задачата и на искушенијата кои ги носи актуелниот политички и историски момент. Со оглед на зголемените овластувања, очекувам Владата, надлежните министерства, Центарот за управување со кризи, Дирекцијата за заштита и спасување и сите инволвирани институции дневно да информираат за сите активности кои ги преземаат, како и за ажурираните планови за свое постапување во иднина. Посебно сакам да нагласам дека лидерите на најголемите политички партии и на власт и во опозиција, даваат поддршка за прогласување на вонредна состојба.

Владата ќе продолжи да функционира како техничка, што значи дека во неа ќе продолжат да даваат свој значаен придонес и претставниците на опозицијата.
Тоа е можност на дело да покажеме дека кога станува збор за ваква опасност без преседан за нашата држава и нашите граѓани, сите политички партии ќе работат заеднички за заштита на здравјето на луѓето и нема да се грижат за својот политички рејтинг. Во оваа ситуација, ќе мора да бидат одложени изборите закажани за 12 април, а парламентарните избори да бидат закажани дури кога ќе се создадат услови за фер и демократско изјаснување на граѓаните. Сите анализи, дебати и калкулации за добивање на гласови или за пратенички мандати сега треба да ги оставиме на страна, затоа што се безвредни во однос на најскапоценото – заштитата на животот на нашите граѓани.

Почитувани сограѓани,

Во деновите пред нас, бидете дисциплинирани и одговорни пред себе си, пред своите најблиски, особено бидете одговорни и помагајте им на нашите повозрасни граѓани и граѓаните со хронични заболувања. Не излегувајте од дома без позначајна потреба. Следете ги информациите од надлежните органи и институции и доследно почитувајте ги нивните препораки. Во оваа прилика, сакам посебно да им се заблагодарам на сите ангажирани здравствени работници, полицајци, војници и волонтери, кои изминативе недели вложуваат навистина натчовечки напори да им помогнат на граѓаните погодени од болеста.

Имам порака и за сите наши државјани кои престојуваат надвор од земјава. Најпаметно е да останете во земјата во која сте, додека трае оваа состојба согласно препораките на Светската здравствена организација. Доколку, сепак, решите да се вратите дома, добредојдени сте, но, при тоа, треба да знаете дека мора да ги почитувате сите мерки пропишани од надлежните институции, а тоа значи и можноста да бидете сместени во карантин.

Апелирам до сите граѓани на нашата заедничка и единствена татковина, да бидеме смирени, да бидеме одговорни и да бидеме солидарни еден кон друг.

Ако си помагаме, ако се држиме заедно, сигурно ќе ја пребродиме и оваа тешка ситуација, како многу пати до сега во нашата историја!

Ви благодарам!

Категории

Categories

Kategori

Последни вести

Latest news

Lajmet e fundit

Порака од претседателот Пендаровски по повод 27 јануари, Меѓународниот ден за сеќавање на жртвите од Холокаустот

Порака од претседателот Пендаровски по повод 27 јануари, Меѓународниот ден за сеќавање на жртвите од Холокаустот

По повод 27 јануари, Меѓународниот ден за сеќавање на жртвите од Холокаустот, претседателот Стево Пендаровски ја испрати следната порака: Милионите жртви, неправди и ужасот од холокаустот нè потсетуваат на нашата заедничка историска одговорност да градиме демократски...

Обраќање на претседателот Пендаровски на традиционалниот годишен прием за претставниците на дипломатскиот кор

Обраќање на претседателот Пендаровски на традиционалниот годишен прием за претставниците на дипломатскиот кор

Претседателот Стево Пендаровски се обрати на традиционалниот годишен прием што за претставниците на дипломатскиот кор, акредитирани во Република Северна Македонија, го приреди вчеравечер во Скопје. Во улога на доајен на дипломатскиот кор, на приемот се обрати...

Честитка од претседателот Пендаровски по повод празникот Свети Сава

Честитка од претседателот Пендаровски по повод празникот Свети Сава

Претседателот Стево Пендаровски по повод празникот Свети Сава упати честитка до припадниците на српската заедница во Република Северна Македонија. Почитувани сограѓани од српската заедница, Дозволете во мое лично име и во името на сите граѓани на Република Северна...

Проштална средба на претседателот Пендаровски со грузиската амбасадорка Лилуашвили

Проштална средба на претседателот Пендаровски со грузиската амбасадорка Лилуашвили

Претседателот Стево Пендаровски денеска во проштална средба ја прими Тамуна Лилуашвили, амбасадорката на Грузија во Република Северна Македонија. На средбата се разменија мислења за билатералните односи меѓу двете држави, актуелните состојби и предизвиците во...

Повик за акредитирање на медиумски екипи – Официјална посета на претседателката на Унгарија, Н.Е. г-а Каталин Новак на Република Северна Македонија, 5 и 6 февруари 2023 година

Повик за акредитирање на медиумски екипи – Официјална посета на претседателката на Унгарија, Н.Е. г-а Каталин Новак на Република Северна Македонија, 5 и 6 февруари 2023 година

Ве известуваме дека на 5 и 6 февруари 2023 година во официјална посета на Република Северна Македонија ќе престојува претседателката на Унгарија, Каталин Новак. Заинтересираните медиуми за следење на официјалната посета потребно е да се акредитираат најдоцна до 1...