На овие простори пописот се врзува за политичка операција, затоа што се уште правата на луѓето се гледаат пред се низ националната призма. Затоа, ни требаат конкретни изјави дека и по смена на власта никој нема намера да го менува Уставот и да ги одзема правата, потенцира претседателот Стево Пендаровски во интервјуто за МИА.
„Да не потпалуваме оган со скриени агенди, затоа што пописот треба да биде статистичка операција без политичко мешање. Легитимна е политиката на опозицијата да ја критикува власта, но би сакал да ги видам конструктивните предлози на опозицијата во однос на пописот да бидат прифатени“, порачува претседателот Пендаровски.
Во интервјуто за државната агенција Претседателот дава одговори и на актуелните прашања од внатрешно – политичката сцена, говори за меѓународните односи, евроинтеграциските процеси и за билатералните односи со Република Бугарија, за очекувањата за постизборна промена на бугарската политика, но и за опциите кои ги имаме доколку бугарската позиција остане константна.
„Станува збор за еден пристап инициран од наша страна, за кој се надевам дека бугарската страна ќе се согласи, кој треба да ја изгради повторно атмосферата на доверба, за да можеме да разговараме за сите прашања. Не станува збор за никаков нов договор, додаток на договор, протокол или анекс “, вели претседателот Пендаровски во интервјуто за МИА, подвлекувајќи уште еднаш дека идентитските прашања за нас не се тема.
