Лазар Лечиќ, Благоја Георгиевски Буштур (постхумно), Владимир Богоевски, Насе Насев и Борче Костовски одликувани со „Медал за заслуги за Република Северна Македонија“

23 јуни 2023 | Соопштенија

Претседателот Стево Пендаровски, денеска на свечена церемонија во Кабинетот на Претседателот со „Медал за заслуги за Република Северна Македонија“одликуваше 5 истакнати спортисти, великани и легенди кои оставија траен белег на спортските терени и дадоа огромен придонес за афирмација на македонскиот спорт и држава.

Претседателот Пендаровски со „Медал за заслуги за Република Северна Македонија“ ги одликуваше Лазар Лечиќ, постхумно – Благоја Георгиевски Буштур, Владимир Богоевски, Насе Насев и Борче Костовски.

На церемонијата на доделување на медалите, во своето обраќање претседателот Пендаровски рече дека иако сме мала нација како број, можеме да бидеме горди на нашите врвни спортисти кои во индивидуалните и колективните спортови остварувале и остваруваат највисоки резултати. Честитајќи им на одликуваните, тој потсети на значењето на спортот за целата заедница, и за секоја индивидуа поединечно и порача врвните резултати и постигнувања на нашите спортисти и нивните тренери, да бидат поттик за сите млади да тргнат по нивните стапки и повторно да ја радуваат македонската нација.

Во продолжение го проследуваме интегралниот текст од обраќањето на претседателот Пендаровски.

Почитувани гости,

Драги пријатели,

Спортот е многу повеќе од физичка активност, игра или забава. Во спортот има и наука, и образование и воспитание и култура и уметност и естетика и филозофија. Врвниот спорт претставува глобален феномен кој привлекува милиони луѓе во целиот свет, генерира огромни финансиски ресурси, зазема централно место во медиумите, претставува составен дел од нашето секојдневие и како таков, наметнува модели на живеење и однесување. Едноставно, спортот е неизоставен дел од нашите животи, како активност која во себе содржи и драматика и триумфалност, но, во исто време и етика и фер плеј.

Иако сме мала нација како број, можеме да бидеме горди на нашите врвни спортисти кои во индивидуалните и колективните спортови остварувале и остваруваат највисоки резултати. Претходно веќе имав можност на дел од нашите освојувачи на највредни олимписки медали да им доделам највисоки државни признанија. Денес уште пет наши спортисти, спортски работници, тренери и селектори кои стојат зад успехот на натпреварувачите, ќе добијат медали за заслуги.

Како еден од најголемите и најпопуларни спортови на светско ниво, кошарката има богата традиција и популарност и кај нас. Едно од најзначајните имиња за развојот на македонската клупска и репрезентативна кошарка е секако нашата жива тренерска легенда Лазар Лечиќ. Со својата енергија и знаење за кошарката, а особено со својот препознатлив стил и лична харизма остави траен белег во историјата на македонскиот спорт.

Кога сме кај кошарката, не верувам дека има љубител на оваа динамична и возбудлива игра, кој не го знае името на Благоја Георгиевски – Буштур, кој, за жал, повеќе не е меѓу нас. Со својот вонсериски квалитет и луцидност во играта меѓу кошевите, Буштур ги достигна највисоките височини освојувајќи медали на најголемите натпреварувања. Денес со посебен пиетет постхумно му доделуваме Медал за заслуги.

Меѓу колективните спортови еден од најмасовните и најпопуларните е одбојката. Среќни сме како нација што го имаме нашиот спортски великан Владимир Богоевски кој беше играч од светска класа, успешен тренер и подоцна посветен спортски работник, освојувач на бројни медали, трофеи, награди и признанија. За сиот негов придонес за одбојкарскиот спорт и македонскиот олимпизам денес симболично му се заблагодаруваме со доделување на Медал за заслуги.

Освен великаните во колективните спортови, имаме особено значајни постигнувања и во индивидуалните спортови. Нашиот најуспешен спорт е борењето во слободен стил. Зад најголемите дострели на нашите борачи, меѓу кои и првиот освоен медал за независна Македонија на олимписките игри, стои името на долгогодишниот селектор Насе Насев. Со својата професионална работа и неуморен ангажман тој успеа да го издигне борењето во слободен стил, не само во најуспешен спорт меѓу боречките спортови, туку воопшто во сите спортски дисциплини. Не смееме да го заборавиме и неговиот долгогодишен ангажман и придонес во работата на Македонскиот олимписки комитет.

Со боречките спортови е врзан и нашиот најголем успех на олимписките игри како самостојна држава. Среброто на Дејан Георгиевски во Теквондо на Олимписките игри во Токио ја сплоти нацијата и ги израдува македонските граѓани. Најзаслужен за овој успех, за создавањето на македонскиот шампион е тренерот Борче Костовски, кој верувам дека допрва во иднина, со своите ученици ќе постигнува врвни  резултати на големите натпреварувања и повторно ќе не прави горди.

Дозволете ми на крајот, уште еднаш да потсетам на значењето на спортот за целата заедница, и за секоја индивидуа посебно. Да спортуваме рекреативно и професионално и да градиме здрави животни стилови и навики. Посакувам врвните резултати и постигнувања на нашите спортисти и нивните тренери, да бидат поттик за сите млади да тргнат по нивните стапки и повторно да ја радуваат македонската нација.

Ви благодарам.

Категории

Categories

Kategori

Последни вести

Latest news

Lajmet e fundit

Честитка од претседателот Пендаровски по повод Рамазан бајрам

Честитка од претседателот Пендаровски по повод Рамазан бајрам

Претседателот Стево Пендаровски, по повод големиот муслимански празник Рамазан бајрам, упати честитка до граѓаните од исламска вероисповед во Република Северна Македонија и до поглаварот на Исламската верска заедница Реис-ул-улема х. хфз. Шаќир еф. Фетаху. Почитуван...

Средба на претседателот Пендаровски со делегација на Пацифичкиот Совет од САД

Средба на претседателот Пендаровски со делегација на Пацифичкиот Совет од САД

Претседателот Стево Пендаровски денеска прими делегација од Пацифичкиот Совет од САД, која престојува во посета на нашата држава. Истакнувајќи дека Соединетите Американски Држави се наш најголем стратешки партнер и сојузник во НАТО, претседателот Пендаровски посочи...

Средба на претседателот Пендаровски со лорд Стјуарт Пич, специјален претставник на Обединетото Кралство за Западен Балкан

Средба на претседателот Пендаровски со лорд Стјуарт Пич, специјален претставник на Обединетото Кралство за Западен Балкан

Претседателот Стево Пендаровски денеска го прими лорд Стјуарт Пич, специјален претставник на Обединетото Кралство за Западен Балкан. Двајцата соговорници разменија мислења за актуелните случувања во регионот на Западен Балкан, за стратешките интереси на земјава и...

Средба со Џилиан Стирк, Шеф на мисијата за набљудување  на претстојните избори (ЕОМ) на ОБСЕ – Канцеларија за демократски институции и човекови права (ОДИХР)

Средба со Џилиан Стирк, Шеф на мисијата за набљудување  на претстојните избори (ЕОМ) на ОБСЕ – Канцеларија за демократски институции и човекови права (ОДИХР)

Претседателот Стево Пендаровски, денеска ја прими Џилиан Стирк, Шеф на мисијата за набљудување на претстојните избори (ЕОМ) на ОБСЕ – Канцеларија за демократски институции и човекови права (ОДИХР). На средбата претседателот Пендаровски беше запознаен со планираните...

Честитка од претседателот Пендаровски до верниците кои го прославуваат Велигден според Грегоријанскиот календар

Честитка од претседателот Пендаровски до верниците кои го прославуваат Велигден според Грегоријанскиот календар

Претседателот Стево Пендаровски, по повод големиот христијански празник Воскресение Христово – Велигден, упати честитка до д-р Киро Стојанов, Скопски бискуп и епарх струмичко-скопски, и до сите христијански верници кои го прославуваат Велигден според Грегоријанскиот...