Претседателот на Република Северна Македонија, Стево Пендаровски, се обрати на отворањето на изложбата на младите членови на Друштвото на ликовните уметници на Македонија.
Во својот говор претседателот Пендаровски нагласи дека улогата на уметниците е незаменлива во критичкото преиспитување на состојбите во нашето општество.
„Преку вашите дела вие можете појасно, похрабро, послободно и погласно да ги адресирате сите чувствителни теми, да ја провоцирате совеста на луѓето и да го инспирирате општеството да се движи кон нови творечки вертикали. Вашите слики се она огледало што и е потребно на нашата земја за да се соочи со вистината за себе си, но и да се отвори и да му ги прикаже на светот своите културни потенцијали“, рече претседателот Пендаровски, истакнувајќи дека една од најважните задачи на ДЛУМ е афирмација на македонските ликовни уметници на домашната и меѓународната ликовна сцена.
Осврнувајќи се на одбележувањето на 75 години од основањето на Друштвото на ликовните уметници на Македонија, што под негово покровителство ќе се одржи следната година, претседателот Пендаровски истакна дека големиот јубилеј ќе биде можност за потсетување на некои од најголемите креативни потфати кои се нераздвоен дел од македонското културно наследство, а на новата генерација уметници им посака со своите свежи идеи и нови дела да ги надминат достигнувањата на мајсторите од кои учеле и од кои се инспирирале.
