Обраќање на претседателот Пендаровски на свеченото отворање на „Охридско лето“

4 август 2020 | Обраќања

Претседателот на Република Северна Македонија, Стево Пендаровски, присуствуваше и се обрати на свеченото отворање на јубилејното 60-то издание на „Охридско лето“, во Античкиот театар во Охрид. Реномираниот меѓународен фестивал традиционално се одржува под покровителство на Претседателот на државата.

Во продолжение е  интегралниот текст од обраќањето на претседателот Пендаровски.

Почитувани пријатели, добра вечер,

Македонскиот поет и лингвист, Конески, во еден од своите записи вели: „До кај што сум ја пренел својата љубов, до таму е мојата татковина… Фестивалот „Охридско лето“ покажува дека сечија и нашата татковина може да биде целиот свет, ако веруваме во уметноста и во културата.

Годинава нашиот фестивал слави шест децении. Години во кои врвни македонски, европски и светски уметници нѐ почестија со својата извонредност, тука во Охрид. И од тука ја промовираа македонската култура и, воопшто, вредностите на нашиот народ и држава. Ова достигнување е заслуга на генерации културни работници и поддржувачи кои со својот труд и посветеност се вградија себеси во мисијата на овој фестивал.

Годинава големиот јубилеј е засенет од глобалниот предизвик со кој сите се соочуваме. Поради пандемијата меѓу нас изникнаа бројни невидливи ѕидови на социјална дистанца и изолација. Во изминативе месеци, многумина со загриженост прашуваа како ќе изгледаат уметноста и културата во светот во кој вирусот, ковид-19 е доминантен?

Историјата сведочи дека во кризни времиња културата не умира, напротив, раѓа поинакви формати за понатамошно опстојување. Некои од најголемите уметнички дела се создадени токму во време на големи лични и заеднички трауми што ја ослободуваат креативноста. Наместо да исчезнат, многу уметнички и културни иницијативи и форми доживеаја дигитален препород. Затворени во своите домови, многумина од нас се восхитуваа на уметниците кои настапуваа на празните плоштади и во празните сали со цел да нѐ охрабрат да издржиме.

Но, во време на здравствени и економски предизвици, уметниците се и критичкиот глас што нѐ поттикнува да размислиме врз какви вредности треба да градиме подобар и поправеден заеднички свет. Сето ова се должи на вистината дека и во времиња на радост и во времиња на страдање, човекот токму преку културата и уметноста ги согледувал, ги отсликувал, но, и ги менувал општествените и политичките наративи.

Да се организира „Охридско лето“ во услови на ковид-19 не е воопшто лесно, но е апсолутно неопходно. Веќе 60 години оваа манифестација е модел за врвни естетски достигнувања на меѓународно ниво. Во исто време, ова е фестивал на креативни поединци кои се исправаат наспроти деструктивните тенденции. Се разбира дека од ваквите потфати на уметничко здружување и политиката може да учи за тоа како се создаваат слободни, отворени, еманципирачки, динамични јадра што ја потврдуваат убавината на различностите.

Драги пријатели,

Нужно е да го задржиме нивото и квалитетот што со себе го носи фестивалот „Охридско лето“. Колку што културата ни е потребна во мирни времиња, уште повеќе ни е неопходна во време на криза. Императив е да вложуваме во културата и во уметноста за и во наредниве децении, од тука, од Охрид, уметниците да продолжат да учествуваат во градењето на свет што ќе биде, се надеваме, поправеден и поблагороден.

Со таа мисла, дозволете ми да го прогласам фестивалот „Охридско лето“ за отворен.

Благодарам

Категории

Categories

Kategori

Последни вести

Latest news

Lajmet e fundit

Средба на претседателот Пендаровски со претставници на Американски совети за меѓународно образование

Средба на претседателот Пендаровски со претставници на Американски совети за меѓународно образование

Претседателот Стево Пендаровски денеска прими претставници на Американски совети за меѓународно образование, меѓународна непрофитна организација со седиште во Вашингтон, кои престојуваат во посета на нашата држава. На средбата се...

Отворен Кабинет со ученици од ООУ „Григор Прличев“ од Скопје

Отворен Кабинет со ученици од ООУ „Григор Прличев“ од Скопје

Денеска Кабинетот на Претседателот, во рамки на активноста Отворен Кабинет, го посетија ученици од шесто одделение при ООУ „Григор Прличев“ од Скопје. За време на посетата, учениците беа запознаeни со историјатот на објектот во...

Обраќање на сопругата на претседателот на конференцијата „Родова еднаквост на работното место“

Обраќање на сопругата на претседателот на конференцијата „Родова еднаквост на работното место“

Сопругата на претседателот, Елизабета Ѓоргиевска присуствуваше и се обрати на конференцијата „Родова еднаквост на работното место“ организирана по повод Меѓународниот ден за еднакви плати. Говорејќи за значајноста на зајакнувањето на економската сигурност на жените во...

Трет модул на Школата за политики за 2023 година при Претседателскиот центар за политичко образование

Трет модул на Школата за политики за 2023 година при Претседателскиот центар за политичко образование

Викендов во Кавадарци се одржа третиот модул на Школата за политики за 2023 година, при Претседателскиот центар за политичко образование. Третиот модул на Школата го отворија д-р Александар Љ. Спасов, претседател на Програмскиот совет на Претседателскиот центар за...

Обраќање на претседателот Пендаровски на затворањето на 44. издание на фестивалот „Браќа Манаки“

Обраќање на претседателот Пендаровски на затворањето на 44. издание на фестивалот „Браќа Манаки“

Претседателот Стево Пендаровски присуствуваше и се обрати на затворањето на 44. издание на интернационалниот фестивал на филмска камера „Браќа Манаки“ во Битола. Во своето обраќање, претседателот Пендаровски кој е...