Во рамки на активноста Отворен кабинет денеска Кабинетот на претседателот го посетија ученици од САД кои се на размена во земјава како дел од програмата Yes abroad на Американски совети за меѓународно образование – Северна Македонија.
Учениците кои живеат во семејства домаќини и посетуваат локални училишта, имаа можност да присуствуваат во просториите во коишто се реализираат официјалните и работните средби, во салите во коишто се одржуваат состаноци, свечености, настани и прес-конференции, како и да го разгледаат импозантниот диптих „Македонија – светла земја“ и „Македонија памети“ на авторот – академик Глигор Чемерски, поставен на двата ѕида во Мозаик салата.
Посетителите се сретнаа и разговараа со претседателот Пендаровски за неговата работа, за претседателските надлежности и активностите во Кабинетот. Учениците во текот на разговорот ги споделија своите искуства од волонтерските активности и импресиите од досегашниот престој во земјава.
Отворен Кабинет како дел од проектот Лице в лице овозможува посети на Кабинетот и непосредни средби со претседателот Пендаровски. Досега институцијата ја посетиле илјадници граѓани од различни возрасти, професии и занимања, студенти од земјава и од странство, како и ученици од основни и средни училишта.
