Претседателот Стево Пендаровски и сопругата Елизабета Ѓоргиевска денеска посетија детски одделенија на неколку скопски клиники.
При посетата на ЈЗУ Универзитетската клиника за детски болести, Скопје, претседателот Пендаровски со сопругата Ѓоргиевска, на најмалите пациенти кои престојуваат овде им прочитаа книга со детски приказни и им подарија новогодишни пакетчиња. Во рамки на посетата, тие имаа средба и со директорката на клиниката, Стoјка Нацева-Фуштиќ со која разговараа за условите за работа и активностите насочени кон пружање на подобра здравствена услуга на децата кои се пациенти во оваа клиника.
Сопругата на претседателот, Елизабета Ѓоргиевска претходно беше во посета на ЈЗУ Институт за белодробни заболувања кај децата – Козле, Скопје и ЈЗУ Клиника за детска хирургија, Скопје кадешто посети неколку детски одделенија при што на децата им подели новогодишни пакетчиња.
При посетата на овие две клиники, Ѓоргиевска имаше можност да разговара со вработените при што им се заблагодари за грижата и посветеноста со која се грижат за децата пациенти во нивните установи. Во разговорите со Бесник Зеќири, директор на ЈЗУ Институт за белодробни заболувања кај децата – Козле, Скопје и Славица Литајковска, директор на ЈЗУ Клиника за детска хирургија, Скопје, сопругата на претседателот беше информирана за функционирањето, тековните активности и планови за работа на овие установи.
