Претседателот Стево Пендаровски денеска ги прими членовите на детскиот хор „Златно славејче“.
Честитајќи ја успешната реализација на 53. издание на фестивалот „Златно славејче“, претседателот Пендаровски којшто е негов покровител, истакна дека овој фестивал повеќе од половина век има значајна улога во развојот на талентот на најмладите, а хитовите компонирани и отпеани на „Златно Славејче“ се популарни до денес и многу од возрасните ги паметат уште од своите детски денови.
Членовите на постојаниот детски хор и солистите на „Златно славејче“ отпеаја рефрени од новите детски хитови и ги споделија своите импресии и доживувања со Претседателот за неодамна одржаниот фестивал.
Првото издание на фестивалот „Златно славејче“ се одржало на 23 мај 1970 година, во организација на Сојузот за грижи и воспитување на децата на Град Скопје. Традиционално, веќе 53 години, во рамки на одбележувањето на ослободувањето на Скопје, 13-ти ноември, „Златно славејче“ е дел од музичката лектира на најмладите.
