Претседателот Стево Пендаровски со сопругата, Елизабета Ѓорѓиевска ја посетија изложбата на Вероника Љоровска „Мојот свет во боја“ во просториите на Домот на култура „Кочо Рацин“ – Скопје.
Ова е првата самостојна изложба на Љоровска која е студент на Факултетот за графички дизајн при Европскиот универзитет. Изложбата се состои од четириесеттина дела изработени во повеќе техники: молив, јаглен, туш, фломастер, темпера, колаж, асамблаж, енформел, а форматите на делата се изработени во повеќе димензии.
Во организирање на изложбата помогна Европскиот универзитет како поддршка на лицата со посебни потреби како еднакви граѓани во нашето општество и нивното право на високо образование. Идејата за изложбата Љоровска ја доби од Јана Манева-Чупоска, нејзина професорка по предметите цртање и сликање од која научила самостојно да ги изработува задачите адаптирани за неа. Oваа изложба за Вероника Љоровска е можност другите да ја видат нејзината креативност и да се запознаат со нејзините дела, како и чекор кон остварување на нејзината визија да биде успешна во професијата графички дизајнер.
