Претседателот Стево Пендаровски денеска ја прими на проштална средба амбасадорката на Република Естонија за Република Северна Македонија, Кристи Карелсон.
На средбата беше изразено задоволството од одличните билатерални односи, што во континуитет ги негуваат двете пријателски држави, афирмирајќи го интересот за натамошно интензивирање на заедничката соработка, со фокус на економијата и трговската размена.
Претседателот Пендаровски истакна дека Северна Македонија придава посебно значење на развојот на пријателските односи со Република Естонија и во овој контекст, се заблагодари за досегашната континуирана поддршка за македонските евроинтеграции.
Соговорниците разговараа за руската агресија врз Украина и нејзиното влијание врз стабилноста и безбедноста на европскиот простор, како и влијанието врз економските состојби на контитнентот. Во таа насока беше потенцирано дека двете земји како членки на НАТО носат одлуки кои се во интерес на безбедноста на евро-атлантскиот простор. Претседателот Пендаровски истакна дека Северна Македонија дава поддршка, во рамки на своите можности на Украина. Дополнително, истакана тој земјава дава поддршка на европската интеграција на Украина, што неодамна и го нагласи претседателот Пендаровски упатувајќи писмо до претседателот Зеленски.
Претседателот Пендаровски се заблагодари на амбасадорката Карелсон за посветениот ангажман и досегашните дипломатски активности во градењето на одличните релации меѓу двете држави, посакувајќи и натамошен успех на личен и на професинален план.
