Советот за безбедност со предлог до Владата за кризна состојба на целата територија на државата

19 ноември 2020 | Соопштенија

Во Кабинетот на Претседателот „Вила Водно“ денеска се одржа десеттата седница на Советот за безбедност на којашто се разговараше за актуелната ситуација со пандемијата на Ковид -19 на територијата на Република Северна Македонија и мерките и активностите на надлежните институции.

По седницата, претседателот Пендаровски изјави дека е донесен заклучок, Советот за безбедност да и предложи на Владата да прогласи кризна состојба на целата територија на Република Северна Македонија во траење од 30 денови.

Во продолжение  го проследуваме интегралниот текст од изјавата на претседателот Пендаровски

Почитувани,

Денеска ја одржавме 10-та седница на Советот. Присуствуваа сите постојани членови на Советот за безбедност, освен министерот за внатрешни работи. А, надвор од постојаниот состав, а на моја покана, со оглед на темата за која разговаравме, беше присутен министерот за здравство.

На дневен ред имавме една точка, разговаравме за актуелната ситуација со пандемијата Ковид-19.

Министерот Филипче информираше за капацитетите и ресурсите кои се на располагање и кои се практично сега употребени во здравствениот сектор, како и за реорганизацијата на болниците низ земјата за прием на големиот број заразени пациенти и наши граѓани.

Премиерот Заев информираше за севкупната активност, за политиките и во другите ресори кои се насочени кон справување со пандемијата и можните опции и сценарија за наредните денови и недели.

Не треба да кажуваме – сите знаеме дека состојбата со коронавирусот кај нас е исклучително сериозна. Тоа што во буквално сите земји од нашето опкружување, од регионот, во цела Европа и во светот, практично без исклучок, ситуацијата е исто така многу лоша, далеку полоша од пролетниот пик на заразени и починати, не значи дека не треба да размислуваме евентуално и за нови мерки или да ги преиспитуваме ефектите на постојните со цел да го ограничиме ширењето на вирусот.

Во таа смисла, после исцрпна дискусија во која учествуваа сите присутни членови на Советот донесовме заклучок, Советот за безбедност да и предложи на Владата да прогласи кризна состојба на целата територија на Република Северна Македонија во траење од 30 денови.

Да појаснам накусо што тоа значи во однос на ова што го имаме сега. Во моментов, ние имаме прогласено кризна состојба на северната и јужната граница во врска со илегалните преминувања на мигранти и бегалци и на тие подрачја полицијата и војската работат заедно. Сега таквата соработка, откако ќе биде декларирана кризна состојба на цела територија, ќе биде овозможена буквално на целата територија на земјата. Инаку и во моментов, знаете тоа го објавивме пред некој ден, армијата дава поддршка на полицијата и на здравствените институции, но, во лимитиран обем, потпирајќи се само врз правниот основ кој доаѓа од Законот за служба во армијата. Но, откако ќе биде прогласена кризната состојба, тогаш Законот за одбрана и Законот за управување со кризи, посебно, даваат многу пошироки можности за поддршка на надлежните институции, пред се здравствените, од страна на армијата.

Втората битна разлика е во законската можност Владата да управува со ресурсите на органите на државната управа, на јавните претпријатија, на општините и на градот Скопје, но, тука вклучувајќи ги и трговските друштва, во овој случај приватните здравствени установи.

Овде сакам да појаснам, бидејќи имаше различни шпекулации на таа тема изминативе два дена, дека не станува збор за национализација на приватните болници, туку евентуално за управување со нив во битката против пандемијата, се разбира таму и во тој обем во кој Владата ќе процени дека е тоа неопходно. Инаку, знаете дека приватната сопственост е гарантирана со уставот и затоа тука не станува збор за национализација или некакво менување на сопственоста.

Да појаснам уште една работа – воведувањето на кризната состојба на целата територија нема никаква врска со т.н. полициски час и евентуално воведување на рестрикции во движењето на граѓаните. Тоа е во надлежност, прво на Комисијата за заразни болести, потоа на централниот кризен штаб и се разбира на крај, на Владата, ако така процени дека е неопходно.

И уште кусо, многу кусо за надлежностите во однос на воспоставување или декларирање кризна состојба бидејќи и за тоа имаше различни ставови изминативе ден-два – не му предлага Владата на Советот за безбедност да прогласи кризна состојба бидејќи ние таа надлежност ја немаме. Туку, Советот за безбедност препорачува – предлага, тоа оди до Управувачкиот комитет при Центарот за управување со кризи кој потоа и формално поднесува предлог до Владата, за таа да ја донесе одлуката на крајот на тој процес, на таа процедура, за прогласување на кризна состојба. После ваков заклучок на Советот и после оние дискусии што ги имавме на оваа 10-та седница, јас очекувам Владата многу брзо да прогласи кризна состојба на целата територија.

Ви благодарам.

 

 

Категории

Categories

Kategori

Последни вести

Latest news

Lajmet e fundit

Порака од претседателот Пендаровски по повод 21 година од потпишувањето на Охридскиот рамковен договор

Порака од претседателот Пендаровски по повод 21 година од потпишувањето на Охридскиот рамковен договор

Претседателот Стево Пендаровски, по повод одбележувањето 21 година од потпишувањето на Охридскиот рамковен договор ја упати следната порака: „Пред 21 година, во Охрид, претседателите на четирите тогашни најголеми политички партии заедно со претседателот Борис...

Претседателот Пендаровски се обрати на доделувањето на Наградата за младинско учество по повод Меѓународниот ден на младите

Претседателот Пендаровски се обрати на доделувањето на Наградата за младинско учество по повод Меѓународниот ден на младите

Претседателот Стево Пендаровски, вчеравечер се обрати на свечената церемонија на доделување на Наградата за младинско учество, што по повод Меѓународниот ден на младите, се одржа во Кабинетот на претседателот. Годинешни носители на наградата се актерката Изабела...

Делегациja од Кабинетот на Претседателот оддадe почит на осумтемина армиски резервисти загинати кај Љуботенски бачила

Делегациja од Кабинетот на Претседателот оддадe почит на осумтемина армиски резервисти загинати кај Љуботенски бачила

Делегациja од Кабинетот на Претседателот на Република Северна Македонија, во состав полковник Билјана Блажеска, аѓутант на претседателот и Валентин Диневски, посебен советник за безбедност, по повод 21-годишнината од загинувањето на осум армиски резервисти кај...

Претставници од Кабинетот на Претседателот оддадоа почит на 10-те армиски резервисти загинати кај Карпалак

Претставници од Кабинетот на Претседателот оддадоа почит на 10-те армиски резервисти загинати кај Карпалак

Претставници од Кабинетот на Претседателот на Република Северна Македонија, по повод 21-годишнината од загинувањето на 10-те армиски резервисти кај месноста Карпалак, денеска положија цвеќе пред спомен-плочата кај месноста Карпалак на автопатот Тетово – Скопје и пред...

Објавен Јавниот повик за признанието „Успешни млади“ за 2021 година

Објавен Јавниот повик за признанието „Успешни млади“ за 2021 година

Кабинетот на Претседателот на Република Северна Македонија продолжува со имплементација на проектот „Успешни млади“, признание кое што се доделува во насока на вреднување на трудот и знаењето на младите, како една од политиките за намалување на одливот на млади луѓе...