Сопругата на претседателот Елизабета Ѓоргиевска при денешната посета на прилепскиот регион го посети ООУ “Кочо Рацин” во Прилеп, кадешто наставничкиот кадар ја запозна со тековните активности за учениците и работата на училиштето во чиј рамки функционира и детска стоматолошка ординација.
Во училиштето се сретна и со Гоце Бумбароски, наставник и магистер по менаџмент во образованието познат како наставник херој, омилен помеѓу своите ученици поради креативниот начин на предавање на лекциите и пренесувањето на знаењето. Неговите ученици споделија со сопругата на претседателот како ги поминуваат часовите со својот омилен наставник и какви активности им подготвува за да им биде поинтересна наставата.
Во рамки на посетата, Ѓоргиевска ги посети манастирите Свети Архангел Михаил во Варош и Свето Преображение во Зрзе. Во манастирот Свети Архангел Михаил монахињите ја информираа за дејностите со кои се занимаваат во насока на самоодржливост на нивната заедница. Меѓу највпечатливите нивни дејности е одгледувањето на лаванда од која подготвуваат разновидни производи меѓу кои се издвојува есенцијалното масло.
Во манастирот Свето Преображение, сопругата на претседателот ги посети ателјеата за изработка на икони и ракотворби за кои најчесто користат природни ресурси од нивната околина. Монасите од овој манастир ја информираа дека произведуваат своја храна посветувајќи големо внимание на одгледувањето на зеленчук, овошје и билки кои ги сушат и користат како чаеви.
Со своите дејности и начинот на организирање, монасите и монахињите од овие два манастири се одличен пример за успешно организирање и функционирање на мали самоодржливи заедници врз принципот на солидарност и заедништо.
