Во пресрет на одбележувањето на Меѓународниот ден на руралната жена, во организација на Центарот за управување со промени и во соработка со Националната федерација на фармери, сопругата на претседателот Елизабета Ѓоргиевска беше во посета на преспанскиот регион.
Запознавајќи се со активностите на Националната федерација на фармери и информирајќи се за производството на јаболка во преспанскиот регион, на фармата на семејното земјоделско стопанство Ѓоргиевски во село Болно, Ресен, сопругата на претседателот имаше можност одблиску да го види начинот на производство и складирање јаболка, при што учествуваше во берба на јаболка. Истовремено, таа се запозна со десетина земјоделки со кои разговараше за предизвиците со кои се соочуваат и со идните планови за унапредување на нивната работа.
Ѓоргиевска се сретна и со членовите на семејното земјоделско стопанство Транталовски кои се и регистрирани оператори на храна, при што тие ја претставија својата производна линија „Преспино“. Тие истакнаа дека сите нивни производи се од домашно производство и дека со нив сакаат да влијаат на домашниот пазар за јакнење на свеста за купување и вреднување на домашното производство.
Во рамки на посетата на преспанскиот регион, сопругата на претседателот во Ресен се сретна со Васил Јанкула, лице со церебрална парализа кој потекнува од Мала Преспа, Албанија. Со Васил, којшто помага во организирање на спортски активности за лицата со попреченост, Ѓоргиевска разговараше за неговите предизвици и инклузијата на лицата со попреченост кај нас.
