Сопругата на претседателот Елизабета Ѓоргиевска со видео порака се обрати до присутните на панелот „Ромската жена во 21 век – можности, придонеси и предизвици”, организиран од страна на коалицијата на Ромски граѓански организации „Khetane” по повод 8 март – Меѓународниот ден на жената.
Во своето обраќање Ѓоргиевска ја потврди својата силна поддршка за унапредување на положбата на Ромките во македонското општество потенцирајќи дека жените во нашето општество сè уште наидуваат на многу пречки и мораат да се соочат со разни предизвици и, за жал, ова е особено изразено кај припадничките на ромската заедница.
Ѓоргиевска истакна дека не смееме секоја година само да ги констатираме проблемите и минималниот напредок и дека мораме работите да ги промениме од корен.
„Покрај борбата со системските бариери, пасивноста на институциите, стереотипите и предрасудите, да придонесеме и со личен активизам и индивидуален ангажман секој во рамките на своите можности. При тоа суштинска е улогата на Ромките лидерки во својата заедница кои се активистки, професионалки и носителки на промени“, нагласи Ѓоргиевска.
Таа ги охрабри присутните да се изборат за правата на сите обесправени жени, и Ромки и припадници на другите заедници.
„Да се избориме за место под сонцето за секого и да донесеме трајни промени во нашето општество, во нашите заедници, да го промениме менталитетот и ретроградниот светоглед кој спречува напредок и просперитет“, порача Ѓоргиевска.
