Кабинетот на претседателот на Република Северна Македонија, Амбасадата на Народна Република Кина во Република Северна Македонија и Јавната установа Меѓуопштински центар за социјална работа – Берово, потпишаа Меморандум за соработка, со цел подигнување на квалитетот на социјалните услуги кои ги добиваат граѓаните во социјален ризик.
Под покровителство на претседателот Стево Пендаровски, Амбасадата на Народна Република Кина во Република Северна Македонија обезбедува финансиски средства во износ од еден милион петстотини и четириесет илјади денари, наменети за Дневниот центар за лица со ментална или телесна попреченост, при Јавната установа Меѓуопштински центар за социјална работа – Берово.
Донираните финансиски средства ќе бидат искористени за опремување на кабинети за физикална и хидро-терапија, како и сензорна соба наменета за деца и лица со аутистичен спектар на нарушувања во Дневниот центар во Берово.
Меморандумот го потпишаа генералниот секретар Миле Бошњаковски, амбасадорот на Народна Република Кина Н.Е. Џанг Ѕуо и директорката на Јавната установа Меѓуопштински центар за социјална работа – Берово, Маја Николова.