Претседателот Стево Пендаровски на покана на граѓанското движење АВАЈА присуствуваше на приемот и на дипломатската вечера по повод 8 Април – Меѓународниот ден на Ромите.
За време на дипломатската вечера се одвиваше дискусија насловена „Приоритети за унапредување на интеграцијата на Ромите во Северна Македонија“. Во текот на дискусијата се презентираа досегашните резултати и работата на ова движење и се разгледаа можностите за унапредување на интеграцијата на Ромите во земјава. Дискусијата се одвиваше на три теми: правична застапеност во државната и јавната администрација, попис и новата Стратегија за Роми.
Претседателот Пендаровски честитајќи го Меѓународниот ден на Ромите истакна дека ромската заедница е нераскинлив дел од мултикултурниот мозаик во земјава и со години придонесува во неговото градење. Претседателот Пендаровски нагласи и дека новата Стратегија за Роми е чекор нанапред кон остварување на конкретни резултати во насока на унапредување на интеграцијата на Ромите за што е потребен заеднички ангажман од сите чинители во земјава.
На настанот присуствуваа и премиерот на Република Северна Македонија, Димитар Ковачевски, првиот заменик на претседателот на Владата и министер за политички систем и односи меѓу заедниците, Артан Груби и претставници на дипломатскиот кор во земјава.