Сопругата на претседателот, Елизабета Ѓоргиевска учествуваше на Меѓународниот фестивал за литература и илустрација за деца „Литера 2023“ што се одржува во Музејот на град Скопје.
Во рамки на настанот, г-ѓа Ѓоргиевска на присутните деца од училишна возраст им ја прочита сликовницата „Облакот во жолто палто“ на хрватската авторка и мултимедијална уметница Николина Манојловиќ Врачар. Сопругата на претседателот имаше можност да поразговара со авторката на сликовницата којашто заедно со илустраторите и креативните уметници Доминик Вуковиќ и Бранка Холингсворт-Нара како гости од Хрватска учествуваа во разновидната програма на фестивалот.
Во разговорот со гостите од Хрватска и со идејниот творец на фестивалот „Литера“, Софија Семенпеева, сопругата на претседателот ја истакна големата важност од одржување на вакви манифестации кадешто публиката има можност да се запознае со авторите и литературата за деца и млади, со што се подигнува свеста кај родителите и децата за влијанието на ваквите литературни изданија врз правилниот интелектуален и емоционален развој на децата.
“Литера” е меѓународен фестивал за литература и илустрација за деца во чии рамки се одржуваат разновидни активности наменети за стручната јавност, издавачките куќи кои објавуваат литература за деца и млади, децата од школска и претшколска возраст, родителите, илустраторите и книжевниците. На фестивалот на гостите од Хрватска им се придружија домашни илустратори, писатели, автори на сликовници, издавачи, мултимедијални ликовни уметници.
