Подигнувањето на нивото на разбирање и свесност за правата на лицата со попреченост, а особено правата на жените и девојчињата со попреченост, загарантирани со Конвенцијата на Обединетите нации, беше централната тема на дискусијата која се одржа во Канцеларијата на претседателот „МладиХаб.“ На настанот во чијшто фокус е промоцијата на Конвенцијата на ОН за правата на лицата со попреченост и практикување на пристап заснован на човекови права, се дискутираше на прашања поврзани со економското зајакнување и финансиската независност на жените и девојчињата со попреченост, нивната еднаквост и недискриминација, како и нивните семејни права и заштита од семејно насилство.
Поздравувајќи ги присутните претставници на организациите на лицата со попреченост на денешниот настан, сопругата на претседателот ги охрабри отворено да разговараат за предизвиците со коишто тие се соочуваат во секојдневниот живот, бидејќи на хартија ги имаме сите права и сите закони, меѓутоа треба да видиме како тие ја доживуваат нивната ситуација и што може да направиме за да се подобри состојбата во различни области.
Како што истакна постојаниот претставник на Канцеларијата на Програмата за развој на Обединетите Нации-УНДП, Армен Григорјан, УНДП во Северна Македонија има направено неколку интервенции насочени кон различни категории на лица вклучително и лица со попреченост, а нивните проекти и интервенции воглавно се фокусираат на образование, на можноста за вработување со перспектива за нивна целосна интеграција како рамноправни членови во општеството.
Панел-дискусијата со поддршка на сопругата на претседателот, Елизабета Ѓоргиевска, се одржа како дел од серијата отворени дискусии на тема „Да ја отпакуваме Конвенцијата на Обединетите нации за правата на лицата со попреченост по однос на правата на жените и девојчињата со попреченост“ и во соработка со Канцеларијата на Програмата за развој на Обединетите нации во Република Северна Македонија-УНДП и националните сојузи и организации на лицата со попреченост.
Активноста беше реализирана во рамки на заедничкиот проект на организациите на ОН – УНДП, УНИЦЕФ и УНФПА „Од знаење и ангажман – до јакнење и учество“, министерствата за труд и социјална политика, образование и здравство и организациите кои ги застапуваат лицата со попреченост.
