Сопругата на претседателот, Елизабета Ѓоргиевска учествуваше на настанот “Средба за вмрежување со културните аташеа на земјите-членки на ЕУ“ што се одржа во куќата – музеј на реномираниот ликовен уметник, Лазар Личеноски. Настанот е дел од активностите по повод 3-от роденден на Europe house, Скопје.
Истакнувајќи дека обновувањето на куќата на Лазар Личеновски е важно од многу аспекти, во своето обраќање пред присутните, сопругата на претседателот нагласи дека од една страна тоа покажува колку се грижиме ние за нашето културно наследство, но од друга страна освен што има музеолошка, традиционална вредност, тоа претставува една основа да се изгради жив, динамичен простор во којшто новите генерации ќе имаат можност да творат, да се инспирираат и да се создадат продолжетоци на онаа уметност со којашто се занимавал Личеновски и ќе се создадат нови моменти, нови искуства и нова уметност за сите млади генерации.
„Навистина ми претставува задоволство што сум патрон заедно со мојот сопруг на еден ваков прекрасен проект и се надевам дека ќе има уште многу вакви проекти коишто ќе бидат инкубатори на идеи за младите уметници“, рече сопругата на претседателот.
На денешниот настан којшто претставува неформално дружење со културните аташеа на амбасадите на земјите-членки на ЕУ, се обрати шефот на делегацијата на ЕУ, амбасадорот Дејвид Гир и директорката на Националната галерија, Дита Старова-Ќерими којашто даде краток преглед на завештанието и вредноста на куќата-музеј и делото на Личеноски коешто ја збогатува културната ризница на земјата.
Присутните на настанот имаа можност да ја видат студентската изложба којашто се состои од различни форми на уметнички дела изработени од студентите и професорите од Факултетот за ликовни уметности, подготвени и инспирирани од делата и наследството на Личеноски. Тие разменија и информации во врска со можностите за идни активности за конзервација и реставрација на куќата – музеј.
Програмата на Europe house, Скопје по повод роденденот предвидува низа активности кои ќе се одвиваат во куќата – музеј на Лазар Личеновски со цел да му се оддаде почит на ликот и делото на овој значаен македонски сликар.