Претседателот Стево Пендаровски оствари средба со генералниот директор на Пивара Скопје, Горан Сладиќ и со главниот извршен директор на групацијата Coca-Cola HBC, Зоран Богдановиќ и присуствуваше на свеченоста по повод одбележувањето на 100 годишнината од основањето на компанијата.
На неформалната средба, раководството на Пивара Скопје го информираше претседателот за нивните најнови инвестиции во производството, за тековни проекти како општествено одговорна компанија, за едукативните програми за развој и намалување на невработеноста кај младите, како и за придонесот кој го даваат кон одржливоста и заштитата на природните ресурси.
Претседателот Пендаровски го честиташе 100-годишниот јубилеј на Пивара Скопје и посочи дека компанијата со своите услуги и производствени капацитети, како и со конкурентноста на странските пазари, има значајна улога во севкупниот економски развој на државата.
Во таа насока, претседателот Пендаровски ја поздрави реализацијата на новите инвестиции во најсовремена опрема и технологија, кои овозможуваат натамошна модернизација на компанијата и го поддржуваат нејзиниот долгорочен одржлив развој.
Претседателот Пендаровски изрази очекување дека Пивара Скопје како еден од најпрепознатливите брендови во земјава и пошироко ќе продолжи со успешниот развој на компанијата во духот на инвестициите и иновациите, следејќи ги современите светски стандарди.