Presidenti dhe komandanti suprem i forcave të armatosura, Stevo Pendarovski sot në Ministrinë e Mbrojtjes dhe Shtabin e Përgjithshëm mori pjesë në brifingun mbi gatishmërinë luftarake të Armatës së Republikës së Maqedonisë së Veriut.
Në brifing, në praninë e ministres së Mbrojtjes, Sllavjanka Petrovska dhe gjeneralëve në Armatë, shefi i Shtabit të Përgjithshëm, gjeneral-leitnanti Vasko Gjurçinovski informoi mbi shkallën e realizimit të planeve dhe detyrave të Armatës gjatë vitit 2022 dhe e prezantoi gjendjen në fushat të cilat ndikojnë mbi gatishmërinë luftarake të Armatës në vitin aktual.
Presidenti Pendarovski u njoh me shkallën e realizimit në fushat funksionale: personel, trajnime dhe stërvitje, pajisje dhe infrastrukturë, operacione, planifikim ushtarak dhe struktura e forcave, modernizim dhe pajisje dhe buxhet dhe financim.
Në brifing Presidenti Pendarovski theksoi se edhe në vitin 2022 përfaqësuesit e Armatës e dëshmuan profesionalizmin, përkushtimin dhe përgatitjen e vet. Në vitin kur festuam 30-vjetorin e formimit të saj, tha Presidenti Pendarovski, Armata e argumentoi edhe njëherë besimin e lartë që e ka te qytetarët maqedonas.
Mandej, tha Presidenti Pendarovski, realizimi i stërvitjes ushtarake të madhe “Përgjigje e shpejtë 22” në poligonin ushtarak “Krivollak” e demonstroi kapacitetin e Armatës që të kontribuojë në mbrojtjen, sigurinë kolektive dhe sigurinë e NATO-s, në kohën e sfidave pas agresionit rus në Ukrainë.
Presidenti Pendarovski i riafirmoi angazhimet e tij për investim të mëtejshëm në modernizimin dhe pajisjen e Armatës dhe arritjen e qëllimit të vendosur – dy për qind e PBV-së të veçohet për mbrojtjen.
Brifingu është obligim i rregullt vjetor i shefit të Shtabit të Përgjithshëm para komandantit suprem.