Presidenti Stevo Pendarovski si patron i festimit të 100-vjetorit të lindjes së Bllazhe Koneskit nëpërmjet video-mesazhit mbajti fjalim në shënimin e këtij jubileu të madh, që u mbajt në selinë e UNESKO-s në Paris. Në suazat e këtij evenimenti festohet edhe Dita Botërore e Poezisë – 21 Marsi.
Ekziston një fortesë intime te secili prej nesh që i hap të gjitha pyetjet të cilat i mbartim në vete si gëzim, peshë apo hidhërim. Një derë pak e hapur nëpër të cilët spikasin të gjitha dilemat e ekzistencës. Ajo është fjala. Ajo është kuptimi i shndërruar në poezi që arrin t’i zhvendosë horizontet e tundimeve jetësore të cilat lidhen gjithmonë me lirinë.
Bllazhe Koneski është kuintesencë e gjuhës poetike në spektrin e të cilës janë vendosur mençuria dhe sfidat e ekzistencës. Koneski e shpjegon në mënyrë subtile gramatikën e jetës, duke krijuar armaturë mbi të cilën mbështetet jo vetëm vazhdimësia e kulturës sonë nacionale, por edhe ka kontributin e vet edhe mbi trashëgiminë botërore poetike dhe shpirtërore.
Poezia e Koneskit është reflektim i thellë dhe i qartë – dhe kur bëhet fjalë për shtigjet intime të njeriut, por edhe kur bëhet fjalë për ndryshimet shoqërore dhe, në përgjithësi, për të gjitha humnerat e jetës. Dhe si poet dhe si gjuhëtar insistonte të jetë vazhdimisht lexues dhe interpretues i përkushtuar dhe kritik i botës. Bllazhe Koneski është poet i cili lufton kundër diktaturës së njëkuptimshmërisë dhe pikërisht për këtë është poet i demokracisë ose siç thotë edhe vetë “intelektuali i vërtetë duhet të veprojë në mjedisin e vet si individ që tërheq përpara…, të ketë ndjenjë për dimensionin historik dhe për aktualitetin bashkëkohës, kurse sidomos të përpiqet për humanizmin.”
I urtë në fjalë, por i fuqishëm në kuptim, në këto kohë të zhurmshme, qetësia në poezinë e tij flet, artikulon dhe argumenton në mënyrë fisnike. Në veprimtarinë e tij të tërësishme krijuese janë vendosur e kaluara, e tashmja dhe e ardhmja jonë, por trashëgimia e tij, në të vërtet, u përket të gjithë atyre që e kanë të qartë si ndërtohen një botë bashkëkohore, e emancipuar dhe kozmopolite.
