Pyetje gazetareje: Zonja Presidente, sot patët një takim me Sekretarin e Përgjithshëm të Kombeve të Bashkuara, z. Antonio Guterres. Ne kemi informacion nga Kombet e Bashkuara se kemi marrë mbështetje të fortë nga z. Guterres. Ju lutem si e komentoni takimin dhe konkretisht mbështetjen.
Presidentja Siljanovska Davkova: Takimi nuk ishte i hapur, por të dy ministrat ishin të pranishëm me mua – Ministri i Punëve të Jashtme dhe Ministri i Integrimit Europian. Z. Guterres shprehu solidaritet të plotë me ne dhe mbështetje të plotë, si dhe i lidhi të dy me hapat tanë demokratikë, veçanërisht me aftësinë për të menaxhuar marrëdhëniet ndëretnike. Ai theksoi se qëndron pas nesh dhe se do ta përsërisë këtë kudo. Sigurisht, është mirë të dëgjoni një qëndrim të tillë dhe të merrni mbështetje nga kreu i Kombeve të Bashkuara, për shkak të përvojës së tij të pasur diplomatike, në të cilën jemi përfshirë edhe ne si një vend që, kur ka pasur probleme, e ka gjetur veten në agjendën e tij.
Pyetje gazetareje: Në fjalimet tuaja thoni se ajo që janë Kombet e Bashkuara për botën, është Bashkimi Europian për Europën. Ju patët një takim me znj. Kallas dhe kolegë nga Europa dhe Ballkani Perëndimor. Si i komentoni standardet e dyfishta që manifeston Bashkimi Europian, konkretisht kur bëhet fjalë për vendet e vogla si i yni?
Presidentja Siljanovska Davkova: Më keni dëgjuar t’i komentoj standardet e dyfishta edhe në vitin e kaluar, e theksoj dhënien fund të standardeve të dyfishta, sepse kjo nuk është një mënyrë europiane, nuk është praktikë europiane, nuk duhet të jetë praktikë europiane. Pra, për mua është sjellje anti-europiane, por praktikohet vazhdimisht në Bashkimin Europian. Sigurisht, e theksova këtë problem sot me znj. Kallas, por paralajmërova se problemi nuk do të ndalet me ne, se ai tashmë po shfaqet në lidhje me Moldavinë dhe Ukrainën dhe se BE-ja nuk është vetëm çështje zgjerimi, por se hyrja e Ballkanit Perëndimor ose riintegrimi i Ballkanit Perëndimor në Europë, domethënë aktualisht në BE, ku gjeografikisht, historikisht dhe kulturorisht i përket për shekuj me radhë, do të jetë një ilaç shumë i rëndësishëm kundër dilemave të sigurisë që tashmë po shfaqen. Ata janë në lëvizje. Sigurisht, si gjithmonë, kam theksuar se në momente të vështira Bashkimi Europian ka arritur të jetë shumë kreativ dhe ndoshta sfida tani është e madhe. Gjithashtu, potencova se është e rëndësishme për Ballkanin Perëndimor, megjithëse ende nuk e di se çfarë do të thotë kjo sintagmë, për të qenë e sinqertë, ta perceptojmë atë si një tërësi dhe se nëse ka një hendek në progresin midis vendeve të Ballkanit Perëndimor, kjo mund të shkaktojë përçarje të mëtejshme në vend të bashkimit.
