Presidenti Stevo Pendarovski sot mbajti fjalim në hapjen e ekspozitës “Arti i mërzisë”, që u vendos sot në rezidencën e ambasadorit të Bashkimit Evropian në Republikën e Maqedonisë së Veriut, në Shkup.
Bëhet fjalë për vepra të artistëve maqedonas të gjeneratave të ndryshme, të inspiruar nga gjendjet e imponuara lidhur me pandeminë e kovid-19.
Duke e falënderuar ambasadorin e BE-së, Dejvid Gir, për organizim të ekspozitës, Presidenti Pendarovski e vlerësoi si mënyrë origjinale për mbështetje dhe promovim të artistëve maqedonas.
“Kjo pandemi shkaktoi edhe largim nga njëri-tjetri, frikë, mërzitje, monotoni, por, njëkohësisht edhe nga kreativiteti, vizioni, shkathtësia dhe vullneti për krijim. Pikërisht artistët me idetë dhe energjinë e vet arrijnë t’i shndërrojnë dhimbjen, traumën dhe zymtinë e përditshmërisë sonë në vepra të mrekullueshme artistike. Më gëzon fakti që në këtë ekspozitë tematike me të vërtetë interesante kemi vepra nga gjenerata të ndryshme të artistëve maqedonas të cilët e prezantojnë me dinjitet skenën artistike maqedonase dhe dëshmojnë mbi qëndrueshmërinë e artit përballë shkurtësisë dhe kalimit të jetës”, tha Presidenti Pendarovski.
Në këtë ekspozitë janë ekspozuar vepra të artistëve maqedonas: Petar Haxhi-Boshkov, Margarita Kiseliçka, Sasho Sazdovski, Goce Nanevski, Monika Moteska, Filip Vellkovski, Jasmina Gllavinçe, Igor Tanevski, David Atanasoski, Antonio Pirkoski dhe Aleksandar Eftimovski.
