Në suazat e aktivitetit Kabinet i hapur, sot Kabinetin e Presidentit e vizituan edukatorët dhe përdoruesit e qendrave ditore të Qendrës republikane për mbështetje të personave me aftësi të kufizuar intelektuale “Mesazhi”.
Vizitorëve u janë prezantuar të dhënat historike të objektit, janë informuar për punën dhe kompetencat e Presidentit Pendarovski, kurse i vizituan edhe hapësirat në të cilat realizohen takimet zyrtare dhe të punës.
Duke e prezantuar funksionimin prej dhjetë dekadash, nga Qendra republikane për mbështetje të personave me aftësi të kufizuar intelektuale “Mesazhi” informuan se nëpër vite është krijuar një rrjet i organizatave lokale nëpër të gjithë shtetin aktivitetet e të cilit janë në drejtim të ngritjes së vetëdijes publike në lidhje me nevojat dhe të drejtat e personave me aftësi të kufizuar intelektuale dhe të familjeve të tyre, si dhe përparimin e mundësive ligjore për realizimin e të drejtave të tyre njerëzore duke i kushtuar vëmendje të veçantë procesit të zbatimit të Konventës së OKB-së për të drejtat e personave me aftësi të kufizuar.
Duke e shprehur mbështetjen e tij për aktivitetet e tyre për inkluzion më të madh të personave me aftësi të kufizuar intelektuale në jetën shoqërore dhe sociale, Presidenti Pendarovski theksoi se puna e tyre kontribuon në krijimin e shoqërisë me mundësi të barabarta për të gjithë.
Kabineti i hapur është pjesë e projektit “Ballë për ballë me Presidentin”, i iniciuar që të mundësohet realizimi i takimeve të drejtpërdrejta të qytetarëve me Presidentin Stevo Pendarovski. Në suazat e aktivitetit Kabinetin e vizitojnë qytetarë të moshave dhe profesioneve të ndryshme, organizata, studentë nga vendi dhe nga jashtë, si edhe nxënës të shkollave nëntëvjeçare dhe të mesme nga vendi.
