Presidentja Gordana Siljanovska Davkova sot në Berlin, në suazat e pjesëmarrjes në Konferencën për rindërtim të Ukrainës mbajti fjalim në panelin kryesor të shefave të shteteve dhe qeverive në të cilin folën edhe organizatorët e konferencës, kancelari gjerman Olaf Sholc dhe Presidenti ukrainas Vollodimir Zelenski. Në panelin kryesor morën pjesë edhe presidentët dhe kryeministrat nga Holanda, Norvegjia, Finlanda, Lituania, Moldavia, Estonia, Bosnja dhe Hercegovina, Malit i Zi, Gjeorgjia.
Në fjalim, Presidentja Siljanovska Davkova tha se pas Luftës së Dytë Botërore, Plani Marshall, midis të tjerash, ishte shprehje e solidaritetit ndaj Evropës së shkatërruar, kurse sot nevojitet një lloj i ri Plani Marshall për Ukrainën e shkatërruar.
Sipas Presidentes, duhet investuar jo vetëm në infrastrukturën rrugore dhe energjetike, por edhe në infrastrukturën njerëzore, arsimore, sociale dhe normative.
Në këtë sesion u vlerësua pozitivisht qëndrimi ekzistues i përbashkët evropian se ndihma gjithëpërfshirëse për Ukrainën duhet të vazhdojë.
Paraprakisht, Presidentja Siljanovska Davkova mori pjesë në hapjen e konferencës, ku fjalim mbajtën kancelari gjerman Olaf Sholc, Presidenti ukrainas Vollodimir Zelenski dhe kryetarja e Komisionit Evropian, Ursula fon der Lejen.
Konferenca është vazhdimësi e serisë së ngjarjeve vjetore të nivelit të lartë kushtuar rimëkëmbjes së shpejtë dhe rikonstruksionit afatgjatë të Ukrainës, pas fillimit të agresionit ushtarak rus. Qëllimi kryesor i këtij evenimenti është të sigurohet mbështetje e vazhdueshme ndërkombëtare, rikonstruksion, reforma dhe modernizim i Ukrainës.
