Në suazat e aktivitet Kabinet i hapur, sot Kabinetin e Presidentit e vizituan anëtarët e Forumit Rinor Arsimor.
Vizitorët – gjimnazistë nga Shkupi, Tetova, Manastiri, Struga, Velesi dhe Strumica, e informuan Presidentin Pendarovski mbi projektet aktuale në suazat e FRA-së, për përfshirje më të madhe dhe zhvillim shoqëror të të rinjve, nëpërmjet politikave cilësore rinore dhe arsimore.
Gjatë takimit me Presidentin biseduan mbi çështjet shoqërore-politike në vend, mbi perspektivat e të rinjve, kurse u njohën edhe me aktivitetet që mbahen në Kabinet, me funksionin e Presidentit dhe kompetencat kushtetuese.
Vizitorët kishin mundësi të njihen me mënyrën e funksionimit të institucionit, t’i vizitojnë hapësirat në të cilat mbahen takimet zyrtare dhe të punës, solemnitetet dhe konferencat për shtypin, si dhe Sallën “Mozaik” me diptikun impozant “Maqedonia – vend i ndritur” dhe “Maqedonia kujton”, të punuar nga artisti i shquar, akademiku Gligor Çemerski.
Kabineti i hapur si pjesë e projektit “Ballë për ballë me Presidentin”, mundëson komunikim të drejtpërdrejtë të qytetarëve me Presidentin Stevo Pendarovski. Kabinetin deri më tani e kanë vizituar mijëra qytetarë të moshave dhe profesioneve të ndryshme, anëtarë të organizatave, studentë nga vendi dhe nga jashtë, si edhe nxënës të shkollave nëntëvjeçare dhe të mesme nga vendi.
