Presidentja Gordana Siljanovska Davkova foli në diskutimin “Rinia dhe demokracia e brendshme partiake”, që u mbajt në Kabinetin e Presidentit me rastin e 15 Shtatorit – Ditës Ndërkombëtare të Demokracisë.
Në këtë diskutim morën pjesë të rinj nga partitë politike në vend, të cilët prezantuan pikëpamjet dhe përvojat e tyre për rolin dhe pozitën e të rinjve në partitë politike ku ata janë anëtarë dhe shkëmbyen ide dhe rekomandime për përmirësimin e demokracisë brendapartiake dhe nxitjen e angazhimit të të rinjve në politikë.
Kryetarja Siljanovska Davkova, në fjalimin e saj para rinisë politike, theksoi se demokratizimi i partive politike është kyç për demokratizimin e politikës. Ajo iu referua proceseve të vendimmarrjes së brendshme partiake, proceseve të kandidimit dhe zgjedhjes së zyrtarëve partiakë, duke theksuar se nevojitet decentralizimi i partive, respektimi i tendencave dhe opinioneve të ndryshme brenda partive dhe performancë më autentike e organizatave lokale partiake.
Në këtë drejtim, ajo foli mbi nevojën e përgjegjësisë brenda partisë, domosdoshmërinë e reformave, kulturën politike pjesëmarrëse dhe ndryshimin e qasjes dhe komunikimit të partive me publikun.
Në fjalën e saj, Presidentja iu referua strukturës së partive dhe përfaqësimit të tyre në aspektin e përfaqësimit gjinor, ndërsa theksoi se veprimi i partive politike varet në masë të madhe nga kapaciteti etik i lidershipit dhe liderit.
Presidentja e mbështeti nevojën e përfshirjes më të madhe të të rinjve në marrjen e vendimeve partiake, duke theksuar se ata duhet të jenë elementi më subversiv që do të ndikojë në demokratizimin e këtyre proceseve dhe në vendimmarrjen partiake.
Duke theksuar rëndësinë e demokracisë brendapartiake, të rinjtë shqyrtuan mundësitë dhe mënyrat për ndikim më të madh të tyre në proceset dhe vendimet politike, nëpërmjet pjesëmarrjes dhe përfshirjes aktive në strukturat partiake.
Degët rinore partiake si gjenerues të lidershipit të ardhshëm partiak theksuan rëndësinë e edukimit dhe sensibilizimit për demokracinë dhe mirëkuptimin e saj tek të rinjtë.
