Mbrëmë, Presidenti Pendarovski me bashkëshorten znj. Elizabeta Gjorgievska ishin nikoqirë të koncertit me muzikë dhome të muzikantëve të rinj nga Fondacioni “Tomisllav Zografski”.
Midis mysafirëve të pranishëm ishin edhe ministrja e kulturës, Irena Stefoska, përfaqësues të trupit diplomatik në vend si dhe përfaqësues nga fusha e kulturës.
Ky është koncerti i parë i këtij lloji që organizohet në Vilën Vodno, kurse qëllimi i kësaj iniciative është promovimi i interpretuesve të rinj të muzikës klasike, si dhe promovimi i veprave të kompozitorëve të shquar maqedonas.
Duke përshëndetur të pranishmit në këtë koncert, drejtoresha e Këshillit Drejtues të Fondacionit “Tomisllav Zografski”, Panda Zografska Beliçanec, theksoi se prej pesëmbëdhjetë vjetësh ky fondacion punon me sukses në afirmimin e krijimtarisë muzikore të Zografskit e cila është pjesë e trashëgimisë kulturore në vend, si dhe e nxit zhvillimin e kulturës muzikore në shtet dhe jashtë shtetit.
Në koncertin me muzikë dhome muzikantët e rinj: Stefan Nedellkovski, Jana Kaevska, Pandorka Janakieva, Eva Bogoevska, Gjorgji Trajkov, Maja Vitanova, Anel Selim dhe Leonardo Dimoski u prezantuan me repertor nga kompozitorë të njohur: Tomisllav Zografski, Rio Noda, Ludvig van Bethoven, Goce Kollaroski, Xhon Uilliams, Igor Stravinski,kurse janë interpretuar edhe përpunimet e dy këngëve popullore “Eleno qerko Eleno” dhe “Jovano Jovanke”.
